1, 2. Vyuma muka tunahase kujimbalisa makumbi ano, kahechi cheji kutulingisanga twivwenga ngachilihi?

 MWANA eji kulilanga chikuma nge najimbalisa chipwe najihi kachuma kenyi kakuhemesa. Kulila chenyi cheji kwivwisanga keke. Kutala wamonaho lyehi omwo mwana eji kuwahililanga nge chisemi chenyi namukindulwishila kachuma kenyi kaze kajimbalanga tahi? Chisemi nahase kumona mulimo wakuwanyina mwanenyi chuma ajimbalisanga chipwe wakuchiwahisa kupwa wawashi. Oloze mwana eji kwivwanga kuwaha nakulikomokela hamulimo nalingi chisemi chenyi. Ou mwana ashinganyekanga ngwenyi chize chuma chinajimbala kunahu, oloze jino vanamukindulwishilacho.

² Yehova, apwa Setu wamwenemwene, kaha nawa atwama nangolo jakukindulwishila vana venyi vahano hamavu vyuma vize vamona ngwavo vinajimbala kunahu. Chipwe ngocho, katweshi nakutalisa kuvyuma vyakuhemesa vanyikeko. Omu tuli nakuyoyela ‘mulwola luno lwalukalu,’ natujimbalisanga vyuma vize vyapwa vyavilemu chikuma kuhambakana tuvyuma twakuhemesa twavanyike. (WaChimoteu 2, 3:1-5) Tunahase kujimbalisa membo etu, naluheto lwetu, namilimo yetu, chipwe vene kuhona kupwa vakulikangula, vyuma vize vyapwa vyavilemu mukuyoya chetu. Tunahase nawa kwivwa kupihya kumichima hakumona omu mavu vali nakuwenyeka, nomu tunyama namitondo vili nakukuma. Oloze  kufwisa mutu twazanga hichuma chize cheji kutwivwisanga chikuma kumuchima kupihya. Tunahase kumona ngwetu katweshi nangolo, kaha nawa katweshi kuhasa kumika hakulyonyinga tuli nachoko.—Samwele 2, 18:33.

3. Mazu muka akutuvendejeka aze atwama hali Vilinga 3:21, kaha Yehova mwakatesamo ngachilihi vyuma kana?

³ Shikaho, kulinangula ngolo jaYehova jakukindulwisa vyuma nachituvendejeka. Mukapetulu uno, natulinangula vyuma vyavivulu vize Kalunga nahase kukatukindulwishila. Chipwe ngocho, Mbimbiliya yamba ngwayo Yehova ajina “kukindulwisa cheka vyuma vyosena muze vyapwile.” (Vilinga 3:21) Yehova mwakatesamo chuma kana kuhichila muWangana wauMeshiya, uze navakayula kuli Mwanenyi, Yesu Kulishitu. Unjiho wasolola ngwawo, Wangana kana waputukile kuyula mwilu mu 1914. a (Mateu 24:3-14) Uno vyuma muka navakakindulwisa? Tuchitalenu havyuma vimwe vyavinene vize Yehova akindulwishile vize tuli nakumona, navize mwakakindulwisa kulutwe.

4, 5. Vyuma muka vyasolokele kuli vatu jaKalunga mu 607 B.C.E., kaha Yehova avashikile vyuma muka?

⁴ Chuma chimwe chize Yehova nakindulwisa lyehi shina kulemesa chamuchano. Hakusaka tuwane mwalumbunukila chuma kanechi, tuvangile kukekesako  chindende hamujimbu wawangana waYuta. Echi nachitukafwa tutachikize kanawa ngolo atwama najo Yehova jakukindulwisa vyuma vize vyajimbalile.—Wavaka-Loma 15:4.

⁵ Achishinganyeke omwo vevwile vaYuleya vakushishika mu 607 B.C.E., omu Yelusalema vayinongesele. Nganda yavo yize vazangile chikuma vayinongesele, nakembwe yayo nawa vayishiwile. Kaha chuma chachipi chikumanyi shina tembele yaupahu yize atungile Solomone, yize vatu mukaye kosena valemeselelenga Yehova, vayinongesele. (Samu 79:1) Kaha vatu vaze vasalileho, vavatwalile muufunge muMbavilone, kaha lifuchi lyavo lyapwile jino hingundu. (Yelemiya 9:11) Kweseka navishinganyeka vyautu, vaYuleya vashinganyekele nge kunahu vyuma vyosena vinalyenyeka. (Samu 137:1) Oloze Yehova, uze ahanjikilile chimweza vyakunongesa kana, ashikile ngwenyi nakukapwa lwola lwakukindulwisa vyuma vyosena.

6-8. (a) Chihande muka chize vasonekelenga vapolofweto vavaHepeleu, kaha upolofweto kana wateselemo ngachilihi hakavanga? (b) Uno upolofweto kana unatesamo ngachilihi makumbi ano?

⁶ Mujimbu wakukindulwisa vyuma wapwile hichihande chize vasonekelenga vapolofweto vavaHepeleu. b Yehova ashikile kuhichila muli ava vapolofweto ngwenyi, lifuchi lyaIsalele nalikapwa cheka mavu awilo, kaha vatu vavavulu navakatwamangamo nakupwa vakukingiwa kuvisuma nakuli vaka-kole javo. Yehova ahanjikile ngwenyi eli lifuchi nalikapwa nge palachise. (Isaya 65:25; Ezekele 34:25; 36:35) Chuma chachilemu chikumanyi shina, kukindulwisa kulemesa chamuchano, nakutungulula  tembele. (Mika 4:1-5) Upolofweto kanou walingishile vaYuleya vaze vapwile muufunge vapwenga nalutalililo nakuvakafwa vomike hamyaka 70 yize vapwile muufunge muMbavilone.

⁷ Lwola lwakukindulwisa vyuma lwahetele jino. VaYuleya vavasokwele muufunge muMbavilone, kaha vakindulukile kuYelusalema nakutungulula tembele yaYehova. (Ezela 1:1, 2) Yehova avakiswile nakuvahana kulya chachivulu, chikalu kaha nge vakundwijilenga kulemesa chamuchano. Avakingilenga kuli vaka-kole javo nakuli visuma vaze vatwaminenga mulifuchi lyavo hamyaka yayivulu. Valivwishile kuwaha hakumona ngolo jaYehova jakukindulwisa vyuma. Oloze vyuma kana vyapwile maputukilo akutesamo chaupolofweto uze Yehova avashikile. Upolofweto wauvulu uli nakutesamo “hamakumbi akukuminyina,” kulumbununa makumbi etu ano, omu Yesu uze vashikile, wakuchisaka chaMwangana Ndavichi, aputukile kuyula.—Isaya 2:2-4; 9:6, 7.

⁸ Omu mwahichile kashimbu kakandende kufuma haze Yesu aputukile kuyula mwilu mwaMwangana mu 1914, awahishile vyuma mangana vatu jaKalunga vakushishika vahano hamavu vapwenga nakulya chakushipilitu. Ngana muze mwangana waPeleja Kuluse asokwele vaYuleya vaze vasalile muMbavilone mu 537 B.C.E., mukiko naYesu nawa asokwele vaYuleya vakushipilitu “[mu]Mbavilone Yayinene,” yize yapwa kwitava chamakuli chamukaye kosena. (Kusoloka 18:1-5; Wavaka-Loma 2:29) Kufuma vene mu 1919, vaka-Kulishitu vamuchano vanalemesanga Yehova mujila yize asaka. (Malaki 3:1-5) Vatu jaYehova vanamulemesanga mutembele yenyi yakushipilitu, yize yapwa jila alongesa Kalunga yakulemesa chamuchano. Mwomwo ika chuma kana chapwila chachilemu kuli etu makumbi ano?

9. Omu vaposetolo jaYesu vafwile, vaka-Kulishitu vamakuli valingile vyuma muka kutalisa kukulemesa chamuchano, oloze vyuma muka nalingi Yehova makumbi ano?

⁹ Achishinganyeke hachakutalilaho chino. Vaka-Kulishitu vamulikulukaji lyamyaka lyakulivanga valivwishilenga kuwaha kulemesa Yehova mujila yize asaka. Oloze Yesu navaposetolo jenyi vahanjikilile chimweza ngwavo vatu navakalitwamina kulemesa Kalunga mujila yize asaka. (Mateu 13:24-30; Vilinga 20:29, 30) Omu vafwile vaposetolo jaYesu, vaka-Kulishitu vamakuli vavulile chikuma. Vatwamina vamukwitava vaputukile kunangula vatu vyuma vyamukwitava chamakuli. Muchishishisa chakukafwa vatu vapandame kuli Kalunga, oloze vavanangwile vyaTulunga vatatu, kaha chuma kana chachikalu kwivwishisa. Vavanangwilenga nawa ngwavo vatela kulweza vapilishitu jishili javo mangana vavakonekele, nakulomba nawa kuli Maliya nakuli “vaka-kujila,” muchishishisa chakulomba kuli Yehova. Uno Yehova nalingi vyuma muka havilinga vyaunyengwe vinasolokanga hamyaka yayivulu? Numba tuhu makumbi ano mukaye munazale nakwitava chamakuli navilinga vyavipi, oloze Yehova nazachisa ngolo jenyi nakukindulwisa kulemesa chamuchano. Chikupu vene, kukindulwisa kulemesa chamuchano chinapu hichuma chachilemu chikuma chize chinasoloka makumbi ano.

10, 11. (a) Uno vyuma muka vivali vyatwama mupalachise yakushipilitu, kaha unahase kupwamo ngachilihi? (b) Vatu vakufwana ngachilihi vaze Yehova nakungulwila mupalachise yakushipilitu, kaha vyuma muka navakamona?

¹⁰ Vaka-Kulishitu vamuchano makumbi ano vali nakulivwisa kuwaha palachise yakushipilitu yize yili nakutwalaho lika kufukila. Vyuma muka vyatwama mupalachise  yakushipilitu? Mwatwama vyuma vivali vyavilemu. Chatete shina kulemesa Kalunga wamuchano Yehova. Natukafwe tumulemese mujila yize navahona kutuhungumwisa kukunangula chamukwitava chamakuli. Kaha nawa natukisula hakutuhana kulya chakushipilitu. Echi cheji kutukafwanga tulinangule vyaSetu wamwilu, nakulinga vyuma vyakumwivwisa kuwaha, nakupandama kuli ikiye. (Yowano 4:24) Chuma chamuchivali chatwama mupalachise yakushipilitu shina vatu. Ngana muze Isaya ahanjikilile chimweza, Yehova nanangulanga vaka-kumulemesa mwakutwamina mukuunda “[mu]makumbi akukuminyina.” Atunangula tulihendenga kukwazana mujijita. Numba tuhu katwakupukako, oloze natukafwe tuvwale “mutu wamuhya.” Eji kutukisulanga nashipilitu yenyi yajila yize yeji kutulingisanga twimenga mihako yamwaza. (Wavaka-Efwesu 4:22-24; Wavaka-Ngalesha 5:22, 23) Nge nauzata kweseka namwaya shipilitu yaKalunga, kaha chikupu vene uli mupalachise yakushipilitu.

¹¹ Mupalachise yakushipilitu, Yehova nakungulwilamo vatu vaze azanga, vaze nawa vamuzanga, nakuzanga kuunda, ‘nakusaka vyuma vyakushipilitu.’ (Mateu 5:3) Vatu kana vakiko navakalimwena omwo Yehova mwakalingila vatu vyuma vyakukomwesa hano hamavu.

12, 13. (a) Mwomwo ika twatela kufwelela ngwetu upolofweto wakukindulwisa vyuma kawatalisa kaha kuvyuma vyakushipilituko? (b) Kweseka navyuma ahanjikile Yehova muEtene, mwomwo ika atengelelele mavu, kaha mwomwo ika chuma kana chatuhanyina lutalililo?

¹² Upolofweto wauvulu wakukindulwisa vyuma kawatalisa kaha kuvyuma vyakushipilituko. Chakutalilaho, Isaya  asonekele vyalwola luze kakweshi kukapwa vaka-kuviza, navitonji natupuputa natujika-matwitwiko, kaha nawa kufwa navakachimina haya myaka. (Isaya 25:8; 35:1-7) Oloze jishiko kana kajateselemo kuli vaIsalele vakushikuluko. Numba tuhu tunamono omwo jishiko kana jili nakutesamo makumbi ano kushipilitu, oloze tunafwelela chikupu ngwetu najikatesamo ngana vene muze vajisoneka. Uno tunejiva ngachilihi?

¹³ Yehova alumbunwine hatoma muEtene ovyo atengelele mavu: Asakile ngwenyi hatwamenga vatu vakuwahilila, vakulikangula, kaha nawa vakulinunga. Valunga napwevo vatete vapwile namulimo wakuwahisa ano mavu nakuzakama tunyama, nakulingisa pulaneti yosena kupwa palachise. (Kuputuka 1:28) Vyuma tuli nakumona makumbi ano keshi vikiko ajinyine Yehovako. Oloze twafwelela ngwetu kakweshi chuma nachihonesa Yehova kutesamo jishiko jenyiko. (Isaya 55:10, 11) Yesu uze vatongola kuli Yehova kupwa Mwangana wauMeshiya mwakalingisa mavu kupwa Palachise.—Luka 23:43.

14, 15. (a) Uno Yehova mwakalingisa ngachilihi “vyuma vyosena kupwa vyavihya”? (b) Uno chiyoyelo nachikapwa ngachilihi muPalachise, kaha vyuma muka uli nakutalilila?

¹⁴ Achishinganyeke omwo naukevwa hakumona mavu osena vanawalumuna kupwa Palachise. Yehova ahanjikile vyalwola kanelu ngwenyi: “Tala! Nangulingisa vyuma vyosena kupwa vyavihya.” (Kusoloka 21:5) Achitale muwalumbunukila mazu kana. Omu Yehova mwakakumisa kuzachisa ngolo jenyi hakunongesa kaye kano kakuhuka, nakukapwa jino “melu amahya namavu amahya.” Echi chili nakulumbununa nge fulumende yayihya yamwilu yikiko nayikayulanga vatu hano hamavu, vaze vazanga Yehova nakulinga mwaya muchima wenyi. (WaPetulu 2, 3:13) Satana navandemone jenyi kaveshi  kukapwa nangolo hali vatu jaKalungako. (Kusoloka 20:3) Hamyaka yayivulu mukuyoya chavatu chosena, elu nalukapwa lwola lwatete vatu kutwama chakuhona kuvafungulula kuli Satana. Chuma kana nachikatwivwisa kuwaha.

¹⁵ Natukahasa jino kulama kanawa pulaneti yetu ngana muze Yehova asakile hakavanga. Mavu atwama nangolo jakulitungulula avene. Vijiva vyamajilo natulwiji vinahase kulitomesa vivene kachi nge navafumisako vyuma vize vyeji kunehanga majilo, kaha vihela vize vanenyekanga kujijita navikapwa cheka vyamwaza, mwomwo kakweshi kukapwa jitako. Natukawahilila chikuma hakuzata mulimo wakuwahisa mavu kupwa palachise, ngana muze yapwilenga milemba yaEtene. Vatu kaveshi kukenyeka cheka tunyama chipwe mitondoko, oloze navakatwamanga mukuunda navyuma vyosena atenga Kalunga hano hamavu. Navana vavandende kaveshi kukevwanga woma watunyama vamuchipapako.—Isaya 9:6, 7; 11:1-9.

16. Uno muPalachise, Yehova mwakakindulwisa ngachilihi vyuma vize navikanganyalisa mutu himutu?

¹⁶ Mutu himutu nawa navakamuwahisa. Hanyima yaAlamangetone, vaze navakayovoka navakavoka mujila yakukomwesa mukaye kosena. Yesu mwakazachisa ngolo jize vamuhana kuli Kalunga mangana akoke tupuputa, natujika-matwitwi, navitonji, ngana muze alingilenga shimbu apwile hano hamavu. (Mateu 15:30) Tushinakaji navakavakindulwisa kuukweze, nakupwa namijimba yangolo, yakulikangula kanawa. (Yopa 33:25) Mikonya nayikajimbangana, mavoko namahinji nawakoloka kanawa, kaha mishisa nawa nayikapwa yakulikangula kanawa. Vatu vakushishika vosena navakamona ngwavo shili nakuhona kukupuka vili nakuvafuma chindende chindende. Natukasakwilila chikuma Yehova Kalunga  mwomwo yangolo jenyi jakukindulwisa vyuma. Tutale jino hachuma chimwe chakwivwisa kuwaha chize Yehova mwakalinga hakukindulwisa vyuma.

17, 18. (a) Mwomwo ika Yesu ahuhumwinyine vaSatuse? (b) Vyuma muka vyalingishile Elija alombe Yehova asangule mwana uze afwile?

¹⁷ Mulikulukaji lyamyaka lyakulivanga C.E., vatwamina vamukwitava vamwe vaze vavulukilenga ngwavo vaSatuse, kavafwelelele mukusanguka chavafuko. Yesu avahuhumwine ngwenyi: “Munalimbenje, mwomwo kamwatachikiza Visoneka, chipwe ngolo jaKalungako.” (Mateu 22:29) Chikupu vene, Visoneka vyasolola ngwavyo Yehova atwama nangolo jakukindulwisa vyuma. Tutale havyakutalilaho vimwe vyasolokele.

¹⁸ Mumakumbi aElija, tuliwe umwe asachile mwanenyi umwe kaha lyamunwe. Ou mwana apwile wakufwa. Chasoloka nge kapolofweto Elija, uze apwile ngeji yayou tuliwe hatando yayisuku, alikomokelele chikuma hachuma kana. Hakavanga, ayowele ou mwana kuzala yakalombolombo. Chasoloka nawa nge Elija azangile chikuma ou kanyike. Naye nawa uze apwile tuliwe, alinyengele chikuma hali ou mwanenyi uze asalile nenyi omu afwile lunga lyenyi. Pamo afwelelele ngwenyi ou mwanenyi ikiye mwakamulama omu mwakashinakajiwa. Ngocho, ou tuliwe ashinganyekele ngwenyi Kalunga apwile nakumuzangamisa hashili avulumwine kunyima. Elija evwile ushona chikuma. Atambwile uze mwana hamavoko anaye, nakuya nenyi mukapete kenyi kahelu, kaha alombele Yehova Kalunga ahindule ou mwana.—Vamyangana 1, 17:8-21.

19, 20. (a) Apalahama asolwele ngachilihi lufwelelo lwenyi mungolo jaYehova jakukindulwisa vyuma, kaha mwomwo ika apwililile nalufwelelo kana? (b) Uno Yehova akiswile ngachilihi Elija halufwelelo lwenyi?

 ¹⁹ Elija keshi ikiye mutu watete kufwelela mukusangukako. Makulukaji amyaka shimbu kanda Elija achisemuke, kwapwile Apalahama uze afwelelele ngwenyi Yehova atwama nangolo jakusangula vafu. Ika yamulingishile afwelele chuma kana? Omu Apalahama apwile namyaka 100, kaha Sala nawa myaka 90, Yehova avahanyine lusemo, ngocho Sala asemene mwana. (Kuputuka 17:17; 21:2, 3) Jino omu alingile uze mwana nakoloko lyehi, Yehova alwezele Apalahama ahane mwanenyi kupwa wana wakulumba. Apalahama asolwele lufwelelo, mwomwo atachikijile ngwenyi Yehova nahase kusangula Isaka mwanenyi azanga. (WavaHepeleu 11:17-19) Lufwelelo kana lukiko lwalingishile Apalahama alweze vangamba jenyi omu apwile nakukanduka kupili hakuya nakulumba Isaka ngwenyi navakinduluka hamwe.—Kuputuka 22:5.

²⁰ Hakuwana nge Yehova akanyishile Apalahama kulumba Isaka, ngocho kusanguka kachasakiwile halwola kaneluko. Oloze kuli Elija, uze mwana tuliwe afwile, numba tuhu kahashimbwileko. Yehova akiswile kapolofweto kenyi mwomwo yalufwelelo lwenyi, hakusangula uze mwana. Elija jino ambachile uze mwana nakumuhana cheka kuli naye nakwamba ngwenyi: “Tala! Mwanove nayoyo cheka.”—Vamyangana 1, 17:22-24.

21, 22. (a) Mwomwo ika kusanguka chavafu vaze vasangwile kunyima vachisonekela muVisoneka? (b) Uno vatu vangahi navakasanguka muPalachise, kaha iya mwakavasangula?

²¹ Elu lukiko lwola lwatete Mbimbiliya kuhanjika hali  Yehova ngwayo azachishile ngolo jenyi hakusangula mufu. Kutwala muze, Yehova ahanyine nawa Elisha, naYesu, naPaulu, naPetulu, ngolo jakusangula vafu. Oloze mukuhita chalwola, vaze vasangwile vafwile cheka. Chipwe ngocho, mijimbu kaneyi yamuMbimbiliya yatukafwa tutachikize vyuma vyamwaza navikasoloka kulutwe.

²² MuPalachise, Yesu mwakatesamo mulimo wenyi wakupwa ikiye ‘kusanguka nakuyoya.’ (Yowano 11:25) Mwakasangula vatu vavavulu chikuma nakukavetavisa vakayoye haya myaka muPalachise hano hamavu. (Yowano 5:28, 29) Achishinganyeke ocho kuwaha natukevwa omu masepa jetu navausoko wetu navakasanguka nakulipakata navo mukasamba! Vatu vosena navakalisa Yehova hangolo jenyi jakukindulwisa vyuma.

23. Chuma muka chachilemu alingile Yehova hakuzachisa ngolo jenyi, kahechi chatukafwa ngachilihi tutalilile vyuma vyakulutwe?

²³ Yehova alingileko vyuma vimwe vize vyatukafwa tufwelele chikupu ngwetu mwakasangula vafu. Chuma chachilemu alingile shina kusangula Mwanenyi Yesu mwamutu wakushipilitu, nakumulingisa kupwa muhato  wenyi. Yesu asolokele kuvatu vavavulu chikuma hanyima yakumusangula. (Wavaka-Kolinde 1, 15:5, 6) Echi chatela kukunyula navatu vaze kavafwelela ngwavo nakukapwa kusangukako. Yehova atwama nangolo jakukindulwisa kuyoya.

24. Mwomwo ika twatela kufwelela ngwetu Yehova mwakasangula vafu, kaha lutalililo muka twatela kulama mutu himutu?

²⁴ Yehova atwama nangolo jakusangula vafu, kaha nawa akwechi muchima wakulinga ngocho. Lunga wakushishika Yopa vamuhwiminyinyine ahanjike ngwenyi, Yehova afwila kusangula vafu. (Yopa 14:15) Tunafwelela chikupu ngwetu uli nakufwila kupandama kuli ou Kalunga ketu, uze afwila kuzachisa ngolo jenyi jakukindulwisa vyuma mujila yazangi. Anuka ngwove, kusanguka hijila yimwe hajijila jize Yehova mwakalingisa vyuma kupwa vyavihya. Omu naupandama chikuma kuli Yehova, fwila kulamanga lutalililo lwove lwakukapwa muPalachise ukamone omu mwakalingisa “vyuma vyosena kupwa vyavihya.”—Kusoloka 21:5.