Mulikulukaji lyamyaka lyakulivanga kwapwile lizavu lyalindende “lyavaposetolo navakulwane kuYelusalema,” lize lyapwile lizavu lyakutwaminyina lize lyatalilenga havihande vyavilemu vyachikungulwilo chosena chavaka-Kulishitu vawavisa. (Vilinga 15:2) Vahashilenga kulinunga nakuvatula kanawa vihande mwomwo yakushimutwila havyuma vyahanjika Visoneka nakukavangiza omu yavatetekelelenga shipilitu yaKalunga. (Vilinga 15:25) Jila kana yikiko veji kulondezezanga namakumbi ano.

Vali nakulizachisa kuli Kalunga hakulinga mwaya muchima wenyi. Vandumbwetu vawavisa vaze vatwama muLizavu Lyakutwaminyina vazanga chikuma Mazu aKalunga kaha nawa vatachikiza kanawa mwakuzachila milimo yetu yosena yamuliuka. Ava vandumbwetu veji kuliwananga chalumingo hichalumingo nakushimutwila vyuma vili nakusakiwa kuli vandumbwavo mukaye kosena. Lizavu Lyakutwaminyina lyeji kuhananga jindongi jamuMbimbiliya kuhichila mumikanda chipwe muli tulama vakutambwojoka najijila jeka jakulisezaseza ngana muze chapwilenga mulikulukaji lyamyaka lyakulivanga. Echi cheji kulingisanga vatu jaKalunga valinunge hamwe muvishinganyeka namuvilinga. (Vilinga 16:4, 5) Lizavu Lyakutwaminyina likiko lyeji kutalanga hamulimo wakuwahisa kulya chakushipilitu, nakutukolezeza etu tuvosena tuhake kulutwe mulimo wakwambulula mukuyoya chetu, nakutala nawa hamulimo wakutongola vandumbwetu vamalunga muvihela vyakulisezaseza.

Shipilitu yaKalunga yikiko yeji kuvatetekelanga. Lizavu Lyakutwaminyina lyeji kutalanga kuli Mwata Atengele Vyuma Vyosena, Yehova, nakuli Mutwe wachikungulwilo, Yesu, mangana vavatwaminyine. (Wavaka-Kolinde 1, 11:3; Wavaka-Efwesu 5:23) Vaze vatwama mulizavu kana kavalimona kupwa vatwamina javatu jaKalungako. Vakivo hohamwe navaka-Kulishitu veka vakuwavisa vosena “veji kukavangizanga Mwanamukoko kweshokwo mwaya.” (Kusoloka 14:4) Lizavu Lyakutwaminyina lyeji kusakwililanga chikuma hakuvalombelako.

• Veya vapwile mulizavu lyakutwaminyina mulikulukaji lyamyaka lyakulivanga?

• Lizavu Lyakutwaminyina lyamakumbi ano veji kulitwaminyinanga ngachilihi kuli Kalunga?