Mbimbiliya yavuluka mazavu avali amalunga vaka-Kulishitu vaze veji kutalanga hamilimo yamuchikungulwilo. Malunga kana vapwa “tulama navaka-kuzachila” muliuka. (Wavaka-Fwilipi 1:1) Kuli vandumbwetu vavavulu vali nakuzata milimo kaneyi muvikungulwilo. Uno vaka-kuzachila muliuka veji kutuzachilanga milimo muka?

Veji kukafwanga lizavu lyavakulwane. Vaka-kuzachila muliuka vapwa hivandumbwetu vakuhya kushipilitu, vakushishika, kaha nawa vapwa vakuvanguluka hakuzata milimo yavo numba vapwa vakweze chipwe vakulwane. Veji kuzatanga milimo yayilemu, chikumanyi yize yeji kulingiwanga lwola lwosena yakukafwa chikungulwilo. Echi cheji kukafwanga vakulwane vatale jino hamulimo wakunangula nakufunga utanga.

Veji kuzatanga milimo yayivulu. Vaka-kuzachila muliuka vamwe vavahana mulimo wakutambula vosena vaze naveza nakukunguluka nakuvatambwokesa kanawa. Veka veji kuzachilanga kumakina akuhanjikila, kumikanda, kujimbongo jachikungulwilo, nakukuhana vandumbwetu jingalila jakwambulwilamo. Veji kukafwanga nakumilimo yakuwahisa Zuvo yaWangana nawa. Vakulwane vanahase kuvahana namulimo wakukafwa vandumbwetu vatushinakaji. Vandumbwetu vosena muchikungulwilo veji kusakwililanga vaka-kuzachila muliuka hakulisuula nakuzata kala milimo veji kuvahananga muchikungulwilo.—WaChimoteu 1, 3:13.

Veji kuhananga chakutalilaho chamwaza hakupwa malunga vaka-Kulishitu. Vaka-kuzachila muliuka veji kuvasakulanga mwomwo yavilinga vyavo vyamwaza vyakushipilitu. Veji kutukolezezanga kulufwelelo navihande veji kuhanjikanga hakukunguluka. Kaha nawa veji kutulingisanga tupwenga natwima yakuyanga muwande hakututetekela mumulimo wakwambulula. Hakulisuula nakuzachila hamwe, veji kulingisanga jino vosena muchikungulwilo kupwa vakulinunga nakupwa vakuwahilila. (Wavaka-Efwesu 4:16) Mukuhita chalwola navakivo vanahase kuzata mwavakulwane.

• Vaka-kuzachila muliuka vapwa malunga vakufwana ngachilihi?

• Uno vaka-kuzachila muliuka veji kukafwanga ngachilihi chikungulwilo mangana vyuma vitambuke kanawa?