Kuli Muka-Kutanga:

Kutala wamona Kalunga kupwa sepa lyove tahi? Vatu vavavulu vashinganyeka ngwavo mutu keshi kuhasa kupwa sepa lyaKalungako. Vamwe vashinganyeka ngwavo kavazakamako, kaha veka nawa ngwavo kavatamo kupwa masepa jenyiko. Oloze Mbimbiliya yatukolezeza ngwayo: ‘Pandama kuli Kalunga, kaha mwapandama kuli ove.’ (WaYakova 4:8) Kaha nawa afwelelesa vaka-kumulemesa ngwenyi: “Ami Yehova Kalunga kove nangukukwachililanga [kulivoko lyove] lyachilyo, yami nguli nakukulweza ngwami, ‘Kanda nawivwa womako, nangukukafwa.’”—Isaya 41:13.

Uno vyuma muka twatela kulinga mangana tupwenga masepa jaKalunga? Sepa wamwenemwene apwa mutu uze twatachikiza kanawa, kulumbununa kutachikiza vishinganyeka vyenyi najila eji kulingilangamo vyuma. Shikaho, twatela kulinangula vilinga vyaKalunga najila eji kulingilangamo vyuma ngana muze vavisolola muMbimbiliya. Tunahase kupandama chikuma kuli Kalunga nge natushinganyekanga hajila Yehova eji kusolwelangamo vilinga kana, nomwo Yesu Kulishitu alondezezelenga Kalunga hakusolola vilinga kana mujila yakukupuka, nakutachikiza nawa omwo nayetu tunahase kusolola vilinga kana. Echi nachitukafwa tumone ngwetu Yehova ikiye atamo kupwa Mwata wakulitulaho mwilu nahamavu. Chachilemunyi, natumona ngwetu apwa Setu uze twasaka atukafwe. Yehova apwa wangolo, nachiyulo, namangana, nazangi, ngocho keshi kukaseza vana venyi vakushishikako.

Shikaho, ou mukanda watela kukukafwa upandame chikuma kuli Yehova Kalunga, nakutunga usepa wakukola uze nawilila, mangana umwalisenga haya myaka.