CHILONGESA 2
Laveka Asakile Kwivwisa Yehova Kuwaha
Laveka apwile pwevo uze azangile chikuma Yehova. Lunga lyenyi apwile Isaka uze nayikiye azangile Yehova. Uno Laveka naIsaka valiwanyine ngachilihi numba valimbate? Vyuma muka alingile Laveka vize vyasolola nge asakile kwivwisa Yehova kuwaha? Tushimutwilenu jino havyuma alingile Laveka.
Visemi jaIsaka vapwile Apalahama naSala. Vatwaminenga mulifuchi lyaKanane. Vatu vamulifuchi kana kavalemeselenga Yehovako. Oloze Apalahama asakile mwanenyi Isaka ambate pwevo uze alemeselenga Yehova. Apalahama jino atumine ngamba yenyi Eliyeze ayenga kungalila vavuluka ngwavo Halane, mangana akatondele Isaka pwevo wakumbata. Mwomwo ika ayililile kungalila kana? Mwomwo kukiko kwapwile nakutwama vausoko jaApalahama.
Laveka alisuwile kututa meya nakuhana vangamela vanwenga
Eliyeze ayile hamwe navangamba jaApalahama vaze vamutwalileko. Ungeji kana wapwile wausuku chikuma. Vayile navangamela 10 vaze vambachilileho vyakulya namawana. Uno Eliyeze ejivile ngachilihi pwevo wakumbachila Isaka? Omu Eliyeze navaze vakwavo ayile navo vahetele kuHalane, vemanyine halishima mwomwo vatachikijile ngwavo vatu kalinwaha vaputuke kwiza nakuswita meya. Eliyeze alombele kuli Yehova ngwenyi: ‘Nge nangulomba kanyike wapwevo anguhaneko meya kaha mwanguhana nakuhana nawa vangamela jami, kaha nangutachikiza ngwami pwevo kana yikiye unasakula.’
Nakushimbula chiku, mwanapwevo Laveka ejile halishima. Mbimbiliya yamba ngwayo apwile wamwaza. Omu alingile washa, Eliyeze amulombele amuhaneko meya akunwa. Kaha Laveka amukumbulwile ngwenyi: ‘Wahenu mwane munwenga, kaha nanguvaswichila navangamela jenu nawa.’ Ngamela apwa kanyama wamunene chikuma, kaha eji kunwanga meya amavulu. Likumbi kana Laveka atuchile meya amavulu nakuhana vangamela vanwenga. Unamumono hamuvwimbimbi omu ali nakuhana meya vangamela tahi?— Eliyeze awahililile chikuma hakumona omu Yehova akumbulwile kulomba chenyi.
Kufumaho, Eliyeze ambachile wana wauvulu nakuuhana Laveka. Kaha Laveka alwezele Eliyeze navaze ejile navo vayenga nenyi hembo lyavo. Kuheta kuze, Eliyeze avalwezele ngwenyi vamutumine kuli Apalahama, kaha nawa Yehova akumbulwile kulomba chenyi. Vausoko waLaveka vawahililile chikuma hakwivwa mujimbu kana, kaha vamwitavishile asomboke kuli Isaka.
Laveka ayile naEliyeze kuKanane kaha akasombokele kuli Isaka
Uno Laveka etavilile kuya nakusomboka kuli Isaka tahi?— Laveka atachikijile ngwenyi Yehova ikiye atumine Eliyeze. Jino vausoko wenyi vamuhulishile avalweze numba nge mwetavila kuya nakusomboka kuli Isaka kuKanane nyi chiku. Ikiye avakumbulwile ngwenyi, ‘E-mwane, nanguya.’ Kaha valongejekele nakukatuka. Omu vahetele kuKanane valimbachile naIsaka.
Laveka etavilile kulinga vyuma vize asakile Yehova, kaha vamukiswile. Omu mwahichile myaka yayivulu, kausoko umwe waLaveka ikiye asemene Yesu. Nge nawivwisa Yehova kuwaha ngana muze alingile Laveka, kaha Yehova mwakukisula.
