1, 2. Chakumwenesa muka amwene Isaya, kaha chatunangula vyuma muka hali Yehova?

 OMU Isaya amwene chakumwenesa chakufuma kuli Kalunga, evwile woma chikuma. Amwene kwijiva nge vyuma kana vili nakusoloka chikupu. Kufumaho Isaya asonekele ngwenyi, ‘amwene Yehova’ natwame halitanda lyenyi lyakuzezuka helu. Kaha chikuto chaYehova chachisuku chazalishile mutembele yayinene muYelusalema.—Isaya 6:1, 2.

² Isaya evwile nawa woma omu evwile vaka-kwimba vali nakwimbila helu chikuma, kaha nachihela chatembele chalinyikile. Mwaso kana vawimbile kuli vaselafwe, vaze vatwama hachihela chachilemu chikuma. Vembilenga mazu amashi, oloze apwile naulumbunwiso waulemu, ngwavo: “Wajila, wajila, wajila Yehova wamayongomena. Hamavu hosena hazala upahu wenyi.” (Isaya 6:3, 4) Kwimba lizu “wajila” mapapa katatu, chapwile hikushindakanya kulema chalizu kana, kaha chatelemo kulinga ngocho mwomwo Yehova apwa wajila chikuma. (Kusoloka 4:8) Kujila chaYehova vachivuluka kakavulu muMbimbiliya. Hajivesi jajivulu haze vavuluka lijina lyenyi, vavulukaho nalizu ‘kujila.’

3. Uno vishinganyeka vyavatu vyakuhenga kutalisa kukujila chaYehova vinalingisa ngachilihi vamwe vakane kupandama kuli Kalunga?

³ Echi chasolola nge Yehova asaka tutachikize chuma chachilemu chikuma hali ikiye. Asaka tutachikize ngwetu apwa wajila. Oloze vatu vavavulu kavasaka kushinganyeka hachuma kanako. Vamwe vashinganyeka ngwavo mutu uze ajila apwa mutu uze alimona kupwa wakwoloka  chipwe uze eji kulyonganga kuzachila Kalunga. Kaha vatu vaze vashinganyeka ngwavo vapwa vamokomoko vamona ngwavo, kaveshi kuhasa kupandama kuli Kalunga uze apwa wajilako. Shikaho, vatu vavavulu veji kukananga kupandama kuli Kalunga mwomwo ngwavo apwa wajila. Vishinganyeka kana vyakuhenga, mwomwo kujila chaKalunga chikiko chatela kutulingisa tupandame kuli ikiye. Mwomwo ika? Shimbu kanda tukumbulule chihula kana, tuvangile kushimutwila omwo chapwa kujila chamuchano.

4, 5. (a) Uno ‘kujila’ chalumbununa ika, kaha kachalumbununa ika? (b) Mujijila muka jivali jajilemu jize Yehova apwilamo ‘wakulihandula’?

⁴ Kalunga hakupwa wajila kachalumbununa nge apwa wakulivwimba, chipwe muka-kufwefululako. Oloze ahunga vilinga kana. (Vishimo 16:5; WaYakova 4:6) Uno lizu ‘kujila’ lyalumbununa ika? Kweseka nachiHepeleu chakushikulu, lizu kana lyafuma kulizu lize lyalumbununa “kulihandula.” Kaha lizu kana lyasolola kulihandula kuvyuma vimwe nakuzachila kaha Kalunga. Kujila nawa chalumbununa kupwa vaunyoji kaha nawa vatoma. Uno eli lizu lyatalisa ngachilihi kuli Yehova? Uno lyalumbununa nge ‘alihandula’ kuli yetu vatu vakuhona kukupuka tahi? Nduma.

⁵ Numba tuhu Yehova apwile “Wajila waIsalele” kaha vaIsalele nawa vapwile vaka-shili, oloze ambile ngwenyi apwile muli vakiko. (Isaya 12:6; Hozeya 11:9) Shikaho kujila chenyi kachamulingisa apwenga hahasuku navaka-kumulemesako. Jino apwa ngachilihi ‘wakulihandula’? Alihandula mujijila jajilemu jivali. Chatete, apwa wakulihandula kuvyuma vyakutenga vyosena mwomwo ikiye kaha uka wenyi apwa Wakulitulaho Chikuma.  Apwa utoma mwosena, waunyoji, kaha nawa wakukupuka. (Samu 40:5; 83:18) Chamuchivali, Yehova apwa wakulihandula kujishili josena, kahechi hichishina chamwaza chatela kutuvendejeka. Mwomwo ika?

6. Mwomwo ika kutachikiza ngwetu Yehova alihandula kushili chatela kutuvendejeka?

⁶ Muno mukaye twatwama, chapwa chachikalu kupwa vajila. Vyuma vyosena vyamukaye kano kakuhanduka kuli Kalunga vyapwa vyamajilo mwomwo yashili nakuhona kukupuka. Tuvosena tweji kulwanga nashili yize yatwama muli etu. Nge katwazangamineko, shili yinahase kutufungulula. (Wavaka-Loma 7:15-25; Wavaka-Kolinde 1, 10:12) Oloze shili kayeshi kuhasa kufungulula Yehovako. Katwama nashiliko, ngocho keshi kukalinga chuma chakuhengako. Echi chatufwelelesa nge Yehova apwa Setu wamwenemwene uze twatela kufwelela. Visemi jetu vakuhona kukupuka vanahase kutwivwisa kupihya mwomwo yakuhona kupwa vakushishika nakuzachisa ngolo javo mujila yakuhenga. Oloze Yehova keshi kukalinga ngochoko, mwomwo apwa wajila. Hakuwana nge lwola lumwe Yehova alishingilenga kujila chenyi hakushika jishiko, ngocho twatela kumufwelela. (Amose 4:2) Chuma kana chatela kutuvendejeka.

7. Mwomwo ika natuhanjikila ngwetu Yehova apwa wajila muvyuma vyosena?

⁷ Yehova apwa wajila muvyuma vyosena. Uno echi chalumbununa ika? Chakutalilaho: Etu vatu katwakupukako. Shikaho, nge naushinganyeka havatu, kaha naushinganyeka nawa hakuhona kukupuka chavo. Oloze nge naushinganyeka hali Yehova, kaha naushinganyeka nawa nahakujila chenyi, mwomwo apwa waunyoji, utoma, kaha nawa wakwoloka muvyuma vyosena. Katweshi kuhasa kutachikiza Yehova chakuzeneka kutachikiza ‘kujila’ chenyiko.

8, 9. Vyuma muka vyasolola nge Yehova akafwile vatu vakuhona kukupuka vapwenga vajila?

⁸ Hakuwana nge Yehova apwa wajila mwosena, ngocho tunahase kwamba ngwetu ikiye kasulu kakujila chosena. Echi kujila kachapwa kaha kuli Yehovako oloze eji kuchihananga nakuli vakwavo namuchima wakusuuluka. Achishinganyeke vyuma vyasolokele halwola luze Kalunga ahanjikile naMose kuhichila muli kangelo muchiputa chakakahya. Nahamavu haze emanyine Mose hapwile hajila mwomwo yaYehova uze apwile mwakamwihi kuhichila muli kangelo.—Kulovoka 3:5.

⁹ Uno vatu vakuhona kukupuka vanahase kupwa vajila hakuvakafwa kuli Yehova tahi? Eyo, vanahase kupwa vajila kuheta nahaseteko yimwe. Kalunga afwelelesele vatu jenyi vaIsalele ngwenyi mwakavalingisa kupwa “muyachi wajila.” (Kulovoka 19:6) Avakiswile hakuvalweza vamulemesenga mujila yajila, yaunyoji kaha nawa yitoma. Shikaho, echi chikiko chalingishile muJishimbi vahanyine Mose vahanjikemo chikuma vyakujila. Kapilishitu wakulitulaho avwalilenga lihina lyakujinga kumutwe lize lyapwile nakalilata kaulu kakuvyakuma haluholo, kaze vamwenenga kuvatu vosena. Kaha hakalilata kana vasonekeleho ngwavo, “Kujila chapwa chaYehova.” (Kulovoka 28:36) Shikaho Yehova asakile kulemesa chavaIsalele nachiyoyelo chavo chipwenga chaunyoji kaha nawa chitoma. Yehova avalwezele ngwenyi: “Pwenunga mwajila mwomwo ami Yehova Kalunga kenu ngwajila.” (VyavaLevi 19:2) Shikaho, kachi nge vaIsalele navazata noho hakumina ngolo javo mangana vakavangize jindongi jaKalunga, kaha Kalunga mwavamona kupwa vajila numba tuhu kavakupukako.

10. Chihandwa muka chapwile hali vaIsalele vakushikulu navaka-mafuchi vaze vavajingilikile kutalisa kukujila?

¹⁰ Kulweza vaIsalele vapwenga vajila mujila kaneyi,  chasolwele nge valemeselenga Kalunga mujila yize yalihandunwine navaka-mafuchi vaze vavajingilikile. Ava vaka-mafuchi, valemeselenga tulunga vamakuli, tulunga vaze vavulukilenga kupwa vaukenya, valifwi, kaha nawa vavilinga vyaunyengwe. Tulunga kana kavapwile vajila numba chachindendeko. Kaha kulemesa tulunga kana chalingishile vatu vahone kupwa vajila. Echi chalingishile Yehova ahuhumune vatu jenyi valihende kuvatu kana nakukwitava chavo.—VyavaLevi 18:24-28; Vamyangana 1, 11:1, 2.

11. Uno kujila chachihanda chaliuka lyaYehova chamwilu chasoloka ngachilihi (a) muvangelo? (b) muvaselafwe? (c) muli Yesu?

¹¹ Numba tuhu vaIsalele vakushikulu vaze vapwilenga muyachi uze asakwile Yehova, vazachilenga nangolo vapwenga vajila, oloze kujila chavo kachesekele hamwe nachavaze vatwama muchihanda chaliuka lyaKalunga chamwiluko. Vangelo vavavulu vaze veji kuzachilanga Kalunga nakashishi vavavuluka kupwa “mayongomena [enyi] ajila.” (Lushimbi lwamuchivali 33:2; WaYuta 14) Veji kulondezezanga kujila chaKalunga mujila yakukupuka. Kaha nawa achishinganyeke hali vaselafwe vaze amwene Isaya muchakumwenesa. Vyuma vembile mumwaso wavo vyasolwele kulema chamulimo veji kuzatanga hakulingisa kujila chaYehova vachitachikize mwilu nahamavu. Oloze kwatwama kangelo wakulitulaho chikuma. Kangelo kana shina Mwana Kalunga umwe kaha wakulipwila. Yesu eji kusololanga kujila chaYehova mujila yakukupuka chikuma. Shikaho, vamuvuluka ngwavo “Ou Wajila waKalunga.”—Yowano 6:68, 69.

12, 13. (a) Mwomwo ika lijina lyaKalunga valivulukila ngwavo lyajila? (b) Mwomwo ika lijina lyaKalunga vatela kulilingisa kupwa lyajila?

¹² Nyi ngachilihi vyalijina lyaKalunga? Ngana muze twamonanga  muKapetulu 1, lijina kana kalyapwa hivulukiso chipwe katachikijiloko. Eli lijina lyasolola omwo apwa Yehova Kalunga navilinga vyenyi vyosena. Shikaho Mbimbiliya yatulweza ngwayo “lijina lyenyi lyajila.” (Isaya 57:15) Kalunga alwezele vaIsalele kuhichila muJishimbi ahanyine Mose ngwenyi, weshowo mwasaula lijina lyaKalunga vatela kumujiha. (VyavaLevi 24:16) Kaha nawa achishinganyeke hachuma chachilemu avulukile Yesu chize twatela kuvangila kuvuluka mukulomba. Ambile ngwenyi: “Ove Setu uli mwilu, lijina lyove lipwenga lyajila.” (Mateu 6:9) Kulingisa chuma kupwa chajila chalumbununa kuchihandula kuvikwavo nakuchimona kupwa chakulipwila. Hakuwana nge lijina lyaKalunga lyapwa lyehi lyajila, jino mwomwo ika lijina kana vatela kulilingisa kupwa lyajila?

¹³ Lijina lyaKalunga lyajila vanalisaulanga namakuli avaka-kole jenyi. Satana ahanjikile makuli mumilemba yaEtene hali Yehova nakusolola ngwenyi Yehova apwa Muka-kuyula wamupi. (Kuputuka 3:1-5) Kufuma vene halwola kana, Satana uze apwa muka-kuyula kano kaye wakuhona kujila natanjisanga mijimbu yamakuli hali Kalunga. (Yowano 8:44; 12:31; Kusoloka 12:9) Mauka akwitava chamakuli anasololanga ngwawo Kalunga apwa wamukalu muchima, kazakama vatuko, kaha nawa waukenya. Veji kwambanga ngwavo Kalunga ikiye eji kuvakafwanga hakulwa jita. Muchishishisa chakwalisa Kalunga havyuma vyakukomowesa atenga, oloze vatu vavavulu vafwelela ngwavo vyuma vyalijililile vivene. Chikupu vene, vaka-kole jaKalunga vanapihisa lijina lyenyi namakuli kana. Echi chikiko lijina kana lyasakiwila kulilingisa kupwa lyajila nakulivumbika. Tuli nakutalilila kulikumbi lize Yehova mwakalingisa lijina lyenyi kupwa lyajila haya myaka. Mwakalinga ngocho kuhichila muWangana  uze navakayula kuli Mwanenyi. Chikupu vene, twawahilila hakuzata noho hakumina ngolo jetu mangana tukundwize vyuma ajina Kalunga.

14. Mwomwo ika shipilitu yaKalunga vayivulukila ngwavo yajila, kaha mwomwo ika kusaula shipilitu yajila wapwila mulonga waunene?

¹⁴ Kuli nawa chuma chikwavo chize vavuluka kakavulu kupwa chajila, kaha nawa chafuma kuli Yehova. Chuma kana shina shipilitu yenyi, chipwe ngwetu ngolo jenyi. (Kuputuka 1:2) Yehova eji kuzachisanga ngolo kana mangana atesemo vyuma ajina. Kalunga eji kulinganga vyuma vyosena mukujila, namujila yitoma, yaunyoji. Ngocho ngolo jenyi vajivuluka ngwavo shipilitu yajila. (Luka 11:13; Wavaka-Loma 1:4) Shikaho kusaula shipilitu yajila chapwa kufumbukila vyuma ajina Yehova, kaha cheji kulingisanga mutu vahone kumukonekela jishili jenyi.—Mako 3:29.

15. Uno kujila chaYehova chatela kutukunyula tulinge ika?

¹⁵ Twatachikiza vyuma vyalingisa Mbimbiliya yambenga ngwayo vatu vatela kwivwa Kalunga woma mwomwo apwa wajila. Chakutalilaho, hali Samu 99:3 vasonekaho ngwavo: “Valisenga lijina lyove lyalinene mwomwo lyapwa lyakwivwisa woma kaha nawa lyajila.” Echi chalumbununa nge twatela kuvumbika chikuma Yehova nalijina lyenyi. Kaha omu mukiko chatela kupwa mwomwo kujila chaKalunga chahambakana chikuma kujila chetu. Chapwa chitoma, kaha nawa chaupahu. Chipwe ngocho, katwatela kumuchinako. Oloze nge natumona kujila chaKalunga mujila yamwaza, kaha nachitulingisa tupandame chikuma kuli ikiye. Mwomwo ika?

16. (a) Mwomwo ika natwambila ngwetu kujila chatambukila hamwe naupahu chipwe ulangaji? Hana chakutalilaho. (b) Uno Mbimbiliya yalumbununa ngachilihi ulangaji waKalunga ketu uze apwa wajila?

 ¹⁶ Tachikiza ngwove Mbimbiliya yasolola ngwayo kujila chatambukila hamwe naupahu chipwe ulangaji. Hali Isaya 63:15, mwilu vavulukamo ngwavo mwapwa ‘muchihela chaKalunga chahelu chajila, chaupahu.’ Tuvosena twasaka vyuma vize vyeji kusololanga upahu, chipwe ulangaji. Chakutalilaho, tala muvwimbimbi uli halifwo 39. Kutala unauzange tahi? Mwomwo ika unauzangila? Meya kana amwaza, atoma. Chinasoloka nawa nge kuli napeho yamwaza, mwomwo utangatanga uli nakusoloka kwijiva taunuku, namusana nawa zwalala. Jino achishinganyeke nge echi chihela navachipihisa, nakumbila majilo mukalwiji, nakufunjejeka hamitondo nakukwenga hamalolwa, kaha nawa nge nakupwa vyuma vize navipihisa peho. Kutala chihela kana nauchizanga tahi? Tunafwelela kaweshi kuchizangako. Chikupu vene, ulangaji, chipwe ngwetu upahu watambukila hamwe naunyoji, nakutoma, nakumunyika. Mazu kana tunahase kuwazachisa hakulumbununa kujila chaYehova. Shikaho, tweji kwivwanga kuwaha kutanga vyuma vyalumbununa ulangaji waYehova. Chakutalilaho, Mbimbiliya yalumbununa Kalunga ketu uze apwa wajila ngwayo, natwame halitanda mwilu, kaha nawa ngwayo eji kumunyikanga nge malolwa akuvyakuma andando yayinene, nge kwepuka chamilangi yakakahya.—Ezekele 1:25-28; Kusoloka 4:2, 3.

17, 18. (a) Uno Isaya evwile ngachilihi hakavanga omu amwene chize chakumwenesa? (b) Uno Yehova azachishile ngachilihi selafwe mangana avendejeke Isaya, kaha vyuma alingile ou selafwe vyapwile naulumbunwiso muka?

¹⁷ Kutala kujila chaKalunga chatela kutulingisa tulivwe kupwa tuvakukuminamo tahi? Tunahase kukumbulula ngwetu eyo. Chikupu vene, twapwa tuvakukuminamo  hakutwesekesa kuli Yehova. Uno echi chatela kutulingisa tuhone kupandama kuli ikiye tahi? Achishinganyeke omwo Isaya evwile hakwivwa vaselafwe vali nakuvilika kujila chaYehova. Isaya ambile ngwenyi: “Mama lelo ngunafu! Mwomwo mivumbo yami kayatomako, kaha vatu ngwatwama navo nawa mivumbo yavo kayatomako. Mwomwo meso ami anamono Mwangana, Yehova wamayongomena.” (Isaya 6:5) Chikupu vene, kujila chaYehova chanukishile Isaya atachikize ngwenyi apwa muka-shili, kaha nawa kakupukako. Hakavanga, ou lunga wakushishika ahombele hakumona vyuma kana. Oloze Yehova kamwechelelele atwaleho lika kuhombako.

¹⁸ Yehova atumine washiwashi selafwe avendejeke ou kapolofweto. Uno amuvendejekele ngachilihi? Ou kangelo atukile nakuya kulijiko lyakulumbila nakumbatako likala lyakakahya, kaha alinangikile hamivumbo yaIsaya. Echi chinahase kusoloka nge amwivwishile kukola, keshi kumuvendejekako. Oloze tachikiza ngwove, echi chapwile kaha chakumumwenesa, chize chapwile naulumbunwiso wachifwanyisa. Isaya uze apwile kaYuleya wakushishika, atachikijile ngwenyi mawana vawalumbilenga hakumbi hakumbi halijiko lyakulumbila lyahatembele mangana afwike hashili. Kaha uze selafwe anukishile ou kapolofweto ngwenyi, numba tuhu kapwile wakukupukako, kaha nawa kapwile ‘namivumbo yitomako,’ oloze nahase kupwa utoma kumeso aKalunga. a Yehova amwene ou lunga muka-shili kaha nawa wakuhona kukupuka kupwa wajila, kuheta nahaseteko yimwe.—Isaya 6:6, 7.

19. Mwomwo ika Yehova mwatumwena kupwa vajila numba tuhu katwakupukako?

 ¹⁹ Omu mukiko ali nakulinga Yehova nakuli yetu makumbi ano. Mawana osena aze valumbilenga halijiko lyakulumbila muYelusalema apwile muvwimbimbi wavyuma vyamwenemwene vyapwile nakwiza kulutwe. Vyuma kana shina wana wakukupuka uze Yesu Kulishitu ahanyine mu 33 C.E. (WavaHepeleu 9:11-14) Shikaho, nge natupihilila nakwalumuka, nakwolola vilinga vyetu vyakuhenga nakufwelela muwana kana, kaha navatukonekela. (WaYowano 1, 2:2) Nayetu tunahase kupwa vatoma kumeso aKalunga. Shikaho kaposetolo Petulu atwanukisa ngwenyi: “Vasoneka ngwavo: ‘Pwenunga mwajila mwomwo ami ngwajila.’” (WaPetulu 1, 1:16) Tachikiza ngwove, Yehova kahanjikile ngwenyi twatela kupwa vajila ngana muze apwa ikiyeko. Katulweza kulinga vyuma vize katweshi kuhasa kulingako. (Samu 103:13, 14) Oloze Yehova atulweza tupwenga vajila mwomwo ikiye apwa wajila. ‘Hakupwa tuvana venyi azanga,’ twasaka kuzata noho hakumina ngolo jetu mangana tumulondezeze, numba  tuhu katwakupukako. (Wavaka-Efwesu 5:1) Shikaho, twatela kutwalaho lika kukilikita tupwenga vajila. Omu tuli nakuzovoloka kushipilitu, tweji kuzatanga nangolo mangana ‘tukupwisenga kujila chetu’ hakumbi hakumbi.—Wavaka-Kolinde 2, 7:1.

20. (a) Mwomwo ika chapwila chachilemu kutachikiza ngwetu tunahase kupwa vatoma kumeso aKalunga? (b) Uno Isaya evwile ngachilihi hakutachikiza ngwenyi jishili jenyi vanamukonekelajo?

²⁰ Yehova azanga vyuma vyakwoloka kaha nawa vitoma. Ahunga shili. (Hambakuke 1:13) Oloze kahunga etuko. Shikaho, kachi nge natumona shili ngana muze ayimona Yehova, kaha natuhunga vyuma vyavipi nakuzanga vyuma vyamwaza, nakufwila nawa kuzata nangolo mangana tukavangize mujitambo jaYesu Kulishitu jakukupuka. Kaha nawa Yehova mwatukonekela jishili jetu. (Amose 5:15; WaPetulu 1, 2:21) Kutachikiza ngwetu tunahase kupwa vatoma kumeso aKalunga ketu wajila nachitukafwa chikuma. Anuka ngwove, hakavanga kujila chaYehova chanukishile Isaya amone ngwenyi kapwa utomako. Isaya alilile ngwenyi: “Mama lelo ngunafu!” Oloze omu atachikijile ngwenyi shili yenyi vanayifwiki lyehi, evwile jino nakumuchima hwo. Omu Yehova apwile nakutonda mutu mwalisuula kuya nakuzata milimo, Isaya etavilile washiwashi numba tuhu kejivile mulimo navamuhanako. Akumbulwile ngwenyi: “Yami uno. Ngutume.”—Isaya 6:5-8.

21. Mwomwo ika tunafwelela ngwetu tunahase kupwa vajila?

²¹ Hakuwana nge vatutenga muchifwanyisa chaKalunga wajila, shikaho tunahase kumulondezeza nakupandama kuli ikiye. (Kuputuka 1:26) Tuvosena tunahase kupwa vajila. Yehova mwatukafwa nge natutwalaho kuzata nangolo mangana tupwenga lika vajila. Ngocho natutwalaho lika kupandama kuli Kalunga ketu wajila. Mutupetulu vanakavangizaho, natushimutwila havyuma vyavivulu vize navitulingisa tupandame chikuma kuli Kalunga.