CHILONGESA 13
Chimoteu Alisuwile Kukafwa Vatu
Chimoteu apwile kanyike walunga uze alisuwile kukafwa vatu. Ayile kujingalila jajivulu nakukafwa vatu. Mulimo kana wamulingishile apwenga wakuwahilila mukuyoya. Musaka utachikize mulimo azachile tahi?—
Chimoteu vamunangwile vyuma asaka Yehova kuli naye nakaka yenyi
Chimoteu apwile nakutwama mungalila vavulukilenga ngwavo Lusutala. Omu apwile kemba, kaka yenyi Lowise nanaye Yunese vamunangwile vyuma asaka Yehova. Omu apwile mukweze, Chimoteu alisuwile kuya nakukafwa vatu vatachikize Yehova.
Halwola apwile mukweze, Paulu alwezele Chimoteu amutwaleko kuya nakwambulwila mujimbu kuvihela vimwe. Chimoteu etavile ngwenyi: ‘Natuya!’ Alisuwile kuya nakukafwa vatu.
Chimoteu ayile naPaulu kungalila yaMasetonya kuchihela vavulukilenga ngwavo Tesolonyika. Ngalila kana yapwilile kwakusuku, vatambukile hamavu numba jino vanyine wato numba vahete. Omu vahetele kuze, vambulwile mujimbu nakukafwa vatu vavavulu valinangula vyuma asaka Yehova. Oloze vatu vamwe vapihililile nakusaka kuvaveta. Kaha Paulu naChimoteu vachinyine nakuya nakwambulwila kujingalila jeka.
Chimoteu apwile wakuwahilila mukuyoya
Omu mwahichile tukweji vavandende, Paulu alwezele Chimoteu ayenga cheka kuTesolonyika mangana akamone vaze vandumbwavo vawanyineko. Chimoteu evwile woma chikuma kukindulukila kuchihela kuze vavavetele! Oloze asakile kukafwa chikuma vaze vandumbwenyi, kaha ayile. Kuheta kuze awanyine vandumbwenyi kuTesolonyika vali nakuzata kanawa milimo yaKalunga. Kaha akindulukile nakulweza Paulu vyuma kanevi akawanyine!
Chimoteu azachile naPaulu mumulimo wakwambulula hamyaka yayivulu. Lwola lumwe Paulu asonekele ngwenyi, Chimoteu apwile mutu wamwaza uze atuminenga kuya nakukafwa vikungulwilo. Chimoteu azangile chikuma Yehova navandumbwenyi.
Uno nayove wazanga vatu nakusaka kuvakafwa mangana valinangule vyuma asaka Yehova tahi?— Nge wavazanga, kaha mupwa uwakuwahilila ngana mwaChimoteu!
