Achishinganyekenu kachi nge yenu mwapwanga munganda yaYeliko. Nganda kana yatwama mulifuchi lyaKanane, muze vatu kavafwelelele muli Yehovako. Munganda kana mwapwile pwevo umwe uze vavulukilenga ngwavo Lahave.

Omu Lahave apwile kanyike, evwilenga mijimbu yakunyima yomu Mose ahandunwine Kalungalwiji Uchila nakutwaminyina vaIsalele kufuma muEjipitu. Nomu Yehova avakafwile vafungulule vaka-kole javo omu valwilenga jijita. Jino evwile ngwavo vaIsalele vaneza nakutunga chilombo kwakamwihi naYeliko.

Likumbi limwe nachingoloshi, vaIsalele vavali vayile kuYeliko nakusondwesa nganda kana. Kaha vayile nahembo lyaLahave. Lahave avatambwokesele kanawa nakuvengisa muzuvo yenyi vatwame. Kuheta naufuku, mwangana wamuYeliko evwile ngwavo vandoji vanengila munganda, kaha vali kuzuvo yaLahave. Mwangana atumine vatu jenyi vamalunga mangana vakakwate vaze vandoji. Omu vahetele kuze, Lahave alwezele vaze vandoji vaswame helu lyazuvo yenyi. Kaha alwezele vaze vatu atumine mwangana ngwenyi: ‘Vandoji vapwanga vene muno muzuvo, oloze vanayi lyehi. Nge hano holili vene ngana namuvakavangiza lumbushi kaha namuvawana.’ Unatachikiza ovyo vyalingishile Lahave asweke vaze vandoji tahi?— Mwomwo afwelelele muli Yehova kaha ejivile ngwenyi lifuchi lyaKanane navalihana kuli vaIsalele.

Omu valingile vaze vandoji hinavaya, vashikile Lahave ngwavo ikiye natanga yenyi kaveshi kukavanongesako omu navakeza nakunongesa vatu vamunganda yaYeliko. Unatachikiza vyuma vamulwezele alinge tahi?— Vamulwezele ngwavo: ‘Mbata elu lungoji luchila nakulukasa kunjanena yove. Nge naulinga omu tunakulweze kaha vosena vaze navakapwa muzuvo yove navakayovoka.’ Lahave alingile vyuma vamulwezele vaze vandoji. Unejiva vyuma vyasolokele kufuma haze tahi?—

Omu mwahichile makumbi amandende, vaIsalele valivembele nakujingilika nganda yosena. Vajingulukilenga nganda kana hakumbi hakumbi hamakumbi 6. Oloze omu vajingulukile nganda kana halikumbi lyamuchi 7, kaha vosena vatambakanyine namazu akukangwoka. Yehova alingishile kembwe yayize nganda, najizuvo japwilemo jipuzuke. Oloze zuvo yize yapwile nalungoji luchila hanjanena kayapuzukileko. Kutala unamono eyi zuvo hamuvwimbimbi tahi?— Lahave natanga yenyi vayovokele!

 Vyuma muka naulinangula kuli Lahave?— Lahave afwelelele muli Yehova mwomwo evwilenga vyuma vyamwaza vize Yehova alingililenga vatu jenyi. Nayove nawa uli nakulinangula vyuma vyamwaza vyaYehova. Uno nayove wafwelela muli Yehova ngana muze alingile Lahave tahi?— Twalaho lika kumufwelela!