Lizu “payiniya” kakavulu lyatalisa kuli vaze veji kuyanga nakwambulwila mujingalila jajihya mangana veka vavakavangize. Yesu apwile nge payiniya mwomwo vamutumine kwiza hano hamavu nakwambulwila vatu mujimbu wakuneha kuyoya nakusokolola jila yaulwilo. (Mateu 20:28) Makumbi ano, tumbaji twenyi vali nakumukavangiza hakuzachisa lwola lwaluvulu mumulimo ‘wakutunga tumbaji.’ (Mateu 28:19, 20) Vamwe vali nakwazana mumulimo ou twavuluka ngwetu mulimo waupayiniya.

Payiniya apwa mutu uze eji kwambululanga shimbu yosena. Vinjiho jaYehova vosena vapwa vaka-kwambulula mujimbu wamwaza. Oloze vamwe vashiwisa chiyoyelo chavo nakupwa vapayiniya vashimbu yosena, nakuzatanga jola 70 hakakweji mumulimo wakwambulula. Vavavulu veji kuzatanga milimo yakumujimba makumbi amandende kaha muchalumingo mangana vatesemo ou mulimo. Veka veji kuvasakulanga kupwa vapayiniya vakulipwila nakuvatuma kweshokwo kuli nakusakiwa vaka-kwambulula Wangana nakukazata jola 130 nakuhambakanyisaho hakakweji. Vapayiniya vasuuluka nachiyoyelo chavo nakufwelela ngwavo Yehova mwavazakamanga. (Mateu 6:31-33; WaChimoteu 1, 6:6-8) Vaze kavahasa kuzata upayiniya washimbu yosenako vanahase kuzata upayiniya wakukafwa nakuzata jola 30 chipwe 50 hakakweji.

Payiniya eji kuzatanga mulimo wenyi mwomwo yakuzanga Kalunga navatu. Twamona chikupu, ngana muze amwene Yesu, nge vatu vavavulu vatela kuvakafwa vatachikize Kalunga navyuma ajina. (Mako 6:34) Enga, tukwechi chinyingi chize chinahase kuvakafwa oholili vene ngana nakuvahana lutalililo lwakukola lwakulutwe. Zangi yikiko yeji kulingisanga vapayiniya valisuule nakuzachisa lwola lwavo nangolo javo vakafwe vatu kushipilitu. (Mateu 22:39; Wavaka-Tesolonyika 1, 2:8) Hakulinga ngocho, veji kuzamisanga lufwelelo lwavo nakupandama chikuma kuli Kalunga nakupwa vakuwahilila chikuma.—Vilinga 20:35.

• Namuhasa kumulumbununa ngachilihi payiniya?

• Vyuma muka vyeji kulingisanga vandumbwetu vamwe vazate upayiniya washimbu yosena?