Nge muli nakulinangula Mbimbiliya naVinjiho jaYehova, kaha mweji kuhitulukanga chimweza muvyuma mweji kulinangulanga. Chochimwe nakukunguluka chachikungulwilo nawa, mwatela kuhituluka chimweza muvihande numba munganyale chikuma. Tunahase kunganyala chikuma nge natulinganga ngocho lwola lwosena.

Wanenu lwola lwakulilongesa nakwakulilongesela. Lwola muka munahase kutanga vyuma nakuvivwishisa? Chimenemene shimbu kanda muputuke kuzata milimo yeka tahi, nyi nachingoloshi nge vana vanasavala lyehi? Numba tuhu kamweshi kulinangulanga lwola lwalusukuko, oloze sakulenu lwola mwatela kulinangula, nakulama lwola kana kuchina vyuma vyeka navimitangula. Sakulenu chihela chakuhengama nakujima chisaji, naTV, nashinga kuchina navimitangula. Mwatela kulomba shimbu kanda muputuke kulinangula mangana muvulyame vyuma vinasoloka mulikumbi nakuhaka mangana kuMazu aKalunga.—Wavaka-Fwilipi 4:6, 7.

Funjikenu vishina nakupwa vakulizanga mukakumbulule havihande. Vangilenu kuhita muchihande chosena muwane vishina vyavilemu vili muchihande kana. Shinganyekenu hamutwe wachihande wachilongesa chipwe kapetulu namukalinangula, nakuwana omwo tumitwe twatundende tunapandama kumutwe wachihande, nakuhunanana hamivwimbimbi nahavihula vyakuhitulukamo vize vinashindakanya havishina vyavinene. Kufumaho, tangenu palangalafu hipalangalafu nakuwana mwakukumbulwila vihula vanasoneka mwishi. Tangenu visoneka vanenyikilako nakushinganyeka omwo vinakundwiza chihande namukalinangula. (Vilinga 17:11) Nge munawane mwakukumbulwila, kaha funjikenu mazu amandende mupalangalafu aze nawakamikafwa mukanuke chishina hakukumbulula. Kaha hakukunguluka mwatela kukemika livoko nge muli nakusaka kukumbulula nakukumbulula jino mumazu enu.

Hakukekesa vihande vyakulisezaseza vize tweji kushimutwilanga chalumingo hichalumingo hakukunguluka, namuvulisa chinyingi chenu chamuMbimbiliya “muzuvo yenu yaluheto.”—Mateu 13:51, 52.

• Jila muka yamwaza yakuhitulukanga muvihande vyahakukunguluka yize munahase kulijilisa?

• Munahase kuliwahisa ngachilihi mangana mukakumbulule havihande hakukunguluka?