Chilongesa 17
How Do Traveling Overseers Help Us?
Malawi
Lizavu lyamulimo wamuwande
Mulimo wamuwande
Kuliwana navakulwane
Visoneka VyachiHelase vyaVaka-Kulishitu vyavuluka Mbalanape nakaposetolo Paulu mapapa kakavulu. Malunga kana vapwilenga tulama vakutambwojoka, vaze vatambukililenga vikungulwilo vyakulivanga. Mwomwo ika? Vazakamine chikuma vandumbwavo kushipilitu. Paulu ambile ngwenyi asakile ‘kukinduluka cheka nakutambukila vandumbwenyi’ amone omwo vali. Alisuwile kutambuka jikilomita jajivulu nakuya nakuvakolezeza. (Vilinga 15:36) Omu mukiko vafwila natulama vakutambwojoka vamakumbi ano.
Veji kwizanga nakutukolezeza. Kalama wakujinguluka eji kutambukilanga vikungulwilo kafwe 20 kavali mumwaka. Eji kutwamanga chalumingo chimwe hachikungulwilo hichikungulwilo. Kalama wangalila eji kutambukilanga vihanda kafwe 10 mumwaka. Hakutambukila vihanda kana, eji kuzachilanga vikungulwilo nakupwa cheyamani hakukunguluka chachihanda. Tunahase kunganyala chikuma kuchakutalilaho chavava vandumbwetu namapwevo javo, nge vambata. Ava vandumbwetu veji kufwilanga kutachikiza vanyike navakulwane, kaha nawa vapwa vakulizanga kuya nayetu mumulimo wakwambulula nakuvilongesa vyetu vyaMbimbiliya. Tulama vakutambwojoka veji kuyanga hamwe navakulwane vamuchikungulwilo mumulimo wakufunga mikoko nakutujikijisa, nakuhanjika vihande vyakutukolezeza hachikungulwilo nakukukunguluka chachihanda.—Vilinga 15:35.
Veji kuzakamanga vandumbwavo vosena. Tulama vakutambwojoka vasaka kwijiva chikuma omwo vili vikungulwilo kushipilitu. Veji kuliwananga navakulwane navaka-kuzachila muliuka mangana vamone omu chikungulwilo chili nakuzovoloka, nakuvakafwa vejive mwakuzachila kanawa milimo yavo. Veji kukafwanga vapayiniya vafukile mumulimo wavo, kaha nawa veji kwivwanga kuwaha kutachikiza vatu vavahya vaze vali nakulikata nachikungulwilo nakwivwa omu vali nakuzovoloka kushipilitu. Ava vandumbwetu veji kulisuulanga nakupwa ‘vakwetu mutwazachila milimo mangana vatunganyalise.’ (Wavaka-Kolinde 2, 8:23) Twatela kulondezeza lufwelelo lwavo nakulihana chavo kuli Kalunga. —WavaHepeleu 13:7.
Mwomwo ika tulama vakutambwojoka veji kutambukilanga vikungulwilo?
Munahase kunganyala ngachilihi nge vanamitambukila?
