Unatachikiza Wangana tuli nakuvuluka hano tahi?— Eyo, tuli nakuvuluka Wangana waKalunga uze naukaneha palachise hano mavu. Kutala uli nakusaka kutachikiza vyuma naukalinga ou Wangana tahi?—

Wangana hiwangana watwama namutu uze apwa mwangana. Mwangana eji kuyulanga vatu vamungalila yenyi. Uno watachikiza mutu uze apwa Mwangana waWangana waKalunga tahi?— Apwa Yesu Kulishitu. Atwama mwilu. Kalinwaha apwenga Mwangana wavatu vosena hano hamavu. Unashinganyeka ngwove naukevwa kuwaha omu Yesu mwakapwa Mwangana hano hamavu tahi?—

Tuvosena natukawahilila chikuma! Vatu vaze navakapwa muPalachise, kaveshi kukaliveta chipwe kulijiha mujijitako. Vatu vosena navakalizanga navakwavo. Kakweshi mutu mwakaviza chipwe kufwako. Tupuputa navakavatonesa meso, tujika matwitwi navakevwa, vitonji navakatambuka, kaha navakevwa kuwaha chikuma. Mutu himutu mwakapwa navyakulya vyavivulu. Tunyama nawa kaveshi kukajiha vatuko, kaha natukahema navo. Vatu vaze vafwa navakasanguka nakuyoya cheka. Vatu vaze tunashimutwila mumukanda uno vakufwana nge Laveka, Lahave, Ndavichi, naElija navakivo  navakasanguka. Unakusaka ukavamone omu navakasanguka tahi?—

Yehova akuzanga chikuma, kaha asaka upwenga uwakuwahilila. Nge nautwalaho lika kulinangula vyuma asaka Yehova nakumwononoka, kaha naukatwama mupalachise haya myaka yosena. Uno unakusaka ukatwame mupalachise tahi?—