Uno vatu kana ava vanawahilila ika ngana? Vanawahilila mwomwo vali hakukunguluka chimwe chachinene. Ngana mwavangamba jaKalunga vakunyima vaze valwezele valikungulwilenga hamwe mumwaka katatu, nayetu tweji kwivwanga kuwaha kulikungulwila hamwe navakwetu hakukunguluka chachinene. (Lushimbi lwamuchivali 16:16) Mwaka himwaka, tweji kupwanga nakukunguluka kana mapapa katatu: Kukunguluka chakulipwila chalikumbi limwe nakukunguluka chachihanda chamakumbi avali, nakukunguluka changalila chamakumbi atatu. Uno tweji kunganyalanga ngachilihi kukukunguluka kanechi?

Cheji kuzamisa usoko wetu navakwetu vaka-Kulishitu. Ngana muze vaIsalele vawahililile hakwalisa Yehova ‘nakumukisula mumauka,’ nayetu tweji kulivwisanga kuwaha kumulemesela hamwe navakwetu hakukunguluka kanechi chakulipwila. (Samu 26:12; 111:1) Kukunguluka kana cheji kutulingisanga tuliwane navakwetu Vinjiho vakuvikungulwilo vyeka chipwe kumafuchi eka. Namusana tweji kulivwisanga kuwaha kulila hamwe vyakulya hachihela chakukungulukila, nakulivwisa kuwaha kushimutwila-shimutwila navakwetu hakukunguluka. (Vilinga 2:42) Hakukunguluka kanechi chachinene hakiko tweji kumonanga zangi yize yeji kutununganga hamwe ‘muwanawakwetu’ wamukaye kosena.—WaPetulu 1, 2:17.

Cheji kutukafwanga tuzovoloke kushipilitu. VaIsalele vanganyalile nawa omu “avalumbunukilile” mazu amuVisoneka aze vavalumbunwinyine. (Nehemiya 8:8, 12) Nayetu tweji kunganyalanga kujindongi jamuMbimbiliya tweji kutambulanga hakukunguluka chetu. Kukunguluka hikukunguluka chikwechi mutwe wachihande wakufuma haChisoneka. Veji kutunangulanga mwakutwamina kweseka namwaya muchima waKalunga mukuyoya chetu kuhichila muvihande veji kuhanjikanga namuvimweso. Veji kutukolezezanga hakwivwa ukalu vali nakuhitamo vandumbwetu mumakumbi ano amakalu mwomwo yakupwa vaka-Kulishitu, nomu vali nakuuhonesa. Hakukunguluka changalila heji kupwanga vimweso vize vyeji kutukafwanga twivwishise mijimbu yamuMbimbiliya nakutunangula vishina vimwe vyavilemu. Hakukunguluka chosena echi chachinene veji kumbapachisanga vaze navafwila kusolola ngwavo vanalihane kuli Kalunga.

• Mwomwo ika lwola lwakukunguluka chachinene lwapwila lwakuwahilila?

• Munahase kunganyala ngachilihi hakupwa kukukunguluka chachinene?