1-3. (a) Solomone asolwele ngachilihi mangana akulipwila hakukekesa jila avatwililemo chihande chamapwevo vavali? (b) Yehova atushika kukatuhana ika, kaha vihula muka natushimutwila?

 CHIHANDE chamapwevo vavali vaze vapwile nakuzungila kemba chapwile chachikalu chikuma kuvatula. Mapwevo kana vatwaminenga muzuvo yoyimwe, kaha vosena vasemene vana vamalunga vaze valisezele namakumbi amandende kaha. Kemba umwe afwile, kaha vaze mapwevo valizungililile mwana uze asalileho, ou ngwenyi mwanami mukwavo nawa ngwenyi mwanami. a Kakwapwile vinjihoko. Echi chihande pamo vavangililile kuchitwala kuzango yayindende oloze vachihonene. Kufumaho, vachitwalile kuli Solomone, mwangana wavaIsalele. Kutala ahashile kuvatula chihande kana tahi?

² Solomone avangililile kuvevwilila omu vapwile nakulikokojwesa, kufumaho atumine mutu amunehele poko yamukwale. Kaha alwezele vatu vapule uze mwana mukachi, nakuhana ou chihanda ou chihanda. Naye yauze mwana alembelelele mwangana ahane tuhu uze mwana kuli mukwavo. Oloze uze mukwavo atwalileho kwamba ngwenyi kuvanga vamupule vene mukachi. Solomone atachikijile jino muchano. Atachikijile keke atwama nayo  chisemi wapwevo hali mwanenyi wakulisemena, ngocho azachishile chinyingi kana mangana avatule chize chihande. Achihumikize omwo evwile naye yauze mwana omu Solomone amuhanyineyo nakwamba ngwenyi: “Ou ikiye vene naye.”—Vamyangana 1, 3:16-27.

³ Awa apwile mangana akulipwila chikupu. Vatu valikomokelele hakumona jila Solomone avatwilililemo chihande kana, “mwomwo vamwene ngwavo Kalunga namuhane mangana.” Eyo, mangana aSolomone apwile hiwana amuhanyine Kalunga. Yehova amuhanyine “muchima wamangana, wakunangakana.” (Vamyangana 1, 3:12, 28) Nyi ngachilihi etu? Kutala nayetu Kalunga nahase kutuhana mangana enyi tahi? Eyo, mwomwo Solomone vamuhwiminyinyine asoneke ngwenyi: “Yehova . . . eji kuhananga mangana.” (Vishimo 2:6) Yehova ashika kuhana mangana kuli vaze veji kuwatondatondanga namuchima wosena. Mangana apwa uhashi wakuzachisa kanawa chinyingi, nakunangakana. Nyi mangana akufuma mwilu tunahase kuwawana ngachilihi? Kaha natuwazachisa ngachilihi mukuyoya chetu?

4-7. Vyuma muka viwana twatela kulinga numba tuhete mangana?

⁴ Uno twatela kupwa vakunangakana chikuma, chipwe vakutanga chikuma numba Kalunga atuhane mangana enyi tahi? Nduma. Yehova alizanga kuhana vatu mangana enyi chakuzeneka kutala havisemwa chipwe hakutanga chavo. (Wavaka-Kolinde 1, 1:26-29) Oloze twatela kulingako vyuma vimwe, mwomwo Mbimbiliya yatukolezeza, “[tuhetenga] mangana.” (Vishimo 4:7) Natuhasa kuwaheta ngachilihi?

⁵ Chatete, twatela kwivwa Kalunga woma. Mukanda waVishimo 9:10 wamba ngwawo: “Kumwivwa Yehova  woma chikiko kuputuka chamangana [chipwe kweseka naMbimbiliya yaThe New English Bible ngwayo, “chikiko chuma chakulivanga hakusaka kupwa namangana”].” Shikaho hakusaka tupwenga namangana amwenemwene, twatela kwivwa Kalunga woma. Mwomwo ika? Mwomwo mangana apwa uhashi wakuzachisa kanawa chinyingi. Kwivwa Kalunga woma, kachapwa kulizuzukila nawomako, oloze kulikehesa kuli ikiye, nakumuvumbika, nakumufwelela. Woma kana wapwa wamwaza kaha weji kutukafwanga tufwile kulinga vyuma vyakwoloka. Weji kutukafwanga tuyoye kweseka nachinyingi chakutachikiza mwaya muchima waKalunga najijila jenyi. Eyi yikiko kaha jila yamangana, mwomwo lwola lwosena jishimbi jaYehova jeji kunganyalisanga chikuma vaka-kujikavangiza.

⁶ Chamuchivali, twatela kupwa vakulinyisa. Katweshi kuhasa kupwa namangana aKalunga nge katweshi kulinyisako. (Vishimo 11:2) Mwomwo ika? Mwomwo nge tuvaka-kulinyisa, kaha natwitavilanga ngwetu katwatachikiza vyuma vyosenako, kaha vishinganyeka vyetu nawa kavyoloka lwola lwosenako, kaha nawa twatela kutachikiza vishinganyeka vyaYehova. Yehova ‘eji kwimanyinanga nakole vaka-kulivwimba,’ oloze eji kuhananga mangana kuli vaka-kulinyisa namuchima wakusuuluka.—WaYakova 4:6.

⁷ Chamuchitatu, shina kulinangula Mazu aKalunga. Mangana aYehova atwama muMazu enyi. Hakusaka kuheta mangana kana, kuvanga tufulyangile hakuwatonda. (Vishimo 2:1-5) Chamuchiwana, shina kulomba. Nge natulomba namuchima wosena kuli Kalunga atuhane mangana, kaha mwatuhanawo. (WaYakova 1:5) Nge natulombanga shipilitu yenyi yitukafwe, kaha mwatukumbululanga. Shipilitu yenyi nawa nayitukafwa kuwana  vishina vyavilemu vyamuMazu enyi vyakutukafwa kukumisa ukalu wetu, nakulihenda kujiponde, nakusakula kanawa vyakulinga.—Luka 11:13.

8. Natusolola ngachilihi ngwetu tunahete mangana aKalunga?

⁸ Ngana muze twamonanga muKapetulu 17, mangana aYehova tweji kuwamwenanga muvilinga. Chikupu vene nge tunahete mangana aKalunga, kaha natuwasololanga muvilinga vyetu. Kambaji Yakova alumbunwine mihako yakutachikijilaho mangana aKalunga ngwenyi: “Mangana akufuma mwilu chatete apwa atoma, kaha akuunda, akwashiwisa muchima, akulyononona washi, akuzala nakutetela namihako yamwaza, kaweshi kuhandulako, kaweshi kulyongako.” (WaYakova 3:17) Omu natushimutwila chuma hichuma vanavuluka kutalisa kumangana aKalunga, tunahase kulihulisa ngwetu, ‘Kutala mangana akufuma mwilu ali nakuzata mukuyoya chami tahi?’

9. Kutoma chalumbununa ika, kaha mwomwo ika chapwila chakutamo kuvangila kuchivuluka hamihako yamangana?

⁹ “Chatete apwa atoma.” Kupwa utoma chalumbununa kupwa uwalambwe, wakuhona lipenga haweluka namukachi. Mbimbiliya ngwayo mangana atwama mumuchima, shikaho mangana akufuma mwilu kaweshi kwingila mumuchima unapihi navishinganyeka vyakuhukako. (Vishimo 2:10; Mateu 15:19, 20) Oloze nge muchima wetu utoma, kweseka noho hakumina ngolo jamutu wakuhona kukupuka, kaha ‘natulitwamina kulinga vyuma vyavipi, oloze natulinga jino vyuma vyamwaza.’ (Samu 37:27; Vishimo 3:7) Chikupu vene chinatemo kuvangila kuvuluka kutoma hamihako yosena yamangana. Nge katweshi kulitomesa kumujimba nakushipilituko, kaha natuhasa ngachilihi kusolola kanawa mihako yikwavo yamangana akufuma mwilu?

10, 11. (a) Mwomwo ika chapwila chachilemu kutwama mukuunda? (b) Nge unanuka ngwove unavulumuna ndumbwove, nausolola ngachilihi ngwove umuka-kuneha kuunda? (Tala nawa kwinyikila chamwishi.)

 ¹⁰ “Kaha akuunda.” Mangana akufuma mwilu eji kutulingisanga tutondenga kuunda, chize chapwa muhako washipilitu yaKalunga. (Wavaka-Ngalesha 5:22) Katwasaka kuluwanganyisa ‘kuunda’ chetu chize cheji kununganga vatu jaYehova hamweko. (Wavaka-Efwesu 4:3) Tweji kufwilanga kuneha cheka kuunda kachi nge vanachiluwanganyisa. Mwomwo ika chapwila chachilemu? Mbimbiliya yahanjika ngwayo: ‘Twamenunga mukuunda. Kaha Kalunga wazangi wakuunda, mwapwanga nayenu.’ (Wavaka-Kolinde 2, 13:11) Shikaho Kalunga wakuunda mwapwanga nayetu nge natutwalangaho lika kutwama mukuunda. Usoko wetu naYehova unahase kuzama chipwe kuzeya kweseka nomwo twatwaminamo  navandumbwetu. Natusolola ngachilihi ngwetu tuvaka-kuneha kuunda? Tala chakutalilaho.

¹¹ Chuma muka watela kulinga nge unamono ngwove unavulumuna ndumbwove? Yesu ngwenyi: “Nge uli nakuneha wana wove kulijiko lyakulumbila, kaha hakuheta kuze hinawanuka ngwove uli namulonga nandumbwove, seza wana wove kulutwe lwalijiko lyakulumbila, kaha yako. Chatete kalivwasane nandumbwove, numba ukinduluke jino nakuhana wana wove.” (Mateu 5:23, 24) Unahase kukavangiza punga kana hakulivanga kuya kuli ndumbwove. Uno kuya ukalinge ika? Mangana ‘ukalivwasane’ nandumbwove. b Hakusaka mulivwasane cheka, watela kwitavila mulonga unamuvulumuna, muchishishisa chakuhanjika ngwove katelanga kupihilila washiko. Nge nauya kuli ikiye namuchima wakusaka kuneha kuunda, kaha munahase kukumisa vikokojola nakulikonekela. Nge naulivanga kuya kuli ndumbwove nakuneha kuunda, kaha uli nakusolola ngwove uli nakukavangiza mangana aKalunga.

12, 13. (a) Uno lizu valumuna ngwavo ‘kwashiwisa muchima’ hali WaYakova 3:17 valilumbununa ngachilihi? (b) Natuhasa kusolola ngachilihi ngwetu twapwa tuvaka-kwashiwisa muchima?

¹² “Akwashiwisa Muchima.” Uno kwashiwisa muchima chalumbununa ika? Vatu valinangula chikuma, vamba ngwavo lizu lyachiHelase lize valumuna ngwavo ‘kwashiwisa muchima’ hali WaYakova 3:17 lyapwa lyalikalu kwalumuna. Lizu kana lyatalisa kukwitavila. Vaka-kwalumuna  vanazachisanga mazu akufwana nge “kuvova,” “kutalilila chikoki,” chipwe “kuhaka kulutwe vyuma vafwila vakwetu.” Natusolola ngachilihi ngwetu mihako kaneyi yasolola mangana akufuma mwilu yili nakuzata muli etu?

¹³ Hali Wavaka-Fwilipi 4:5 ngwavo: “Vatu vosena vamone ngwavo mwapwa muvaka-kwashiwisa muchima.” Mbimbiliya yaThe New Testament in Modern English, yize valumwine kuli J. B. Phillips yavuluka vesi kana ngwayo: “Vatu vatela kumitachikijila hakwashiwisa muchima.” Nyingilila ngwove chuma chachilemu shina omwo vatumona vakwetu, namuze vatwijivilamo, keshi nge muze twalimona etu vaveneko. Muka-kwashiwisa muchima keshi kwijiva kutokomenya hakukavangiza jishimbi, chipwe kushinjila vakwavo vakavangize munayi vishinganyeka vyenyiko. Oloze eji kwivwililanga kuvakwavo kaha nge chinatemo eji kukavangizanga munayi vishinganyeka vyavakwavo. Apwa nawa wamuvwovu, nakutwama kanawa navakwavo. Numba tuhu omu mukiko vatela kupwa vaka-Kulishitu vosena, oloze chikumanyi vakulwane muchikungulwilo vatela kulinga ngocho. Nge vakulwane navapwa vavavwovu, kaha vanahase kupwa vavashi kuhanjikisa. (Wavaka-Tesolonyika 1, 2:7, 8) Jino tulihulisenu etu vavene ngwetu, ‘Kutala vatu vangutachikiza kupwa ngumuka-kutetela, nguwamuvwovu nakwitavila vishinganyeka vyavakwetu tahi?’

14. Natusolola ngachilihi ngwetu twapwa ‘tuvaka-kulyononona washi’?

¹⁴ “Akulyononona washi.” Lizu lyachiHelase valumuna ngwavo “kulyononona washi” kalyatwama muvesi yeka muVisoneka VyachiHelase vyaVaka-Kulishituko. Mutu umwe alinangula chikuma ambile ngwenyi, lizu kana “valizachishilenga kutalisa kumaswalale valisuwilenga kukavangiza jishimbi vavahanyinenga.”  Lizu kana lyatalisa ‘kukupwa wamwashi kukunyula’ kaha nawa ‘kukuliluula.’ Mutu uze eji kukavangizanga mangana akufuma mwilu, alizanga kukavangiza vyuma vyahanjika Visoneka. Kapwa mutu wakulinga nge nashinganyeka mumwe, kaha keshi kwitavila vishinganyeka vize navilihandununa navyenyiko. Oloze himutu wamwashi kwalumuka nge navamulweza Visoneka vyakusolola ngwavo vyuma anakulinga vyakuhenga chipwe nge nasakula vyuma vyakuhenga. Uno omu mukiko vakutachikiza vakwenu tahi?

15. Uno kutetela chapwa ngachilihi, kaha mwomwo ika “kutetela” “namihako yamwaza” vavivulukila hamwe hali WaYakova 3:17?

¹⁵ “Akuzala nakutetela namihako yamwaza.” c Kutetela himuhako waulemu uze wasolola mangana akufuma mwilu, mwomwo Mbimbiliya ngwayo mangana kana ‘azala nakutetela.’ Tachikiza ngwove “kutetela” “namihako yamwaza” vavivulukila hamwe. Echi chakutamo mwomwo kweseka naMbimbiliya, lizu kana lyatalisa kumuchima wakuzakama vatu, muchima uze naulingisa mutu asolwele vakwavo likoji. Mukanda umwe walumbununa lizu kutetela ngwawo “himuchima wakwivwila keke mutu ali muukalu nakufwila kumukafwa.” Shikaho, mutu uze akwechi mangana aKalunga apwa wakunangakana kaha nawa azanga vakwavo nakuvatetela nakuvazakama. Natusolola ngachilihi ngwetu twazala nakutetela?

16, 17. (a) Chuma muka chakuhakila kuzangi yakuzanga Kalunga, chize cheji kutulingisanga tuzate mulimo wakwambulula, kaha mwomwo ika? (b) Mujijila muka tunahase kusolwelamo ngwetu twazala nakutetela?

¹⁶ Jila yayilemu yakusolwelamo ngwetu tuvaka-kutetela,  shina yakwambulila vatu mujimbu wamwaza waWangana waKalunga. Chuma muka cheji kutulingisanga tuzate mulimo kana? Chuma chachinene shina mwomwo twazanga Kalunga, kaha nawa mwomwo tweji kwivwilanga vakwetu keke. (Mateu 22:37-39) Vatu vavavulu makumbi ano “vali nakuyanda nakulimwanga nge mikoko vakuzeneka kafunga.” (Mateu 9:36) Vanavasuvilila nakuvelavisa meso akushipilitu kuli tufunga vamukwitava chamakuli. Ngocho kavatachikiza ngwavo Mazu aKalunga anahase kuvatwaminyina chipwe ngwavo Wangana naukaneha vyuma vyamwaza hano hamavuko. Omu tweji kushinganyekanga havyuma vyakushipilitu vali nakusakiwa vatu, tweji kuvevwilanga keke nakufwila kuvalweza vyuma vyamwaza ajina kukalinga Yehova.

 ¹⁷ Mujijila muka jikwavo tunahase kusolwelamo ngwetu twazala nakutetela? Anuka chifwanyisa ahanjikile Yesu chakaSamaliya uze awanyine mutu nasavala kuswanga kujila, vanamwivi vyuma vyenyi nakumupupula. KaSamaliya “amwivwilile keke,” kaha ajingile mahina hajimbandu nakumuzakama nawa. (Luka 10:29-37) Kutala echi kacheshi nakusolola nge kutetela chasakiwa kukafwa vakwetuko tahi? Mbimbiliya yatulweza ‘tulingenga vyuma vyamwaza kuli vosena, chikumanyi kuli vaze twalikata navo mulufwelelo.’ (Wavaka-Ngalesha 6:10) Tala vyuma vimwe tunahase kulinga. Ndumbwetu wakashinakaji pamo mwasakiwa kumukafwa mwakutambukila hakuya kukukunguluka nakumukindulwisa cheka hembo. Tuliwe muchikungulwilo nawa pamo mwasakiwa kumuzachilako milimo yimwe hembo lyenyi. (WaYakova 1:27) Mutu uze nahombo nawa, nahase kusakiwa kwivwa “mazu amwaza” akumukolezeza. (Vishimo 12:25) Nge natutetelanga vatu vakufwana ngana, kaha tuli nakusolola ngwetu mangana akufuma mwilu ali nakuzata muli etu.

18. Nge tuli namangana akufuma mwilu, vyuma muka twatela kufumisa mumichima yetu, kaha mwomwo ika?

¹⁸ “Kaweshi Kuhandulako.” Mangana auKalunga eji kutukafwanga tulihende kukumona vatu ulumbi mwomwo yachikova chavo, chipwe kulifuchi vafuma. Nge natupwa namangana kana, kaha natulihendanga kukuzanga vatu vamwe nakuhunga vakwavo. (WaYakova 2:9) Katweshi kulingilanga vatu vyuma vyamwaza mwomwo vatanga chikuma shikola, chipwe mwomwo yajimbongo javo chipwe milimo vazata muchikungulwiloko, kaha nawa katweshi kuhombwanyisa vandumbwetu, numba tuhu navasoloka nge vakukuminamoko. Yehova avazanga, kaha nayetu nawa twatela kuvazanga.

19, 20. (a) Uno lizu lyachiHelase lyakuvuluka ngwavo “muka-kulyonga” valizachishilenga ngachilihi? (b) Natusolola ngachilihi “zangi yakuzanga vandumbwetu yakuzeneka kulyonga,” kaha mwomwo ika chapwila chachilemu?

 ¹⁹ “Kaweshi kulyongako.” Lizu lyachiHelase valumuna ngwavo ‘muka-kulyonga’ lyatalisa kuli “muka-kuhema muchimweso.” Kushikulu, vaka-kuhema vavaHelase navavaLoma vavwalilenga vyuma vize vyalingishile vatu vahone kuvatachikiza. Shikaho, eli lizu lyachiHelase lyakwamba ngwavo “muka-kulyonga,” valizachishilenga kumutu uze mwalisolola kupwa mweka mwakulihandununa nomwo apwa. Ou muhako wamangana aKalunga watela kutulingisa tutwamenga kanawa navandumbwetu nakwalumuna nawa jila twavamwenamo.

²⁰ Kaposetolo Petulu amwene ngwenyi “kwononoka kumuchano,” nachitulingisa tupwenga “nazangi yakuzanga vandumbwetu yakuzeneka kulyonga.” (WaPetulu 1, 1:22) Eyo, katwatela kukumina kaha hakulisolola kuvatu ngwetu twazanga vandumbwetuko. Katwapwa tuvaka-kulyonga kumeso avatu ngana mwavaka-kuhema muchimwesoko. Zangi yetu yatela kupwa yamuchano, yakufuma kumuchima. Kaha vandumbwetu navatufwelela, mwomwo navamona vene ngwavo omu twasoloka haweluka mukiko twapwa namumuchima. Kaha echi cheji kukafwanga vaka-Kulishitu muchikungulwilo vapwenganga vakukasunuka nakulizanga chikuma nakulifwelela.

21, 22. (a) Uno Solomone ahonene ngachilihi kulama mangana? (b) Vyuma muka navitukafwa tulame mangana, kaha nganyo muka nayifumamo?

²¹ Mangana aKalunga hiwana wakufuma kuli Yehova, uze twatela kulama. Solomone ngwenyi: “Ove mwanami, . . . lamanga mangana amwenemwene nauhashi wakushinganyeka.” (Vishimo 3:21) Chaluvinda ivene  Solomone kahashile kulingamoko. Apwile namangana hatando kaha yize apwile namuchima wakwononoka. Oloze kutwala muze mapwevo jenyi vavavulu vakumafuchi eka valumwine muchima wenyi, kaha asezele Yehova. (Vamyangana 1, 11:1-8) Vyuma vyasolokele kuli Solomone vyatunangula tutachikize ngwetu, chinyingi chinahase kupwa chamokomoko kachi nge katweshi kuchizachisa kanawako.

²² Uno tunahase kulama ngachilihi mangana amwenemwene? Twatela kutanganga Mbimbiliya namikanda yahanjika haMbimbiliya, yize eji kutuhananga “ndungo wakushishika wakuzangama,” nakufwila nawa kulinga vyuma tuli nakulinangula. (Mateu 24:45) Chapwa chachilemu kuzachisanga mangana aKalunga, mwomwo nawatukafwa tupwenga nachiyoyelo chamwaza oholyapwa. Kaha nawa nawatukafwa ‘tulinjilile kukuyoya chamwenemwene,’ chamukaye kakahya kaKalunga. (WaChimoteu 1, 6:19) Chachilemunyi, nge natupwa namangana akufuma mwilu, kaha natupandama kuli Yehova Kalunga, uze apwa Kasulu kamangana osena.