1-3. (a) Uno vaIsalele vapwile muukalu muka? (b) Uno Yehova azungililile ngachilihi vatu jenyi?

 VAISALELE vahonene kwakuchinyina, mwomwo vapwile mukachi kajipili jajisuku, kaha kulutwe nawa kwapwile Kalungalwiji Uchila. Lizavu lyavaka-jita lyavaEjipitu lyaukenya, lyapwile nakuhangasana vaIsalele mangana vavanongese. a Oloze Mose akolezezele vatu jaKalunga vahone kwivwa woma. Avafwelelesele ngwenyi: “Yehova ikiye mwamyashila jita.”—Kulovoka 14:14.

² Chipwe ngocho, Mose alombele kuli Yehova Kalunga, kaha amukumbulwile ngwenyi: “Mwomwo ika uli nakuteta kuli ami? . . . Mbata mbwechi yove, olola livoko lyove hakalungalwiji, kaha meya nawalipangununa.” (Kulovoka 14:15, 16) Achishinganyeke havyuma vyasolokele. Nakushimbula chiku, Yehova atumine kangelo kenyi, kaha panda yalivwi yafumine kulutwe lwavaIsalele nakuya kunyima yavo, pamo yatanduukile nge mbango nakujikinyina vaEjipitu vaze vapwile nakwiza nakulukuka vaIsalele. (Kulovoka 14:19, 20; Samu 105:39) Mose olwele livoko lyenyi, kaha peho yangolo yahuhwile. Shikaho meya alipangunwine hakachi kwijiva nge jimbango kusali nasali mangana vaIsalele vahite mukachi kakalungalwiji.—Kulovoka 14:21; 15:8.

 ³ Fwalo atelelele kulweza maswalale jenyi vakinduluke hakumona vyuma kanevi vyakukomwesa. Oloze ou mwangana wakulivwimba alwezele vatu jenyi valukuke vaIsalele. (Kulovoka 14:23) VaEjipitu vengilile mukachi kakalungalwiji nakutwalaho lika kuhangasana vaIsalele, oloze tufumbo twakumatemba avo twaputukile kusokojoka. Omu vaIsalele vazaukile, Yehova alwezele Mose ngwenyi: “Olola livoko lyove hakalungalwiji mangana meya aliwane cheka nakufwika vaEjipitu, namatemba avo ajita, navaka-kutambukisa tuvalu.” Kaha jimbango jameya jaliwanyine nakufwika Fwalo navatu jenyi vosena.—Kulovoka 14:24-28; Samu 136:15.

4. (a) Uno Yehova alisolwele kupwa iya haKalungalwiji Uchila? (b) Uno vatu vamwe vanahase kwivwa ngachilihi hachuma kanechi?

⁴ Vyuma alingile Yehova haKalungalwiji Uchila mangana ayovole vaIsalele vyatunangula vyuma vyavivulu hali ikiye. Halwola kana, Yehova alisolwele kupwa “muka-kwasa jita wangolo.” (Kulovoka 15:3) Uno weji kwivwanga ngachilihi hachuma kanechi? Kuhanjika muchano, jijita jeji kulingisanga vatu valishone nakupwa muukalu waunene. Kutala wamona jila yize Kalunga eji kuzachishilangamo ngolo jenyi jakunongesa kupwa yayipi nakukulingisa uhone kupandama kuli ikiye tahi?

5, 6. (a) Mwomwo ika Kalunga vamuvulukila ngwavo “Yehova wamayongomena”? (b) Uno jita yaKalunga yalihandununa ngachilihi nayeyi yavatu?

⁵ Kalunga vamuvuluka ngwavo “Yehova wamayongomena” mapapa kafwe 250 muVisoneka VyachiHepeleu, kaha nawa mapapa kavali muVisoneka VyachiHelase  vyaVaka-Kulishitu. (Samwele 1, 1:11) Yehova hakupwa Muka-kuyula Wakulitulaho, eji kutwaminyinanga liyongomena lyalinene lyavangelo. (Yoshuwa 5:13-15; Vamyangana 1, 22:19) Eli liyongomena lyalinene lyatwama nangolo chikuma, kaha kachavakaluhwila kunongesa vaka-kole jaKalungako. (Isaya 37:36) Kachapwa hichuma chamwaza kumona vatu vali nakuvanongesako. Oloze twatela kwanuka ngwetu jita yaKalunga yalihandununa najita yavatu. Maswalale navatwamina vamapolitiki vanahase kwamba ngwavo, kuli vyuma vyamwaza vize vyeji kuvalingisanga valwenga jita. Oloze jijita javo jasolola nge vatwama namuchima walizangamina nalwiso.

⁶ Oloze Yehova kalinga vyuma chakuhona kushinganyeka kanawako. Mukanda waLushimbi lwamuchivali 32:4 wamba ngwawo: “Ikiye Lilolwa, milimo yenyi yapwa yakukupuka mwosena, jijila jenyi josena jakwoloka. Apwa Kalunga wakushishika uze keshi kuhengesa chiyuloko. Apwa wakwoloka, wakusungama.” Mbimbiliya yamba nawa ngwayo Kalunga ahunga ukenya, nautenu naulyanyi. (Kuputuka 49:7; Samu 11:5) Shikaho, kuli vyuma vyamwaza vize vyeji kulingisanga Yehova alinge vyuma vimwe. Kavula kuzachisa ngolo jenyi jakunongesako, oloze eji kujizachisanga nge kakweshi mweka mwakulingilako. Ahanjikile kuhichila muli kapolofweto kenyi Ezekele ngwenyi: “Mwata Wakulitulaho Yehova nambe ngwenyi, ‘Kutala ngweji kwivwilanga kuwaha kufwa chamuka-kuhuka numba? Kutala kangwasaka aseze jijila jenyi nakuyoyanga likako nyi?’”—Ezekele 18:23.

7, 8. (a) Vishinganyeka muka apwile navyo Yopa kutalisa kuukalu wenyi? (b) Uno Elihu olwele ngachilihi Yopa havishinganyeka vyenyi vyakuhenga? (c) Chishina muka natulinangula kuvyuma ahichilemo Yopa?

⁷ Mwomwo ika Yehova eji kuzachishilanga ngolo jenyi  jakunongesa? Shimbu kanda tuchikumbulule, vangila kushinganyeka hali Yopa, lunga wakushishika. Mazu ahanjikile Satana kuli Yopa asolwele nge Yopa keshi kuhasa kulama kulonga chenyiko nge ali muvyeseko. Mazu kana atalisa nakuli kala mutu. Hakusaka Yehova apayise Satana, amwitavishile eseke kulonga chaYopa. Echi chikiko chalingishile Yopa ajimbalise luheto lwenyi lwosena navana venyi nakupwa namusongo. (Yopa 1:1–2:8) Yopa amwene ngwenyi Kalunga ikiye apwile nakumuzangamisa chakuhona mulonga mwomwo katachikijile ovyo apwilile muukalu kanako. Ahulishile Kalunga mangana amulweze ovyo ‘namutakilikila’ novyo namumwena kupwa “muka-kole.”—Yopa 7:20; 13:24.

⁸ Mukweze walunga Elihu olwele Yopa havishinganyeka vyenyi vyakuhenga. Ambile ngwenyi: “Uno unalimono vene ngwove unoloka hakwamba ngwove, ‘Ami nguwakwoloka kuhambakana Kalunga’ nyi?” (Yopa 35:2) Chapwa chakuhenga kushinganyeka ngwetu twatachikiza vyavivulu kuhambakana Kalunga, chipwe kushinganyeka ngwetu Kalunga ali nakutulinga mwamupi. Elihu ambile ngwenyi: “Nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.” Kufumaho ambile ngwenyi: “Katweshi kuhasa kutachikiza ou Wangolo Josenako. Ikiye atwama nangolo jajinene, oloze keshi kuhengesa chiyulo chipwe kupihisa vilinga vyenyi vyakwolokako.” (Yopa 34:10; 36:22, 23; 37:23) Shikaho, twatela kufwelela ngwetu nge Yehova mwalwa jita, kaha kuli vyuma vyamwaza vinamulingisa alinge ngocho. Omu tunatachikiza chishina kanechi, tushimutwile jino havyuma vimwe vize vyeji kulingisanga Kalunga wakuunda lwola lumwe alwenga jita.—Wavaka-Kolinde 1, 14:33.

9. Mwomwo ika Kalunga wakujila eji kulwilanga jita?

⁹ Mose alishile Kalunga hakupwa “muka-kwasa jita wangolo,” kaha ambile jino ngwenyi: “Ove Yehova, iya apwa nge yove hatulunga vosena? Iya apwa nge yove uze eji kulisololanga ivene kupwa wajila chikuma?” (Kulovoka 15:11) Hambakuke asonekele mazu akulifwanako ngwenyi: “Ove wapwa utoma, kaha kaweshi kumona vyuma vyavipiko, kaweshi kwechelela vilinga vyakuhukako.” (Hambakuke 1:13) Yehova apwa Kalunga wazangi, wakujila, wakwoloka, kaha nawa wachiyulo chakwoloka. Shimbu jimwe, vilinga kana vikiko vyeji kumulingisanga azachise ngolo jenyi jakunongesa. (Isaya 59:15-19; Luka 18:7) Shikaho, nge Kalunga ali nakulwa jita, kacheshi nakulumbununa nge kapwa wajilako. Oloze kujila chikiko cheji kumulingisanga alwenga jita.—Kulovoka 39:30.

10. Uno kole vavuluka hali Kuputuka 3:15 nayikakuma ngachilihi, kaha nganyo muka nayikafumamo kuli vaka-kwoloka?

¹⁰ Achishinganyeke hachuma chasolokele omwo Alama naEve valikangile kuli Kalunga. (Kuputuka 3:1-6) Yehova apwa Mwata Wakulitulaho Mwilu naHamavu, ngocho nge echelelele ava valunga napwevo vakuhona kushishika, kachi chiyulo chenyi chazeyele. Kalunga avalwezele ngwenyi navakafwa, mwomwo apwa wakwoloka. (Wavaka-Loma 6:23) Muupolofweto watete wamuMbimbiliya, Kalunga ahanjikilile chimweza ngwenyi mukachi kavangamba jenyi navaka-kukavangiza Satana uze apwa “linoka,” namukapwa kole. (Kusoloka 12:9; Kuputuka 3:15) Tachikiza ngwove, kole kana nayikakuma kuvanga kaha nge Satana vanamuchiki. (Wavaka-Loma 16:20) Oloze chuma kana nachikanehela vaka-kwoloka vyuma vyamwaza, nakufumisako nawa vilinga vyaSatana vize vinakuhungumwisa vatu, nakulingisa hamavu hosena  hakapwe palachise. (Mateu 19:28) Oloze shimbu kanda lwola kana luhete, vatu vaze vakundwiza Satana navafumbukilanga vatu vaze vazanga Kalunga, nakuvayanjisa nakusaka kuvajiha. Chipwe ngocho, Yehova shimbu jimwe nakinginga vatu jenyi.

11. Mwomwo ika Yehova amwene ngwenyi chakutamo kuneha livaji mukaye kosena?

¹¹ Yehova azachishile ngolo jenyi haLivaji lize lyapwileko mumakumbi aNowa. Mukanda waKuputuka 6:11, 12 wahanjika ngwawo: “Hamavu hapihile kumeso aKalunga wamuchano, kaha hosena hapwilenga ulyanyi lika. Kalunga atalile hamavu, kaha amwene ngwenyi hanapihi, mwomwo vatu vosena hamavu valingilenga vyuma vyavipi.” Kutala Kalunga echelelele vaka-kuhuka vanongese vatu vavandende vaze vapwile navilinga vyamwaza tahi? Nduma. Amwene ngwenyi chakutamo kuneha livaji mukaye kosena mangana afumiseko vatu vaze vapwile navilinga vyaulyanyi naujila.

12. (a) Vyuma muka vize Yehova ahanjikilile chimweza kutalisa kuli “muka-tanga” yaApalahama? (b) Mwomwo ika vaAmole vatelelele kuvajiha?

¹² Kalunga alingile vyuma vyakulifwana navize alingile hakavanga omu ashinganyekele kunongesa vaKanane. Yehova ashikile Apalahama ngwenyi, vaka-mafuchi vosena navakavakisula kuhichila muli vaka-tanga yenyi. Hakusaka kutesamo lushiko kana, Kalunga ahanjikile ngwenyi vana vaApalahama mwakavahana lifuchi lyaKanane, muze mwatwaminenga vaAmole. Kutala chapwile chakutamo Kalunga kunongesa venya-lifuchi tahi? Yehova ahanjikilile chimweza ngwenyi atela kuvandamina hamyaka kafwe 400, palanga nomu najikalinga “jishili javaAmole”  ‘jinayangilila chikuma.’ b (Kuputuka 12:1-3; 13:14, 15; 15:13, 16; 22:18) Mumyaka kana, vaAmole vapwilenga navilinga vyavipi chikuma. Vatu vamuKanane valemeselenga tuponya, nakujiha vatu, nakulinga chikuma ujila. (Kulovoka 23:24; 34:12, 13; Kulava 33:52) Valumbilenga navana vavo hakakahya kupwa wana wakulumba. Kutala Kalunga wakujila nahase kwechelela vatu jenyi vengile mulifuchi muze mwapwile vilinga vyavipi tahi? Nduma. Ambile ngwenyi: “Lifuchi lyavo lyosena linapihi, ngocho nanguvazangamisa hakuhenga chavo, kaha navakavahanga mulifuchi.” (VyavaLevi 18:21-25) Chipwe ngocho, Yehova kajihile vatu chamujihilako. VaKanane vaze vapwile namichima yakwoloka, vakufwana nge Lahave navaka-Ngiveyone, kavavajihileko.—Yoshuwa 6:25; 9:3-27.

13, 14. (a) Mwomwo ika chapwilile chakutamo Yehova kujilika lijina lyenyi? (b) Uno Yehova ahakwililile ngachilihi lijina lyenyi?

¹³ Yehova apwa wajila, ngocho nalijina lyenyi lyapwa lyajila. (VyavaLevi 22:32) Yesu anangwile tumbaji twenyi valombenga ngwavo: “Lijina lyove lipwenga lyajila.” (Mateu 6:9) Omu Satana ahanjikile vyuma vyamakuli hali Yehova nahajila eji kuyulilangamo nakulingisa Alama naEve valikange, asawile lijina lyaKalunga nakulipihisa. Yehova kechelelele vatu kana vamusaule nakulikangako. Chatelemo kufumisa katombo halijina lyenyi.—Isaya 48:11.

¹⁴ Shinganyeka cheka hali vaIsalele. Omu vapwile muundungo muEjipitu, vatu vashinganyekele ngwavo Kalunga keshi kukatesamo lushiko luze ashikile Apalahama  lwakuvuluka ngwenyi vaka-mafuchi osena navakavakisula kuhichila muli vaka-tanga yaApalahamako. Oloze Yehova ahakwilile lijina lyenyi hakusokola vaIsalele muundongo nakuvalingisa kupwa muyachi. Ngocho kapolofweto Ndanyele avulukile Kalunga kenyi mukulomba ngwenyi: “Ove Yehova Kalunga ketu, ove walowele vatu jove mulifuchi lyaEjipitu nalivoko lyangolo, ove unalifumakanyisa.”—Ndanyele 9:15.

15. Mwomwo ika Yehova asokwelele vaYuleya muufunge muMbavilone?

¹⁵ Ndanyele alombele mujila kaneyi halwola luze vaYuleya vasakile Yehova avayovole cheka mwomwo yalijina lyenyi. Halwola kanelu, vaYuleya vaze valikangile vapwile muufunge muMbavilone. Nganda yavo yayinene yaYelusalema vayinongesele. Ndanyele atachikijile ngwenyi Yehova mwahakwila cheka lijina lyenyi kachi nge mwasokola vaYuleya muufunge nakuvakindulwisa kwimbo lyavo. Ngocho Ndanyele alombele ngwenyi: “Ove Yehova, tukonekele. Ove Yehova, tengeleka matwitwi ove nakulingaho chuma chimwe. Ove Kalunga kami, kanda naulangisako mwomwo yalijina lyove, nanganda yove navatu jove vaze vavulukila lijina lyove.”—Ndanyele 9:18, 19.

16. Lumbununa ovyo muchima waYehova wakufwila kuhakwila lijina lyenyi kawalumbununa nge alizanga iveneko.

¹⁶ Uno Yehova hakufwila kuhakwila lijina lyenyi nakulisolola ngwenyi apwa wajila, kaha nawa wachiyulo chalumbununa nge alizanga ivene tahi? Nduma. Eji kulinganga ngocho mangana akinge nawa vatu jenyi. Achishinganyeke mujimbu watwama hali Kuputuka kapetulu 14. Mukapetulu kana tweji kutangangamo vyavamyangana vawana vaze vakwachile Lote  mwana ndumbwaApalahama natanga yenyi. Kalunga akafwile Apalahama afungulule ava vaka-kole numba tuhu vapwile nangolo chikuma. Chasoloka nge mujimbu wajita kana wapwa mujimbu watete uze vasoneka “[mu]mukanda waJijita jaYehova,” mukanda uze pamo vasonekelengamo jijita jimwe jize kavavuluka muMbimbiliyako. (Kulava 21:14) Kwapwile nawa jijita jeka vafungulwile.

17. Chuma muka chasolola nge Yehova alwilenga jita mangana akinge vaIsalele omu vapwile mulifuchi lyaKanane? Hana chakutalilaho.

¹⁷ Omu vaIsalele vapwile kwakamwihi nakwingila mulifuchi lyaKanane, Mose avafwelelesele ngwenyi: “Yehova Kalunga kenu mwaya kulutwe lwenu, ikiye mwamyashila jita nge muze alingile muEjipitu kumeso enu.” (Lushimbi lwamuchivali 1:30; 20:1) Kuputukila vene mulwola lwaYoshuwa uze aswanyine Mose, nakuheta namulwola lwaVaka-kuyula navamyangana vakushishika vamuYuta, Yehova napunga lika nakulwa jita mangana akinge vatu jenyi.—Yoshuwa 10:1-14; Vaka-kuyula 4:12-17; Samwele 2, 5:17-21.

18. (a) Mwomwo ika twatela kwivwila kuwaha hakuwana nge Yehova kalumukako? (b) Vyuma muka navikasoloka omu kole yize vavuluka hali Kuputuka 3:15 nayikaheta kusongo?

¹⁸ Yehova kalumukako, kaha nawa kujina chenyi chakulingisa yino pulaneti yetu kupwa palachise yakuunda kachalumukako. (Kuputuka 1:27, 28) Noholyapwa vene, Kalunga ahunga vilinga vyakuhuka. Oloze azanga chikuma vatu jenyi, kaha nawa kalinwomu alwenga jita mangana avayovole. (Samu 11:7) Kalinwomu kole yize vavuluka hali Kuputuka 3:15 yitohwe chikuma omu vatu jaKalunga navavafumbukila. Yehova mwapwa “muka-kwasa jita wangolo” omu mwajilika cheka lijina lyenyi nakukinga vatu jenyi.—Zekaliya 14:3; Kusoloka 16:14, 16.

19. (a) Hana chakutalilaho chasolola ovyo ngolo jaKalunga jinahase kutulingisa tupandame kuli ikiye. (b) Uno muchima waKalunga wakufwila kulwa jita mangana atukinge nautukafwa ngachilihi?

 ¹⁹ Achishinganyeke tanga vanayilukuka kuli kanyama waukenya, kaha mutwe watanga mwakinga tanga yenyi nakujiha uze kanyama. Kutala pwevo lyauze lunga navana venyi navamwivwa woma nakulihenda kuli ikiye mwomwo ajihanga uze kanyama tahi? Nduma, navawahilila hakumona ngwavo navakingi mwomwo avazanga chikuma. Nayetu nawa katwatela kwivwa woma Kalunga nakulihenda kuli ikiye hakumona omwo eji kuzachisanga ngolo jenyi jakunongesako. Muchima wenyi wakufwila kulwa jita mangana atukinge watela kutulingisa tumuzange chikuma. Kaha nawa twatela kumuhana kavumbi hangolo jenyi jajinene. Ngocho ‘natumuzachilanga Kalunga mulimo wajila nakumwivwa woma nakumukomoka.’—WavaHepeleu 12:28.

20. Vyuma muka twatela kulinga kachi nge katwevwishishile mujimbu umwe wamuMbimbiliyako, kaha mwomwo ika?

²⁰ Mbimbiliya kayalumbununa vyuma vyosena vize vyeji kulingisanga Yehova azachise ngolo jenyi jakunongesako. Oloze twafwelela ngwetu Yehova keshi kukazachisa ngolo kana mujila yakuhenga, chipwe yaukenyako. Kakavulu, tunahase kwivwishisa kanawa mujimbu umwe wamuMbimbiliya kachi nge natukekesa jivesi jinahate kumujimbu tunatange navyuma vyeka vyasolokele kutalisa kumujimbu kana. (Vishimo 18:13) Numba tuhu katwatachikiza mashina namasongoko, oloze nge natulinangula vyavivulu hali Yehova nakushinganyeka havilinga vyenyi vyakulipwila, kaha nachitukafwa tuhone kuhuhwasana. Nge natulinga ngocho, kaha natutachikiza ngwetu kuli vyuma vyavivulu vyatela kutulingisa tufwelela Yehova.—Yopa 34:12.

21. Uno Yehova apwa ngachilihi numba tuhu lwola lumwe eji kupwanga “muka-kwasa jita wangolo”?

²¹ Numba tuhu lwola lumwe Yehova eji kupwanga “muka-kwasa jita wangolo,” oloze kachalumbununa nge azanga kulwa jitako. Muchakumwenesa chalitemba lyamwilu chize vamwenesele Ezekele, Yehova apwile nakulizanga vyakulwa jita navaka-kole jenyi. Chipwe ngocho, Ezekele amwene Kalunga vanamujingilika kukongolo, yize yemanyinako kuunda. (Kuputuka 9:13; Ezekele 1:28; Kusoloka 4:3) Chikupu vene, Yehova apwa wamuvwovu kaha nawa wakuunda. Kaposetolo Yowano asonekele ngwenyi: “Kalunga ikiye zangi.” (WaYowano 1, 4:8) Yehova eji kusololanga vilinga vyenyi vyosena mujila yakukupuka. Shikaho, twawahilila chikuma hakuwana nge tunahase kupandama kuli Kalunga wangolo jajinene, wazangi.