Vinjiho jaYehova vangahi mwatachikizako? Etu vamwe mutwalihachila nayenu, chipwe mutwazachila, chipwe mutweji kuyilanga kushikola. Nyi pamo nawa twashimutwilaho lyehi Mbimbiliya nayenu. Uno chikupu etu yetu veya? Kaha mwomwo ika tweji kwambulwilanga vakwetu vyuma twafwelela?

Twapwa tuvatu ngana mwayenu. Twafuma kuvisemwa naviyoyelo vyakulisezaseza. Etu vamwe twapwilenga mukwitava cheka, kaha veka nawa kavafwelelelele muli Kalungako. Shimbu kanda tupwenga tuVinjiho, tuvosena twavangilile kukekesa kanawa vyuma yanangula Mbimbiliya. (Vilinga 17:11) Twetavilile vyuma twalinangwile, nakuputuka kulemesa Yehova Kalunga mukuyoya chetu.

Tweji kunganyalanga hakulinangula Mbimbiliya. Nayetu vene tweji kulipikanga naukalu wamukuyoya natutenga twetu nawa. Oloze kukavangiza vyuma vyamuMbimbiliya hakumbi hakumbi chinatukafwe tupwenga nachiyoyelo chamwaza. (Samu 128:1, 2) Echi chikiko cheji kutulingisanga twazane navakwetu vyuma vyamwaza twalinangula muMbimbiliya.

Tweji kukavangizanga jishimbi jaKalunga. Jishimbi jamuMbimbiliya jatunangula tupwenga tuvatu vamwaza, nakuvumbika vakwetu, nakupwa nakashishi nalikoji navilinga vyeka vyamwaza. Jeji kutulingisanga tulikangule kumujimba nakuzata nangolo muchitungilo, nakukafwa jitanga jetu jilinunge hamwe nakupwa navilinga vyamwaza. Twafwelela chikupu ngwetu “Kalunga katala vatu kumesoko,” ngocho twatwama muwanawakwetu wamukaye kosena, chakuzeneka kulitala hamiyachi chipwe kwazana muvihande vyamafuchi nachiyulo. Numba tuhu twapwa tuvatu kaha vanganavene, oloze twapwa tuvakulipwila.—Vilinga 4:13; 10:34, 35.

• Ukalu muka veji kulipikanga nawo naVinjiho jaYehova?

• Vyuma muka valinangula Vinjiho jaYehova muMbimbiliya?