1-3. Uno kulondezeza Yehova hakusolola zangi nachitunganyalisa ngachilihi?

 “KUHANA cheji kunehanga kuwahilila chikuma kuhambakana kutambula.” (Vilinga 20:35) Awa mazu aYesu atunangula chishina chachilemu. Atukafwa tusolwelenga vakwetu zangi yamwenemwene. Numba tuhu tweji kwivwanga kuwaha hakutuzanga kuli vakwetu, oloze kuhana chipwe ngwetu kusolwela vakwetu zangi chikiko cheji kunehanga kuwahilila chikuma.

² Setu wamwilu ikiye kaha atachikiza kanawa chuma kana kuhambakana kala mutu. Ngana muze twashimutwilanga mukapetulu nafumuho wamuchihanda chino, Yehova ikiye kaha asolola zangi yayinene chikuma. Nasololanga chikuma zangi kuhambakana kala mutu, kaha nawa nalinginga ngocho hamyaka yayivulu. Shikaho katweshi kulikomokelako hakuwana nge Mbimbiliya yamuvuluka ngwayo apwa ‘hiKalunga wakuwahilila.’—WaChimoteu 1, 1:11.

³ Kalunga ketu wazangi asaka nayetu tumulondezezenga, chikumanyi hakusolola zangi. Mukanda Wavaka-Efwesu 5:1, 2 watulweza ngwawo: “Londezezenunga Kalunga, hakupwa muvana venyi azanga.” Nge natulondezezanga Yehova hakusolwelanga vakwetu zangi, kaha natupwanga vakuwahilila chikuma mwomwo yamuchima kanou wakuhana. Natupwa nawa vakusuuluka mwomwo tunejiva ngwetu tuli nakwivwisa Yehova kuwaha, uze atulweza muMazu enyi ngwenyi ‘tulizangenga navakwetu.’ (Wavaka-Loma 13:8) Chipwe ngocho, kuli nawa vyuma vikwavo vyatela kutulingisa ‘tutambukenga lika muzangi.’

4, 5. Mwomwo ika chapwila chachilemu kulisuula kuzanga vakwetu vaka-kwitava?

⁴ Mwomwo ika chapwila chachilemu kusolwela vakwetu vaka-kwitava zangi? Mwomwo zangi hichuma chachilemu chikuma kuli vaka-Kulishitu vamuchano. Nge katweshi kupwa nazangiko, kaha katweshi kupwa nausoko wakukola navandumbwetuko, kaha nawa Yehova mwatumona kupwa tuvatu vamokomoko. Tala omwo Mazu aKalunga atukafwa tutachikize ovyo twatela kusolwela vakwetu zangi.

⁵ Yesu anangwile vaka-kumukavangiza haufuku wamakumishilo wakuyoya chenyi chahano hamavu ngwenyi: “Nguli nakumihana lushimbi lwaluhya ngwami mulizangenga navakwenu. Kaha nganomu ngunamizangenga enu, nayenu nawa lizangenunga navakwenu. Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:34, 35) Yesu hakwamba ngwenyi, “nganomu ngunamizangenga enu,” apwile nakutulweza tuzangenga vakwetu nganomu alingile ikiye. Mukapetulu 29 twamonanga omwo Yesu ahanyine chakutalilaho chamwaza chakusolola zangi, hakulisuula kuhaka vyuma vasakile vakwavo kulutwe kuhambakana vyenyi. Nayetu nawa twatela kusolola hatoma zangi kaneyi, mujila yize vanahase kuyimona navatu vakuweluka wachikungulwilo chavaka-Kulishitu. Chikupu vene, zangi kaneyi yakuzanga vandumbwetu namuchima wakulisuula yapwa katachikijilo kakututachikijilaho ngwavo twapwa tuvaka-kukavangiza Kulishitu vamuchano.

6, 7. (a) Uno twatachikiza ngachilihi ngwetu Mazu aYehova ashindakanya hakulema chakusolola zangi? (b) Mazu aPaulu vasoneka hali Wavaka-Kolinde 1, 13:4-8 ahanjika hazangi muka?

⁶ Uno ngachilihi nge katweshi nazangiko? Kaposetolo Paulu ambile ngwenyi: “Kachi nge . . . nanguhona kupwa nazangi, kaha ngunapu nge chivumo  changunga, chipwe nge vyema vyachifwoyo vanahumuna.” (Wavaka-Kolinde 1, 13:1) Chivumo changunga nachifwoyo vanahumuna vyeji kunehanga vyema chikuma. Chifwanyisa kana chatamo chikupu. Mutu wakuhona zangi nafwane nge chisaji chize chili nakuneha vyema chikuma, chize nachihanga vatu muchishishisa chakuvakoka. Nachipwa chachikalu mutu kana kupwa nausepa wakukola navakwavo. Paulu ahanjikile nawa ngwenyi: “Nge nguli nalufwelelo lwakuhasa kunungulula jipili, oloze kangweshi nazangiko, kaha nguwamokomoko.” (Wavaka-Kolinde 1, 13:2) Shikaho, nge mutu keshi kupwa nazangiko, kaha Yehova keshi kumuzachisako, numba tuhu mutu kana mwalinga vyuma vyamwaza. Chikupu vene, Mbimbiliya yatunangula ngwayo Yehova asaka tusololenga zangi.

⁷ Uno natuhasa kusolola ngachilihi eyi zangi hakutwama navakwetu? Hakusaka tukumbulule echi chihula, tukekese  mazu aPaulu ahali Wavaka-Kolinde 1, 13:4-8. Eji jivesi kajeshi nakuhanjika chikuma hazangi atuzanga Kalunga chipwe yize twamuzanga yetuko. Oloze Paulu hano apwile nakuhanjika chikuma omwo tunahase kusolwela vakwetu zangi. Alumbunwine omwo yapwa zangi nomwo kayapwako.

8. Uno kutalilila vakwetu chikoki chinahase kutukafwa ngachilihi?

⁸ “Zangi yeji kutalililanga chikoki.” Shikaho kupwa nazangi chalumbununa kwitavila tutenga twavakwetu. (Wavaka-Kolose 3:13) Chikupu vene, tuvosena twasakiwa kututalilila chikoki. Etu hakupwa tuvatu vakuhona kukupuka, kaha nawa twazachila hamwe navakwetu, twatela kwitavila ngwetu shimbu jimwe vandumbwetu vaka-Kulishitu navatupihisanga kumichima ngana muze tunahase kuvapihisa nayetu kumichima. Oloze kutalililanga vakwetu chikoki nachitukafwa tuliulenga tutenga twavo nakuneha kuunda muchikungulwilo.

9. Mujijila muka tunahase kusolwelamo muchima wakutetela vakwetu?

⁹ “Zangi . . . yeji kutetelanga.” Kutetela veji kuchisololanga muvilinga namumazu amwaza. Zangi yeji kutulingisanga tuwane jijila jakusolwelamo muchima wakutetela, chikumanyi kuli vaze vanakalikiza. Chakutalilaho, kunahase kupwa ndumbwetu wakashinakaji uze ali nakwivwa uli, uze mwasakiwa kumutambukila nakumukolezeza. Chisemi wapwevo wamujike chipwe ndumbwetu wapwevo uze atwama mutanga yize yatwama nakwitava chakulihandununa, nahase kusakiwa kumukafwa. Kaha nawa ndumbwetu ali nakuviza chipwe ali nakumona ukalu umwe, nahase kusaka kwivwa mazu akumukolezeza kuli sepa lyenyi azanga. (Vishimo 12:25; 17:17) Nge natusolwela vakwetu muchima wakutetela mujijila jakufwana ngana, kaha  natusolola ngwetu twatwama nazangi yamwenemwene.—Wavaka-Kolinde 2, 8:8.

10. Uno zangi yeji kutukafwanga ngachilihi tukundwize muchano nakuhanjikanga muchano, nahalwola nachipwa chachikalu kulinga ngocho?

¹⁰ “Zangi . . . yeji kwivwilanga kuwaha muchano.” Mbimbiliya yimwe yamba ngwayo: “Zangi . . . yeji kwivwanga kuwaha kukundwiza muchano.” Zangi yeji kutukafwanga tukundwize muchano ‘nakuhanjikanga muchano navakwetu.’ (Zekaliya 8:16) Chakutalilaho, nge mutu twazanga nalingi shili yayinene, kaha zangi yetu yakuzanga Yehova nauze mutu nalingi shili, nayitukafwa tukavangize jishimbi jaKalunga muchishishisa chakusweka shili nalingi chipwe kuyilelesa chipwe kulyonga. Chipwe ngocho, chinahase kupwa chachikalu kwitavila ngwetu mutu twazanga nalingi vyuma vyavipi. Oloze nge twazakama chikuma uze nalingi shili, kaha twasaka mutu kana etavile kuzangamisa chaKalunga chazangi nakwalumunako vilinga vyenyi. (Vishimo 3:11, 12) Kaha nawa hakupwa tuvaka-Kulishitu vazangi, twasaka “[kupwa] vakashishi muvyuma vyosena.”—WavaHepeleu 13:18.

11. Hakuwana nge zangi yeji “[kufwikanga] vyuma vyosena,” vyuma muka twatela kufwila kulinga kutalisa kututenga twavakwetu vaka-kwitava?

¹¹ “Zangi . . . yeji kufwikanga vyuma vyosena.” Mukanda WaPetulu 1, 4:8 wamba ngwawo: “Zangi yeji kufwikanga jishili jajivulu.” Chikupu vene, muka-Kulishitu wazangi kafwila kusolola hatoma tutenga twavakwavo vaka-Kulishituko. Kakavulu tutenga twavakwetu vaka-kwitava twapwa twatundende, kaha tunahase kutufwika nazangi.—Vishimo 10:12; 17:9.

12. Kaposetolo Paulu asolwele ngachilihi ngwenyi afwelelele Fwilemone kulinga vyuma vyamwaza, kaha vyuma muka natulinangulako?

¹² “Zangi . . . [yeji kwitavilanga] vyuma vyosena.” Mbimbiliya  yimwe yamba ngwayo, zangi “yafwila kwitavila vyuma vyamwaza chikuma lwola lwosena.” Shikaho, twatela kufwelelanga vandumbwetu nakuhona kuvashinganyekelanga vyuma vyakuhenga. Zangi yeji kutukafwanga ‘twitavile vyuma vyamwaza chikuma’ hali vandumbwetu nakuvafwelelanga. a Tala chakutalilaho chatwama mumukanda uze Paulu asonekelele Fwilemone. Paulu asonekele mukanda wakukolezeza Fwilemone atambule nalikoji ndungo yenyi Oneshimu uze amuchinyine, uze apwile jino himuka-Kulishitu. Paulu kashinjilile Fwilemone kulinga chuma kanako, oloze amulembelelele muzangi. Afwelelele Fwilemone ngwenyi mwalinga mwakwoloka, hakwamba ngwenyi: “Ngunafwelela vene ngwami nawononoka, shikaho nguli nakukusonekela hakutachikiza ngwami naulinga kuhambakana nomu ngunakulweze.” (Vesi 21) Nge zangi nayitulingisa tufwelele vandumbwetu mujila kaneyi, kaha vandumbwetu navasolola vilinga vyamwaza.

13. Natusolola ngachilihi ngwetu twafwelela ngwetu vandumbwetu navalinga vyuma vyamwaza?

¹³ “Zangi . . . [yeji kutalililanga] vyuma vyosena.” Zangi yeji kutalililanga vyuma nganomu nawa yeji kufwelelanga vyuma vyosena. Zangi yeji kutulingisanga tufwelele ngwetu vandumbwetu navalinga vyuma vyamwaza. Chakutalilaho, nge ndumbwetu “nayi mujila yakuhenga chakuzeneka ivene kutachikiza,” tweji kufwelelanga ngwetu mwetavila vyuma vanamuhuhumuna. (Wavaka-Ngalesha 6:1) Kaha twafwelela nawa ngwetu vandumbwetu vaze vanazeye kushipilitu vanahase kuzama cheka. Shikaho, tweji kuvatalililanga chikoki mangana tuvakafwe vazame cheka kushipilitu.  (Wavaka-Loma 15:1; Wavaka-Tesolonyika 1, 5:14) Numba tuhu mutu twazanga naseze muchano, oloze twatela kutwalaho lika kufwelela ngwetu likumbi limwe mwakakinduluka kuli Yehova, ngana mwamwana wakujimbala wamuchishimo chaYesu.—Luka 15:17, 18.

14. Lukakachila lwetu vanahase kulweseka ngachilihi kuli vandumbwetu muchikungulwilo, kaha zangi nayitukafwa ngachilihi?

¹⁴ “Zangi . . . [yeji kukakachilanga] muvyuma vyosena.” Lukakachila lweji kutukafwanga tumike kachi nge vanakutulinga mwamupi chipwe nge tuli nakumona ukalu. Vyeseko vyakweseka lukakachila lwetu kavyafuma kaha kuvatu vakuweluka wachikungulwiloko. Hakuwana nge vandumbwetu muchikungulwilo kavakupukako, ngocho shimbu jimwe vanahase kutuhaka mucheseko. Vanahase kuhanjika vyuma vimwe vize vinahase kutukola kumuchima. (Vishimo 12:18) Kaha nawa pamo chihande chimwe muchikungulwilo kavachiyulile kweseka nomwo twapwanga nakushinganyekako. Vilinga vyandumbwetu uze twavumbika chikuma vinahase kutwivwisa kupihya nakutulingisa tulihulise ngwetu, ‘Mwomwo ika muka-Kulishitu nalingila vyuma kana?’ Nge tunamono ukalu kana, kutala tunahase kufuma muchikungulwilo nakwecha kuzachila Yehova tahi? Katweshi kulinga ngochoko nge tuli nazangi. Chikupu vene, zangi yinahase kutukafwa tuhone kwechelela katenga kandumbwetu katulingise tuhone kumona vyuma vyamwaza muli ikiye chipwe muli vandumbwetu vosena muchikungulwilo. Zangi yeji kutukafwanga tutwaleho lika kupwa vakushishika kuli Kalunga nakukundwiza vandumbwetu, chamokomoko navyuma navalinga chipwe vize navahanjika.—Samu 119:165.

15. Uno lwiso lwapwa ngachilihi, kaha zangi yeji kutukafwanga ngachilihi?

¹⁵ “Zangi kayevwa lwisoko.” Lwiso lunahase kutulingisa  twivwile vakwetu lushiushiu mwomwo yavikumba vyavo, chipwe yajila Yehova ali nakuvakiswilamo, chipwe mwomwo yauhashi wavo. Lwiso lunahase kutulingisa tulizange etu vavene nakufwila kulemeka vakwetu. Shikaho nge katwazangamineko tunahase kulingisa muchikungulwilo muhone kupwa kuunda. Chuma muka chinahase kutukafwa tulihende kumuchima walwiso? (WaYakova 4:5) Chuma chinahase kutukafwa shina, zangi. Zangi yapwa yayilemu mwomwo yeji kutukafwanga tuwahilile navatu vaze vali navyuma vize katweshi navyoko. (Wavaka-Loma 12:15) Kaha nawa zangi yeji kutukafwanga tuhone kupihilila nge mukwetu vanamwalisa mwomwo yauhashi wenyi chipwe mwomwo yavyuma vimwe natesamo.

16. Nge twazanga vandumbwetu, kaha mwomwo ika katwatela kulisashila havyuma natutesamo mumulimo waYehovako?

¹⁶ “Zangi . . . kayeshi kulitukwojolako, kayeshi kulivwimbako.” Zangi yeji kutukafwanga tuhone kulisasa mwomwo yauhashi wetu chipwe mwomwo yavyuma tunatesamo. Nge chikupu vene twazanga vandumbwetu, kaha katweshi kulisasa havyuma tuli nakutesamo mumulimo wakwambulula chipwe mwomwo yamilimo tweji kuzatanga muchikungulwiloko. Kulisasa chinahase kuhombesa vakwetu nakuvalingisa valivwe kupwa vamokomoko hakulyesekesa kuli yetu. Zangi yeji kutulingisanga tuhone kulisasa hamilimo yize Kalunga atuhana. (Wavaka-Kolinde 1, 3:5-9) Kaha nawa zangi “kayeshi kulivwimbako,” chipwe kayalingisa mutu alimone kupwa wamulemu chikuma kuhambakana vakwavoko, ngana muze yahanjika Mbimbiliya yimwe. Zangi yeji kutukafwanga tulihende kumuchima wakulitohwesa.—Wavaka-Loma 12:3.

17. Zangi yeji kutukafwanga tusolole ngachilihi ngwetu twazakama vakwetu, kaha vilinga muka twatela kulihendako?

¹⁷ “Zangi . . . kayeshi kulinga mwakuhingamako.” Mutu uze eji kulinganga vyuma vyakuhingama, eji kulinganga vyuma vize navivwisa vakwavo sonyi chipwe kuvevwisa  kupihya. Mutu kana eji kusololanga nge kashinganyeka omwo vakwavo navevwa mwomwo yavyuma mwalinga chipwe vize mwahanjikako. Oloze nge natupwa nazangi, kaha natutetela vakwetu nakusolola ngwetu twavazakama. Kaha nawa zangi yeji kutulingisanga tupwenga navilinga vyamwaza vize evwila Kalunga kuwaha, nakuvumbika vandumbwetu. Ngocho, zangi kayeshi kutulingisa tulinge “vilinga vyakwivwisa sonyi” vize navilingisa vandumbwetu valikomokele chipwe kuvevwisa kupihyako.—Wavaka-Efwesu 5:3, 4.

18. Mwomwo ika mutu wazangi kasaka vyuma vyosena vavilingenga kweseka nomwo munayi vishinganyeka vyenyiko?

¹⁸ “Zangi . . . kayeshi kufwila vyuma vyayo yiveneko.” Mbimbiliya yimwe yahanjika ngwayo: “Zangi kayeshi kutakilika munayi vishinganyeka vyayoko.” Mutu atwama nazangi kasaka vatu vakavangizenga munayi vishinganyeka vyenyiko, kwijiva nge vishinganyeka vyenyi vikiko vyakwoloka lwola lwosena. Kaha nawa keshi kuzondola vakwavo mangana valinge munayi vishinganyeka vyenyiko, mwomwo nge mwalinga ngocho, kaha mwasolola ngwenyi apwa wakulivwimba. Mbimbiliya yamba ngwayo: “Kulivwimba cheji kutwalanga kukulimbuka.” (Vishimo 16:18) Nge chikupu vene twazanga vandumbwetu, kaha natwivwililanga vyuma navahanjika nakuvikavangizanga kachi nge chinatemo. Muchima kana ukiko ahanjikile naPaulu ngwenyi: “Mutu himutu kanda mwasakanga kulinganyalisa iveneko, oloze anganyalisenga vakwavo.”—Wavaka-Kolinde 1, 10:24.

19. Uno zangi yeji kutukafwanga ngachilihi nge vakwetu vanatulingi mwamupi?

¹⁹ “Zangi . . . kayeshi kukwata washi matotoko. Kayeshi kulama kokoko.” Mutu wazangi keshi kukwata washi matoto havyuma navahanjika vakwavo chipwe vize navalingako. Chikupu vene, hakupwa tuvatu, tunahase kupihilila nge vakwetu vanatulingi mwamupi. Oloze zangi yinahase kutukafwa tuhone kutwalaho lika kupwa namatoto. (Wavaka-Efwesu  4:26, 27) Katweshi kulamanga koko hamazu chipwe havilinga vyavakwetu, kwijiva nge tunavisoneka mumukanda mangana tuvyanukengako. Oloze zangi nayitulingisa tulondezezenga Kalunga ketu wazangi. Yehova eji kukonekelanga vatu nge kuli vimwe atela kulingila ngocho, nge muze twamonanga muKapetulu 26. Ikiye nge nakonekela mutu, eji kuvulyamangako nakuhona kukamuzangamisa cheka kulutwe hashili amukonekelele lyehi. Twasakwilila chikuma Yehova hakupwa namuchima kanou wakuhona kulama koko.

20. Uno tweji kwivwanga ngachilihi nge ndumbwetu naputuka kumona ukalu mwomwo yakulinga shili?

²⁰ “Zangi . . . kayeshi kuwahilila navilinga vyakuhengako.” Mbimbiliya yimwe yamba ngwayo: “Mutu wazangi . . . keshi kulisamba hajishili javatu vekako.” Kaha Mbimbiliya yikwavo nawa ngwayo: “Mutu wazangi keshi kuwahilila nge vakwavo vanalingi vyuma vyavipiko.” Nge tuli nazangi, kaha katweshi kwivwila kuwaha vilinga vyavipiko, ngocho katwakundwiza kala vilinga vyakuhukako. Uno tweji kwivwanga ngachilihi nge ndumbwetu naputuka kumona ukalu mwomwo yakulinga shili? Zangi nayitukafwa tuhone kuwahilila hachuma kana, nakushinganyeka ngwetu, ‘Chinawahe omwo ukalu kana unamusolokela. Chinamutela.’ (Vishimo 17:5) Oloze tweji kuwahililanga nge natumona ndumbwetu alinganga shili napihilila nakwalumuka nakuputuka kuzama cheka kushipilitu.

21-23. (a) Uno Paulu atalikishile mulihi hakwamba ngwenyi “zangi kayakumako”? (b) Chihula muka natushimutwila mukapetulu wamakumishilo?

²¹ “Zangi kayakumako.” Uno Paulu atalikishile mulihi hakuhanjika mazu kana? Nge natukekesa mujimbu wosena, natuwana nge apwile nakushimutwila hamawana ashipilitu aze vahanyine vaka-Kulishitu vakulivanga. Mawana kana  asolwele nge Kalunga evwilile uselewa chize chikungulwilo chachihya. Oloze keshi vaka-Kulishitu vosena vapwilenga nawana wakuka, chipwe wakupolofweta chipwe wakuhanjika malimiko. Chipwe ngocho, vyosenevi kavyapwile vyavilemu chikumako, mwomwo mawana kana ejile nakukuma. Oloze kuli chuma cheka chize vaka-Kulishitu vosena vatelelele kutwalaho lika kupwa nacho. Chuma kanechi chapwile chachilemu, kaha nawa chakwilila, kuhambakana mawana eka osena. Echi chikiko Paulu achivulukilile ngwenyi “jila yakuhambakana kuwaha.” (Wavaka-Kolinde 1, 12:31) Uno eyi “jila yakuhambakana kuwaha” yapwile ika? Yapwile jila yazangi.

²² Chikupu vene, zangi yavaka-Kulishitu avulukile Paulu “kayakumako,” kulumbununa nge nayikelilanga. Namakumbi ano, zangi yakulisuula yakuzanga vandumbwetu yikiko  katachikijilo kavaka-kukavangiza Yesu vamuchano. Tweji kumonanga zangi kana muvikungulwilo vyavaka-kulemesa Yehova vyamukaye kosena. Zangi kana nayikelilanga haya myaka, mwomwo Yehova ashika kukahana kuyoya chahaya myaka kuli vangamba jenyi vakushishika. (Samu 37:9-11, 29) Shikaho tukilikitenu mangana tutwaleho ‘kutambuka lika muzangi.’ Nge natulinga ngocho, kaha natuwahilila chikuma mwomwo yakusolwelanga vakwetu zangi. Kaha nawa natukatwalaho lika kuyoya, nakutwalaho lika kuzanga vakwetu haya myaka, hakulondezeza Kalunga ketu wazangi Yehova.

²³ Mumukanda uno tunalinangula vyavivulu havilinga atwama navyo Yehova. Tunamono chikupu omwo tweji kunganyalanga kungolo jenyi, nakuchiyulo chenyi nakumangana enyi. Chikumanyi tunamono omwo tweji kunganyalanga kuzangi yenyi. Shikaho omu tunashimutwila omwo tunahase kusolwelamo vakwetu zangi, nachipwa jino chamangana kulihulisa ngwetu, ‘Uno nanguhasa kusolola ngachilihi kuli Yehova ngwami chikupu vene ngwamuzanga?’ Chihula kana navachikumbulula mukapetulu wamakumishilo.