CHILONGESA 1
Twatela Kuwahilila Hakutachikiza Vyuma vyaKusweka
Uno vakulwezaho lyehi vyuma vimwe vyakusweka tahi?— * MuMbimbiliya vasonekamo mujimbu umwe wakulipwila uze vavuluka ngwavo “vyuma vyajila vyakusweka.” Mujimbu kana wapwa wajila mwomwo wafuma kuli Kalunga. Vauvuluka nawa ngwavo wakusweka mwomwo vatu kushikulu kavautachikijileko. Natungelo vene vapwile nakusaka kwijiva mujimbu kanou wakusweka mwomwo navakivo kavautachikijileko. Uno nayove uli nakusaka kutachikiza mujimbu kana tahi?—
Uno tungelo vapwile nakusaka kwijiva vyuma muka?
Makumbi akunyima chikuma, Kalunga atengele valunga napwevo vakulivanga. Majina avo vapwile Alama naEve. Kalunga avahanyine limbo lyamwaza chikuma vavulukilenga ngwavo litepa lyaEtene. Nge Alama naEve vononokele kuli Kalunga, kachi vasemene vana vamwenemwene nakuwahisa lifuchi lyosena kupwa palachise ngana mwalize litepa lyaEtene. Kachi vatwamine muze muPalachise nakuyoya kanawa myaka yosena. Oloze valingile vyuma vyavipi chikuma. Watachikiza vyuma valingile vaAlama naEve tahi?—
Alama naEve valikangile kuli Kalunga. Evi vikiko vyalingisa nayetu makumbi ano tuhone kupwa mupalachise. Oloze Kalunga atushika ngwenyi mwakalingisa lifuchi lyosena kupwa lyamwaza mangana tukatwame kanawa nakuwahilila myaka yosena. Uno mwakalinga ngachilihi vyuma kana? Putu vene kumakumbi akunyima, vatu kavatachikijile kanawa omu Kalunga mwakalinga vyuma kanako. Mwomwo vyapwile vyakusweka.
Omu Yesu ejile hano hamavu, anangwile vatu mwalumbunukilile evi vyuma vyakusweka. Ambile ngwenyi vyuma kana vyapwa vyaWangana waKalunga. Yesu alwezele vatu valombenga ngwavo Wangana wizenga mangana ukalingise lifuchi lyosena kupwa palachise.
Musaka utachikize evi vyuma vyakusweka tahi?— Chatete anuka ngwove, vatu vaze veji kwononokanga kuli Yehova vakiko navakatwama muPalachise. Mbimbiliya yatulweza malunga namapwevo vavavulu vaze vononokele kuli Yehova. Uli nakusaka uvatachikize tahi?— Tulinangule jino majina avatu kana, nomu tunahase kuvalondezeza.
^ par. 3 Omu namutanga mijimbu yili muno mumukanda namwanenu, namuwanamo vihula vize vanahulisa. Kusongo yavihula kana vanahakeko mufunda wakufwana ngana (—). Omu namuheta havihula vyangana mwatela kuhwima chindende mangana mwanenu akumbulule.
