Kuputuka vene omu apwile kanyike, Samwele atwaminenga nakuzachila hatavanaku. Tavanaku chapwile chihela chize vatu valikungulwililengaho nakulemesa Kalunga. Unatachikiza omu chapwile numba Samwele aputuke kuzachila hatavanaku tahi? Chatete tuchishimutwile hamujimbu waHana, uze apwile naye yaSamwele.

Hamyaka yayivulu, Hana kapwile namwana numba umweko. Kaha alombele kuli Yehova mangana amuhane mwana. Ashikile Yehova ngwenyi nge mwamuhana mwana, kaha mwakamusuula akaye nakutwama hatavanaku nakumuzachila. Nakushimbula chiku, Yehova akumbulwile kulomba chenyi kaha amuhanyine mwana. Amulukile lijina ngwenyi Samwele. Jino omu Samwele akolele nakuheta hamyaka yitatu, Hana alingile ngana muze ashikile Yehova. Asuwile Samwele ayenga nakuzachila Kalunga kutavanaku.

Halwola kana, Eli ikiye apwile kapilishitu wakulitulaho. Vana venyi vavali navakivo vapwile nakuzachila haze hatavanaku. Nganomu tunashimutwila lyehi, tavanaku yapwile zuvo yakulemesela Kalunga, kaha vatu vatelele kulinga vyuma vyamwaza. Oloze chaluvinda, vana vaEli valingilenga vyuma vyavipi. Samwele amwene omu vana vaEli vapwile nakulinga vyuma vyavipi. Uno Samwele nayikiye alingile vyuma vyavipi ngana mwavaze vana vaEli tahi?— Pimbi, kavakavangijileko, oloze alingilenga vyuma vyamwaza vize vamulwezele visemi jenyi.

Vyuma muka vize Eli atelele kulweza vaze vana venyi vavali?— Atelele kuvatenukila nakuvakanyisa kuzachila hazuvo yaKalunga. Oloze Eli kavatenukilileko. Kaha Yehova evwile kupihya chikuma havyuma alingile Eli navaze vana venyi vamalunga vavali. Yehova amwene ngwenyi atela kuvazangamisa.

Likumbi limwe naufuku Samwele asavalile mutulo, kaha evwile vali nakumusanyika ngwavo: ‘Samwele!’ Kaha alahile jimbushi nakuya kuli Eli, oloze Eli amulwezele ngwenyi, ‘Kangwakusanyikileko.’ Samwele vamusanyikile cheka, kaha alahile nakuya kuli Eli. Jino omu vamusanyikile kamuchitatu,  Eli alwezele Samwele ngwenyi nge mwivwa navakusanyika cheka, kaha ukumbulula ngwove: ‘Ove Yehova, hanjika, mwomwo ami ngamba yove nguli nakwivwilila.’ Kahomu mukiko ahanjikile Samwele omu vamusanyikile. Yehova jino alwezele Samwele ngwenyi: ‘Yako ulweze Eli ngwove nanguzangamisa tanga yenyi havyuma vyavipi vali nakulinga.’ Unashinganyeka ngwove chapwile chachashi kuli kanyike Samwele kuya nakulweza Eli mujimbu kana tahi?— Mukiko vene, chapwile chachikalu. Oloze Samwele ahamukile nakuya nakwambulula mazu amulwezele Yehova. Yehova ateselemo awa mazu enyi ahanjikile. Vaze vana vaEli vamalunga vavali vavajihile, kaha naise Eli vene afwile.

Samwele atusela chakutalilaho chamwaza chikuma. Alingilenga vyuma vyamwaza numba tuhu amwene vatu vali nakulinga vyuma vyavipi kumeso aKalunga. Uno nayove unahase kulinga vyuma vyakwoloka tahi? Kutala unahase kulondezeza Samwele nakulinga vyuma vyamwaza tahi? Nge naulinga vyuma vyamwaza, kaha nawivwisa kuwaha Yehova navisemi jove.