Lizu Mbetele lyapwa hilizu lyachiHepeleu, lize lyalumbununa “Zuvo yaKalunga.” (Kuputuka 28:17, 19) Lizu kana lyapwa lyakutamo kuliluka vihela veji kuzachisanga Vinjiho jaYehova mukaye kosena hakutwaminyina nakukundwiza mulimo wakwambulula. Lizavu Lyakutwaminyina lyeji kuzachilanga hachikota chakaye kosena muNew York State, U.S.A., kaha oku kukiko jino lyeji kutwaminyinanga milimo veji kuzatanga hamitango mumafuchi amavulu. Vaze vazachila hamutango vavavuluka vosena hamwe ngwavo tanga yaMbetele. Ngana mwatanga, veji kuzachilanga hamwe milimo, nakulila hamwe vyakulya, nakulinangwila hamwe Mbimbiliya.—Samu 133:1.

Chapwa hichihela chakulipwila chize chikwechi vaka-tanga vakulisuula. HaMbetele hiMbetele hatwama malunga namapwevo vaka-Kulishitu vaze valisuula kulinga mwaya muchima waKalunga nakuzata milimo yaWangana shimbu yosena. (Mateu 6:33) Kakweshi numba umwe veji kuholesanga jimbongoko, oloze vosena vavahana jizuvo jakusavala kaha veji kuvahananga vyakulya natujimbongo twatundende twakulikafwa natwo kuvyuma vyasakiwa kumujimba. Mutu himutu atwama haMbetele akwechi milimo vamuhana. Vamwe veji kuzatanga mujiofesi, veka veji kutelejekanga vyakulya, vakwavo veji kulongesanga vyuma kanawa mujizuvo jakulila nakuhana vaka-tanga vyakulya. Kaha vamwe nawa veji kupulitanga chipwe kutunga mikanda, veka veji kuwahisanga mujizuvo, vakwavo veji kukosanga uvwalo, kaha vamwe veji kuwahisanga kala vyuma vinafu nakuzata milimo yeka nawa.

Chapwa hichihela veji kuzachilanga milimo yayivulu yakukundwiza mulimo wakwambulula Wangana. Mulimo waulemu wajiMbetele josena wapwa wakutandakanyisa muchano wamuMbimbiliya kuvatu vavavulu. Evi vikiko vanasonekela mbuloshuwa yino. Lizavu Lyakutwaminyina lyatetekelele mulimo wakusoneka ino mbuloshuwa, nakuyituma hamakina kuli vaka-kwalumuna mikanda mukaye kosena, nakuyipulita jino hajiMbetele jajivulu hamakina amanene, nakuyituma muvikungulwilo vyakuhambakana ha 100,000. Mumilimo yoseneyi, tanga yaMbetele yeji kukundwizanga chikuma mulimo waulemu wakwambulula mujimbu wamwaza.—Mako 13:10.

• Veya veji kuzachilanga hajiMbetele, kaha veji kuvazakamanga ngachilihi?

• Mulimo muka vali nakuzata mukapachapacha uze vali nakukundwiza hajiMbetele?