Chihande chino chili namujimbu wakanyike umwe walunga uze akafwile natwenyi mangana vahone kumujiha. Ou kanyike apwile mwihya waPaulu. Kavatulweza lijina lyayou kanyikeko, oloze alingile chuma chize chasolola nge apwile wakuhamuka. Uno musaka kutachikiza vyuma alingile tahi?—

Likumbi limwe Paulu vamukashile munjele kuYelusalema, mwomwo ambulwilenga mujimbu waYesu. Kwapwile malunga vamwe vavikenya vaze valivwasanyine kujiha Paulu. Vambile ngwavo: ‘Tulwezenu mukulwane wamaswalale mangana anehe Paulu kuzango yakusopela. Kaha natuswama kujila mangana omu navahita tumujihe.’

Oloze mwihya waPaulu evwile mujimbu kanou wakusaka kumujiha. Uno alingile ngachilihi? Ayile kuze kunjele nakulweza natwenyi Paulu. Kaha Paulu amwambile ngwenyi yako ukalweze mukulwane wamaswalale. Unashinganyeka ngwove chapwile chachashi kuli ou kanyike kuya nakulweza mukulwane wamaswalale tahi?— Chapwile chachikalu, mwomwo uze mukulwane wamaswalale apwile mutu wamulemu chikuma. Uze mwihya waPaulu kevwile womako, oloze ahamukile nakuya nakulweza uze mukulwane wamaswalale.

Uze mukulwane wamaswalale jino alumwine uze ungeji. Akungulwile maswalale 500 mangana vashinjikize Paulu nakumukinga. Avalwezele ngwenyi kanda namuvandamina hameneko, oloze katukenu lelo naufuku mutwale Paulu kuKesaliya. Uno Paulu ahetele kanawa kuKesaliya tahi?— Eyo, mwomwo vaze vikenya omu vejile nakumukikilila, vawanyine te nahichi lyehi. Kaha ayovokele.

Vyuma muka mulinangula kumujimbu kana?— Nayove unahase kuhamuka ngana mwauze mwihya waPaulu. Twatela kupwa vakuhamuka omu natwambulwilanga vatu mujimbu waKalunga. Kutala unahase kuhamuka nakwambulula mujimbu waYehova tahi?— Nge naupwa wakuhamuka, kaha naukafwa vatu vavavulu mangana vakayovoke.