1, 2. (a) Vihuli muka amwene Yosefwe? (b) Yehova akumishile ngachilihi vihuli kana?

 YOSEFWE uze apwile mukweze wamwaza vamuvangijikilile mulonga waunene chikuma. Vamukashile mukamenga mwomwo vamuvangijikilile ngwavo asakile kupika pwevo lyambala. Ou kawapwile mulonga watete kumuvangijikilako. Kunyima, ou mukweze wamyaka 17 vamufumbukilile kuli vandumbwenyi, kaha hasalile hahandende nakumujiha. Oloze vamulanjishile muundungo kulifuchi lyeka. Kulifuchi kana kukiko vamushinjililenga kuli pwevo lyakaka yenyi mangana alisavale nenyi, oloze ikiye akanyinenga. Uze pwevo hakumona ngwenyi Yosefwe namukane, amutungililile chihande nakumulingisa jino vamukase mukamenga. Chaluvinda Yosefwe asolokele nge kapwile namutu wakumuhakwilako.

² Oloze Kalunga uze “azanga kwoloka nachiyulo” apwile nakumona vyuma vyapwilenga nakulingiwa. (Samu 33:5) Yehova engilile hachihande chaYosefwe nakwolola vyuma, kaha vamufumishile mukamenga. Kufumaho, Yosefwe vamutongwele nakumuhaka hachihela chachinene chaulemu. (Kuputuka 40:15; 41:41-43; Samu 105:17, 18) Yosefwe vamusambishile jino, ngocho azachishile ngolo apwile najo mangana alingise vyuma ajinyine Kalunga vitesemo.—Kuputuka 45:5-8.

3. Mwomwo ika katweshi kulikomokelako hakuwana nge tuvosena twasaka vihande vyetu vaviyule mwakwoloka?

³ Mijimbu yangana yeji kutuvendejekanga, nyi mweka? Iya kanda vavangijikilengaho lyehi chipwe kumona  mutu navamuvangijikila mulonga? Tuvosena twasaka vihande vyetu vaviyule mujila yamwaza kaha nawa yakwoloka, mwomwo Yehova atutenga navilinga vize vyeji kusololanga omwo apwa, kaha havilinga vyenyi vyavinene hatwama nachiyulo. (Kuputuka 1:27) Hakusaka tutachikize kanawa Yehova, twatela chatete kwivwishisa omwo amona chiyulo. Echi nachitukafwa tumone ngwetu jijila jenyi japwa jakukupuka nakutulingisa jino tupandame kuli ikiye.

4. Uno vatu vamona ngwavo chiyulo chapwa ngachilihi?

⁴ Vatu vamona ngwavo chiyulo chapwa kukavangiza kanawa jishimbi. Mukanda umwe wahanjika ngwawo, “chiyulo chasakiwa kukavangiza jishimbi, navilika namilimo vatuhana kuzata, kaha vatu veji kuvafwetanga chipwe kuvazangamisa kweseka namuze vanakula kuvyuma kanevi.” (Right and Reason—Ethics in Theory and Practice) Oloze chiyulo chaYehova kachapendamina kaha hakukavangiza jishimbi kwijiva nge hichilikako.

5, 6. (a) Uno mazu amulilimi lyakulivanga aze valumuna ngwavo “chiyulo” alumbunukila mulihi? (b) Uno mazu akwamba ngwavo Kalunga apwa wachiyulo alumbununa ika?

⁵ Hakusaka twivwishise mwalumbunukila chiyulo chaYehova, twatela kutala kanawa hamazu amulilimi lyakulivanga vazachishile hakusoneka Mbimbiliya. MuVisoneka VyachiHepeleu, vazachisa mazu amalemu atatu. Lizu vavula kwalumuna ngwavo “chiyulo” vanahase kulyalumuna nawa ngwavo “kulinga mwamwaza.” (Kuputuka 18:25) Kaha mazu akwavo avali vavula kuwalumuna ngwavo “kwoloka.” MuVisoneka VyachiHelase vyaVaka-Kulishitu, lizu valumuna ngwavo “kwoloka” valilumbununa ngwavo “kupwa wakwoloka chipwe kuyula mwakwoloka.” Shikaho kahatwama chihandwa  chachinene halizu kwoloka nachiyuloko.—Amose 5:24.

⁶ Shikaho, nge Mbimbiliya nayamba ngwayo Kalunga apwa wachiyulo, yili nakutulweza ngwayo eji kulinganga mwakusungama, kaha keshi kutala vatu kumesoko. (Wavaka-Loma 2:11) Chikupu vene, keshi kuhengesa chiyuloko. Elihu lunga wakushishika ambile ngwenyi: “Nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.” (Yopa 34:10) Eyo, Yehova ‘kahengesa chiyuloko.’ Mwomwo ika? Mwomwo yavyuma vivali vyavilemu.

7, 8. (a) Mwomwo ika natuhanjikila ngwetu Yehova keshi kalinga mwakuhengako? (b) Vyuma muka vyeji kulingisanga Yehova alinge mwakwoloka chipwe ngwetu mwachiyulo?

⁷ Chatete, apwa wajila. Ngana muze twamonanga lyehi muKapetulu 3, Yehova apwa wakulonga kaha nawa apwa wakwoloka. Ngocho keshi kulinga mwakuhengako. Achitale omwo chalumbunukila chishina kana. Twatela kufwelela ngwetu Setu wamwilu hakupwa wajila, keshi kayanjisa vana venyiko. NaYesu afwelelele vene ngocho. Haufuku wenyi wakukumishilako hano hamavu, alombele ngwenyi: “Ove Tata Wajila, valame mwomwo yalijina lyove eli unanguhane ami.” (Yowano 17:11) MuVisoneka, hanjikiso yakwamba ngwavo “Tata Wajila” vayizachisa kaha kutalisa kuli Yehova uka wenyi. Echi chakutamo mwomwo kakweshi chisemi uze nahase kupwa wajila nge Yehovako. Yesu afwelelele chikupu ngwenyi tumbaji twenyi navakavalama kuli Ise, uze apwa utoma, wakuzeneka shili.—Mateu 23:9.

⁸ Chamuchivali, lwola lwosena Kalunga atwama nazangi kaha nawa eji kulingilanga vatu vyuma vyamwaza. Eyi zangi yikiko yeji kumulingisanga alinge  mwakwoloka kuvatu. Oloze kakavulu vilinga vyakuhenga vyosena, vyakufwana nge kulitala havikova, kulimona ulumbi nakutala vatu kumeso, vyeji kwizanga mwomwo yalwiso namuchima walizangamina. Oloze zangi kayapwa ngochoko. Mbimbiliya yatufwelelesa hazangi yaKalunga ngwayo: “Yehova apwa wakwoloka, azanga vilinga vyakwoloka.” (Samu 11:7) Yehova ambile ngwenyi: “Ami Yehova ngunazange chiyulo.” (Isaya 61:8) Uno katwevwa kuwaha kutachikiza ngwetu Kalunga azanga kulinga mwakwoloka, chipwe ngwetu mwachiyuloko tahi?—Yelemiya 9:24.

9-11. (a) Uno chiyulo chaYehova chatambukila ngachilihi hamwe namuchima wenyi wakeke? (b) Uno Yehova eji kusololanga ngachilihi chiyulo nakeke kuli vaka-shili?

⁹ Chiyulo chaYehova chapwa chakukupuka ngana mwavilinga vyenyi vikwavo vyavinene. Mose asangejekele Yehova ngwenyi: “Ikiye Lilolwa, milimo yenyi yapwa yakukupuka mwosena, jijila jenyi josena jakwoloka. Apwa Kalunga wakushishika uze keshi kuhengesa chiyuloko. Apwa wakwoloka, wakusungama.” (Lushimbi lwamuchivali 32:3, 4) Yehova eji kuyulanga mujila yamwenemwene.

¹⁰ Chiyulo chaYehova chatambukila hamwe namuchima wenyi wakeke. Mukanda waSamu 116:5 ngwawo: “Yehova apwa muka-kutetela, wakwoloka [chipwe ngwetu “wachiyulo,” kweseka naMbimbiliya yaThe New American Bible]. Kalunga ketu apwa wakeke.” Eyo, Yehova apwa wachiyulo nakeke, kahevi vyuma vivali kavyalimbalakako. Keke eji kusololanga kayalumbununa nge  atwama nachiyulo chakuhenga numba ayule mwakwolokako. Oloze eji kulinganga mwachiyulo nakeke halwola lwolumwe. Tushimutwile hachakutalilaho chimwe.

¹¹ Vatu vosena vasemuka nashili, ngocho vosena kachi vatela kufwa. (Wavaka-Loma 5:12) Oloze Yehova keshi kwivwila kuwaha kufwa chavaka-shiliko. Apwa “Kalunga muka-kukonekela, wakutetela, wakeke.” (Nehemiya 9:17) Chipwe ngocho, ikiye hakupwa wajila, keshi kwechelela vatu valingenga shiliko. Uno nahase kwivwila ngachilihi vaka-shili keke? Kukumbulula natuchiwana mumuchano waulemu wamuMazu aKalunga, wakwamba ngwavo Yehova alongesele vatu ndando yakusokola. Natukalinangula vyavivulu hakulongesa kanechi chazangi muKapetulu 14. Kulongesa kana chasolola hatoma chiyulo nakeke yayinene. Eyi yikiko jila yize Yehova eji kusolwelangamo keke kuli vaka-shili vaze vanapihilila nakwalumuka, oku nawa ali nakusolola chiyulo chenyi chakukupuka.—Wavaka-Loma 3:21-26.

12, 13. (a) Mwomwo ika chiyulo chaYehova cheji kutupandamishilanga kuli ikiye? (b) Uno Ndavichi akukulwile ngwenyi ika kutalisa kuchiyulo chaYehova, kahechi chatuvendejeka ngachilihi?

¹² Chiyulo chaYehova kachapwa chachipi numba chitusosolole kuli ikiyeko. Oloze chapwa hichiyulo chamwaza chize cheji kutulingisanga tupandame kuli ikiye. Mbimbiliya yalumbununa omwo chiyulo chipwe ngwetu kwoloka chenyi cheji kumulingisanga kupwa muka-kutetela. Tutale hajijila jimwe jamwaza jize Yehova eji kusolwelangamo chiyulo.

¹³ Chiyulo chaYehova chakukupuka cheji kumulingisanga apwenga wakushishika kaha nawa wakashishi kuli  vangamba jenyi. Muka-kwimba jisamu Ndavichi, amwene omwo Yehova asolwele chiyulo. Uno vyuma ahichilemo Ndavichi navize alinangwile kujijila jaKalunga, vyamulingishile akukulule ngwenyi: “Yehova azanga chiyulo, kaha keshi kusuvilila vatu jenyi vakushishikako. Mwavalamanga lwola lwosena.” (Samu 37:28) Mazu kana apwa akutuvendejeka chikupu. Kalunga ketu keshi kukavulyama vaze vashishika kuli ikiyeko. Shikaho twatela kufwelela ngwetu, keshi kukatusosolokako, kaha nawa mwatuzakamanga. Chiyulo chenyi chikiko chatela kutulingisa tufwelele chuma kana.—Vishimo 2:7, 8.

14. Uno Jishimbi jize Yehova ahanyine vaIsalele jasolola ngachilihi muchima wenyi wakuzakama vatu vaze vali muukalu?

¹⁴ Kalunga hakupwa wachiyulo, eji kutachikizanga vyuma vyasakiwa kuli vaze vali nakuyanda. Muchima waYehova wakuzakama vatu vali muukalu tweji kuumwenanga haJishimbi ahanyine vaIsalele. Chakutalilaho, Jishimbi jahanjikile ngwajo vanginga navatuliwe vatelelele kuvazakama. (Lushimbi lwamuchivali 24:17-21) Yehova hakutachikiza ngwenyi jitanga kana jinahase kumona ukalu waunene, alilingishile jino kupwa ikiye sevo Muka-kuvayula, kaha nawa Muka-kuvalama, uze eji “kulinganga mwachiyulo kuli vana vakuzeneka masevo navatuliwe.” a (Lushimbi lwamuchivali 10:18; Samu 68:5) Yehova alwezele vaIsalele ngwenyi nge navayanjisa vatuliwe chipwe vanginga, mwevwa miteto yavo. Kaha  ambile ngwenyi: “Nangupihilila chikuma.” (Kulovoka 22:22-24) Numba tuhu Yehova katenuka lwola lwosenako, oloze eji kupihililanga kachi nge vatu navayanjisa vakwavo, chikumanyi kuyanjisa vaka-kuhutwa chipwe kulisa vakwavo nachikela.—Samu 103:6.

15, 16. Chakutalilaho muka chachilemu chize chasolola nge Yehova katala vatu kumesoko?

¹⁵ Yehova atufwelelesa nawa ngwenyi, “keshi kutala vatu kumesoko, kaha nawa keshi kutambula maswekezako.” (Lushimbi lwamuchivali 10:17) Yehova kapwa ngana mwavatu vaze veji kutalanga haupite wamutu chipwe hapuho yenyiko. Ikiye katala vatu kumesoko. Achitale hachakutalilaho chachilemu chize chasolola nge Yehova katala vatu kumesoko. Nahane lisesa vatu vosena vaze navasaka kupwa vaka-kumulemesa vamuchano, vakayoye haya myaka. Mbimbiliya ngwayo: “Muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.” (Vilinga 10:34, 35) Elu lushiko kana valuhana kuvatu vakuvisemwa vyosena, nakuli vaka-vikova vyosena, navatu vakumafuchi osena. Chikupu vene, echi hichiyulo chamwenemwene.

¹⁶ Tutale nawa hajila yikwavo yize Yehova eji kusolwelangamo chiyulo chenyi chamwenemwene. Jila kana shina omwo eji kumwenangamo vatu vaze veji kuhokolanga jishimbi jenyi.

17. Uno vyuma vyavipi vili nakusoloka mukaye vyasolola nge Yehova katwama nachiyuloko tahi? Lumbununa.

¹⁷ Vatu vamwe vanahase kuhulisa ngwavo: ‘Nge chikupu vene Yehova ahunga vilinga vyakuhenga, kaha mwomwo  ika tuli nakumwena vihuli navyuma vyavipi mukaye kosena makumbi ano?’ Oloze vyuma kana kavyeshi nakusolola nge Yehova katwama nachiyuloko. Vihuli vyavivulu vali nakumona vatu mukaye kano kakuhuka, vyeza mwomwo yashili vaswana vatu kuli Alama. Kaha nawa mukaye muli vihuli vyavivulu mwomwo vatu vakuhona kukupuka vasaka kulinga mwaya michima yavo yashili. Oloze vihuli kana kavyeshi kukatwalaho likako.—Lushimbi lwamuchivali 32:5.

18, 19. Vyuma muka vyasolola nge Yehova keshi kukechelela vatu vakatwaleho lika kuhokolanga jishimbi jenyi jakwolokako?

¹⁸ Numba tuhu Yehova eji kwivwilanga keke vatu vaze veji kupandamanga kuli ikiye namichima yavo yosena, oloze keshi kukechelela vilinga vyavipi vize navineha katombo halijina lyenyiko. (Samu 74:10, 22, 23) Naumwe wauchi nahase kuhulamisa Kalunga wachiyulo. Shikaho keshi kukechelela vaka-kulinga shili yakulisakila, vaze atela kuzangamisa kweseka navilinga vyavoko. Yehova apwa “Kalunga wakeke nakutetela, wakushipwokela kukwata utenu, wazangi yakwilila, wamuchano. . . Oloze keshi kukahona kuzangamisa vatu vakuzeneka kupihilila nakwalumukako.” (Kulovoka 34:6, 7) Omu mukiko Yehova nalinginga. Shimbu jimwe nazangamisanga vatu vaze vanapunga nakuhokola jishimbi jenyi jakwoloka mukulisakila.

¹⁹ Chakutalilaho, achishinganyeke havyuma alingilenga Kalunga kuli vaIsalele vakushikulu. Valikangilenga kuli ikiye mapapa kakavulu nomu alingile navahetesa lyehi muLifuchi lyaLushiko. Numba tuhu vilinga vyavo ‘vyamwivwishilenga kukola kumuchima,’ oloze kavambilile washiko. (Samu 78:38-41) Avevwilililenga keke nakuvalembelela valumuke. Avalembelelele ngwenyi: “Kangweshi kwivwila kuwaha kufwa  chamuka-kuhukako. Oloze ngwasaka muka-kuhuka aseze jijila jenyi nakuyoya lika. Shikaho sezenu, sezenu vilinga vyenu vyavipi. Ikaze namufwila enu vakuzuvo yaIsalele?” (Ezekele 33:11) Yehova atuminenga vapolofweto mapapa kakavulu mangana ngwenyi vaIsalele vaseze jijila javo jajipi mwomwo amona kuyoya chavatu kupwa chachilemu. Oloze vakiko vakaluhwishile michima yavo, nakukana kumwivwilila chipwe kwecha vilinga vyavo vyavipi. Jino Yehova hakusaka kuhakwila lijina lyenyi lyajila, navilinga vyenyi vitoma, avechelelenga vavafungulule kuli vaka-kole javo.—Nehemiya 9:26-30.

20. (a) Uno vyuma alingilenga Yehova kuli vaIsalele vyatunangula ika hali ikiye? (b) Mwomwo ika chapwila chakutamo kufwanyisa chiyulo chaYehova kuli ndumba?

²⁰ Vyuma muka natulinangula hali Yehova hakukekesa vyuma alingilenga kuli vaIsalele? Natulinangula chishina chino: Meso enyi aze eji kumonanga vyuma vyosena eji kumonanga navilinga vyavipi, kaha echi cheji kumwivwisanga kukola kumuchima. (Vishimo 15:3) Natuwana nawa nge eji kwivwilanga vatu keke nge chinatemo  kulinga ngocho. Kaha nawa, eji kutalililanga vatu chikoki nakuvahana lwola valumuke. Hakuwana nge Yehova apwa muka-kutalilila vatu chikoki, ngocho vavavulu vakukulula ngwavo pamo keshi kukasopesa vaka-kuhukako. Oloze omu keshi mukikoko, mwomwo vyuma alingile kuli vaIsalele vyatunangula nawa nge muchima wenyi wakutalilila watwama noho wakumina. Yehova mwatwalaho kulinganga mwakwoloka. Kapwa ngana mwavatu vaze veji kuhonanga kuhamuka mangana vayule mwakwolokako, oloze lwola lwosena mwalinganga mwakwoloka. Echi chikiko chalingisa chiyulo chenyi chaundume nalitanda lyenyi vavifwanyise kuli ndumba. b (Ezekele 1:10; Kusoloka 4:7) Shikaho, twatela kufwelela ngwetu Kalunga mwakatesamo lushiko lwenyi lwakukafumisaho vihuli hano hamavu. Tunahase kukukulula jino ngwetu, eji kuzangamisanga vaka-kulinga vyuma vyavipi nge chili nakusakiwa kulinga ngocho mwomwo yachiyulo chenyi, nakusolola nawa keke hosena oho nachisakiwila kulinga ngocho.—WaPetulu 2, 3:9.

21. Omu natuhunanananga hajila Yehova eji kusolwelangamo chiyulo chenyi, twatela kumumonanga ngachilihi, kaha mwomwo ika?

²¹ Omu natuhunanananga hachiyulo chaYehova, katwatela kushinganyeka ngwetu apwa muka-kuyula wamukalu muchima nautenu, uze eji kwivwanga kuwaha kusopesa vaka-kuvulumuna milongako. Oloze twatela kumumonanga ngwetu hiSetu wazangi, muka-kuyula wakuhamuka kaha nawa eji kulingilanga vana venyi vyuma vyamwaza. Yehova hakupwa Setu wachiyulo nakwoloka, eji kuzangamisanga nakutetela vana venyi  vahamavu vaze navasaka kuvakafwa nakuvakonekela.—Samu 103:10, 13.

22. Uno chiyulo chaYehova nachikamulingisa akatulingile vyuma muka, kaha mwomwo ika?

²² Twatela kumusakwilila chikuma Yehova hakutachikiza ngwetu, chiyulo chenyi kachalumbununa kuvandamina kaha mangana azangamise vaka-kupihisako. Eyo, Yehova hakupwa wachiyulo, atushika chuma chamwaza. Chuma kana shina kuyoya chakukupuka chakuzeneka kukuma, mukaye muze “namukapwanga kwoloka.” (WaPetulu 2, 3:13) Echi chasolola nge chiyulo chaKalunga ketu cheji kumulingisanga afwile kulwila vatu, keshi kuvazangamisako. Chikupu vene, kwivwishisa kanawa omwo chapwa chiyulo chaYehova, nachitupandamisa kuli ikiye. Mutupetulu vanakavangizaho, natushimutwila jino hajijila jize Yehova eji kuzachishilangamo chiyulo chenyi chakulipwila.