CHILONGESA 8
Yoshiya Alikachilenga naMasepa Vamwaza
Washinganyeka ngwove chapwa chachashi kulinga vyuma vyamwaza tahi?— Vatu vavavulu vashinganyeka ngwavo chapwa chachikalu. Mbimbiliya yatulweza nge nakanyike walunga Yoshiya chamukaluwilile kulinga vyuma vyamwaza. Oloze apwile namasepa vamwaza vaze vamukafwileko. Tushimutwile jino hali Yoshiya namasepa jenyi nakumona vyuma natulinangulako.
Ise yaYoshiya apwile Amone, kaha nawa apwilenga mwangana muYuta. Amone apwile navilinga vyavipi, kaha alemeselenga tuponya. Omu Amone afwile, mwanenyi Yoshiya ikiye apwile jino mwangana. Halwola kana Yoshiya apwile kanyike wamyaka yakusemuka 8. Washinganyeka ngwove Yoshiya apwile navilinga vyavipi ngana mwaise tahi?— Nduma, kalondezezele iseko.
Zefwanyiya alwezele vatu valitwamine kulemesa tuponya
Yoshiya asakile kwononoka Yehova numba tuhu apwile kanyike. Alikwachilenga usepa navatu vaze vazangile Yehova. Vaze masepa jenyi vamukafwile kulinga vyuma vyamwaza vize asaka Yehova. Uno masepa jenyi vapwile veya?
Sepa lyenyi umwe apwile Zefwanyiya. Zefwanyiya apwile kapolofweto uze alwezele vatu vamuYuta ngwenyi valitwamine kulemesa tuponya, nge pimbi kaha Yehova mwakavajiha. Yoshiya evwililile kuli Zefwanyiya. Kalemesele tuponyako oloze alemesele Yehova.
Sepa lyenyi mukwavo apwile Yelemiya. Yelemiya naYoshiya vapwile namyaka yakusemuka yoyimwe, kaha nawa vatwaminenga mungalila yimwe. Valizangile chikuma, kahomu Yoshiya afwile, Yelemiya asonekele mwaso wakulishona wakusolola nge amuzangile chikuma sepa lyenyi. Yelemiya nasepa lyenyi Yoshiya valikafwilenga kulinga vyuma vyamwaza nakwononoka kuli Yehova.
Yoshiya naYelemiya valikafwile kulinga vyuma vyamwaza
Vyuma muka naulinangula kuchakutalilaho chaYoshiya?— Numba tuhu Yoshiya apwile kanyike, oloze alingilenga vyuma vyamwaza. Atachikijile ngwenyi chapwa chamwaza kupwa namasepa vaze vazanga Yehova. Nayove nawa watela kupwa namasepa vaze vazanga Yehova, vaze navakukafwa ulingenga vyuma vyamwaza.
