1, 2. Uno likumbi lyasolola ngachilihi ngolo jaYehova jakutenga vyuma?

 KUTALA watwamaho lyehi kukakahya halwola lwachishika naufuku tahi? Pamo wasengekele mavoko ove kukakahya mangana wivwenga yuku. Nge wahachile chikuma kukakahya, kaha wevwile kuzuma chikuma. Jino nge wasosolokeleko chikuma, kaha chishika chakukwachile.

² Likumbi tunahase kulifwanyisa “kukakahya” kaze keji kutukafwanga twivwenga yuku. Likumbi lyatwama kwakusuku nayetu, kafwe jikilomita jakuheta kujimiliyoni 150. a Numba tuhu likumbi lyatwama hahasuku oloze tweji kwivwanga yuku mwomwo lyatwama nangolo. Oloze tunda yakufuma haze hasukama pulaneti yamavu nakuheta halikumbi yapwa yakutamo. Shikaho nge mavu nawapwa kwakamwihi nalikumbi, kaha meya nawakakumuka nakuma, kaha nawa nge nawapwa hahasuku nalikumbi kaha meya nawalikonda. Kachi nge mukiko chapwile, kachi hamavu kahatwama vyuma vyakuyoyako. Shikaho musana wapwa waulemu chikuma kuvyuma vyakuyoya. Kawalingisa nawa vyuma vilyenyekeko, kaha nawa weji kutwivwisanga kuwaha.—Muka-kwambulula 11:7.

3. Likumbi lyatunangula vyuma muka?

³ Chipwe ngocho, vatu vavavulu kavamona likumbi kupwa lyalilemuko, numba tuhu hakiko hapendamina  kuyoya chavo. Echi chikiko chavalingisa vahona kutachikiza vyuma tunahase kulinangula kulikumbi. Mbimbiliya yahanjika hali Yehova ngwayo: “Yove wahakileko kumunyika nalikumbi.” (Samu 74:16) Chikupu vene, likumbi lyeji kuneha kavumbi hali Yehova uze “atengele melu namavu.” (Samu 19:1; 146:6) Tunahanjika kaha halikumbi havyuma vyakumunyika vyavivulu vyamumelu vize vyatukafwa tutachikize ngolo jaYehova jakutenga vyuma. Oloze tutale jino havyuma vikwavo vyakumunyika, kaha kufumaho numba jino tushimutwile hapulaneti yamavu navyuma vyakuyoya vyatwamaho.

4, 5. Uno tunatachikiza ngachilihi ngwetu likumbi lyatwama nangolo chikuma, kaha lyatohwa ngachilihi? Tunahase kulyesekesa ngachilihi kuvatanganyika vakwavo?

⁴ Ngana muze pamo watachikiza, nalikumbi lyapwa tanganyika. Likumbi lyeji kusolokanga kupwa lyalinene kuhambakana vatanganyika tweji kumonanga naufuku, mwomwo likiko lyatwama hakamwihi. Uno tunatachikiza ngachilihi ngwetu likumbi lyatwama nangolo chikuma?  Kuzuma chalikumbi chaheta kafwe ku 15,000,000°C. Nge mumbata kachihanda kalikumbi kakweseka hamwe namutwe wafwenete nakukaneha hano hamavu, kaha kuzuma nachifuma kukachihanda kana chinahase kukwocha nge nawimana hatunda yakuheta kujikilomita 140. Kuzuma chize cheji kufumanga kulikumbi hasekondi yimwe, cheseka hamwe nakuzuma chatupata vavavulu chikuma vaze navapilukila hamwe.

⁵ Likumbi lyapwa lyalinene chikuma, kaha ano mavu etu anahase kwingilamo mapapa akuhambakana 1,300,000. Uno likumbi likiko lyapwa tanganyika wamunene chikuma tahi? Nduma, vaka-sayasi vamba ngwavo likumbi lyapwa lyalindende chikuma hakulyesekesa kuvatanganyika vamwe. Kaposetolo Paulu asonekele ngwenyi, “upahu watanganyika hitanganyika walihandununa.”  (Wavaka-Kolinde 1, 15:41) Paulu hauka wenyi kaha kachi katachikijile muchano wamazu kanako. Kwatwama tanganyika wamunene. Nge tanganyika kana navamuhaka haze hatwama likumbi, kaha nahase kufwikila kumwe nayino pulaneti yamavu. Kwatwama nawa tanganyika mukwavo wamunene chikuma, kaha nge navamutumbika haze hatwama likumbi nahase kuheta kupulaneti vavuluka ngwavo Saturn. Eyi pulaneti yatwama kwakusuku chikuma napulaneti yamavu, kaha nge ndeke nayiyako, nayitambuka myaka yiwana numba yikahete, oho nawa yili nakutuka chikuma kuhambakana kutuka chachilyanga mapapa 40.

6. Uno Mbimbiliya yasolola ngachilihi ngwayo vatanganyika vapwa vavavulu chikuma, kaha kaveshi kuhasa kuvalava kuli mutuko?

⁶ Chuma chakukomwesa nawa shina kuvula chavatanganyika kana. Mbimbiliya yavuluka ngwayo kakweshi mutu mwahasa kulava vatanganyikako, ngana muze chakaluhwa kulava “usekeseke wakukalungalwiji.” (Yelemiya 33:22) Echi chalumbununa nge kwatwama vatanganyika vavavulu vaze katweshi kuhasa kumona namesoko. Kachi nge muka-kusoneka Mbimbiliya Yelemiya atalile mwilu naufuku nakweseka kulava vatanganyika, kachi ahashile kulavako kaha kafwe makombakaji atatu mwomwo vakiko vatanganyika nahase mutu kulava chakuhona kuzachisa likina. Echi kuvula vanahase kuchesekesa kumaundu ausekeseke wakuta mulivoko kaha. Oloze vatanganyika vapwa vavavulu chikuma ngana mwausekeseke wakukalungalwiji. b Uno iya nahase kuvalava vosena?

7. Uno vaka-sayasi vashinganyeka vyuma muka kutalisa kukuvula chavatanganyika vatwama mumulalaji wetu, chipwe kutalisa kukuvula chamilalaji yatwama mumelu?

 ⁷ Mukanda waIsaya 40:26 wamba ngwawo: “Andulenu meso enu mutale mwilu mumone. Iyaze natenge vyuma vyosenevi? Shina Ou eji kutetekelanga liyongomena lyavatanganyika kweseka nakuvula chavo. Eji kuvavulukanga vosena halijina halijina.” Kaha nawa mukanda waSamu 147:4 ngwawo: “Eji kulavanga vatanganyika.” Uno kwatwama ‘vatanganyika’ vangahi? Chihula kana chachikalu kuchikumbulula. Vaka-sayasi vashinganyeka ngwavo mumulalaji wetu vavuluka ngwavo Milky Way mwatwama vatanganyika vakuzomboka hajimbiliyoni 100. c Veka nawa ngwavo vapwa vavavulu chikuma kuhambakana kuvula kanechi. Oloze kwatwama nawa vihita vyamilalaji muze mwatwama vatanganyika vavavulu kuhambakana vaze vatwama mumulalaji wetu. Uno kwatwama milalaji yingahi? Vaka-sayasi vashinganyeka ngwavo kwatwama vihita navihita vyamilalaji. Kweseka nomwo vili vyuma oholyapwa ngana, chinasoloka nge kakweshi mutu nahase kutachikiza kuvula chamilalaji yosena navatanganyika vatwamamoko. Oloze Yehova atachikiza kuvula chayo. Kaha nawa eji kuvulukanga tanganyika hitanganyika halijina.

8. (a) Uno naulumbununa ngachilihi kutohwa chamulalaji wetu waMilky Way? (b) Uno Yehova ahakako vyuma muka vize vyeji kukafwanga vyuma vyamwilu vitambuke mukulonga?

⁸ Tunahase kuvumbika chikuma Kalunga nge natushinganyeka hakutohwa chamilalaji. Chakutalilaho, achishinganyeke omwo kumunyika cheji kutambukanga  washiwashi. Cheji kutambukanga jikilomita 300,000 hasekondi yimwe. Shikaho chinahase kumbata myaka 100,000 numba chivatasane mulalaji wetu wosena waMilky Way. Kaha nawa milalaji yeka yapwa yayinene chikuma kuzomboka mulalaji kana. Mbimbiliya yahanjika ngwayo, Yehova akanyika “lilu” kwijiva nge lihina. (Samu 104:2) Alongesa nawa omwo jipulaneti navatanganyika vatela kutambuka. Vyuma vyosena vyamumelu, vipwa vyavindende chipwe vyavinene, vyeji kutambukanga mukulonga kweseka najishimbi javyuma vyakutenga jize ahakako Kalunga. (Yopa 38:31-33) Shikaho vaka-sayasi vafwanyisa kutambuka chavyuma vyamumelu kulizavu lyalinene lyavaka-kukina lize valongesa kanawa. Kaha shinganyeka jino hali Uze atengele vyuma vyosenevi. Chikupu vene, tunafwelela unevu kuwaha kutachikiza ngolo jaKalunga jajinene jakutenga vyuma.

9, 10. Uno havihela haze vahaka likumbi najipulaneti josena nakakweji, vyasolola ngachilihi ngolo jaYehova?

⁹ Jila yize Yehova atengelelemo mavu yasolola ngolo jenyi. Yino pulaneti yetu yamavu ayihaka hamwaza muutangatanga. Vaka-sayasi vamwe vamba ngwavo, mumilalaji yayivulu kamweshi kuhasa kupwa vyuma vyakuyoya ngana muze chapwa hano hapulaneti yetuko. Kaha nawa chihanda chachinene chamulalaji wetu waMilky Way kachatwama navyuma vyakuyoyako. Hakachi kamulalaji wetu hazala navatanganyika. Ngocho hazuma chikuma, kaha nawa vatanganyika kana valihata chikuma. Kukulo yamulalaji wetu nawa kakwatwama vyuma vyavivulu vize vyakundwiza kuyoyako. Oloze likumbi najipulaneti josena vyatwama mukachi kavyevi vihanda vivali.

¹⁰ Pulaneti yetu yamavu veji kuyikinganga kupulaneti yayinene yize yatwama hahasuku vavuluka ngwavo Jupiter.  Eyi pulaneti yapwa yayinene kuzomboka ano mavu mapapa 1,000, kaha yikwechi chikuma ngolo jakukoka vyuma (gravity). Ngocho eyi pulaneti yeji kukokanga chipwe kupeula vyuma vyaponde vize vyeji kutambukanga muutangatanga. Vaka-sayasi vawana ngwavo, nge eyi pulaneti yaJupiter kayapwileko, kachi vyuma kanevi vyaponde vyeji kutulilanga hano hamavu mapapa akuzomboka 10,000. Kaha nawa yino pulaneti yetu yamavu yalihata nakakweji. Kakweji eji kusolokanga ulangaji, kaha nawa eji ‘kumunyikanga naufuku.’ Kakweji nawa eji kulingisanga yino pulaneti yetu yamavu yipwenga yakutengama lwola lwosena. Kaha echi kutengama chikiko cheji kulingisanga tupwenga najingonde jakulisezaseza, jize japwa jajilemu chikuma kuvyuma vyakuyoya.

11. Uno utangatanga weji kuzatanga ngachilihi nge kepwe yakukinga ano mavu?

¹¹ Ngolo jaYehova jakutenga vyuma jasoloka muvyuma atenga hano hamavu. Achishinganyeke hautangatanga uze wazata nge kepwe yakutukinga. Kulikumbi kweji kufumanga miteleleji yamwaza nayeyi yaponde. Nge miteleleji yaponde yinahete haze haputukila utangatanga wetu, yeji kulingisanga peho tweji kuhwimanga yaoxygen kwalumuka nakupwa jino hichiuva chapeho yaozone. Kaha eyi peho yaozone yikiko yeji kuhonesanga eyi miteleleji kupulasana. Echi chili kwijiva nge yino pulaneti yetu yamavu vayifwika kuchuma chimwe chakuyikinga.

12. Uno kulitungulula chameya muutangatanga chasolola ngachilihi ngolo jaYehova jakutenga vyuma?

¹² Utangatanga ukwechi peho yize twasakiwa numba tuyoye, kaha nawa weji kulinganga vyuma vyavivulu vize vyeji kulingisanga hano hamavu hapwenga kuyoya. Muutangatanga mwatwama nawa vyuma vikwavo vyakukomwesa, kaha chuma chimwe shina kulitungulula chameya. Mwaka himwaka, likumbi lyeji kukakumunanga meya  akuheta ku 400,000 cu km kufuma mutulwiji namutulungalwiji. Awa meya anakakumuka eji kulitunganga jino kupwa mavwi, aze eji kupekumukanga napeho yamuutangatanga. Kaha nge awa meya analikoso lyehi omu apwanga nakukakumuka, eji kunokanga mwavula, chipwe mwambundu yachishika, chipwe mwameya akale, nakuhiluka jino kuze afumanga. Chapwa ngana muze vasoneka hali Muka-kwambulula 1:7 ngwavo: “Tulwiji vosena vawila hakalungalwiji, oloze kalungalwiji kazalako. Kaha meya eji kukindulukanga kuto yatulwiji kana nakuputuka kuhita cheka.” Yehova kaha ikiye nahase kulinga chuma kanechi.

13. Uno mitondo namavu vyasolola ngachilihi ngolo jaYehova?

¹³ Kala vyuma vyakuyoya natumona vyasolola ngolo atwama najo Tengi. Ngolo jaYehova jakutenga vyuma tweji kujimwenanga nawa kumitondo yayisuku yajimita jakuzomboka 100, nakutumitondo twatundende tuze twatwama mukalungalwiji, tuze tweji kutunganga peho yaoxygen yize tweji kuhwimanga. Kaha mumavu mwatwama tututu vavavulu vaze veji kulingisanga mitondo yikole kanawa.

14. Uno kaliundu kaatomu katwama nangolo muka?

¹⁴ Chikupu vene, Yehova “ikiye atengele mavu nangolo jenyi.” (Yelemiya 10:12) Ngolo jaKalunga jeji kusolokanga namuvyuma vyavipululu atenga. Chakutalilaho, unahase kuhaka hamwe tumaundu vavuluka ngwavo atomu twakuheta kumiliyoni yimwe, oloze katweshi kuheta hakutohwa chalukambu lwamutuko. Numba tuhu nge ngwavo vafutunune atomu yimwe mangana yitohwe nakusuhwa nge zuvo yili najizuvo jahelu 14, oloze kamuchima kaatomu nakapwa kwijiva nge kaliundu kamungwa kaze kali hakachi kazuvo kaneyi yayisuku. Aka kamuchima numba tuhu kapwa kakapululu, oloze kakiko vene veji kutungisanga tupata vangolo.

15. Uno Yehova anangwile Yopa chishina muka hakuhanjika hatunyama vakulisezaseza?

¹⁵ Unjiho ukwavo uze wasolola ngolo jaYehova shina kuvula chatunyama vahano hamavu. Mukanda waSamu 148 wavuluka vyuma vyavivulu vize vyeji kwalisanga Yehova, kaha vesi 10 yavuluka nawa ‘tunyama vamuchipapa navimuna vosena.’ Yehova alwezele Yopa vyandumba, nangolo, nangombe wamuchipapa, naMbehemote (nguvu), naLevyatane (pamo ngandu), mangana akafwe vatu vamuvumbikenga hakupwa Tengi. Chuma muka Yehova asakile kunangula Yopa? Asakile Yopa atachikize ngwenyi, kachi nge mutu mwevwa woma wavava tunyama vangolo vakwivwisa woma, kahanyi vatela kwivwa chikuma woma Uze avatengele.—Yopa, kapetulu 38-41.

16. Vyuma muka vyeji kukwivwisanga kuwaha hatujila vamwe vaze atenga Yehova?

¹⁶ Mukanda waSamu 148:10 wavuluka nawa “tujila vakwechi mavava.” Achishinganyeke omu yavula miyachi yatujila. Yehova alwezele Yopa vyanyamalanda uze “eji kusehanga kavalu namuka-kumutambukisa.” Numba tuhu ou kajila wamusuku mahinji akuheta kafwe kujimita 2.5 katukako, oloze eji kulahanga tunda yajikilomita 65 muola yimwe, mwomwo tambo yenyi yeji kuhetanga kujimita 4.5. (Yopa 39:13, 18) Oloze kwatwama nawa kajila umwe vavuluka ngwavo albatross uze eji kuhemenanga chikuma helu lyatulungalwiji. Ou kajila eji kutengenyanga helu, kaha mavava enyi apwa amasuku kafwe jimita jitatu kufuma kusongo yalivava nakuheta kusongo yalivava likwavo nge nawatanduula. Nahase kuzajika mavava enyi hatando yayisuku mwilu chakuhona kuwapupumwiza. Kwatwama nawa kajila wakufwana nge kasholya, uze apwa wamundende chikuma hatujila vosena mukaye. Kajila kana eji kupupumwizanga mavava enyi mapapa 80 hasekondi yimwe. Kajila kana eji kuvyakumanga chikuma  hamangona kwijiva nge malolwa andando yayinene. Kaha eji kwimananga mupeho kwijiva nge ndeke yakapokopoko, kaha nawa eji kupululukanga nachifutanyima.

17. Uno blue whale atohwa ngachilihi, kaha tweji kwivwanga ngachilihi hakushinganyeka hatunyama vaze atenga Yehova?

¹⁷ Mukanda waSamu 148:7 wavuluka ngwawo ‘natunyama vamutulungalwiji’ veji kwalisanga Yehova. Achishinganyeke likanyama vamona ngwavo likiko lyalinene chikuma kuzomboka tunyama vosena vahano hamavu, lize vavuluka ngwavo blue whale. Ou kanyama apwa wamusuku kafwe jimita 30 chipwe kuhambakanaho, kaha eji kupwanga ‘hatujinga.’ Kanyama kana nahase kulema kuhambakana vakungulu javanjamba 30. Lilimi lyenyi linahase kulema ngana mwanjamba umwe. Muchima wenyi wateseka hamwe naminyau yayindende. Ou muchima weji kulukukanga mapapa 9 mumunyutu umwe, kaha walihandununa namuchima wakasholya uze weji kulukukanga mapapa 1,200 mumunyutu umwe. Mumushisa wayou kanyama mwapwa mwamunene, kaha munahase kukalava kemba. Chikupu vene, tweji kuwahililanga hamazu vasoneka muvesi yamakumishilo mumukanda waSamu yize yahanjika ngwayo: “Vyuma vyakuhwima vyosena vyalisenga Ya.”—Samu 150:6.

18, 19. Uno vyuma vingahi atenga Yehova hano hamavu, kaha vyatunangula vyuma muka kutalisa kuwata wenyi?

¹⁸ Uno jila Yehova eji kuzachishilangamo ngolo jenyi jakutenga vyuma nayitunangula vyuma muka? Tweji kulikomokelanga chikuma hakumona vyuma vyakulisezaseza vize atenga Yehova. Muka-kwimba jisamu umwe ambile ngwenyi: “Ove Yehova, vyuma watenga omu vyavula! . . . Hamavu hazala navyuma watenga.” (Samu 104:24) Omu mukiko vene chikupu. Vaka-sayasi vawana nge hano hamavu  hatwama vyuma vyakuyoya vyavivulu vyakuhambakana hamiliyoni yimwe, oloze vamwe nawa vashinganyeka ngwavo vyuma kana vyahambakana hajimiliyoni. Shimbu jimwe mutu uze apwa muka-kutenga vyuma, mangana eji kumukumanga. Oloze Yehova mangana kawamukumako, atwama lika nangolo jakutenga vyuma vyavihya vyakulihandununa handununa.

¹⁹ Jila yize Yehova eji kuzachishilangamo ngolo jenyi yatukafwa tutachikize ngwetu akwechi wata. Lizu lyakwamba ngwavo “Tengi” lyahandununa Yehova kuvyuma vyosena vyamwilu nahamavu, mwomwo vyuma kana valingile vyakutenga. Numba tuhu MwanaYehova wakulipwila apwile “kuluwa muka-kuzata” halwola lwakutenga vyuma, oloze kavamuvuluka muMbimbiliya ngwavo Tengiko. (Vishimo 8:30; Mateu 19:4) Oloze vamuvuluka ngwavo apwa “twatwa kuvyuma vyakutenga vyosena.” (Wavaka-Kolose 1:15) Hakuwana nge Yehova apwa Tengi, ngocho ikiye atwama nangolo jakuyula vyuma vyosena vyamwilu nahamavu.—Wavaka-Loma 1:20; Kusoloka 4:11.

20. Uno Mbimbiliya yatalikishile mulihi hakwamba ngwayo Yehova anokele omu akumishile kutenga vyuma hano hamavu?

 ²⁰ Kutala Yehova nalitwamina kuzachisa ngolo jenyi jakutenga vyuma tahi? Mbimbiliya yahanjika ngwayo, Yehova akumishile milimo yenyi yakutenga halikumbi lyakusokesa 6, kaha “halikumbi lyakusokesa 7, anokele kumilimo yenyi yosena yize apwile nakuzata.” (Kuputuka 2:2) Mazu ahanjikile kaposetolo Paulu asolwele nge eli “likumbi” lyakusokesa 7 lyapwile myaka yayivulu chikuma, mwomwo likumbi kana kulyapwile lika namumyaka yize apwileko. (WavaHepeleu 4:3-6) Uno “kunoka” kana chili nakulumbununa nge Yehova alitwamina kuzata tahi? Chiku, Yehova achili lika nakuzata. (Samu 92:4; Yowano 5:17) Echi kunoka kana pamo chapwile nakutalisa kukwecha kuzata mulimo wakutenga vyuma hano hamavu. Oloze chazata mulimo wakutesamo vyuma ajina. Chakutalilaho, azachile mulimo wakuhwima Visoneka Vyajila. Kaha nawa nazatenga mulimo wakukungulula vyuma vize Mbimbiliya yavuluka ngwayo “kutenga chachihya.” Natukashimutwila vyuma kana muKapetulu 19.—Wavaka-Kolinde 2, 5:17.

21. Uno natukevwa ngachilihi omwo Yehova mwakazachishilamo ngolo jenyi jakutenga vyuma?

²¹ Omu likumbi lyaYehova lyakunoka nalikakuma, mwakamba ngwenyi vyuma vyosena vyahamavu “vinawahe chikuma,” ngana muze ahanjikile kusongo yalikumbi lyakusokesa 6 lyakutenga vyuma. (Kuputuka 1:31) Katwejiva mujila mwakazachishilamo ngolo jenyi jakutenga vyuma kulutweko. Chipwe ngocho, twatela kufwelela ngwetu natwivwanga lika kuwaha najila Yehova mwazachishilangamo ngolo jenyi jakutenga vyuma. Natukalinangula vyavivulu hali Yehova haya myaka kuhichila muvyuma atenga. (Muka-kwambulula 3:11) Shikaho, nge natutwalaho lika kulinangula hali Tengi Wamunene, kaha natumuvumbikanga nakumuzanga chikuma, nakutwalaho lika kupandama kuli ikiye.