Lwola lumwe vatu veji kwivwanga kupihya nge natuvambulwila mazu aKalunga. Echi chinahase kutulingisa twivwenga woma nakusaka kulitwamina kwambulula. Uno nayove wevwaho lyehi woma tahi?— MuMbimbiliya vavulukamo kanyike umwe walunga uze azangile Yehova, oloze asakile kulitwamina kwambulula. Lijina lyenyi ikiye Yelemiya. Tushimutwile jino hamujimbu wayou kanyike.

Omu Yelemiya apwile kanyike, Yehova amulwezele ayenga nakuhuhumuna vatu valitwamine kulinga vyuma vyavipi. Mulimo kana wapwile waukalu chikuma, kaha Yelemiya evwile woma. Alwezele Yehova ngwenyi: ‘Kangwejiva kuhanjikako, mwomwo nguchili ngukanyike.’ Oloze Yehova amwambile ngwenyi: ‘Kanda wivwa womako, nangukukafwa.’

 Yelemiya jino etavilile, kaha aputukile kulweza vatu vambile vilinga vyavipi. Unashinganyeka ngwove vatu vetavilile vyuma avalwezele Yelemiya tahi?— Pimbi, kavetavileko. Vamusehelenga nakumusekeleka, nakumujinda. Veka vasakile kumujiha. Uno Yelemiya evwile ngachilihi?— Evwile woma, kaha ambile ngwenyi: ‘Kangweshi kuhanjika cheka mazu aYehovako.’ Uno alitwaminyine kwambulwila vatu tahi?— Chiku, kalitwaminyineko. Mwomwo azangile chikuma Yehova kaha asakile kulweza vatu vatachikize vyuma asaka. Yehova akafwile Yelemiya nakumukinga.

Chakutalilaho, likumbi limwe malunga vamwe vavapi vakwachile Yelemiya nakumumbila muwina wausuku muze mwapwile majilo. Kapwile nameya chipwe navyakulyako. Vaze malunga vasezele Yelemiya muze muwina mangana afwenga. Oloze Yehova amukafwile, kaha afuminemo.

Vyuma muka unahase kulinangula kuchakutalilaho chaYelemiya?— Numba tuhu evwilenga woma, oloze atwalileho lika kulweza vatu mazu aYehova. Namakumbi ano, vatu vanakusehanga vaze vali nakwambulula mazu aKalunga. Kaha nayove vene unahase kwivwa sonyi nawoma. Oloze kanda ulitwamina kwambulula mazu aKalungako. Yehova mwakukafwa ngana muze akafwile Yelemiya.