Weji kulinga ngachilihi nge kuli vyuma vimwe vinakwivwisa woma?— Pamo weji kuchinyinanga kuli vanoko chipwe kuli vaiso mangana vakukinge. Oloze kwatwama mutu weka uze nahase kukukinga. Atwama nangolo chikuma kuhambakana vatu vosena. Mutu kana wamutachikiza tahi?— Mukiko vene, Yehova Kalunga. Tuchishimutwile hali kanyike umwe walunga uze vavuluka muMbimbiliya ngwavo Ndavichi. Ndavichi ejivile ngwenyi Yehova mwamukafwanga lwola lwosena, kaha kevwilenga womako.

Omu Ndavichi apwile kemba, visemi jenyi vamunangwilenga kuzanga chikuma Yehova. Echi chamukafwile ahone kwivwa woma numba tuhu lwola lumwe alitulukilenga navikenya vavapi. Atachikijile ngwenyi Yehova apwile Sepa lyenyi kaha nahase kumukinga kala lwola. Likumbi limwe Ndavichi apwile nakufunga mikoko kumusenge, kaha ndumba wamunene ejile nakukwata mukoko nakuputuka kuchina nenyi. Unejiva ovyo alingile Ndavichi tahi? Amunungile uze ndumba nakumuwana, kaha amujihile. Likumbi likwavo nawa Ndavichi ajihile ulusu uze ejile nakukwata mikoko jenyi. Unamono ngwove iya akafwile Ndavichi?— Mukiko vene, Yehova ikiye amukafwile.

Likumbi likwavo nawa Ndavichi kevwile womako. VaIsalele vapwile nakulwa jita navaFwilishite. Liswalale umwe wavaFwilishite apwile wamusuku kaha nawa wamunene chikuma kwijiva nge chikishikishi! Lijina lyenyi ikiye Ngolyate. Ou liswalale apwile nakutukana maswalale vavaIsalele naYehova. Ngolyate asanyikilenga vaIsalele mangana vezenga avajihe nakuvalyatangila! VaIsalele vosena vevwile woma kuya nakuzunga nenyi. Oloze Ndavichi kevwile womako. Alwezele Ngolyate ngwenyi: ‘Twaya uzunge nayami! Yehova mwangukafwa kaha nangukujiha!’ Unashinganyeka ngwove Ndavichi ahamukile tahi?— Mukiko vene, ahamukile. Musaka utachikize vyuma vikwavo alingile tahi?

Ndavichi ambachile lekeni yenyi namalolwa akwashisa atanu, kaha ayile nakujiha Ngolyate. Omu Ngolyate amwene kuli nakwiza kanyike Ndavichi, amulwezele ngwenyi twaya ngukulyate. Oloze Ndavichi amutambakanyine ngwenyi: ‘Ove uli nakwiza kuli yami napoko yamukwale, oloze ami nangwiza kuli ove mulijina lyaYehova.’ Omu ahetele hakamwihi, Ndavichi ahakile lilolwa mulekeni yenyi nakusungamisa hali Ngolyate. Lize lilolwa lyayile nakukwata muluholo  lwaNgolyate, kaha aholokele hahaze vene kapatapata nakufwa. VaFwilishite vosena vaze vapwile vatu jaNgolyate vachinyine. Uno iya akafwile uze kanyike Ndavichi mangana ajihe Ngolyate?— Yehova ikiye amukafwile, mwomwo apwile nangolo chikuma kuhambakana Ngolyate.

Vyuma muka unahase kulinangula kumujimbu waNdavichi?— Yehova atwama nangolo chikuma kuhambaka vatu vosena. Kaha nawa apwa sepa lyove. Nge likumbi limwe nakukapwa vyuma vimwe vize navikakwivwisa woma, kaha anuka ngwove Yehova mwakakukafwa!