Vatu vavavulu vashinganyeka ngwavo lijina lyaVinjiho jaYehova lyapwa hilijina lyaliuka lyalihya lyavaka-kwitava. Oloze myaka yakuhambakana ha 2,700 kunyima, vangamba jaKalunga vamuchano vavavulukilenga ngwavo “vinjiho.” (Isaya 43:10-12) Kumyaka yakunyima vatwijivilenga kupwa Vaka-Kulinangula Mbimbiliya kuheta namu 1931. Jino mwomwo ika twaputukile kuzachisa lijina lyaVinjiho jaYehova?

Lyeji kusololanga Kalunga ketu. Kweseka namikanda yajimanyusikilipiti jakushikulu, lijina lyaKalunga lyakwamba ngwavo Yehova lyasoloka kakavulu muMbimbiliya. Vaka-kwalumuna Mbimbiliya vavavulu vashishisa lijina lyaKalunga najivulukiso jakwamba ngwavo Mwata chipwe ngwavo Kalunga. Oloze Kalunga wamuchano alisolwele yivene kuli Mose nakumulweza lijina lyenyi, Yehova, nakwamba ngwenyi: “Eli likiko lijina lyami haya myaka yosena.” (Kulovoka 3:15) Echi chili nakulumbununa nge alihandununa ivene kutulunga vosena vamakuli. Ngocho twawahilila kutuvuluka lijina lyaKalunga lyajila.

Lyeji kulumbununanga mulimo twazata. Vatu vavavulu vakushikulu, kuputukila vene hali lunga wakwoloka Avele, vasolwele unjiho walufwelelo lwavo muli Yehova. Kuli Nowa, Apalahama, Sala, Mose, naNdavichi, kunalinunganga vatu mumyaka yosena yinahichi kunyima nakupwa jino “liyongomena lyalinene lyavinjiho.” (WavaHepeleu 11:4–12:1) Nganomu mutu mwahana unjiho muzango wakusambisa mutu uze kavulumwineko, nayetu nawa twafwila kutandakanyisa muchano wakuvuluka Kalunga ketu.

Tweji kulondezezanga Yesu. Mbimbiliya yavuluka Yesu kupwa “chinjiho wakushishika wamuchano.” (Kusoloka 3:14) Yesu ivene ambile ngwenyi ‘asolwele lijina lyaKalunga’ ‘nakuhana unjiho wakuvuluka muchano’ waKalunga. (Yowano 17:26; 18:37) Vaka-kukavangiza Kulishitu vamuchano vatela kuhana unjiho halijina lyaYehova nakulisolola kuvatu. Omu mukiko vafwila kulinga Vinjiho jaYehova.

• Mwomwo ika Vaka-Kulinangula Mbimbiliya vaputukile kuzachisa lijina lyaVinjiho jaYehova?

• Uno Yehova napunga navinjiho jenyi hano hamavu kufuma kulwola muka?

• Iya apwa Chinjiho chaYehova wamunene?