Yesu apwile kupenge natumbaji twenyi vawana, Petulu, Yakova, Yowano naAndelei nakushimutwila navo omu apwile kwakamwihi nakufwa. Omu Yesu apwilenga nakulumbununa chinjikizo chakwijivilaho kupwako chenyi mumakumbi akukuminyina, ahulishile chihula chachilemu ngwenyi: “Iya chikupu napu ndungo wakushishika wakuzangama, uze vatongwele kuli Kaka yenyi kumulamina vaka-kuzata kuzuvo yenyi, avahanenga kulya chavo halwola lwakutamo?” (Mateu 24:3, 45; Mako 13:3, 4) Yesu apwile nakufwelelesa tumbaji twenyi ngwenyi hakupwa ikiye “kaka” yavo, mwakatongola vaze navakahananga kulya chakushipilitu kuli vaze navakamukavangizanga mumakumbi akukuminyina. Uno veya vatwama mulizavu kaneli lyandungo?

Vapwa vaka-kumukavangiza Yesu vamuchano vaze vawavisa nashipilitu. Ou “ndungo” eji kuhananga kulya chakushipilitu halwola lwakutamo kuli vaze eji kulemeselanga navo hamwe Yehova. Twapendamina halizavu lyou ndungo wakushishika atuhanenga “kulya chakutamo halwola lwakutamo.”—Luka 12:42.

Veji kulamanga vakuzuvo yaKalunga. (WaChimoteu 1, 3:15) Yesu ahanyine lizavu lyandungo mulimo wakuzakamanga chihanda chaliuka lyaYehova chahano hamavu. Ahanyine lizavu kana mulimo wakutala havyuma vyaliuka, nakutwaminyina mulimo wakwambulula, nakutunangula kuhichila muvikungulwilo vyetu. Ngachize, “ndungo wakushishika wakuzangama” ali nakutuhananga kulya chakushipilitu kuhichila mumikanda yize tuli nakuzachisanga muwande, namuvihande vize vali nakuhanjikanga hakukunguluka chachikungulwilo, nachachihanda, nachakulipwila, nachechi changalila.

Lizavu lyandungo lyashishika hamuchano wamuMbimbiliya, nakumulimo wakwambulula mujimbu wamwaza, kaha nawa lyapwa lyakuzangama mujila lyeji kulaminangamo vyuma vyaKulishitu vyahano hamavu. (Vilinga 10:42) Yehova ali nakukisula mulimo walyeli lizavu hakuvulisa vatu vaze vali nakwiza muliuka nahakuvahana kulya chakushipilitu chachivulu.—Isaya 60:22; 65:13.

• Iya vatongola kuli Yesu mangana alisenga tumbaji twenyi kulya chakushipilitu?

• Uno ndungo apwa ngachilihi wakushishika kaha nawa wakuzangama?