Uno chapwa chachashi kwononoka kuli visemi jove tahi?— Lwola lumwe chapwa chachikalu. Watachikiza ngwove Yesu ononokele kuli Yehova nakuli visemi jenyi tahi?— Chakutalilaho chenyi nachikukafwa wononoke kuli visemi jove numba tuhu lwola lumwe chinahase kupwa chachikalu. Tulinangule jino omu chapwa kwononoka.

Shimbu kanda Yesu ezenga hano hamavu, apwile mwilu nakutwama naIse Yehova. Oloze Yesu apwile nawa navisemi jenyi hano hamavu. Majina avo vakivo Yosefwe naMaliya. Uno watachikiza vyuma vyasolokele shimbu kanda vapwenga visemi jenyi tahi?—

Yehova ambachile kuyoya chaYesu mwilu nakuchihaka mujimo lyaMaliya mangana asemukile hano hamavu. Chuma kana chapwile chakukomwesa! Maliya jino emichile Yesu mujimo, kaha Yesu aputukile kukola ngana muze cheji kupwanga kuli vakemba vosena. Omu mwahichile tukweji 9, Yesu asemukile. Aha jino hakiko Maliya naYosefwe vapwile visemi jaYesu vahano hamavu.

Jino omu Yesu apwile namyaka yakusemuka 12, alingile vyuma vimwe vyavilemu vize vyamusolwele nge azangile chikuma Ise Yehova. Chuma kana chasolokele omu Yesu natanga yenyi vayile ungeji kuYelusalema kuchilika chaPaseka. Jino omu vakumishile nakuputuka kuhiluka kwimbo lyavo, Maliya amwene ngwenyi Yesu wauchi. Unatachikiza okwo apwile tahi?—

Yosefwe naMaliya vahilukile kuYelusalema nakutondatonda Yesu. Valizakaminyine chikuma mwomwo Yesu apwile wauchi. Kaha omu mwahichile makumbi atatu, vamuwanyine ali mutembele! Unejiva ovyo Yesu apwile nakulinga mutembele tahi?— Apwile nakulinangula vyaIse Yehova. Azangile chikuma Yehova, kaha asakile kumwivwisa kuwaha. Kuputuka vene kuwinyike swi nomu akolele, Yesu ononokelenga kuli Yehova makumbi osena nahalwola vene luze vamuyanjishile. Uno Yesu ononokele nakuli Yosefwe naMaliya tahi?— Eyo, mwomwo naMbimbiliya vene yamba ngwayo ononokele.

Vyuma muka unahase kulinangula kuchakutalilaho chaYesu?— Watela kwononokanga kuli visemi jove numba vene lwola lumwe chinahase kupwa chachikalu. Kutala mwononokanga tahi?—