1, 2. Uno vaIsalele vapwile muponde muka omu vapwile nakwingila mungalila yaShinai, kaha Yehova avajikijishile ngachilihi?

 VAISALELE vapwile muponde omu vapwile nakwingila mungalila yaShinai kumaputukilo amwaka wa 1513 B.C.E. Jila vahichile yapwile yayipi chikuma mwomwo yahichile “mupambo yakwivwisa woma yikwechi manoka natuvwanda vaulembe.” (Lushimbi lwamuchivali 8:15) Vapwile nawa muponde yakuvalukuka kuli vaka-kole javo. Yehova ikiye alingishile vatu jenyi vapwenga muponde kana. Hakuwana nge apwile Kalunga kavo, kutala ahashile kuvakinga tahi?

² Yehova avafwelelesele ngwenyi: “Munalimwena enu vavene vyuma ngwalingile kuli vaEjipitu numba ngumimbate hamavava ami ngana mwangonga.” (Kulovoka 19:4) Anukishile vatu jenyi ngwenyi, avasokwele muundungo muEjipitu, kwijiva nge vanavambate kuvangonga nakuvatwala kuchihela chakukingiwa. Oloze kuli nawa vyuma vikwavo vyalingisa mukingo waKalunga vaufwanyise ‘kumavava angonga.’

3. Mwomwo ika chapwila chakutamo kufwanyisa ngolo jaKalunga ‘kumavava angonga’?

³ Ngonga eji kuzachisanga mavava enyi hakutuka namujijila jeka jajivulu. Chakutalilaho, nge kunazumu chikuma, eji kutanduulanga mavava enyi kuheta kafwe jimita jivali mangana akinge vana venyi vali muuswa kuchina navawema kumusana. Shimbu jimwe, eji kumbatanga vana nakuvengisa mumavava enyi mangana avakinge kuchishika. Shikaho, ngana  muze ngonga eji kukinganga vana venyi, naYehova nawa akingile muyachi waIsalele. Kaha omu vaIsalele vapwile mupambo vatelelele kutwalaho lika kupwa vakushishika mangana vasolole ngwavo vali nakuchinyina mumuvule wamavava aYehova angolo. (Lushimbi lwamuchivali 32:9-11; Samu 36:7) Uno nayetu makumbi ano tunahase kufwelela ngwetu Kalunga mwatukinga tahi?

4, 5. Mwomwo ika twatela kufwelela ngwetu Yehova mwatukinganga?

⁴ Yehova akwechi ngolo jakukinga vangamba jenyi. Apwa “Kalunga Wangolo Josena.” Vulukiso kana yalumbununa nge akwechi ngolo chikuma. (Kuputuka 17:1) Kakweshi mutu nahase kumuhonesako, ngana muze mutu keshi kuhasa kuhonesa makimba ahakalungalwijiko. Yehova nahase kulinga kala vyuma nasake. Ngocho pamo tunahase kulihulisa ngwetu, ‘Uno Yehova asaka kuzachisa ngolo jenyi mangana akinge vatu jenyi tahi?’

⁵ Natukumbulula ngwetu, eyo. Yehova atufwelelesa ngwenyi mwakinganga vatu jenyi. Mukanda waSamu 46:1 wamba ngwawo: “Kalunga ikiye uchinyino wetu, ikiye ngolo jetu, alizanga kutukafwa mulwola lwaluyando.” Hakuwana nge Kalunga ‘kongako,’ ngocho twafwelela ngwetu mwatukinganga. (WaChituse 1:2) Achitale havyuma vimwe vize Yehova azachisa mangana alumbunune omwo japwa ngolo jenyi jakukinga vatu.

6, 7. (a) Uno tufunga vakushikulu vakingilenga ngachilihi mikoko? (b) Chakutalilaho chamuMbimbiliya chasolola ngachilihi muchima atwama nawo Yehova wakuzakama mikoko jenyi nakuvakinga?

⁶ Yehova apwa Kafunga ketu, kaha etu “twapwa tuvatu  jenyi, tumikoko vakuulilo wenyi.” (Samu 23:1; 100:3) Tunyama vamwe kavapwa vakukingiwako ngana muze chapwa kuli mikoko. Tufunga vakushikulu vatelelelenga kupwa vakuhamuka mangana vakinge mikoko javo kuchina kuvalya kuvandumba, nakutungunge, nakuvaulusu, chipwe vene kuveva. (Samwele 1, 17:34, 35; Yowano 10:12, 13) Oloze lwola lumwe nawa, mikoko vasakiwilenga kuvakinga namuchima wakutetela. Nge mukoko nasemena kwakusuku nalimba, kaha kafunga wamwaza muchima mwazakama mukoko kana, nakumbata mwanamukoko uze nasemuka nakumutwala kulimba.

⁷ Yehova hakulifwanyisa kuli kafunga, chili nakulumbununa nge atufwelelesa ngwenyi mwatukinganga. (Ezekele 34:11-16) Anuka omu Yehova vamulumbununa hali Isaya 40:11, ngana muze twashimutwilanga muKapetulu 2 mumukanda uno. Vamba ngwavo: “Mwakazakamanga utanga wenyi nge muze eji kulinganga kafunga. Mwakakungulula vana vamikoko nalivoko lyenyi, kaha mwakavambachila hatulo yenyi.” Uno mwanamukoko mweza ngachilihi “hatulo” yakafunga, chipwe ngwetu mungoji yenyi? Nahase kwiza kuli kafunga, chipwe kumupupa kulihinji lyenyi. Oloze kafunga ikiye atela kunongama nakumbata uze mwanamukoko nakumuhaka kanawa hatulo yenyi. Echi chakutalilaho chatukafwa tutachikize omwo Yehova Kafunga Wamunene asaka kutukinga.

8. (a) Uno Kalunga ashika kukinga veya, kaha chuma kana vachisolola ngachilihi hali Vishimo 18:10? (b) Vyuma muka vyasakiwa hakuchinyina mulijina lyaKalunga?

⁸ Kalunga ashika kukinga kaha vatu vaze navapandama kuli ikiye. Mukanda waVishimo 18:10 wamba ngwawo: “Lijina lyaYehova linapu kaposhi kakukola. Muka-kwoloka  mwachinyinamo, kaha navamukinga.” Kushikulu, mupambo vatungilengamo tuposhi vakuswamamo. Kachi nge mutu ali muponde, atelelele kuchinyina kukaposhi kana mangana apwenga wakukingiwa. Omu mukiko chapwa nakuchinyina mulijina lyaKalunga. Chipwe ngocho, kuvuluka kaha lijina lyaKalunga kacheshi kuhasa kutukingako, mwomwo lijina kana kalyapwa nge lisakuko. Oloze twatela kutachikiza Mwenya lijina kana nakumufwelela, nakuyoya kweseka namwaya jishimbi jenyi jakwoloka. Yehova atusolwela likoji hakutufwelelesa ngwenyi nge natumufwelela, kwijiva nge tunachinyina mukaposhi kakukola, kaha mwatukinga.

9. Uno tunatachikiza ngachilihi ngwetu Yehova kakumina kaha hakutushika ngwenyi mwatukingako?

⁹ Yehova kakumina kaha hakutushika ngwenyi mwatukingako. Kushikulu, alingile vyuma vyakukomwesa vize vyasolwele nge nahase kukinga vatu jenyi. Chakutalilaho, azachishile ‘ngolo jenyi’ mangana akinge muyachi wavaIsalele kuli vaka-kole javo vangolo. (Kulovoka 7:4) Azachishilenga nawa ngolo jenyi hakukinga mutu himutu.

10, 11. Vyakutalilaho muka vyamuMbimbiliya vize vyasolwele omwo Yehova azachishile ngolo jenyi hakukinga mutu himutu?

¹⁰ Omu vakweze vavaHepeleu vatatu, vaze vavulukilenga ngwavo Shatalake naMeshake naAvete-nengo, vakanyine kulifukula kulikombelo lyaulu ajikile Mwangana Nevukataneza, ou mwangana apihililile nakwamba ngwenyi vavambile mulilungu lyakakahya. Mwangana Nevukataneza uze apwile mwangana wangolo hamavu hosena, alisashile ngwenyi: “Kalunga mukaze nahase kumipululula mumavoko ami?” (Ndanyele 3:15) Vaze  vakweze vatatu vafwelelele chikupu ngwavo Kalunga kavo apwile nangolo jakuvakinga, oloze kavatachikijile ngwavo mwavakingako. Shikaho vakumbulwile ngwavo: “Kachi nge navatumbila mulilungu lyakakahya, kaha Kalunga ou tweji kuzachilanga mwatuyovola.” (Ndanyele 3:17) Numba tuhu lize lilungu lyakakahya valizumishile mapapa 7, oloze echi kachahonesele Kalunga kavo wangolo josenako. Yehova avakingile chikupu, kaha echi chalingishile mwangana ambenga ngwenyi: “Kakweshi kalunga weka nahase kuyovola vatu nge ou Kalunga kavoko.”—Ndanyele 3:20-29.

¹¹ Yehova asolwele nawa ngolo jenyi jakukinga omu anungulwile kuyoya chaMwanenyi umwe kaha wakulipwila nakuchihaka mujimo lyaMaliya, kaYuleya uze apwile kanda alisavaleho lyehi nalunga. Kangelo alwezele Maliya ngwenyi: “Nawimita lijimo, kaha naukasema mwana walunga.” Ou kangelo alumbunwine nawa ngwenyi: “Shipilitu yajila nayiza hali ove, kaha ngolo jayou Wakulitulaho Chikuma najitwama hali ove.” (Luka 1:31, 35) Halwola kana, MwanaKalunga asakiwile chikuma kumukinga. Kutala shili yanaye nakuhona kukupuka vyahashile kwenyeka ou mwana mujimo tahi? Kutala Satana ahashile kuvulumuna uze mwana shimbu apwile mujimo chipwe kumujiha tahi? Nduma. Yehova akingile Maliya mangana mwanenyi uze ali mujimo vahone kumwenyeka. Yehova atwalileho lika kukinga Yesu kuheta nakuukweze wenyi. (Mateu 2:1-15) Amukingile kuheta nakulwola luze atongwele ivene.

12. Mwomwo ika Yehova akingilililenga vatu vamwe mujijila jakukomwesa?

¹² Mwomwo ika Yehova akingilililenga vatu vamwe mujijila kaneji jakukomwesa? Kakavulu Yehova akingilenga  vatu kana mwomwo yakusaka kutesamo vyuma ajina. Chakutalilaho, Yehova akingile Yesu mangana atesemo vyuma ajina, nakulingisa nawa vatu vakayoye haya myaka. Mijimbu yayivulu yize yasolola omwo Yehova azachishililemo ngolo jenyi jakukinga vatu vayisoneka muMbimbiliya, kaha “va[yi]sonekelele kutunangula etu, mangana kuhichila mukukakachila chetu namukuvendejeka chamuVisoneka tuhase kupwa nalutalililo.” (Wavaka-Loma 15:4) Chikupu vene, evi vyakutalilaho vyeji kutulingisanga tufwelele chikuma Kalunga ketu wangolo josena. Uno Kalunga nahase kutukinga ngachilihi makumbi ano?

13. Kutala Yehova eji kuzachisanga vyakukomwesa mangana atukinge tahi? Lumbununa.

¹³ Hakuwana nge Yehova atushika ngwenyi mwatukinganga, kachalumbununa nge mwazachisanga vyakukomwesa mangana atukingeko. Kalunga ketu katushika ngwenyi natuyoyanga chakuzeneka kumona ukalu mukaye kanoko. Vangamba jaYehova vavavulu vakushishika veji kumonanga ukalu waunene chikuma, wakufwana nge uhutu, najijita, nakuviza, nakufwa. Yesu alwezele tumbaji twenyi ngwenyi vamwe vanahase kukavajiha mwomwo yalufwelelo lwavo. Echi chikiko Yesu ahanjikilile ovyo twatela kupwila nalukakachila palanga nakusongo. (Mateu 24:9, 13) Kachi nge Yehova mwazachisa ngolo jenyi mujila yakukomwesa mangana atukinge mukala ukalu, kaha Satana mwasaula Yehova nakuhuhwasana nawa vyuma vyatulingisa tulihane kuli Kalunga ketu.—Yopa 1:9, 10.

14. Vyakutalilaho muka vyasolola nge Yehova kakinga vangamba jenyi vosena mujila yoyimweko?

 ¹⁴ Nakushikulu vene, Yehova kazachishilenga ngolo jenyi mangana akinge mutu himutu kukufwako. Chakutalilaho, kaposetolo Yakova vamujihile kuli Helote kafwe mu 44 C.E., oloze omu mwahichile katando kakandende, Petulu ‘vamupululwile mulivoko lyaHelote.’ (Vilinga 12:1-11) Kaha nawa Yowano, ndumbwaYakova, atwamine myaka yayivulu kuhambakana Petulu naYakova. Shikaho, katwatela kushinganyeka ngwetu Kalunga ketu mwakinganga vangamba jenyi vosena mujila yoyimweko. Anuka ngwove, “lwola navyuma vyakwiza mukukasumuna” vyeji kutuwananga tuvosena. (Muka-kwambulula 9:11) Uno Yehova eji kutukinganga ngachilihi makumbi ano?

15, 16. (a) Unjiho muka wasolola nge Yehova nakinginga vaka-kumulemesa mwalizavu? (b) Mwomwo ika twatela kufwelela ngwetu Yehova mwakinga vangamba jenyi oholyapwa ‘nahaluyando lwalunene’?

¹⁵ Chatete, tuchishimutwile omwo Yehova eji kutukinganga mukuyoya chetu. Hakuwana nge twapwa tuvangamba jenyi, ngocho nahase kutukinga mwalizavu. Mwomwo nge keshi kutukingako, kaha Satana mwachiwana kupwa chachashi kutwoza. Achishinganyeke hachumechi: Satana uze apwa “muka-kuyula kano kaye,” asaka kufumisako kulemesa chamuchano. (Yowano 12:31; Kusoloka 12:17) Jifulumende jimwe jangolo jamuno mukaye jinakanyisanga mulimo wetu wakwambulula nakusaka kunongesa vangamba jaKalunga vosena. Oloze vatu jaYehova vanapunga lika vakuzama nakutwalaho lika kwambulula mujimbu wamwaza. Mwomwo ika mafuchi angolo anahonena kulingisa  aka kalizavu kakandende kavaka-Kulishitu kalitwamine kwambulula? Mwomwo Yehova atufwika mumavava enyi angolo.—Samu 17:7, 8.

¹⁶ Uno Yehova mwakakinga kuyoya chetu “[ha]luyando lwalunene” tahi? Katwatela kwivwa womako omu Kalunga mwanongesa vaka-kuhuka. Mbimbiliya yamba ngwayo: “Yehova atachikiza mwakuyowela vatu vaze vakwechi muchima wakumuzachila muvyeseko vyavo, oloze alama vaka-kuhenga akavanongese halikumbi lyakusopesa.” (Kusoloka 7:14; WaPetulu 2, 2:9) Halwola luno, twatela kutachikiza vyuma vivali. Chatete, twatela kutachikiza ngwetu Yehova keshi kwechelela Satana anongese vatu jenyi vakushishika vosenako. Chamuchivali, Yehova mwakahana vaze veji kulamanga kulonga chavo kuyoya chahaya myaka mukaye kakahya, chipwe vene kuvasangula. Kaha vaze vafwa lyehi vapwa vakukingiwa mwomwo vatwama muvishinganyeka vyaKalunga.—Yowano 5:28, 29.

17. Uno Yehova eji kutukinganga ngachilihi kuhichila muMazu enyi?

¹⁷ Namakumbi ano, Yehova eji kutukinganga kuhichila ‘mumazu’ enyi, aze atwama nangolo jize jeji kutukafwanga twalumuneko vyuma vimwe mukuyoya chetu nakutulingisa tupwenga vakuwahilila. (WavaHepeleu 4:12) Nge natukavangizanga jindongi jamuMazu aKalunga, kaha tunahase kulihenda kuvyuma vize navituvulumwisa. Mukanda waIsaya 48:17 wahanjika ngwawo: “Ami Yehova yami . . . [ngweji] kuminangulanga mangana munganyale.” Chikupu vene, kukavangiza jindongi jamuMazu aKalunga nachitukafwa tupwenga vakulikangula kumujimba nakuyoya makumbi amavulu. Chakutalilaho, tweji kukavangizanga jindongi jamuMbimbiliya  jakulihenda kuujila nakulitomesa kuvyuma vyakupihisa mujimba, hakulihenda kuvilinga vyavipi nakujitato jajipi, vyuma vize vyeji kwenyekanga vatu vaze kavononoka Kalungako. (Vilinga 15:29; Wavaka-Kolinde 2, 7:1) Chikupu vene, twasakwilila Kalunga hakutukinga kuhichila muMazu enyi.

18. Uno Yehova eji kutukinganga ngachilihi kushipilitu?

¹⁸ Chuma chachilemu chikuma eji kulinganga Yehova, shina kutukinga kushipilitu. Kalunga ketu wazangi eji kutukinganga kushipilitu hakutuhana vyuma twasakiwa mangana tumike muvyeseko nakulama usoko wetu naikiye. Shikaho, Yehova eji kutukinganga mukuyoya chetu mangana tukayoye haya myaka. Tala vyuma vimwe ahakako Kalunga vize vinahase kutukinga kushipilitu.

19. Uno shipilitu yaYehova yinahase kutukafwa ngachilihi tumike?

¹⁹ Yehova apwa “muka-kwivwilila kukulomba.” (Samu 65:2) Nge tunahombo, kaha kulomba kuli Yehova nachitukafwa twivwenga kumuchima hwo. (Wavaka-Fwilipi 4:6, 7) Pamo keshi kufumisa vyeseko mujila yakukomwesako, oloze mwakumbulula kulomba chetu hakutuhana mangana akutukafwa tumike. (WaYakova 1:5, 6) Yehova nawa eji kuhananga shipilitu yajila kuli vaze navamulombayo. (Luka 11:13) Eyi shipilitu yangolo yinahase kutukafwa tumike mukala vyeseko natumona. Yinahase nawa kutuhana “ngolo jakuhambakana jize javatu” mangana tumike palanga nomu Yehova mwafumisako ukalu wosena, uze kaweshi kukapwa mukaye kakahya kaze kali nakwiza kalinwomuko.—Wavaka-Kolinde 2, 4:7.

20. Uno Yehova nahase kuzachisa ngachilihi ngolo jenyi jakutukinga kuhichila muli vandumbwetu?

 ²⁰ Shimbu jimwe Yehova nahase kuzachisa ngolo jenyi jakutukinga kuhichila muli vandumbwetu. Yehova atukungulwila hamwe ‘navandumbwetu’ mukaye kosena.’ (WaPetulu 1, 2:17; Yowano 6:44) Tweji kumonanga omwo shipilitu yajila yaKalunga yeji kutukafwanga hakulisolwela zangi navandumbwetu. Shipilitu kana yeji kutulingisanga tusolole mihako yamwaza yakufwana nge zangi, nalikoji, nakuwaha. (Wavaka-Ngalesha 5:22, 23) Shikaho, nge ndumbwetu mwatukolezeza nakutuvendejeka, kaha twatela kusakwilila Yehova mwomwo yakutukinga nakutuzakama kuhichila muli ndumbwetu.

21. (a) Uno Yehova eji kutuhananga kulya muka chakushipilitu halwola lwakutamo? (b) Unanganyala ngachilihi kuvyuma vize Yehova eji kutuhananga mangana atukinge kushipilitu?

²¹ Yehova nawa eji kutukinganga hakutuhana kulya chakushipilitu halwola lwakutamo. Ahana “ndungo wakushishika wakuzangama” mulimo wakutuhananga kulya chakushipilitu mangana chitujikijise kuhichila muMazu enyi. Ndungo wakushishika eji kutuhananga kulya “halwola lwakutamo” hakuzachisa mikanda yakupulita, kuhakilako vene naKaposhi Kakutalila naTonenu!, nakeyala yetu ya jw.org, nakukunguluka chachikungulwilo, nachachihanda nachangalila. (Mateu 24:45) Kutala wevwaho lyehi chishina chimwe hakukunguluka, pamo mumazu nakumbulula ndumbwetu, chipwe muchihande, chipwe vene mukulomba, chize chakukolezezele tahi? Uno kuyoya chove chalumuka mwomwo yachihande chimwe watangile mumikanda yetu tahi? Tachikiza ngwove Yehova eji kutuhananga vyuma vyosenevi mangana atukinge kushipilitu.

22. Mujila muka Yehova eji kuzachishilangamo ngolo jenyi lwola lwosena, kaha chuma kana cheji kutukafwanga ngachilihi?

 ²² Yehova apwa kepwe “kuli vosena vaze navachinyina muli ikiye.” (Samu 18:30) Twatachikiza ngwetu kazachisa ngolo jenyi mangana atukinge kuukalu wosenako. Oloze lwola lwosena eji kujizachisanga mangana atesemo vyuma ajina. Echi cheji kukafwanga vatu jenyi vapwenga nachiyoyelo chamwaza. Shikaho, nge natupandama kuli Yehova nakutwama muzangi yenyi, kaha mwakatuhana kuyoya chakukupuka chahaya myaka. Kushinganyeka havyuma kana nachitukafwa tumone ukalu tuli nakuhitamo kupwa “[wa]hakapyapya kakandende, kaha nawa [wawashi] kumika.”—Wavaka-Kolinde 2, 4:17.