1, 2. Mwomwo ika vatu vavavulu vahombwanyishila jishimbi, oloze etu tunahase kumona ngachilihi jishimbi jaKalunga?

 MUKANDA umwe vasonekele kushikulu mu 1712 wamba ngwawo: “Jishimbi japwa nge wina wakuzeneka kukuma, . . . Mweji kutokanga vyuma vyosena.” Mwenya-mukanda kana alinyengele hatato yayipi yakushimbwisanga milonga mujizango hamyaka yayivulu, nakuhutwisa vaka-milonga. Mumafuchi amavulu, jishimbi najijila javo jakuyulilamo japwa jakulikonda chikuma, jakuhenga, jakutala vatu kumeso, kaha nawa jakuhona kuya mumwe, ngocho vatu vali jino nakuhombwanyisa jishimbi.

² Oloze achitale vishinganyeka vyakulihandununako vize vasonekele kafwe myaka 2,700 yinahichimo, ngwavo: “Jishimbi jove omu ngwajizanga!” (Samu 119:97) Mwomwo ika muka-kwimba jisamu evwilile ngocho? Mwomwo jishimbi alishile japwile jakufuma kuli Yehova Kalunga, keshi kujifulumende javatuko. Omu naulinangula jishimbi jaYehova, nayove nauputuka kwivwa ngana muze evwile muka-kwimba jisamu. Kaha vyuma naulinangula navikukafwa utachikize kanawa Muka-kuhana Jishimbi Wakulitulaho navishinganyeka vyenyi.

3, 4. Mujijila muka muze Yehova alisolola kupwa Muka-kuhana Jishimbi?

³ Mbimbiliya yatulweza ngwayo: “Kwatwama umwe kaha uze apwa Muka-kuhana Jishimbi kaha nawa Muka-kusopesa.” (WaYakova 4:12) Chikupu vene, Yehova ikiye kaha Muka-kuhana Jishimbi wamwenemwene. Navyuma  vyamumelu vyeji kutambukanga kweseka “najishimbi jamumelu.” (Yopa 38:33, The New Jerusalem Bible) Vihita vyavangelo vajila navakivo vapendamina hajishimbi jaYehova, mwomwo vavapangila vihela vyakulisezaseza. Kaha nawa vazata kweseka najishimbi jenyi hakupwa vaka-kumuzachila.—Samu 104:4; WavaHepeleu 1:7, 14.

⁴ Yehova ahana jishimbi nakuli vatu nawa. Tuvosena twatwama nachivezu chize chasolola nge Yehova apwa wachiyulo. Chivezu chapwa nge hijishimbi jamujitulo jetu, jize jatukafwa twijive vyuma amona Yehova ngwenyi vyakwoloka navyevi vyakuhenga. (Wavaka-Loma 2:14) Visemi jetu vakulivanga vavahanyine vivezu vyakukupuka, ngocho vasakiwile kaha jishimbi jajindende. (Kuputuka 2:15-17) Oloze vatu vakuhona kukupuka vasakiwa jishimbi jajivulu numba valinge mwaya muchima waKalunga. Vakakuluka jetu vakufwana nge Nowa, naApalahama naYakova vatambwile jishimbi kuli Yehova Kalunga kaha vajilwezele navatanga javo. (Kuputuka 6:22; 9:3-6; 18:19; 26:4, 5) Yehova apwile Muka-kuhana Jishimbi mujila yeka omu ahanyine muyachi wavaIsalele Jishimbi kuhichila muli Mose. Jishimbi kana jeji kutukafwanga twivwishise omwo chapwa chiyulo chaYehova.

5. Uno Jishimbi vahanyine Mose japwile jajivulu chikuma, kaha nawa jajikalu kukavangiza tahi? Mwomwo ika unakumbulwila ngocho?

⁵ Vatu vavavulu vashinganyeka ngwavo Jishimbi jize vahanyine Mose japwile jajivulu chikuma, kaha jajikalu kukavangiza. Oloze keshi mukikoko. Jishimbi kana jahambakana 600. Numba tuhu jinakusoloka nge jajivulu chikuma, oloze achishinganyeke hachuma chino chasolokele kusongo yalikulukaji lyamyaka lyakusokesa 20: Jishimbi  jafulumende yaUnited States javulile nakuzalisa mapapilo amumikanda yajishimbi akuzomboka 150,000. Nge munahichi myaka yivali, veji kuhakilangako jishimbi jeka kafwe 600. Echi chili nakusolola hatoma nge, jishimbi javatu jikiko jajivulu chikuma kuzomboka jize vahanyine Mose. Chipwe ngocho, Jishimbi jaKalunga jakafwilenga vaIsalele mujijila jize jishimbi jamakumbi ano najihona kukafwilamo vatu. Tuchishimutwileko mukavatu.

6, 7. (a) Ika yalingisa Jishimbi vahanyine Mose jilihandunune najishimbi jikwavo, kaha lushimbi muka lwapwa lwalunene haJishimbi kana? (b) Uno vaIsalele vasolwelenga ngachilihi ngwavo vetavilile chiyulo chaYehova?

⁶ Jishimbi jazezwile wata waYehova. Echi chikiko chalingisa Jishimbi vahanyine Mose jilihandunune najishimbi jikwavo. Lushimbi lwalunene hajishimbi kana shina lwakwamba ngwavo: “Ivwililenu enu vaIsalele, Yehova Kalunga ketu ikiye Yehova umwe kaha. Zangenunga Yehova Kalunga kenu namichima yenu yosena, namyono yenu yosena, nangolo jenu josena.” Jino vatu jaKalunga vatelelele kusolola ngachilihi ngwavo vamuzanga? Vatelelele kumuzachila, nakuliluula kuwata wenyi.—Lushimbi lwamuchivali 6:4, 5; 11:13.

⁷ Mutu himutu muli vaIsalele asolwelenga muchima wakwitavila chiyulo chaYehova hakuliluulanga kuli vaze ahanyine ngolo jakuvatwaminyina, vaze vemanyinyinengako chiyulo chenyi. Vatu kana shina visemi, navamyata javatu, navaka-kuyula, navapilishitu, kaha mukuhita chalwola kwaputukile kupwa vamyangana. Yehova amwenenga vaze valikangile kuli vaka-kutwaminyina ngwenyi valikangilenga kuli ikiye. Chipwe ngocho, Yehova akwachilililenga nawa utenu vaze vapwile nakutetekela vakwavo kachi nge navayanjisa vatu jenyi. (Kulovoka 20:12; 22:28; Lushimbi lwamuchivali 1:16, 17; 17:8-20; 19:16, 17) Shikaho, navaze vapwile nakutetekela vakwavo, navaze vapwile  mwishi yavo, vosena vatelelele kukundwiza wata waKalunga.

8. Uno Jishimbi jazezwilenga ngachilihi kujila chaYehova?

⁸ Jishimbi jazezwilenga kujila chaYehova. Jishimbi vahanyine Mose jahanjika hakujila mapapa akuzomboka ha 280. Jishimbi jakafwilenga vatu jaKalunga kuhandununa vyuma vyamwaza navyevi vyavipi, vitoma navyevi vyamajilo, kaha jalumbunwine vyuma kafwe 70 vize vyalingishilenga kaIsalele apihye. Jishimbi kana jahanjikile haunyoji, nahavyakulya, namwakumbilila majilo. Eji jishimbi jakafwilenga vatu vapwenga vakulikangula. a Oloze japwile namulimo weka waunene, wakulingisa vatu vavevwilenga uselewa kuli Yehova, nakuvahandula kuvilinga vyaunyengwe vyavaka-mafuchi avajingilikile. Tala chakutalilaho.

9, 10. Lushiko lwamuJishimbi lwahanjikile ika kutalisa kukulisavala nakukusema, kahechi chakafwile ngachilihi vaIsalele?

⁹ Jishimbi vahanyine Mose jahanjikile ngwajo kulisavala chalunga napwevo, numba kuli vaze valimbata, nakusema vana vyavalingishilenga vapihye hakatando kamwe. (VyavaLevi 12:2-4; 15:16-18) Echi kachalumbununa nge kulisavala nakusema vana kachapwile mawana atoma akufuma kuli Kalungako. (Kuputuka 1:28; 2:18-25) Oloze jishimbi kana jakundwijilenga kujila chaYehova, nakukinga vaka-kumulemesa vahone kulipihisa. Mafuchi amavulu aze ajingilikile vaIsalele apwile nakulemesa tulunga twavo hakulisavala. Mukwitava chavaKanane vetavishile vilinga vyaujila. Echi chalingishile vatu vavavulu chikuma vapwenga navilinga vyaunyengwe. Oloze Jishimbi jakanyishilenga kwingisa vilinga vyaujila mukulemesa chaYehova. b  Kaha eji Jishimbi jakafwilenga nawa vaIsalele mujijila jeka.

¹⁰ Jishimbi kana janangwilenga muchano waulemu. c Numba tuhu kulisavala chalunga napwevo nakusema vana vyapwa wana wakufuma kuli Kalunga, oloze vyapwa nawa jila yakulitambwishilamo shili yaAlama kufuma kuchisemunwino chimwe nakuya kuchisemunwino chikwavo. (Wavaka-Loma 5:12) Eyo, Jishimbi jaKalunga janukishilenga vatu jenyi ngwavo vapwile vaka-shili. Tuvosena vene twasemuka nashili. (Samu 51:5) Twasakiwa kutukonekela nakutusokola numba tuhase kupandama kuli Kalunga ketu wajila.

11, 12. (a) Jishimbi jakundwijilenga ngachilihi chiyulo? (b) Vyuma muka vyamuJishimbi vize vyakafwile vatu kuhona kuhengesa chiyulo?

¹¹ Jishimbi jazezwile chiyulo chaYehova chakukupuka. Jishimbi vahanyine Mose jasakilenga vatu kupezalisa kuyula milonga chakuzeneka kutala kumeso. Javulukile ngwajo: “Mukalinga mwono namwono ndwa, liso naliso ndwa, livoko nalivoko ndwa, lihinji nalihinji ndwa.” (Lushimbi lwamuchivali 19:21) Chakutalilaho, nge mutu nalingi mulonga waulyanyi, vatelelelenga kumuzangamisa kweseka namulonga wenyi. Eji Jishimbi jasolwele omwo chapwa chiyulo chaKalunga, kaha achisolwele nawa hakuhana Kulishitu Yesu kupwa ndando yakusokola  mwachimuna wakuvatula, ngana muze naumona muKapetulu 14.—WaChimoteu 1, 2:5, 6.

¹² Jishimbi nawa jakafwilenga vatu vahone kuhengesa chiyulo. Chakutalilaho, nge mutu vanamuvulukila chihande, kwasakiwilenga chatete kwivwilila mutunwa twavinjiho vavali numbanyi vachivatule. Vinjiho vamakuli vavazangamishilenga mwamunene. (Lushimbi lwamuchivali 19:15, 18, 19) Jishimbi jakanyishile kutambula maswekeza. (Kulovoka 23:8; Lushimbi lwamuchivali 27:25) Vatu jaKalunga vatelelele kukavangiza chiyulo chaYehova namukusekasana. (VyavaLevi 19:35, 36; Lushimbi lwamuchivali 23:19, 20) Eji jishimbi jajilemu jakukanyisa vatu kulitala kumeso janganyalishile vaIsalele.

13, 14. Uno Jishimbi jakafwilenga ngachilihi vatu kuyula mujila yamwaza yakwoloka hakachi kamwiji namwenya-vikumba?

¹³ Uno Jishimbi vahanyine Mose japwile jajikalu, kaha nawa jakuhona keke tahi? Nduma. Mwangana Ndavichi vamuhwiminyinyine asoneke ngwenyi: “Jishimbi jaYehova japwa jakukupuka.” (Samu 19:7) Atachikijile kanawa ngwenyi, Jishimbi jakafwilenga vatu kuyula namuchima wakutetela, nakuhona kutala vatu kumeso. Uno javakafwilenga ngachilihi valinge ngocho?

¹⁴ Jishimbi jamumafuchi amwe makumbi ano, jeji kutetelanga vihwanga kuhambakana vaze vanalingi mwamupi kuli vihwanga kana. Chakutalilaho, mwiji nahase kushimbula mukamenga. Olozenyi vaze venya-vikumba vanapaye, vikumba vyavo vinatoko, oku nawa ngwavo vatela kuhana mitelo yize navazachisa hakuzakama vihwanga vali mutumenga. MuIsalele yakushikulu, kamwapwilenga tumenga ngana vaze tuli navo makumbi anoko. Jishimbi jakanyishile kuzangamisa mutu  nakuhambakanyisaho, nge navulumuna mulonga. (Lushimbi lwamuchivali 25:1-3) Mwiji vamuhanyinenga mulonga wakukindulwisa vyuma vyakuta muli vize evile. Kaha nawa ahakililengaho vyuma vikwavo. Uno afwetelenga vyuma vyakuheta museteko muka? Vyapendaminyinenga hakutohwa chamulonga. Chasoloka hatoma nge vaka-kuyula vavahanyine lisesa lyakukekesa kanawa vyuma. Chakutalilaho, vakekeselenga vamone nge mutu kana napihilila nakwalumuna nyi chiku. Shikaho, vyuma atelelele kukindulwisa mwiji kweseka naVyavaLevi 6:1-7 vyapwile vyavindende chikuma hakuvyesekesa navize vavuluka hali Kulovoka 22:7.

15. Jishimbi jasolwelenga ngachilihi kutetela nakeke kuli mutu mwajiha mukwavo chakuzeneka kuchisakula?

¹⁵ Jishimbi jetavile ngwajo, milonga yimwe kavayivulumwinenga chakusakula kumuchimako. Chakutalilaho, nge mutu najihi mukwavo chakuzeneka kuchisakula, kaha himwachinyina kunganda yimwe hajinganda jakuswamamo japwile muIsalele, mutu kana katelelele kufweta mwono namwono ndwako. Oloze nge vaka-kuyula vakuhya vanakekesa lyehi chihande chenyi, kaha atwaminenga munganda yize palanga nakukufwa chakapilishitu wakulitulaho, nakupwa jino wakulihehwa kutwama kwosena okwo nasake. Shikaho, jishimbi jaKalunga jakutetela janganyalishilenga mutu kana. Oloze lushimbi kana elu lwashindakanya hakulema chakuyoya chamutu.—Kulava 15:30, 31; 35:12-25.

16. Uno Jishimbi jakingilenga ngachilihi lisesa lyavatu?

¹⁶ Jishimbi jakingilenga lisesa lyavatu. Achitale omwo jakingilenga vaze vatambwilenga mikuli. Jishimbi jakanyishilenga mutu kwingila muzuvo yauze nalevanyisa nakulimbachila chuma chipwenga chijikilo. Muka-kulevanyisa asalilenga haweluka mangana muka-mukuli anehe ivene chijikilo. Ngocho lushimbi kana lwakafwilenga kuvumbika  zuvo yamutu. Nge uze nalevanyisa mukwavo mwatambula chikuto chamuka-mukuli kupwa chijikilo, kaha atelelele kumuhilwishilacho hakulauka chalikumbi, kuchina mutu kana mwafwa chishika, mwomwo pamo chikiko alifwikilenga naufuku.—Lushimbi lwamuchivali 24:10-14.

17, 18. Uno vaIsalele valihandunwine ngachilihi navaka-mafuchi eka kutalisa kukulwa jita, kaha mwomwo ika?

¹⁷ Jijita nawa vapwilenga nakujilwa kweseka naJishimbi. Jijita valwilenga vatu jaKalunga kajapwilenga jakusaka kusolola undume wavoko, oloze mwomwo valwilenga “Jijita jaYehova.” (Kulava 21:14) Kakavulu, vaIsalele vavangililenga kulweza vaka-kole javo vasume kupoko. Nge nganda valwilenga nayo kayite kusuma kupoko, kaha vaIsalele vayihakilenga muchingombela, oloze valingilenga ngocho kweseka najishimbi jaKalunga. Maswalale vavaIsalele kavavetavishile kupika mapwevo chipwe kujiha vatu chamujihila, ngana muze vanalinginga maswalale vavavulu mujitako. Vavakanyishile kwenyeka mihako yavaka-kole javo, chipwe vyuma vyeka vawanyinengako. d Oloze maswalale javaka-mafuchi eka kavapwile najishimbi kanejiko.—Lushimbi lwamuchivali 20:10-15, 19, 20; 21:10-13.

¹⁸ Uno weji kwivwanga kupihya nge nawivwa ngwavo mumafuchi amwe vana vavandende vali nakuvanangula uswalale tahi? MuIsalele yakushikulu, kanyike walunga uze kanda ahetese myaka yakusemuka 20 kavamwingishilenga uswalaleko. (Kulava 1:2, 3) Kaha nawa namukulwane wawoma chikuma kayilenga kujitako. Lunga nawa uze  nambate kalinwomu katelelelenga kuya kujita nakuzata mulimo kanou waponde hamwaka wamuunduko, mangana apwengako omu mwasemuka mwanenyi watwatwa. Jishimbi jalumbunwine ngwajo, echi chalingishilenga uze mukweze walunga nambate “[atwame] mwaka wamuundu kuzuvo mangana akasuulwise pwevo lyenyi.”—Lushimbi lwamuchivali 20:5, 6, 8; 24:5.

19. Uno Jishimbi jakafwilenga ngachilihi mapwevo, navana, najitanga, navatuliwe, navanginga?

¹⁹ Jishimbi jakingilenga nawa mapwevo, navana najitanga, nakukafwa nawa vaIsalele vamone ngwavo vatu kana vali navyuma vasakiwilenga. Jalwezele visemi vazakamenga lika vana vavo nakuvanangula vyuma vyakushipilitu. (Lushimbi lwamuchivali 6:6, 7) Jakanyishilenga mutu kulimbata nakausoko kenyi, kaha vatu vaze vazombokelenga lushimbi kana, vavajihilenga. (VyavaLevi, kapetulu 18) Jakanyishile nawa ukoji, mwomwo kakavulu ukiko weji kumwanganga jitanga nakuneha ukalu waunene chikuma mujitanga. Jishimbi jakafwilenga nawa vatuliwe navanginga, kaha nawa jazangamishilenga vaze vavayanjishilenga.—Kulovoka 20:14; 22:22-24.

20, 21. (a) Mwomwo ika Jishimbi vahanyine Mose jetavishilile vaIsalele kumbata luhali? (b) Mwomwo ika Yehova etavishile hakatando kakandende vatu kulilukulula?

²⁰ Oloze vamwe vanahase kulihulisa ngwavo, ‘Mwomwo ika Jishimbi jetavishile kumbata luhali?’ (Lushimbi lwamuchivali 21:15-17) Twatela kukekesa jishimbi kana kweseka nomu vyapwilenga vyuma halwola kana. Shikaho nge mutu mwesekesa Jishimbi vahanyine Mose kuvyuma navisemwa vyamakumbi ano, kaha keshi kujivwishisako. (Vishimo 18:13) Omu Yehova atengele Alama naEve, asolwele hatoma ngwenyi lunga atela kupwa kaha napwevo umwe nakutwama hamwe haya myaka. (Kuputuka 2:18, 20-24) Halwola Yehova ahanyine Jishimbi kuli vaIsalele, chisemwa chakumbata luhali kuchapwile lyehi makulukaji  amyaka kunyima. Yehova atachikijile kanawa ngwenyi kakavulu vatu jenyi “vakukakama michima” navakahona kukavangiza najishimbi jajashi avahanyine, jakufwana nge jakuvakanyisa kulemesa makombelo. (Kulovoka 32:9) Ngocho amwene ngwenyi lwola kana kalwapwile hilwola lwakutamo kwolola vilinga vyavo vyosena vyakupandama kuuloko. Chipwe ngocho, twatela kutachikiza ngwetu Yehova kavahanyine lushimbi lwakumbata luhaliko. Oloze ahanyine jishimbi jakukinga mapwevo nakukanyisa malunga kuyanjisa mapwevo.

²¹ Kaha nawa Jishimbi vahanyine Mose jetavishilenga lunga kulukulula puwenyi hamilonga yayinene yayivulu. (Lushimbi lwamuchivali 24:1-4) Oloze Yesu ambile ngwenyi Kalunga etavishile vaYuleya kulinga ngocho “hakukaluwa chamichima [yavo].” Chipwe ngocho, etavishile chuma kana hakatando kakandende kaha. Yesu anangwile vaka-kumukavangiza vakavangizenga lushimbi luze Yehova ahakileko hakavanga lwakutalisa kuulo.—Mateu 19:8.

22. Jishimbi vahanyine Mose jakundwijile ngachilihi zangi, kaha zangi kana yapwile yakuzanga veya?

²² Uno wejivako jishimbi jimwe jamakumbi ano jize jeji kukundwizanga zangi tahi? Jishimbi vahanyine Mose jakundwijilenga zangi kuzomboka vyuma vikwavo vyosena. Chakutalilaho, mukanda waLushimbi lwamuchivali ukawawo, wahanjika hazangi mapapa akuzomboka 20. Lushimbi lwalulemu lwamuchivali haJishimbi josena shina lwakwamba ngwavo, “zangenunga vakwenu nganomu mwalizanga enu vavene.” (VyavaLevi 19:18; Mateu 22:37-40) Vatu jaKalunga vatelelele kulizanga mwavomwavo nakuzanga nawa vamwiza, mwomwo lwola lumwe navakiko vaIsalele vapwilenga vamwiza. Vatelelele kuzanga vaka-kuhutwa navaka-kuyanda, nakuvahana vyakulikafwa  navyo nakulihenda kukuvayanjisa. Vavahanyine nalushimbi lwakutetela vimuna vakumbata viteli.—Kulovoka 23:6; VyavaLevi 19:14, 33, 34; Lushimbi lwamuchivali 22:4, 10; 24:17, 18.

23. Uno chuma muka alingile muka-kusoneka Samu 119, kaha nayetu twatela kufwila kulinga ika?

²³ Kakweshi lifuchi lyeka lyatwamaho lyehi najishimbi ngana jize Yehova ahanyine vaIsaleleko. Echi chikiko chalingishile muka-kwimba jisamu asoneke ngwenyi: “Jishimbi jove omu ngwajizanga!” Oloze zangi yenyi kayapwile yakwivwa kaha mumuchimako. Hakuwana nge azangile jishimbi jaKalunga, echi chamulingishile ajikavangizenga. Ambile nawa ngwenyi: “Ngweji kujishinganyekanga lwola lwosena.” (Samu 119:11, 97) Chikupu vene, alinangwilenga jishimbi jaYehova lwola lwosena. Echi chamulingishile ajizange chikuma. Kaha nawa chamulingishile azange chikuma Yehova Kalunga uze apwa Muka-Kuhana Jishimbi. Shikaho, omu nautwalaho lika kulinangula jishimbi jaKalunga, fwila kupandama chikuma kuli Yehova, Muka-Kuhana Jishimbi Wamunene, uze nawa apwa Kalunga wachiyulo chakwoloka.