1. Tunahase kwivwa ngachilihi nge vyuma vinahenge?

 UNAHASE kwivwa ngachilihi nge tuliwe wakashinakaji vanamwongo nakumwiva jimbongo jenyi? Uno nawivwa ngachilihi nge kemba vanamumbili kuli naye wakuhona keke? Nawivwa ngachilihi nge mutu vanamukase mukamenga chakuzeneka mulonga? Evi vyakutalilaho vinahase kukwivwisa kupihya. Etu vatu tukwechi muchima wakufwila vyuma vyakwoloka. Nge vyuma vimwe vanavihengesa, kaha tweji kwivwanga kupihya. Tweji kusakanga uze vanavulumuna mulonga vamufwete kaha uze nawa navulumuna mukwavo vamuzangamise. Nge kavalingile ngochoko, kaha tweji kulihulisanga ngwetu: ‘Uno Kalunga keshi nakumona vyuma vili nakulingiwako tahi? Nyi ikaze nechelela vyuma kana?’

2. Hambakuke evwile ngachilihi hakumona kuhenga chinavulu, kaha mwomwo ika Yehova kamutenukilileko?

² Kufuma vene kushikulu, vangamba jaYehova vakushishika vanahulisanga vihula vyakufwana ngana evi. Chakutalilaho, kapolofweto Hambakuke alombele kuli Kalunga ngwenyi: “Ikaze weji kungumweneselanga kuhenga nakungutalisa luyanjisa? Mwomwo kwenyeka naulyanyi vili kumeso ami, kuli kulisopesa, kweji kukatukanga vikokojola.” (Hambakuke 1:3, Luvale Bible 1970) Yehova katenukilile Hambakuke hakumuhulisa chihula kanako, mwomwo Ikiye atengele mutu namuchima wakusaka chiyulo chakwoloka. Mujijila jimwe, nayetu tweji kusololanga omwo Yehova eji kwivwanga havyuma vyakwoloka nevi vyakuhenga.

3. Mwomwo ika natwambila ngwetu Yehova ikiye ejiva chikuma vilinga vyakuhenga kuhambakana yetu?

³ Yehova kaliula kuhengesa chavatuko. Eji kumonanga vyuma vyosena vili nakulingiwa. Mbimbiliya yatulweza vyamakumbi aNowa ngwayo: “Yehova amwene ngwenyi kuhuka chavatu chinatoho chikuma hamavu, ngwenyi vishinganyeka vyamichima yavo vinapunga lika vyavipi lwola lwosena.” (Kuputuka 6:5) Achishinganyeke hamujimbu kana. Kakavulu vyuma vyakuhenga twatachikiza shina vize twevwile chipwe vize twahichilemo. Oloze Yehova atachikiza vilinga vyakuhenga vili nakulingiwa mukaye kosena. Eji kumonanga kuhenga chosena. Kaha nawa nahase kwijiva vili mumuchima wamutu, kulumbununa vishinganyeka vyavipi vize vyeji kulingisanga mutu alinge vyuma vyakuhenga.—Yelemiya 17:10.

4, 5. (a) Mbimbiliya yasolola ngachilihi ngwayo Yehova eji kuzakamanga vaze vali nakumwenesa vihuli kuli vakwavo? (b) Uno Yehova eji kwivwanga ngachilihi havilinga vyakuhenga?

⁴ Yehova kakumina kaha hakutachikiza vyuma vyakuhengako. Oloze eji kuzakamanga nawa navatu vaze vali nakumona ukalu mwomwo yavaka-kuhengesa chiyulo. Omu vatu jenyi vavayanjishile kuli vaka-kole javo, Yehova evwile kupihya “havihuli vyavo vavamwenesele kuli vaze vavashinyinyikile, navaze vavayanjishilenga.” (Vaka-kuyula 2:18) Nayove pamo unamono ngwove, vatu vamwe vanamononga chikuma omwo vatu vanahengesanga chiyulo, kaha echi chinavalingisa vahone kulingako vyuma vimwe mwomwo vanejilila kumona vyuma kana. Oloze omwo keshi mukiko apwa Yehovako. Namononga omwo vatu vanahengesanga chiyulo hamyaka kafwe 6,000, oloze hanga ahungila vatu kana. Mbimbiliya yatukolezeza ngwayo, vyuma vyakufwana nge “lilimi lyakwonga, namavoko akumwanga manyinga amutu wazeneka  mulonga,” “nachinjiho uze eji kuhanjikanga vyakwonga” vyapwa vyaunyengwe kuli ikiye.—Vishimo 6:16-19.

⁵ Achitale nawa omwo Yehova ahuhumwine vatwamina vaze vahengeselenga chiyulo muIsalele. Ahwiminyinyine kapolofweto kenyi ahanjike kuli vakiko ngwenyi: “Mwatelanga kutachikiza vyuma vyakwoloka.” Yehova hakukumisa kulumbununa muvazachishilenga ngolo javo mujila yakuhenga, ahanjikilile chimweza vyuma navikasoloka kumalunga kana ava vakuhuka, ngwenyi: “Namukatwa kawelele kuli Yehova, oloze keshi kukamikumbululako. Mwakalisweka kumeso enu [halwola kana] mwomwo yavilinga vyenu vyavipi.” (Mika 3:1-4) Chikupu vene, Yehova amona kuhengesa chiyulo kupwa hichuma chachipi chikuma. Anukenu ngwenu, naikiye vamwivwisaho lyehi kupihya. Satana namutombonga hamyaka yayivulu chikuma. (Vishimo 27:11) Kaha nawa Yehova evwile kupihya hakumona jila yayipi vayanjishililemo Mwanenyi uze “kalingile shiliko,” nakumujiha nge hichihwanga. (WaPetulu 1, 2:22; Isaya 53:9) Twatachikiza chikupu ngwetu Yehova eji kumonanga vatu vaze vali nakumwenesa vihuli kuli vakwavo, kaha nawa eji kuvazakamanga.

6. Tunahase kwivwa ngachilihi nge navatumwenesa vihuli, kaha mwomwo ika?

⁶ Tweji kwivwanga kupihya chikuma nge tunamono mutu vali nakumulinga vyuma vyavipi chipwe nge yetu vanakumwenesa vihuli. Etu vatutenga muchifwanyisa chaKalunga, kaha Yehova atwama navilinga vyamwaza vize kavyalifwana navilinga vyakuhengako. (Kuputuka 1:27) Kaha mwomwo ikaze Kalunga etavishila vilinga vyakuhengesa chiyulo?

7. Lumbununa omwo lijina lyaYehova valisawile nomwo nawa vamuvangijikilile ngwavo eji kuyulanga mwakuhenga.

⁷ Nge natukekesa chihande chachilemu kaha natumona ovyo Kalunga etavishila vilinga vyakuhengesa chiyulo. Ngana muze tunamono lyehi, Tengi ikiye atela kuyula mavu navyuma vyosena vyatwamaho. (Samu 24:1; Kusoloka 4:11) Oloze kushikulu, lijina lyaYehova lyamwaza valisawile, kaha nawa vamuvangijikilile ngwavo eji kuyulanga mwakuhenga. Uno vyuma kana vyaputukile ngachilihi? Yehova akanyishile mutu wakulivanga, Alama, kulya kumutondo umwe uze wapwile mulitepa lyamuPalachise yize yapwile limbo lyenyi. Uno Kalunga amulwezele ngwenyi vyuma muka navisoloka nge mwalikanga? Ambile ngwenyi: “Naukafwa chakufwa.” (Kuputuka 2:17) Elu lushimbi lwaKalunga kalwapwile lwalukalu kulukavangiza kuli Alama napuwenyi Eveko. Chipwe ngocho, Satana akunywile Eve mangana amone ngwenyi Kalunga apwa wamukalu muchima. Vyuma muka amulwezele ngwenyi navisoloka nge mwalya kumutondo kana? Satana ongele Eve ngwenyi: “Kufwa kamweshi kufwako. Mwomwo Kalunga natachikiza ngwenyi halikumbi lize namukalyako, meso enu nawakatona, kaha namukapwanga nge Kalunga, kaha namukatachikizanga kuwaha nakupihya.”—Kuputuka 3:1-5.

8. (a) Uno vyuma ahanjikile Satana kuli Eve vyasolwele ika? (b) Satana asawile ngachilihi lijina lyaKalunga nakufumbukila wata wenyi?

⁸ Vyuma ahanjikile Satana vyasolwele nge Yehova aswekelelele Eve vyuma vyamwaza, kaha nawa amwongele. Satana alingishile Eve ahuhwasane omwo apwa Yehova. Ngocho asawile lijina lyaKalunga. Kaha nawa afumbukilile wata waYehova, chipwe ngwetu jila Yehova eji kuyulilangamo. Satana kahanjikile ngwenyi Kalunga kapwa  Muka-Kuyula vyuma vyosenako. Oloze ambile ngwenyi Kalunga kayula mwakwolokako, kaha nawa katamo kuyulako. Mujila yikwavo, apwile nakulumbununa ngwenyi Yehova apwile nakuhengesa chiyulo, kaha nawa kayulilenga mujila yize nayinganyalisa vaze apwile nakuyulako.

9. (a) Ukalu muka valikokelelele vaAlama naEve mwomwo yakulikanga chavo, kaha makuli aSatana aneha vihula muka vyavilemu? (b) Mwomwo ika Yehova kanongesele vaze vaka-kulikanga hahaze veneko?

⁹ Kutwala muze, Alama naEve valikangile kuli Yehova hakulya kumutondo avakanyishile. Ngocho kulikanga chavo chavanehelele kufwa, ngana muze avalwezele Kalunga. Makuli aSatana aneha jino vihula vyavilemu. Vihula kana shina, Uno Yehova atamo kuyula vatu tahi, nyi vatu vatela kuliyula vavene? Uno Yehova eji kuzachisanga wata wenyi mujila yamwaza tahi? Yehova kachi azachishile ngolo jenyi jakulitulaho mangana anongese vaze vaka-kulikanga hahaze vene. Oloze chihande chepukile kachatalikishile kungolo jaKalungako, chatalikishile kulijina lyenyi nakujila eji kuyulilangamo. Shikaho nge anongesele Alama naEve, naSatana hahaze vene, kachi kachasolwele chiyulo chaKalunga kupwa chakwolokako. Kaha nawa kachi chasolwele nge vyuma ahanjikile Satana vyapwile vyamuchano. Shikaho jila yamwaza yakutachikijilamo nge vatu vanahase kuliyula vavene nyi chiku, shina yakuvahana lwola mangana veseke kuliyula vavene.

10. Uno mijimbu yasolola vyuma muka kutalisa kuchiyulo chavatu?

¹⁰ Hamyaka yayivulu, vatu vanesejekanga jifulumende jakulisezaseza. Uno vyuma muka vinafumungamo? Vyuma vinafumumo shina vize yahanjika Mbimbiliya ngwayo: “Mutu nashinyinyika mukwavo mutu mangana amuyanjise.” (Muka-kwambulula 8:9) Echi  chikiko chalingishile kapolofweto Yelemiya ambenga ngwenyi: “Ove Yehova, ngunatachikiza ngwami mutu katwama nangolo jakusakula jila yenyiko. Mutu katwama nangolo jakulitwaminyina iveneko.”—Yelemiya 10:23.

11. Mwomwo ika Yehova etavishila vatu vayande?

¹¹ Kufuma vene kukuputuka, Yehova atachikijile ngwenyi kulikanga chavatu nakusaka kuliyula vavene nachikavanehela ukalu waunene. Kutala Yehova ahengesele hakwitavisa ukalu kana usoloke tahi? Nduma. Chakutalilaho, achishinganyeke mwanove ali nakuviza musongo waunene uze nausakiwa kumupula numba ayoye. Mwanove mwevwa kukola chikuma mwomwo yakumupula, kaha echi nachikwivwisa kupihya kumuchima. Chipwe ngocho, nawijiva ngwove jila kana nayikafwa mwanove akapwe wakulikangula kulutwe. Chochimwe nawa, Kalunga atachikijile ngwenyi vatu hakuvetavisa valiyulenga vavene nachikaneha vihuli naluyando, kaha nawa ahanjikilemo lyehi. (Kuputuka 3:16-19) Chipwe ngocho, atachikijile nawa ngwenyi, hakusaka kuyanda chikafumeko haya myaka kuvanga etavise vatu vamone kupihya chatwamaho kachi nge navasaka kuliyula vavene chakuzeneka kuvayula kuli ikiye. Ngocho, chihande chawata navakachivatula chosena haya myaka.

12. Kweseka navyuma vyasolokele kuli Yopa, Satana ahanjikile makuli muka hali vatu?

¹² Omu Satana akatwile chihande ngwenyi Kalunga katamo kuyulako, kaha nawa ngwenyi kayula mwakwolokako, ahanjikile makuli kutalisa kuchiyulo chaYehova,  navatu vaze veji kuzachilanga Kalunga nakuvyuma vyavalingisa vamuzachile. Chakutalilaho, achitale hamazu ahanjikile Satana kuli Yehova kutalisa kuli lunga wakwoloka Yopa. Ambile ngwenyi: “Uno kawamukingile nakukinga nawa zuvo yenyi navyuma vyosena ali navyoko numba? Unakisula milimo yamavoko enyi, kaha vimuna jenyi vanavulu chikuma mulifuchi. Oloze acholole livoko lyove, umutambule vyuma vyosena ali navyo, tumone numba nge keshi kukwangula hatomako.”—Yopa 1:10, 11.

13. Uno vyuma ahanjikile Satana hali Yopa vyalumbunwine ika, kaha vyuma kana vyalumbunwine ika kutalisa kuvatu vosena?

¹³ Satana ambile ngwenyi Yehova nazachisa ngolo jenyi mangana akinge Yopa amuzange nakumuzachila. Echi chalumbunwine nge Satana apwile nakuhanjika ngwenyi Yopa azachilililenga Kalunga mwomwo yavyuma vyamwaza vize Kalunga amuhanyine. Satana avangijikilile Yopa ngwenyi, nge Kalunga kamukiswileko, kachi Yopa angwile Tengi. Satana ejivile ngwenyi Yopa apwile chikupu “mutu wakusungama, wakulonga. [Muka-kwivwa Kalunga] woma, kaha [alihendelenga] kuvyuma vyavipi.” a Nge Satana ahashile kulingisa Yopa lunga wakushishika alikange kuli Yehova, kachi amwene ngwenyi nahase kulinga mwomumwe nakuli vatu veka nawa. Shikaho, Satana asolwele chikupu ngwenyi vatu veji kuzachilanga Kalunga mwomwo yakusaka kunganyalilaho. Tunahanjika ngocho mwomwo yavyuma vikwavo ahanjikile Satana kuli Yehova, ngwenyi: “Vyeshovyo ali navyo mutu mwavihana hamwono wenyi.”—Yopa 1:8; 2:4.

14. Uno Satana ahanjikile mwakwoloka kutalisa kuvyuma ahanjikile hali vatu tahi?

 ¹⁴ Vatu vavavulu vanapunga vakushishika kuli Yehova chamokomoko nakuhita muukalu, ngana muze chapwile kuli Yopa. Echi chasolola nge vyuma ahanjikile Satana vyapwile vyamakuli. Vatu vanevwisanga Yehova kuwaha hakushishika chavo, kaha echi chinalingisa Yehova apayise Satana uze ambile ngwenyi, vatu vanahase kwecha kuzachila Kalunga nge vali muvihuli. (WavaHepeleu 11:4-38) Eyo, vatu vamichima yamwaza kavasezele Kalungako. Veji kupendaminanga chikuma hali Yehova avahane ngolo jakumika, numba navamona tuhu ngachilihi ukalu wakulinga nahameso wi.—Wavaka-Kolinde 2, 4:7-10.

15. Uno tunahase kuhulisa chihula muka kutalisa kujila Kalunga asopeselelemo vatu kunyima nomwo mwakalinga ngocho kulutwe?

¹⁵ Jila Yehova akwililemo kuchihande chakutalisa kuchiyulo chenyi, nachakuvuluka ovyo vatu veji kumuzachilanga, hijila yimwe yize yasolola nge Yehova eji kulinganga vyuma vyakwoloka lwola lwosena. Mbimbiliya nawa yatulweza omwo asopeselelengamo vatu vamwe nomwo asopeselelengamo nawa mafuchi kushikulu. Kaha yahanjika nawa chimweza ngwayo mwakasopesa vatu kulutwe. Mwomwo ika twatela kukunyukila ngwetu Yehova nasopesanga vatu mujila yakwoloka kaha omwo mukiko mwakalinga nakulutwe?

16, 17. Vyakutalilaho muka vyasolola nge kakavulu vatu kavasopesa mujila yakwolokako?

¹⁶ Mbimbiliya yoloka hakuhanjika hali Yehova ngwayo: “Jijila jenyi josena jakwoloka.” (Lushimbi lwamuchivali 32:4) Oloze etu vatu katweshi kuhasa kulyamba  ngochoko, mwomwo shimbu jimwe katwejiva unjiho wosena wachihandeko, kaha echi cheji kutulingisanga tukukulule chihande mujila yakuhenga. Chakutalilaho, achishinganyeke hali Apalahama. Numba tuhu vatu vamuSotome vapwile navilinga vyavipi chikuma, oloze alembelelele Yehova ahone kunongesa nganda kana. Ahulishile Yehova ngwenyi: “Uno naukanongesa vaka-kuhuka navaka-kwoloka hamwe tahi?” (Kuputuka 18:23-33) Tunejiva ngwetu Kalunga keshi kulinga ngochoko. Yehova avandaminyine swi nomu Lote navana venyi vahetele kunganda yaZowale hakiko jino “anokesele vula yasulufulu nakakahya haSotome.” (Kuputuka 19:22-24) Oloze omu Kalunga alumukile nakwivwila keke vatu vamuNyineve, Yona “evwile matoto chikuma.” Hakuwana nge Yona avilikile vyakunongesa vatu kana, ngocho asakile kumona Yehova mwavanongesa, chamokomoko namuchima vasolwele wakupihilila nakwalumuka.—Yona 3:10–4:1.

¹⁷ Yehova afwelelesele Apalahama ngwenyi, hakuwana nge eji kulinganga vyuma mujila yakwoloka, ngocho keshi kunongesa vaka-kwoloka hamwe navaka-kuhukako. Yona naikiye nawa atelelele kutachikiza ngwenyi Yehova apwa muka-kutetela. Nge muka-kuhuka mwaseza jijila jenyi, kaha ‘mwamukonekela.’ (Samu 86:5) Yehova kapwa ngana mwavatu vaze veji kulinganga vakwavo mwamupi mangana vavamone ngwavo vatwama nangolo, chipwe kushinganyeka ngwavo nge navapwa namuchima wakutetela kaha navavamona kupwa vakuhehelako. Kalunga eji kutetelanga vatu nge chinakusakiwa kulinga ngocho.—Isaya 55:7; Ezekele 18:23.

18. Hana vyakutalilaho vyamuMbimbiliya vize vyasolola nge Yehova kayula chamuyulilako.

¹⁸ Chipwe ngocho, muchima wakutetela atwama nawo  Yehova kawamulingisa aliule vaka-kuhukako. Omu vatu jenyi vandupukilile mukulemesa makombelo, ambile ngwenyi: “[Nangumisopesa] kweseka najijila jenu navilinga vyenu vyaunyengwe. Kangweshi kumivwila keke chipwe kumitetelako, oloze nangumizangamisa hajijila jenu.” (Ezekele 7:3, 4) Shikaho, Yehova eji kuzangamisanga vatu kachi nge navatwalaho lika kulinga vyuma vyavipi. Oloze kusopesa chenyi cheji kupendaminanga haunjiho wamwenemwene. Shikaho, omu Yehova evwile miteto yavaka-Sotome naNgomola, ambile ngwenyi: “Nanguyako ngumone numba nge vyuma vali nakulitetelelaho vyamuchano.” (Kuputuka 18:20, 21) Twasakwilila Yehova hakuwana nge kapwa ngana mwavatu vaze veji kukukululanga vihande chakuzeneka kwivwa unjiho wosenako. Chikupu vene, Yehova apwa ngana muze vamuvuluka muMbimbiliya ngwavo, “apwa Kalunga wakushishika uze keshi kuhengesa chiyuloko.”—Lushimbi lwamuchivali 32:4.

19. Natulinga ngachilihi nge katwevwishishileko ovyo Yehova avatwililile vihande vimwe mujila yimwe?

¹⁹ Mbimbiliya kayalumbununa vyuma vyosena vyasolola omwo Yehova asopeselelemo vatu kushikulu, chipwe kusolola omwo mwakalinga ngocho kulutweko. Kachi nge katwevwishishile vihande vimwe chipwe upolofweto umwe wamuMbimbiliya mwomwo yakuhona unjiho wauvuluko, kaha twatela kupwa vakushishika ngana muze alingile kapolofweto Mika, uze asonekele ngwenyi: “Nanguvandaminanga Kalunga muka-kungulwila.”—Mika 7:7.

20, 21. Mwomwo ika twatela kukunyukila ngwetu Yehova mwalinganga lika vyuma mujila yakwoloka?

²⁰ Tunafwelela ngwetu Yehova mwalinganga vyuma  mujila yakwoloka. Numba tuhu nachisoloka nge vatu vanaliula vaka-kuhengesa chiyulo, oloze Yehova ashika ngwenyi: “Kulinga sambanjinga chinapu chami, ami nangukavashishishilamo.” (Wavaka-Loma 12:19) Nge natupwa namuchima wakuvandamina, kaha natukunyuka ngana muze akunyukile kaposetolo Paulu, uze ambile ngwenyi: “Uno Kalunga eji kuhengesanga numba? Nduma.”—Wavaka-Loma 9:14.

²¹ Muholyapwa ngana, tuli nakuyoyela ‘mumakumbi akukuminyina amakalu.’ (WaChimoteu 2, 3:1) Kuhengesa chiyulo “[na]vilinga vyaluyanjisa” vinanehe ukalu waunene chikuma kuvatu. (Muka-kwambulula 4:1) Yehova kalumukako. Noholyapwa ahunga vaka-kuhengesa chiyulo, kaha nawa azakama vatu vaze vali nakulinga mwamupi. Shikaho, nge natutwalaho lika kupwa vakushishika kuli Yehova nakuwata wenyi, kaha mwatujikijisa omu tuli nakumona ukalu swi nahalwola atongola omu mwakolola vyuma vyosena muWangana wenyi.—WaPetulu 1, 5:6, 7.