1. Uno vatu vakuhona kukupuka veji kufwanga mumuheto muka?

 MUKA-KUSONEKA tushimutwiji umwe wamulikulukaji lyamyaka lyakusokesa 19 ambile ngwenyi: “Ngolo japwa muheto.” Awa mazu eji kutwanukisanga vyamuheto wakuzachisa ngolo mujila yayipi. Chaluvinda, hakuwana nge vatu vosena kavakupukako, chachashi kufwa mumuheto kana. Kufuma vene kushikulu, “mutu nashinyinyika mukwavo mutu mangana amuyanjise.” (Muka-kwambulula 8:9) Kuzachisa ngolo chakuzeneka zangi chikiko chili nakuyanjisa chikuma vatu.

2, 3. (a) Chuma muka chatwivwisa kuwaha kutalisa kujila yize Yehova eji kuzachishilangamo ngolo jenyi? (b) Uno ngolo muka tunahase kupwa najo, kaha twatela kujizachisa ngachilihi?

² Tweji kwivwanga kuwaha hakutachikiza ngwetu Yehova Kalunga kazachisa ngolo jenyi mujila yayipiko numba tuhu atwama nangolo jajinene. Nganomu twamonanga mutupetulu vanafumuho, lwola lwosena eji kuzachisanga ngolo jenyi muzangi kweseka navyuma ajina, numba jipwa ngolo jakutenga vyuma, chipwe jakunongesa, chipwe jakukinga vatu, chipwe jakukindulwisa vyuma. Nge natushinganyeka hajila eji kuzachishilangamo ngolo jenyi, kaha natupandama kuli ikiye. Echi jino nachitukunyula tufwile ‘kulondezeza Kalunga’ mujila natuzachishilamo ngolo jetu. (Wavaka-Efwesu 5:1) Uno ngolo muka twatwama najo etu vatu hakuwana nge twapwa tuvakukuminamo hakutwesekesa kuli Kalunga?

³ Anuka ngwove mutu vamutengele “muchifwanyisa [chaKalunga],” kaha nawa wakulifwana naIkiye. (Kuputuka 1:26, 27) Shikaho nayetu tukwechi ngolo jakutamo  kweseka naseteko yetu hakupwa tuvatu. Twatwama nangolo jakutesamo vyuma chipwe kuzata milimo, chipwe kupwa nangolo hali vakwetu chipwe kuvatwaminyina, chipwe jakwalumuna vishinganyeka vyavakwetu chikumanyi vaze vatuzanga, chipwe jakujikiza muvifuhwa, chipwe nge tuli naupite. Muka-kwimba jisamu ahanjikile hali Yehova ngwenyi: “Kuli ove kukiko kwafuma kuyoya.” (Samu 36:9) Shikaho, kuli Kalunga kukiko kwafuma ngolo josena twatwama najo. Ngocho twatela kujizachisa mujijila jize najimwivwisa kuwaha. Uno natuhasa kulinga ngachilihi ngocho?

4, 5. (a) Chuma muka chachilemu chize nachitukafwa tuzachise kanawa ngolo jetu, kaha Kalunga atuhana chakutalilaho muka? (b) Uno zangi nayitukafwa ngachilihi tuzachise kanawa ngolo jetu?

⁴ Chuma chachilemu chasakiwa numba tuzachise kanawa ngolo shina zangi. Kalunga atuhana chakutalilaho. Anuka vyuma twashimutwilile muKapetulu 1 havilinga vyaKalunga viwana. Vilinga kana shina ngolo, nachiyulo, namangana nazangi. Hali evi vyuma viwana, chimwe chilihi chahambakana vikwavo? Zangi. Hali WaYowano 1, 4:8 ngwavo: “Kalunga ikiye zangi.” Eyo, Yehova apwa zangi, kaha vyuma vyosena eji kuvilinganga muzangi. Shikaho, eji kuzachisanga ngolo jenyi muzangi, nakukafwa vaze vamuzanga.

⁵ Zangi nayitukafwa nayetu tuzachisenga kanawa ngolo jetu. Omu mukiko yatulweza naMbimbiliya. Yamba ngwayo, zangi “yeji kutetelanga,” kaha nawa “kayeshi kufwila vyuma vyayo yiveneko.” (Wavaka-Kolinde 1, 13:4, 5) Shikaho, zangi nayitulingisa tuhone kuyanjisa vatu vaze tuli nakutwaminyina chipwe kuvalinga mwamupi. Oloze nayitulingisa tuvavumbike nakuhaka vyuma vasaka kulutwe kuhambakana vyayetu.—Wavaka-Fwilipi 2:3, 4.

6, 7. (a) Uno kwivwa Kalunga woma chapwa chika, kaha echi nachitukafwa ngachilihi tulihende kukuzachisa ngolo jetu mujila yakuhenga? (b) Lumbununa omwo kwivwa Kalunga woma chatambukila hamwe nakumuzanga.

 ⁶ Zangi yatambukila hamwe nachuma chikwavo chize chinahase kutukafwa tulihende kukuzachisa ngolo mujila yayipi. Chuma kana shina kwivwa Kalunga woma. Uno kwivwa Kalunga woma nachitukafwa ngachilihi? Mukanda waVishimo 16:6 wamba ngwawo: “Kumwivwa Yehova woma cheji kupeulanga mutu kuupi.” Kuzachisa ngolo mujila yakuhenga chatwama hamukana wavyuma vyavipi vize twatela kulihendako. Kwivwa Kalunga woma nachitukafwa tuhone kuyanjisa vatu vaze tuli nakutwaminyina. Mwomwo ika? Mwomwo twatachikiza ngwetu Kalunga mwakatusopesa hajila tweji kuyulilangamo vakwetu. (Nehemiya 5:1-7, 15) Oloze kwivwa Kalunga woma chasakiwa kulinga vyuma vyavivulu. Mazu amulilimi lyakulivanga aze valumuna ngwavo “woma” kakavulu atalisa kukuvumbika Kalunga. Shikaho Mbimbiliya yasolola hatoma ngwayo kuzanga Kalunga nachitulingisa tumuhane kavumbi. (Lushimbi lwamuchivali 10:12, 13) Echi kwivwa Kalunga woma chapwa nawa kuhona kumwivwisa kupihya. Tweji kulinganga ngocho mwomwo twamuzanga namuchima wetu wosena, keshi mwomwo yakuchina kutuzangamisako.

⁷ Chakutalilaho, achishinganyeke hausoko watwama hali mwana naise. Ou mwana atachikiza ngwenyi ise amuzanga chikuma kaha nawa amuzakama. Atachikiza nawa vyuma asaka ise kuli ikiye, nakutachikiza nawa ngwenyi ise mwamuzangamisa nge mwalimbenja. Ou mwana keshi kulizuzukila nawoma waiseko, mwomwo azanga chikuma ise. Eji kwivwanga kuwaha kulinga vyuma vize navivwisa ise kuwaha. Omu mukiko chapwa nakwivwa Kalunga woma. Hakuwana nge twazanga Setu  wamwilu Yehova, ngocho tweji kulihendanga kukala chuma chize nachimwivwisa kumuchima kupihya. (Kuputuka 6:6) Twafwila kumwivwisa kuwaha kumuchima. (Vishimo 27:11) Echi chikiko cheji kutulingisanga tuzachise kanawa ngolo jetu. Tutale jijila tunahase kulingilamo ngocho.

8. (a) Wata muka atwama nawo lunga mutanga, kaha atela kuuzachisa ngachilihi? (b) Uno lunga nahase kusolola ngachilihi ngwenyi avumbika puwenyi?

⁸ Chatete, tuchihunanane jino hatanga. Mukanda wavaka-Efwesu 5:23 wamba ngwawo: “Lunga apwa mutwe wapwevo.” Uno lunga atela kuzachisa ngachilihi wata vamuhana kuli Kalunga? Mbimbiliya yalweza malunga vatwamenga namapwevo javo “mwaya chinyingi,” ‘nakuvavumbika nge hichitenga chakuhehela.’ (WaPetulu 1, 3:7) Lizu lyachiHelase lize valumuna ngwavo “kavumbi,” lyalumbununa “ndando yayinene, kulema, . . . kalemesa.” Eli lizu valyalumuna nawa ngwavo “mawana.” (Vilinga 28:10) Lunga uze eji kuvumbikanga puwenyi keshi kumupupula, chipwe kumutoleka chipwe kumwivwisa sonyi nakumulingisa alivwe kupwa wamokomokoko. Oloze eji kumumonanga kupwa wamulemu nakumuvumbika. Eji kusololanga muhanjikiso namuvilinga ngwenyi amumona kupwa wamulemu numba nge vali kwauka wavo chipwe kuvatu. (Vishimo 31:28) Lunga wakufwana ngana veji kumuzanganga kuli puwenyi nakumuvumbika, kaha nawa Kalunga eji kumwivwilanga kuwaha.

9. (a) Uno mapwevo vatwama nangolo muka mutanga? (b) Vyuma muka navikafwa pwevo azachisenga uhashi wenyi mangana akundwizenga lunga lyenyi, kaha kuwaha muka nachifumamo?

⁹ Namapwevo nawa vakwechi ngolo jimwe mutanga. Mbimbiliya yahanjika hamapwevo vaze vevwilenga  Kalunga woma nakuvumbika malunga javo. Ava mapwevo vazachilenga nangolo vakunyule malunga javo valinge vyuma vyakwoloka chipwe valihende kuvyuma vize navivengisa muukalu. (Kuputuka 21:9-12; 27:46–28:2) Pwevo nahase kupwa muka-kushinganyekanga washi kuzomboka lunga lyenyi, chipwe kupwa nauhashi weka uze keshi nawo lunga lyenyiko. Chipwe ngocho, atela kupwa “nakalemesa chikuma” kuli lunga lyenyi ‘nakuliluula’ kuli ikiye “nge kuli Mwata.” (Wavaka-Efwesu 5:22, 33) Nge pwevo mwafwila kwivwisanga Kalunga kuwaha, kaha nachimukafwa azachisenga uhashi wenyi mangana akundwize lunga lyenyi muchishishisa chakumulelesanga chipwe kusaka kumutwama hamutwe. Ou ‘pwevo wamangana’ ngana eji kuzachilanga hamwe nalunga lyenyi mangana vatunge tanga yavo. Ngocho pwevo kana eji kupwanga nausoko wamwaza naKalunga.—Vishimo 14:1.

10. (a) Uno Kalunga ahana visemi wata muka? (b) Uno lizu ‘kuzangamisa’ lyalumbununa ika, kaha visemi vatela kuzangamisa ngachilihi vana vavo? (Talenu nawa kwinyikila chamwishi.)

¹⁰ Visemi navakiko vatwama nawata uze avahana Kalunga. Mbimbiliya yamba ngwayo: “Enu masevo . . . , kanda namwivwisanga kupihya vana venuko, oloze valelenunga mukuvazangamisa namukuhuhumuna chakuli Yehova.” (Wavaka-Efwesu 6:4) MuMbimbiliya, lizu ‘kuzangamisa’ linahase kulumbununa “kulela, kunangula, chipwe kuhana jishimbi.” Vana vasakiwa kuvazangamisanga. Veji kukolanga kanawa nakufukila nge navavahana jishimbi jambwende, nakuvalumbunwina vyuma vatela kulinga nevi kavatela kulingako. Mbimbiliya yavuluka ngwayo kuzangamisa kanechi chipwe kuhana jishimbi, chatambukila hamwe nazangi. (Vishimo 13:24) Shikaho, ‘chitondo chakuzangamisa’ kavatela kuchizachisa mujila yaukenya yize nayihombesa mwana chipwe kumulemekako. a  (Vishimo 22:15; 29:15, kwinyikila chamwishi) Kuzangamisa mwana mujila yaukenya chakuzeneka zangi chapwa kuzachisa wata mujila yayipi, kaha nawa chinahase kumuhombesa. (Wavaka-Kolose 3:21) Oloze kuzangamisa mujila yamwaza cheji kukafwanga vana vatachikize ngwavo visemi javo vavazanga, kaha vasaka vakapwe vatu vakulumbunuka nge vanakolo.

11. Uno vana vanahase kuzachisa ngachilihi ngolo javo?

¹¹ Uno navana vatwama nangolo tahi? Kaha vanahase kuzachisa ngachilihi kanawa ngolo javo? Mukanda waVishimo 20:29 wamba ngwawo: “Upahu wavakweze hingolo javo.” Chikupu vene, jila yamwaza yize vakweze vanahase kuzachishilamo ngolo javo, shina yakuzachila ‘Tengi yetu Wamunene.’ (Muka-kwambulula 12:1) Vana vatela kwijiva ngwavo vilinga vyavo vinahase kwivwisa visemi javo kuwaha chipwe kupihya. (Vishimo 23:24, 25) Nge vana navononoka visemi javo vaze vevwa Kalunga woma nakulinganga vyuma vyakwoloka, kaha navevwisa visemi javo kuwaha. (Wavaka-Efwesu 6:1) Kulinga ngocho “cheji kwivwisanga Mwata kuwaha.”—Wavaka-Kolose 3:20.

12, 13. (a) Uno vakulwane vatela kumona ngachilihi ngolo vatwama najo muchikungulwilo? (b) Hana chakutalilaho chasolola ovyo vakulwane vatela kutetelanga mikoko.

¹² Yehova atongola tulama vatwaminyine chikungulwilo chavaka-Kulishitu. (WavaHepeleu 13:17) Ava malunga vakulindunuka vatela kuzachisa ngolo avahana Kalunga  mangana vakafwe utanga wamikoko upwenga wakulikangula kushipilitu. Kutala vihela vatwama navyo vyatela kuvalingisa vapwenga vakaka javakwavo vaka-kwitava tahi? Nduma. Vakulwane vatela kupwa vakulinyisa nakutachikiza kanawa mulimo vavahana muchikungulwilo. (WaPetulu 1, 5:2, 3) Mbimbiliya yalweza tulama ngwayo: “[Fungenunga] chikungulwilo chaKalunga chize alanjile namanyinga aMwanenyi.” (Vilinga 20:28) Echi chikiko chuma chachilemu chatela kulingisa vakulwane vatetelenga mukoko himukoko.

¹³ Tala chakutalilaho chino: Naulinga ngachilihi nge sepa lyove nakulweze umulamineko chuma chenyi chize amona kupwa chachilemu? Tunafwelela ngwetu nauchilama kanawa mwomwo unatachikiza ngwove chuma kana achilanjile handando yayinene. Chochimwe nawa, Kalunga ahana tulama mulimo wakulama chikungulwilo chenyi chize amona kupwa chachilemu, muze mwatwama vatu vaze afwanyisa kumikoko. (Yowano 21:16, 17) Yehova azanga chikuma mikoko jenyi, shikaho avalanjile nandando yamanyinga amalemu aMwanenyi umwe kaha wakulipwila, Yesu Kulishitu. Eyi ndando ahanyine Yehova yapwile yayinene chikuma. Tulama vakulinyisa veji kwanukanga chishina kana nakulama kanawa mikoko jaYehova.

14. Uno lilimi lyatwama nangolo jakulinga ika?

¹⁴ Mbimbiliya yahanjika ngwayo: “Lilimi lyatwama nangolo jakuneha kufwa chipwe kuyoya.” (Vishimo 18:21) Chikupu vene, lilimi linahase kwenyeka chikuma vyuma. Iyaze kanda achivwengaho lyehi kukola kumuchima hakumwamba mwamupi? Chipwe ngocho, lilimi lyatwama nawa nangolo jakuwahisa vyuma. Hali Vishimo  12:18 ngwavo: “Lilimi lyamuka-mangana lyeji kuhindulanga.” Eyo, mazu amwaza akukolezeza, anahase kupwa nge vitumbo nakutulingisa twechenga kwivwa kukola kumuchima. Tala havyakutalilaho vino.

15, 16. Mujijila muka tunahase kuzachishilamo lilimi lyetu mangana tukolezeze vakwetu?

¹⁵ Hali Wavaka-Tesolonyika 1, 5:14 vatukolezeza ngwavo: “Vendejekenunga vatu vaze vanahombo.” Chikupu vene, shimbu jimwe navangamba jaYehova vakushishika vanahase kuhomba. Uno natuhasa kuvakafwa ngachilihi? Twatela kuvasangejeka kufuma kumuchima mangana vamone ngwavo Yehova avamona kupwa vavalemu. Tunahase kushimutwila navo mazu akuvendejeka amuMbimbiliya akusolola nge chikupu vene Yehova avazanga, kaha nawa azakama vaze “vali nakulyonyinga mumuchima” navaze “vanahombo.” (Samu 34:18) Nge natuzachisanga ngolo jalilimi lyetu mangana tukolezeze vakwetu, kaha natusolola ngwetu tuli nakulondezeza Kalunga ketu wakeke,  “uze eji kuvendejekanga vaze vanahombo.”—Wavaka-Kolinde 2, 7:6.

¹⁶ Tunahase nawa kuzachisa ngolo jalilimi lyetu hakukolezeza vakwetu. Nge ndumbwetu nafwisa, kaha tunahase kuhanjika nenyi mazu akumuvendejeka mangana tusolole ngwetu twamuzakama, ngocho mazu kana anahase kumuvendejeka. Nge kuli ndumbwetu wakashinakaji ali nakulimona ngwenyi wamokomoko, kaha tunahase kumukolezeza mangana amone ngwenyi apwa wamulemu kaha nawa twamuzanga. Nge kuli ndumbwetu aviza musongo wakuhona kuka, kaha tunahase kushimutwila nenyi mazu akukokweza hashinga chipwe kumusonekela mukanda chipwe kuya nakumutala, kahechi nachimujikijisa. Tengi yetu mwawahilila chikuma hakutumona tuli nakuzachisa ngolo jalilimi lyetu mangana tuhanjike mazu ‘akutunga vakwetu.’—Wavaka-Efwesu 4:29.

17. Jila muka yayilemu tunahase kuzachishilamo lilimi lyetu mangana tunganyalise vakwetu, kaha mwomwo ika?

¹⁷ Jila yayilemu chikuma yakuzachishilamo ngolo jalilimi lyetu, shina kwambulila vatu mujimbu wamwaza waWangana waKalunga. Hali Vishimo 3:27 ngwavo: “Kanda ukamina vyamwaza vaze vanatela kuvahanavyoko, kachi nge chili mungolo jove kuvahanavyo.” Tukwechi mukuli wakwambulila vatu mujimbu wamwaza wakuvayovola. Shikaho, katwatela kulitwamina kwambulula ou mujimbu atuhana Yehova uze uli nakusakiwa mukapachapachako. (Wavaka-Kolinde 1, 9:16, 22) Uno Yehova nasake tuwambulule kuheta nakuseteko muka?

18. Uno Yehova asaka tulinge ika?

¹⁸ Kuzanga Yehova cheji kutukunyulanga twazane chikuma mumulimo wakwambulula. Uno Yehova asaka etu tulinge ika kutalisa kumulimo kana? Kala mwosena omwo  chinapu chiyoyelo chetu, tuvosena tunahase kulinga chuma atulweza ngwenyi: “Vyeshovyo muli nakuzata, vizatenunga namwono wosena, nge muli nakumuzachila Yehova, keshi vatuko.” (Wavaka-Kolose 3:23) Yesu hakuvuluka lushimbi lwalulemu, ambile ngwenyi: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena, nangolo jenu josena.” (Mako 12:30) Eyo, Yehova asaka mutu himutu amuzangenga nakumuzachila namwono wenyi wosena.

19, 20. (a) Uno nge lizu mwono lyatalisa nakumuchima wamutu, navishinganyeka vyenyi nangolo jenyi, kaha mwomwo ika vyuma kana vanavivulukila cheka hali Mako 12:30? (b) Uno kuzachila Yehova namwono wetu wosena chalumbununa ika?

¹⁹ Uno kuzachila Kalunga namwono wetu wosena chalumbununa ika? Lizu mwono lyatalisa kumutu wosena, nangolo jenyi navishinganyeka vyenyi vyosena. Uno nge lizu mwono lyatalisa nakumuchima wamutu, navishinganyeka vyenyi nangolo jenyi, kaha mwomwo ika vyuma kana vanavivulukila cheka hali Mako 12:30? Achishinganyeke hachakutalilaho chino. Mulwola vasonekele Mbimbiliya, vatu valilanjishilenga vavene (myono yavo) muundungo. Oloze vandungo vamwe kavazachililenga vakaka javo namichima yavo yosenako, kulumbununa nge kavazachilenga nangolo javo josena, chipwe navishinganyeka vyavo vyosena mangana vafukise milimo yavakaka javoko. (Wavaka-Kolose 3:22) Echi chikiko chalingishile Yesu avuluke evi vyuma vikwavo mangana alumbunune kanawa ngwenyi twatela kuzachisanga vyosena twatwama navyo mumulimo waKalunga. Chikupu vene, kuzachila Kalunga namwono wetu wosena chalumbununa kulihana etu vavene, nakuzachisa ngolo jetu josena mumulimo wenyi.

²⁰ Uno kuzata namwono wetu wosena chalumbununa  nge tuvosena twatela kuzata jola jojimwe mumulimo wakwambulula nakuzachisa ngolo jakuteseka hamwe tahi? Nduma, mwomwo vatu vatwama nachiyoyelo nauhashi wakulihandununa handununa. Chakutalilaho, mukweze wakulikangula, uze nawa ali nangolo, nahase kuzata jola jajivulu mumulimo wakwambulula kuhambakana kashinakaji. Mujike uze kanda achipwe natanga yakuzakama nahase kuzata chikuma kuhambakana uze ali natanga hazuvo. Kachi nge tuli nangolo jakuzata chikuma mumulimo wakwambulula, kaha chiyoyelo chetu nawa chinatwitavisa, twatela kusakwilila Yehova. Chipwe ngocho, katwatela kupwa namuchima wakuhombwanyisa vakwetu chipwe kulyesekesa kuli vakwetuko. (Wavaka-Loma 14: 10-12) Oloze twatela kuzachisa ngolo jetu mangana tukolezeze vakwetu.

21. Jila muka yamwaza yayilemu chikuma yize tunahase kuzachishilamo ngolo jetu?

²¹ Yehova atuhana chakutalilaho chamwaza kutalisa kujila eji kuzachishilangamo kanawa ngolo jenyi. Twafwila kumulondezeza kweseka noho hakumina ngolo jetu numba tuhu katwakupukako. Tunahase kuzachisa kanawa ngolo jetu hakuvumbika vatu vaze tuli nakutwaminyina. Kaha nawa tweji kufwilanga kuzata namwono wetu wosena mulimo wakwambulula wakuyovola vatu, uze Yehova atuhana. (Wavaka-Loma 10:13, 14) Anuka ngwove, Yehova eji kwivwanga kuwaha chikuma nge nauzata noho hakumina ngolo jove, chipwe ngwetu kuzata namwono wove wosena. Chikupu vene, nawivwa kuwaha kuzachila Kalunga uze apwa muka-kwivwishisa, kaha nawa wazangi. Eyi yikiko kaha jila yamwaza yayilemu chikuma yize unahase kuzachishilamo ngolo jove.