Vaka-Mbetele veji kuzachilanga mumalipatimende akulisezaseza mangana mulimo wakwambulula uyenga kulutwe mumafuchi akulisezaseza. Vamwe veji kwalumunanga mikanda, veka kupulita jimangazini namikanda, vakwavo vazachila muzuvo yakulamina mikanda, veka veji kutunganga jivindiyo najiCD, kaha veka nawa veji kutalanga havyuma vyeka vyamulifuchi lyavo.

Komiti yaMutango yikiko yeji kutwaminyinanga milimo yosena. Lizavu Lyakutwaminyina lyatongola tulama vakuhya kushipilitu vatatu chipwe kuhambakanaho vapwenga muKomiti yaMutango mangana vatwaminyine milimo hamutango himutango. Eji jikomiti jeji kulwezanga Lizavu Lyakutwaminyina omu yili nakutambuka milimo chipwe ukalu vali nakumona mulifuchi lyavo chipwe mumafuchi eka aze veji kutwaminyinanga. Mijimbu kana yeji kukafwanga Lizavu Lyakutwaminyina liwane vihande vatela kusoneka mumikanda, chipwe vyakukalinangula hakukunguluka chachikungulwilo, nachakulipwila, nachachihanda nachangalila. Lizavu Lyakutwaminyina lyeji kutumanga vandumbwetu vavuluka ngwavo, tulama vakutambukila mitango vahite mumitango nakuhana jiKomiti jaMitango jindongi jakuvakafwa mwakuzachila milimo yavo. (Vishimo 11:14) Ava tulama veji kuhanjikanga nachihande chize cheji kukolezezanga vandumbwetu vaze vatwama mungalila yamutango, hakukukunguluka chakulipwila chize cheji kupwangako.

Veji kukundwizanga vikungulwilo. Vandumbwetu vamwe haofesi yamutango veji kutalanga hamulimo wakutunga vikungulwilo vyavihya nawou wakutongola tulama navaka-kuzachila muliuka. Vandumbwetu kana veji kutalanga nawa hamulimo wavapayiniya, vamishonali, natulama vakutambwojoka vaze vazachila mungalila yamutango. Veji kulongesanga kukunguluka chakulipwila, chachihanda nachangalila, nakutwaminyina mulimo wakutunga jiZuvo jaWangana nakutumanga mikanda kuvikungulwilo yakuvakafwa. Milimo yosena veji kuzatanga hamutango yeji kulingisanga mulimo wakwambulula utambuke mukulonga.—Wavaka-Kolinde 1, 14:33, 40.

• Uno jiKomiti jaMitango jeji kukafwanga ngachilihi Lizavu Lyakutwaminyina?

• Milimo muka veji kuzatanga haofesi yamutango?