1. Vishinganyeka muka vyakuhenga vili nakuyanjisa vatu vavavulu, kuhakilako vene navaka-Kulishitu vamwe vamuchano?

 UNO Yehova Kalunga akuzanga tahi? Vatu vamwe vetavila vene ngwavo Kalunga azanga vatu, ngana muze chahanjika chisoneka chaYowano 3:16. Olozenyi mumichima yavo ngwavo, Kalunga kavazangako. Navaka-Kulishitu vamuchano shimbu jimwe vanahase kupwa navishinganyeka kana. Lunga umwe uze ahombele, ambile ngwenyi: “Cheji kungukaluhwilanga kwitavila ngwami Kalunga eji kunguzakamanga.” Kutala shimbu jimwe nayove weji kushinganyekanga mwomumwe tahi?

2, 3. Iya asaka tufwelele ngwetu twapwa tuvamokomoko chipwe ngwetu Yehova katuzangako, kaha natuhonesa ngachilihi vishinganyeka kana?

² Satana afwila tufwelele ngwetu, Yehova Kalunga katuzanga chipwe kutumona kupwa tuvavalemuko. Chamuchano vene, Satana kakavulu eji kutangisanga vatu vafwile vyuma vyaufwefwelekete nakupwa vakulivwimba. (Wavaka-Kolinde 2, 11:3) Asaka nawa kulingisa vatu valimone kupwa vamokomoko. (Yowano 7:47-49; 8:13, 44) Echi chili nakusoloka chikumanyi “hamakumbi [ano] akukuminyina” amakalu. Makumbi ano, mujitanga jajivulu vatu “kavazanga vakwavoko.” Kaha veka valipika makumbi osena navaka-ukenya, navaka-lifwi, navaka-kunjinjavala. (WaChimoteu 2, 3:1-5) Vatu vaze vanayanjisanga hamyaka yayivulu nakumona vihuli vyakulitala hamiyachi nachijindo, vanahase kulivwa kupwa vamokomoko chipwe ngwavo kavavazangako.

³ Nge mukiko weji kwivwanga nayove, kaha kanda kuhombako.  Shimbu jimwe, etu vavavulu tweji kushinganyekanga ngwetu twapwa tuvamokomoko. Oloze anuka ngwove Mazu aKalunga vawahakilako “kwolola vyuma” “[nakukatumuna] vyuma vize vyazama chikuma.” (WaChimoteu 2, 3:16; Wavaka-Kolinde 2, 10:4) Mbimbiliya yamba ngwayo: “Natukunyula michima yetu kumeso enyi havyuma vyosena vize nayihasa michima yetu kutuhanyina milonga, mwomwo Kalunga ahambakana michima yetu, kaha atachikiza vyuma vyosena.” (WaYowano 1, 3:19, 20) Tutale hajijila jiwana jize Visoneka vyeji kutukafwilangamo ‘tukunyule michima yetu’ ngwetu Yehova atuzanga.

4, 5. Uno chifwanyisa chaYesu chatujilili chasolola ngachilihi nge twapwa tuvavalemu kuli Yehova?

⁴ Chatete, Mbimbiliya yanangula hatoma ngwayo Kalunga amona vangamba jenyi vosena kupwa vavalemu. Chakutalilaho, Yesu ambile ngwenyi: “Kutala tujilili vavali kaveshi kuvalanda nakalumbongo kamwe kachicheleko numba? Chipwe ngocho, naumwe wauchi mwaholokela hamavu chakuzeneka Senu kutachikizako. Oloze enu najikambu jakumitwe yenu vajilava lyehi josena. Ngocho kanda namwivwa womako. Enu mwapwa muvavalemu kuhambakana tujilili vavavulu.” (Mateu 10:29-31) Achishinganyeke omwo vevwile vaka-kwivwilila Yesu vamulikulukaji lyamyaka lyakulivanga hakwivwa mazu kana.

⁵ Tunahase pamo kulikomokela ovyo vatu valanjilililenga tujilili. Mumakumbi aYesu, tujilili vapwilenga vandando yayindende chikuma hamiyachi yatujila vosena vakulya. Muka-kulanda ahashilenga kulanda tujilili vavali nakalumbongo kamwe kaha kachichele. Oloze Yesu ambile cheka ngwenyi, mutu nge ali natujimbongo twachichele tuvali, vamuhanyinenga tujilili vatanu, keshi vawanako. Uze kajilili wamuchitanu apwilenga wawana, nakumumona kwijiva nge kapwile wamulemuko. Pamo vatu vamwenenga  tujila kana nge kavapwile vavalemuko. Uno Tengi avamwenenga ngachilihi? Yesu ambile ngwenyi: “Naumwe wauchi [kuhakilako vene nauze wawana] navavulyama kuli Kalunga.” (Luka 12:6, 7) Echi chatukafwa twivwishise chishina apwile nakunangula Yesu. Nge Yehova amona kajilili kupwa wamulemu, kahanyi mutu amumona kupwa wamulemu chikuma. Ngana muze alumbunwine Yesu, Yehova atutachikiza kanawa namutuvyuma twatundende. Najikambu jakumitwe yetu ajilava lyehi josena.

6. Mwomwo ika natwitavila ngwetu vyuma ahanjikile Yesu vyapwile vyamuchano hakwamba ngwenyi jikambu jakumitwe yetu vajilava?

⁶ Jikambu jetu josena vajilava lyehi. Vamwe vanahase kwamba ngwavo vyuma ahanjikile Yesu kavyeshi kuhasa kusolokako. Oloze achishinganyeke vyalutalililo lwakusanguka. Chasoloka nge Yehova atutachikiza kanawa, kahechi chikiko nachikamulingisa akahase kukatusangula. Atumona kupwa tuvavalemu, shikaho eji kwanukanga vyuma vyosena hali yetu, kuhakilako vene nakulinyinga twafuma, navyuma twatachikijile mukuyoya chetu, navyuma tunahichimo nawa. a Shikaho, chapwa chachashi kuli ikiye kulava jikambu jetu jakuheta kafwe ku 100,000.

7, 8. (a) Vilinga muka vimwe evwila kuwaha Yehova vize eji kuwananga hakuhehwojola michima yavatu? (b) Milimo yimwe muka tweji kuzatanga yize amona Yehova kupwa yayilemu?

⁷ Chamuchivali, Mbimbiliya yatunangula vyuma vyavilemu  vize eji kumonanga Yehova muli vangamba jenyi. Eji kwivwilanga kuwaha vilinga vyetu vyamwaza nakukilikita chetu. Mwangana Ndavichi alwezele mwanenyi Solomone ngwenyi: “Yehova eji kuhehwojolanga mumichima yavatu vosena, kaha eji kutachikizanga vyuma vyosena veji kujinanga mumichima yavo.” (Mijimbu 1, 28:9) Omu Kalunga eji kuhehwojolanga mumichima yavatu vavavulu mukaye kano kanazale naulyanyi nachijindo, eji kwivwanga kuwaha nge mwawana vatu vaze vafwila kuunda, nakuzanga muchano nakwoloka. Uno Kalunga eji kulinganga ngachilihi nge nawane mutu amuzanga, uze ali nakutonda kulinangula vyaikiye, nakusaka kulwezako vakwavo chinyingi kana? Yehova atulweza ngwenyi atachikiza vaze veji kwambulilanga vakwavo vyaikiye. Atwama “[na]mukanda wakwanukilaho” “vaze vevwilenga Yehova woma navaze vashinganyekelenga halijina lyenyi.” (Malaki 3:16) Vilinga kana avimona kupwa vyavilemu.

⁸ Uno milimo muka yamwaza yize Yehova amona kupwa yayilemu? Twafwelela ngwetu Yehova amona milimo tweji  kuzatanga hakufwila kulondezeza Mwanenyi Yesu Kulishitu kupwa yayilemu. (WaPetulu 1, 2:21) Mulimo umwe uze Kalunga amona kupwa waulemu shina wakwambulula mujimbu wamwaza waWangana wenyi. Hali Wavaka-Loma 10:15, tweji kutangangaho ngwavo: “Omu awaha mahinji avaze veji kuvilikanga mujimbu wamwaza wavyuma vyamwaza.” Mahinji vavuluka hano emanyinako kukilikita chavangamba jaYehova mumulimo wakwambulula mujimbu wamwaza wavyuma vyamwaza. Kukilikita kana chapwa chamwaza kaha nawa chachilemu kumeso enyi.—Mateu 24:14; 28:19, 20.

9, 10. (a) Mwomwo ika tunafwelela ngwetu Yehova eji kumonanga kulema chalukakachila lwetu hakuhita muukalu wakulisezaseza? (b) Vishinganyeka muka vyakuhenga vize katwama navyo Yehova kutalisa kuli vangamba jenyi vakushishikako?

⁹ Yehova amona nawa lukakachila lwetu kupwa lwalulemu. (Mateu 24:13) Ijiva ngwove, Satana asaka useze Yehova. Nge naupwanga lika uwakushishika kuli Yehova hakumbi hakumbi, kaha naumukafwa alangulule Satana. (Vishimo 27:11) Shimbu jimwe chapwa chachikalu kupwa nalukakachila. Ukalu wamisongo, nawakuhona jimbongo, nakulizakamina naukalu weka unahase kukaluhwisa chiyoyelo chetu hakumbi hakumbi. Kaha nawa nge vyuma natalilila mutu vinashimbula kutesamo, vinahase kumwivwisa kukola kumuchima. (Vishimo 13:12) Shikaho, Yehova amona lukakachila lwetu tweji kusololanga muukalu wangana kupwa lwalulemu. Echi chalingishile Mwangana Ndavichi alweze Yehova ahake masoji enyi “mutuku,” nakwamba nawa ngwenyi: “Kutala kawawasoneka mumukanda woveko numba?” (Samu 56:8) Eyo, Yehova amona masoji etu navihuli tuli nakumona oku nawa tuchili vakushishika kuli ikiye kupwa vyavilemu, kaha nawa kavivulyamako.

¹⁰ Oloze shimbu jimwe tunahase kulivwa kupwa tuvamokomoko, chamokomoko naunjiho wosenou wakusolola nge Yehova atumona kupwa tuvavalemu. Tunahase kushinganyeka  ngwetu: ‘Kuli vatu veka vavavulu vaze vakwechi vilinga vyamwaza kuzomboka etu. Ngwafwelela Yehova eji kungumonanga kupwa nguwamokomoko hakungwesekesa kuli vakiko.’ Oloze tachikiza ngwove Yehova keshi kutwesekesa kuvatu vekako, kaha nawa kasaka tulinge vyuma vize katweshi kuhasako. (Wavaka-Ngalesha 6:4) Omu Yehova eji kukekesanga michima yetu, kaliula kala kachuma mwawanamoko, oloze amona kala chuma chamwaza mwawanamo kupwa chachilemu.

11. Vyuma muka natulinangula kuli Yehova hajila amwenenenemo Aviya?

¹¹ Chamuchitatu, omu Yehova eji kuhehwojolanga mumichima yetu, eji kufwilanga kumona chuma chamwaza muli yetu. Chakutalilaho, omu Yehova ahanyine lushimbi lwakulalisa tanga yaMwangana Yelovowame yize yalikangile kuli ikiye, ambile ngwenyi, havana vosena vamwangana, Aviya kaha ikiye vatela kukafunda kanawa. Mwomwo ika? Mwomwo ‘Yehova Kalunga kaIsalele amwenemo chuma chimwe chamwaza muli ikiye.’ (Vamyangana 1, 14:1, 10-13) Yehova ahehwojwele mumuchima wayauze mwanalunga nakuwanamo “chuma chimwe chamwaza.” Numba tuhu chuma kana chapwile chachindende chipwe chasolokele nge kachapwile chachilemuko, oloze Yehova achimwene ngwenyi chakutamo kuchisoneka muMazu enyi. Alingile mwamwaza nakutetelako mutu umwe wamutanga yize yalikangile kuli ikiye.

12, 13. (a) Uno mujimbu waMwangana Yehoshafwate wasolola ngachilihi nge Yehova eji kumonanga vyuma vyamwaza muli etu numba nge tunalingi shili? (b) Yehova eji kulinganga ngachilihi hakupwa Chisemi wazangi kutalisa kumilimo yetu yamwaza navilinga vyetu?

¹² Chakutalilaho chachinene chikumanyi shina chajila  Yehova amwenenenemo Mwangana Yehoshafwate. Omu mwangana alimbenjele, kapolofweto kaYehova amwambile ngwenyi: “Hakuwana nge unalingi chuma kanechi, ngocho Yehova nakukwachila utenu.” Mujimbu kana wapwile wakwivwisa woma. Oloze mujimbu waYehova kawakuminyinyine aha kahako. Wambile nawa ngwawo: “Chipwe ngocho, kuli vyuma vimwe vyamwaza vize unalingi.” (Mijimbu 2, 19:1-3) Shikaho, matoto aYehova akwoloka kawamuhonesele kumona vyuma vyamwaza vyapwile muli Yehoshafwateko. Chikupu vene, Yehova alihandununa navatu vakuhona kukupuka. Etu vatu nge tunalimbalaka navakwetu, tweji kuvulyamanga navyuma vyamwaza vyatwama muli vakiko. Kaha nawa nge tunalingi shili, tweji kuvulyamanga vyuma vyamwaza twatwama navyo, mwomwo yakwivwa kupihya, nasonyi nakulihana mulonga. Oloze anuka ngwove, nge natupihilila nakwalumuka kushili yetu nakukilikita tuhone kuyilinga cheka, kaha Yehova mwatukonekela.

¹³ Yehova hakuhehwojola muli yove, eji kufumisanga shili kana, ngana muze muka-kufula ulu eji kufumisanga mavu amokomoko kuulu, uze eji kumonanga kupwa waulemu. Omu mukiko Yehova eji kumonanga vilinga vyove vyamwaza nakukilikita chove. Kakavulu visemi vazangi vasaka kutala vyuma vanafunjejeka vana vavo chipwe vize vatunganga kushikola, kaha shimbu jimwe veji kuvilamanga hamyaka yayivulu okunyi vana vavo vavivulyama lyehi. Yehova apwa Chisemi wazangi chikuma. Nge natutwalaho lika kupwa vakushishika kuli ikiye, kaha keshi kukavulyama milimo yetu yamwaza navilinga vyetuko. Achimona kupwa chakuhenga kachi nge mwavulyama vyuma kana, mwomwo ikiye kapwa wakuhengako. (WavaHepeleu 6:10) Yehova eji kutuhehwojolanga mujila yikwavo nawa.

14, 15. (a) Mwomwo ika tutenga twetu katwalingisa Yehova ahone kumona vyuma vyamwaza muli etuko? Hana chakutalilaho. (b) Uno Yehova eji kulinganga ika kuvilinga vyetu vyamwaza vize eji kuwananga muli yetu, kaha eji kumonanga ngachilihi vatu jenyi vakushishika?

 ¹⁴ Yehova katala hakuhona kukupuka chetuko, oloze eji kutalanga omwo tunahase kupwa. Achishinganyeke hachuma echi: Vatu vaze vazanga milimo yakufunjejeka vanahase kufulyangila nakuwahisa vyuma vize vinalyenyeka. Chakutalilaho, kuchihela chaNational Gallery muLondon, England, omu lunga umwe enyekele nauta vyuma afunjikile Leonardo da Vinci, vize vyafwikile jimbongo jakuheta kafwe kujimiliyoni jajindola 30, kakwapwile mutu numba umwe ambile ngwenyi vyuma kana vatela kuvifumisaho mwomwo vinalyenyeka lyehiko. Oloze hahaze vene vaputukile mulimo wakuwahisa vize vyuma vyapwileko hamyaka 500. Mwomwo ika? Mwomwo vyuma kana vyapwile vyavilemu kuli vaze vazanga vyuma vyakufunjejeka. Kutala ove kawalema kuhambakana mivwimbimbi yakufunjejeka, nangula namakalako nyi?  Numba tuhu unalyenyeka mwomwo yashili yize waswana, oloze kumeso aKalunga wapwa uwamulemu chikuma. (Samu 72:12-14) Yehova Kalunga, uze apwa kuluwa mukutenga, mwakalingisa cheka vatu vosena vaze vamuzanga nakumwononoka vakapwe vakukupuka.—Vilinga 3:21; Wavaka-Loma 8:20-22.

¹⁵ Eyo, Yehova eji kumonanga vyuma vyamwaza muli etu vize pamo katweshi kuhasa kumona etu vaveneko. Omu tuli nakumuzachila, mwalingisanga vilinga vyetu vyamwaza vitohweleko palanga nomu natukakupuka. Numba tuhu vatu vamukaye kaSatana vanatuyanjisa chikuma, oloze Yehova eji kumonanga vangamba jenyi vakushishika kupwa vavalemu.—Hangai 2:7.

16. Unjiho muka waunene wasolola nge Yehova atuzanga, kaha tunejiva ngachilihi ngwetu ou wana auhana hali mutu himutu?

¹⁶ Chamuchiwana, Yehova eji kulinganga vyuma vyavivulu mangana asolole ngwenyi atuzanga. Chikupu vene, ndando yakusokola yaKulishitu yasolola nge vyuma ahanjikile Satana ngwenyi tuvamokomoko chipwe ngwenyi kavatuzangako, vyapwa vyamakuli. Kanda natuvulyama ngwetu kufwa chaYesu hachitondo chakuyanjishila nakulyonyinga evwile Yehova hakumona omu afwile Mwanenyi azanga, hiunjiho wakusolola nge vatuzanga. Chaluvinda, vatu vamwe vachiwana kupwa chachikalu kwitavila ngwavo wana kana weji kuzata nahali vakiko mutu himutu. Veji kulivwanga kupwa vamokomoko. Anuka ngwove, kaposetolo Paulu apwile muka-kuyanjisa vaka-kukavangiza Kulishitu. Oloze asonekele ngwenyi: “MwanaKalunga . . . anguzangile ami nakulyecha ivene hali ami.”—Wavaka-Ngalesha 1:13; 2:20.

17. Uno Yehova eji kutukokanga naka mangana atunehe kuli ikiye naMwanenyi?

¹⁷ Yehova eji kusololanga ngwenyi atuzanga hakutukafwa  mutu himutu mangana tunganyale kuwana waKulishitu. Yesu ambile ngwenyi: “Kakweshi mutu mwahasa kwiza kuli amiko kuvanga vanamukoko kuli Tata uze angutumine.” (Yowano 6:44) Eyo, Yehova ikiye eji kutukokanga nakutuneha kuli Mwanenyi mangana tupwenga nalutalililo lwakukayoya haya myaka. Uno eji kutukokanga ngachilihi? Yehova eji kutukokanga mutu himutu kuhichila mumulimo wakwambulula, nakutukafwa nawa nashipilitu yenyi yajila mangana twivwishise muchano wakushipilitu nakuukavangiza, chamokomoko naukalu chipwe tutenga twatwama natwo. Ngocho Yehova nahase kwamba kuli etu ngana muze ambile kumuyachi waIsalele ngwenyi: “Ngunakuzange, kaha nangukuzanganga haya myaka yosena. Shikaho ngunakupandamishila kuli ami nazangi yakwilila.”—Yelemiya 31:3.

18, 19. (a) Jila muka Yehova asolwelamo ngwenyi atuzanga, kaha ika yasolola nge ikiye kaha mwenya-mulimo kana? (b) Uno Mbimbiliya yatufwelelesa ngachilihi ngwayo Yehova apwa muka-kwivwilila namuchima wakutetela?

¹⁸ Zangi yaYehova pamo tweji kuyimonanga mujila yakulipwila chikumanyi kuhichila mukulomba. Mbimbiliya yatulweza ngwayo, “Lombenunga [kuli Kalunga] shimbu yosena.” (Wavaka-Tesolonyika 1, 5:17) Kalunga eji kutwivwililanga. Vamuvuluka nawa ngwavo “muka-kwivwilila kukulomba.” (Samu 65:2) Ou mulimo wakwivwilila kukulomba kauhana kuli veka, chipwe vene kuli Mwanenyiko. Achishinganyeke hachuma echi: Tengi uze atengele vyuma vyosena, atukolezeza tulombenga kuli ikiye namuchima wakukasunuka. Kutala eji kwivwililanga kukulomba chetu chakuzeneka kutuzakama nakuhona kuhaka muchima kuukalu tuli nakuhitamo tahi? Nduma.

¹⁹ Yehova apwa muka-kutetela. Uno kutetela chapwa chika? Muka-Kulishitu wakushishika umwe wakashinakaji ambile ngwenyi: “Kutetela chapwa hikulyonyinga chove chize chili mumuchima wami.” Uno Yehova eji kwivwanga  kukola chetu tahi? Tweji kutanganga mazu akuvuluka kuyanda chavatu jenyi vaIsalele, akwamba ngwawo: “Evwilenga kupihya omu vayanjilenga.” (Isaya 63:9) Yehova amwene kuyanda chavo nakwivwa kukola vapwile nakwivwa vatu jenyi. Kukola evwile Yehova vachisolola mumazu enyi aze ahanjikile kuli vangamba jenyi ngwenyi: “Weshowo mwamikwata, nakwate hakatutu kahaliso lyami.” b (Zekaliya 2:8) Tweji kwivwanga kukola nge mutu mwatukwata hakatutu kahaliso. Chikupu vene, Yehova eji kutwivwilanga keke. Nge vanatwivwisa kupihya, kaha naikiye mwevwa kupihya.

20. Vishinganyeka muka vyakuhenga twatela kulihendako kachi nge natusaka kukavangiza mazu atwama hali Wavaka-Loma 12:3?

²⁰ Kakweshi muka-Kulishitu wakuhya uze mwalivwimba mwomwo yakushinganyeka ngwenyi Kalunga amuzanga nakumumona kupwa wamulemuko. Kaposetolo Paulu asonekele ngwenyi: “Kuhichila mulikoji lyalinene eli vanangusolwela ami, nangwamba kuli mutu himutu ali muli enu ngwami, kanda alishinganyeka mweka mwakuhambakana omu mwatela kushinganyekako. Oloze kushinganyeka chenyi chipwenga chamangana, nganomu Kalunga nahane mutu himutu seteko yenyi yalufwelelo.” (Wavaka-Loma 12:3) Ngocho, omu tuli muzangi yaSetu wamwilu, twatela kushinganyeka mwamangana nakwijiva ngwetu zangi yaKalunga katwalinga yakuzachililako.—Luka 17:10.

21. Makuli muka aSatana aze twatela kukana shimbu yosena, kaha muchano muka waKalunga uze unahase kutulingisa tutwaleho lika kukunyula michima yetu?

²¹ Shikaho tuvosena tukilikitenu mangana tukane makuli  aSatana osena, kuhakilako nawaze akutulingisa tulivwe kupwa tuvamokomoko chipwe ngwetu kavatuzangako. Nge vyuma unahichimo mukuyoya chove vinakulingisa ulimone kupwa umutu wamupi chikuma uze kaveshi kuzanga kuli Kalunga ukwechi zangi yayineneko, chipwe kumona milimo yove kupwa yayindende chikuma yize kaveshi kuhasa kumona kuli Kalunga muka-kumona vyosenako, chipwe ngwove jishili jove jinavulu kaha kaveshi kuhasa kujifwika kumanyinga aMwanenyiko, kaha vanakunangula makuli. Kana awa makuli namuchima wove wosena. Shikaho, tutwalenuho lika kukunyula michima yetu namazu vahwima amuchano aze ahanjikile Paulu ngwenyi: “Ngunenjikiza chikupu ngwami, chipwe kufwa, chipwe kuyoya, chipwe vangelo, chipwe jifulumende, chipwe vyuma viliko, chipwe vyuma navikeza kulutwe, chipwe jingolo, chipwe kujindama helu, chipwe kukunama, chipwe chuma cheka chakutenga, kavyeshi kuhasa kutuhandununa kuzangi yaKalunga eyi yili muli Kulishitu Yesu Mwata wetuko.”—Wavaka-Loma 8:38, 39.