1-3. (a) Chuma muka chalingishile Yesu alondezeze Ise? (b) Jijila muka natushimutwila jize Yesu asolwelelemo zangi?

 KUTALA wamonaho lyehi kanyike walunga ali kulondezeza ise tahi? Nahase kulondezeza kutambuka chaise, chipwe omwo eji kuhanjikanga chipwe vilinga vyenyi. Kutwala muze, nahase kupwa navishinganyeka vyovimwe kutalisa kuvyuma vyakuhenga navyakwoloka, nakufwelela nawa vyuma vyovimwe. Chikupu vene, kuzanga ise nakumuvumbika chikiko cheji kulingisanga mwana alondezeze ise.

² Uno Yesu eji kwivwanga ngachilihi hali Ise wamwilu? Lwola lumwe Yesu ambile ngwenyi: “Ami ngwazanga Tata.” (Yowano 14:31) Kakweshi mutu azanga Yehova ngana mwayou Mwanenyi uze apwilenga nenyi hamyaka yayivulu shimbu kanda vatenge vyuma vyeka vyosenako. Eyi zangi yikiko yalingishile ou MwanaKalunga alondezeze Ise.—Yowano 14:9.

³ Mutupetulu vakulivanga vamumukanda uno, twashimutwilile omwo Yesu alondezezele kanawa Yehova hakusolola ngolo, nachiyulo namangana enyi. Uno Yesu asolwele ngachilihi zangi yaIse? Tuchitale hajijila jitatu jize Yesu asolwelelemo zangi. Jijila kana shina muchima wenyi wakulisuula, nawakeke, nawakukonekela vatu.

4. Yesu asolwele ngachilihi chakutalilaho chachinene chakulisuula kusolola zangi yamwenemwene?

⁴ Yesu atusela chakutalilaho chamwaza chakulisuula kusolola zangi yamwenemwene. Kulisuula chapwa kuhaka  vyuma vyavakwenu kulutwe kuhambakana vyayove ivene. Uno Yesu asolwele ngachilihi zangi kaneyi? Ahanjikile ngwenyi: “Naumwe wauchi ali nazangi yakuhambakana eyi, mutu kwecha mwono wenyi hali masepa jenyi.” (Yowano 15:13) Yesu alisuwile kuhana kuyoya chenyi chakukupuka hali yetu. Eyi yapwile zangi yayinene yize kanda vasololengaho lyehi kuli kala mutu. Yesu alisuwile kusolola zangi mujijila jeka nawa.

5. Mwomwo ika natwambila ngwetu MwanaKalunga umwe kaha wakulipwila alisuwile kusolola zangi hakufuma mwilu?

⁵ Ou MwanaKalunga umwe kaha wakulipwila apwilenga nachihela chachilemu mwilu shimbu kanda ezenga hano hamavu. Alikachile chikuma naYehova namayongomena avatu vakushipilitu. Numba tuhu ou Mwana vazangile chikuma apwilenga naulemu kana, oloze “alilingishile kupwa wamokomoko nakulifwanyisa nandungo, kaha apwile mutu.” (Wavaka-Fwilipi 2:7) Alisuwile kwiza nakutwama navaka-shili vaze vatwama mukaye kaze “katwama mumavoko ayauze wakuhuka.” (WaYowano 1, 5:19) Chikupu vene, MwanaKalunga asolwele zangi yayinene hakulisuula kulinga chuma kana.

6, 7. (a) Uno Yesu alisuwile ngachilihi kusolola zangi halwola apwilenga nakuzata mulimo wenyi hano hamavu? (b) Mujimbu muka watwama hali Yowano 19:25-27 uze watukwata kumichima, uze wasolola nawa muchima waYesu wakulisuula kusolola zangi?

⁶ Yesu alisuwile kusolola zangi mujijila jakulisezaseza omu azachilenga mulimo wenyi hano hamavu. Lwola lwosena ahakilenga kulutwe vyuma vasakilenga vakwavo. Alisuwile kuyoya chiyoyelo chachashi chakuzeneka vyuma vize vamona vatu ngwavo vyapwa vyavilemu mukuyoya. Ambile ngwenyi: “Vamyumbwe vatwama namenavo, tujila vahelu vatwama namaswa avo, oloze Mwanamutu keshi nahamwe hakusachila mutwe wenyiko.” (Mateu 8:20) Yesu kachi atungile zuvo yamwaza chipwe  kusonga vitwamo vyakulandulula nakuwana jimbongo jajivulu, mwomwo apwilenga muka-kusonga maliva wakwipangweji. Oloze kazachishile uhashi wenyi mangana apwenga naluhetoko.

⁷ Hali Yowano 19:25-27 hatwama mujimbu uze watukwata chikuma kumichima, uze wasolola muchima waYesu wakulisuula kusolola zangi. Achishinganyeke havyuma vyavivulu apwilenga nakushinganyeka Yesu nachingoloshi halikumbi lyakufwa chenyi. Omu apwile nakuyanda hachitondo chakumuyanjishila, alizakaminyine hali tumbaji twenyi, nahamulimo wakwambulula, nahakulonga chenyi nakufwila kuvumbika lijina lyaIse. Chikupu vene, kuyoya chavatu vosena chakulutwe chapendaminyine hali ikiye. Kaha nawa shimbu kanda afwenga, azakamine naye Maliya uze pamo apwile tuliwe halwola kana. Yesu alwezele kaposetolo Yowano alamenga Maliya nge hinaye, ngocho ou kaposetolo ambachile Maliya nakuya nenyi kwimbo lyenyi. Yesu azakamine naye kumujimba nakushipilitu. Chikupu vene, alisuwile kusolola zangi yayinene chikuma.

8. Uno lizu lyachiHelase lize Mbimbiliya yazachisa hakulumbununa keke yaYesu lyalumbununa ika?

⁸ Yesu evwilenga keke ngana mwaIse. Visoneka vyalumbununa Yesu kupwa himutu ayilenga nakukafwa vatu vaze vahombelenga, mwomwo yakuvevwila keke. Hakulumbununa keke yaYesu, Mbimbiliya yazachisa lizu lyachiHelase lize valumuna ngwavo ‘kwivwa keke.’ Mutu umwe alinangula chikuma ambile ngwenyi: “Lizu kana lyalumbununa . . . kwivwa keke yakufuma kumuchima. Lizu kana likiko vazachisa mulilimi lyachiHelase hakuvuluka kutetela.” Achitale jijila jimwe jize Yesu asolwelelemo vatu keke.

9, 10. (a) Chuma muka chalingishile Yesu navaposetolo jenyi vayenga kwauka wavo? (b) Yesu alingile ngachilihi omu liyongomena lyavatu lyavatangwile, kaha mwomwo ika?

 ⁹ Keke yamulingishile akafwe vatu kushipilitu. Mujimbu watwama hali Mako 6:30-34 wasolola ovyo vyalingishile Yesu evwile vatu keke. Achihumikize omwo vyapwile vyuma. Vaposetolo vawahililile chikuma mwomwo vakumishile mulimo wakwambulula uze vavahanyine kuzata. Vakindulukile kuli Yesu nakumulweza vyuma vyosena vamwene nakwivwa. Oloze kwejile liyongomena lyalinene lize lyalingishile Yesu navaposetolo jenyi vahone nakulya. Hakuwana nge Yesu lwola lwosena apwilenga wakuvanguluka navyuma vasakiwilenga vakwavo, ngocho amwene ngwenyi vaposetolo jenyi vanazeye. Kaha avalwezele ngwenyi: “Tuyenu kwauka wetu kupenge mukanoke chindende.” Vengilile muwato nakuya kunote yaKalungalwiji waNgalileya, kuchihela kwakuhona vatu. Lizavu lyavamwene omu vapwilenga nakuya, oloze veka vevwile kaha. Vosena valahile nakuhita jila yachikulo chakutala kunote, kaha valivangile kuheta kuze shimbu kanda nawato uhete.

¹⁰ Kutala Yesu apihililile nakwamba ngwenyi vanavatangula tahi? Nduma. Evwile keke hakumona makombakaji avatu vali nakumuvandamina. Mako asonekele ngwenyi: “Amwene liyongomena lyalinene, kaha avevwililile keke mwomwo vapwile nge mikoko vakuzeneka kafunga. Kaha aputukile kuvanangula vyuma vyavivulu.” Yesu amwene ava vatu kupwa hivatu vapwile nakusakiwa kukafwa kushipilitu. Vapwile nge mikoko vakujimbala vakuzeneka kafunga wakuvafunga nakuvakinga. Yesu ejivile ngwenyi ava vatu vavasuvililile kuli vatwamina javo vamukwitava, vaze vatelelele kachi kupwa tufunga vakuvazakama. (Yowano 7:47-49) Avevwililile keke, kaha aputukile kuvanangula “vyaWangana waKalunga.” (Luka 9:11) Yesu evwililile ava vatu keke shimbu kanda atachikize ngwenyi navakula kanawa  kukunangula chenyi. Shikaho tunahase kwamba ngwetu, kevwile keke hanyima yakunangula vatuko, oloze keke yikiko yamulingishile numba aputuke kuvanangula.

11, 12. (a) Vaka-mbumba vavamwenenga ngachilihi kushikulu, kaha Yesu alingile ngachilihi kumutu uze apwile “namusongo wambumba mujimba wosena” uze ejile kuli ikiye? (b) Uze muka-mbumba pamo evwile ngachilihi hakumukwata kuli Yesu, kaha mujimbu wandotolo umwe unalumbununa ngachilihi chuma kanechi?

¹¹ Keke yamulingishile akafwe vaze vapwile nakuyanda. Vatu vaze vapwile namisongo yakulisezaseza vejilenga kuli Yesu hakwijiva ngwavo apwilenga wakeke. Echi chasolokele hatoma omu mutu umwe uze apwile “namusongo wambumba mujimba wosena” ejile kuli Yesu uze apwile hamwe naliyongomena. (Luka 5:12) Kushikulu, vatu vaze vavijilenga musongo wambumba vavahakilenga kwauka wavo kuchina navatambwisako vakwavo. (Kulava 5:1-4) Kaha kutwala muze vatwamina vavalapi vamwenenga jino musongo wambumba mujila yayipi chikuma, ngocho vahakileko najishimbi javo jize japwile jajikalu. a Achitale omu alingile Yesu kuli uze muka-mbumba: “Kuli ikiye kwejile muka-mbumba nakumulembelela oku nafukama hamambuli, nakwamba ngwenyi: ‘Kachi nge unasake, unahase kungutomesa.’ Hakwivwa ngocho, amwivwilile keke, olwele livoko lyenyi nakumukwata, kaha ambile kuli ikiye ngwenyi: ‘Ngunasake vene. Toma.’ Hahaze vene yize mbumba yamufumine.” (Mako 1:40-42) Yesu atachikijile  vene ngwenyi chapwile chakuhenga muka-mbumba kwiza kuvatu. Oloze muchishishisa chakumukindulwisa, Yesu amwivwililile keke nakulinga jino chuma chakulipwila hakumukwata.

¹² Achishinganyeke omwo evwile uze muka-mbumba hakumukwata kuli Yesu. Tala hachakutalilaho chino. Ndotolo Paul Brand, kuluwa mumulimo wakuka vaka-mbumba, alumbunwine vyamuka-mbumba umwe okile muIndia. Ou ndotolo hakukekesa muka-mbumba, asalikile livoko lyenyi halihye lyauze muka-mbumba nakulweza muka-kwalumuna mulilimi lyauze muka-mbumba mangana amulumbunwine mujila navamukilamo. Uze muka-mbumba aputukile kulila. Ndotolo amuhulishile ngwenyi: “Uno ngunahanjika vyuma vyavipi tahi?” Uze muka-kwalumuna ahulishile uze muka-mbumba mulilimi lyenyi, kaha amukumbulwile ngwenyi: “Nduma ove ndotolo. Ou mukweze ngwenyi ali nakulila mwomwo wasalikanga livoko lyove halihye lyenyi. Ngwenyi, hamyaka yayivulu naumwe wauchi amukwataho lyehi kuheta nakulikumbi lyalelo.” Nge ou mukweze muka-mbumba evwile kuwaha, kahanyi uze vakwachile kuli Yesu awahililile chikuma. Mwomwo vamukile kumusongo wenyi hakumukwata kaha kamwe, musongo uze walingishilenga vatu vahone kumuswenya.

13, 14. (a) Omu Yesu apwile kwakamwihi nanganda yaNane alihumanganyine nachuma muka, kaha chuma kana chapwile ngachilihi chaushona? (b) Keke yaYesu yamulingishile alingile uze tuliwe wakuNane chuma muka?

¹³ Keke yamulingishile akafwe vaze vapwilenga nakulishona. Yesu evwilenga keke hakumona vakwavo vaze vapwilenga nakulishona. Chakutalilaho, tala mujimbu watwama hali Luka 7:11-15. Ou mujimbu wasolokele kwakamwihi nanganda yaNane muNgalileya, omu Yesu ahetesele chimbwa chamyaka azachile mulimo wenyi hano hamavu. Omu Yesu apandamine kwakamwihi nachikolo changanda,  alihumanganyine navatu vapwile nakuya nakufunda mufu. Chuma chasolokele chapwile chaushona chikuma. Ou mufu walunga apwile mwana umwe lyamunwe, kaha naye nawa apwile tuliwe. Ou pwevo pamo ayileho cheka nakufunda mufu omu vayile nakufunda lunga lyenyi. Halwola kana apwile nakuya nakufunda mwanenyi, uze pamo apwilenga nakumulama. Hali vaze tufunde hapwile vamwe vaze vembilenga jingungu navaka-kwimba veka vaze vembilenga myaso yaushona. (Yelemiya 9:17, 18; Mateu 9:23) Oloze Yesu azakamine chikuma uze pwevo apwile nakulishona, uze atambukile kwakamwihi namusela vambachililile mujimba wamwanenyi.

¹⁴ Yesu “[evwilile] keke” uze pwevo afwishile mwanenyi. Kaha amulwezele nalizu lyakumuvendejeka ngwenyi: “Hola, kanda naulilako.” Kufumaho, Yesu aswenyene kumusela nakukwatako. Jino vaze vambachile musela natufunde vosena vemanyine nakuhola kulu. Yesu ahanjikile nalizu lyajingolo kumufu, ngwenyi: “Ove mukweze walunga, nangwamba kuli ove ngwami, hinduka!” Kaha vyuma muka vyakavangijileho? “Uze mufu akondomokele nakuputuka kuhanjika,” kwijiva nge mutu uze nalangumuka hatulo. Kaha Mbimbiliya yahanjika mazu ano amwaza ngwayo: “Kaha Yesu amuhanyine kuli naye.”

15. (a) Uno keke yatambukila ngachilihi hamwe navilinga, kweseka namijimbu yamuMbimbiliya yavuluka omwo Yesu asolwelelenga vatu keke? (b) Uno natuhasa kulondezeza ngachilihi Yesu?

¹⁵ Vyuma muka natulinangula kumijimbu kana? Mumijimbu yosena, tala omwo keke yatambukila hamwe navilinga. Yesu kamwenenga ukalu vahichilengamo vakwavo chakuzeneka kuvevwila kekeko, kaha nawa kavevwilililenga keke chakuzeneka kuvakafwako. Uno natuhasa kumulondezeza ngachilihi? Etu hakupwa tuvaka-Kulishitu, twatwama namulimo wakwambulula mujimbu wamwaza nakukafwa vatu vapwenga tumbaji. Kuzanga Kalunga chikiko chuma chachinene cheji kutulingisanga tuzate  mulimo kana. Chuma chikwavo nawa shina mwomwo yakwivwila vatu keke. Nge natwivwilanga vatu keke nganomu alingilenga Yesu, kaha michima yetu nayitulingisa tuvambulile mujimbu wamwaza. (Mateu 22:37-39) Uno vyuma muka twatela kulinga mangana twivwile keke vandumbwetu vaze vali nakuyanda chipwe kulishona? Katweshi kuhasa kuka vatu mujila yakukomwesa chipwe kusangula vafuko. Chipwe ngocho, tunahase kuvasolwela keke hakuhanjika navo mujila yalikoji chipwe kuvalingilako vyuma vimwe.—Wavaka-Efwesu 4:32.

16. Uno muchima waYesu wakukonekela vatu wasolokele ngachilihi nomu apwile hachitondo chakuyanjishila?

¹⁶ Yesu asolwele kanawa zangi atwama nayo Ise mujila yikwavo yayilemu, ‘hakukonekelanga’ vatu. (Samu 86:5) Asolwele muchima kanou nomu apwile hachitondo chakuyanjishila. Uno Yesu ahanjikile ika omu apwile kwakamwihi nakufwa mujila yayipi, oku vanamupapalila jimbambo mumavoko nahavilyachilo? Uno alombele Yehova azangamise vaze vapwile nakumujiha tahi? Nduma. Yesu ahanjikile mazu amakumishilo ngwenyi: “Ove Tata, vakonekele, mwomwo kavatachikijile chuma vali nakulingako.”—Luka 23:34. b

17-19. Mujijila muka Yesu asolwelelelemo ngwenyi akonekelele kaposetolo Petulu uze amukanyine mapapa katatu?

 ¹⁷ Chakutalilaho chikwavo chamwaza chaYesu chakukonekela vatu tunahase kuchimwena kuvyuma alingile kuli kaposetolo Petulu. Chikupu vene Petulu azangile chikuma Yesu. Halikumbi lyamakumishilo lyakuyoya chaYesu, haNyisane 14, Petulu alwezele Yesu ngwenyi: “Ove Mwata, ami ngunalizange kuya nove mukamenga chipwe kufwa nove vene.” Oloze kahashimbwileko, Petulu akanyine Yesu mapapa katatu ngwenyi kamwijivako. Mbimbiliya yatulweza vyuma vyasolokele omu Petulu akumishile mazu enyi amuchitatu akukana Yesu, ngwayo: “Mwata anyingulukile nakutala Petulu.” Kaha Petulu “alovokele kuweluka, alilile chikuma,” hakwivwa kupihya hamulonga waunene washili avulumwine. Omu afwile Yesu likumbi lyalize vene, ou kaposetolo pamo alihulishilenga ngwenyi, ‘Uno Mwata nangukonekela tahi?’—Luka 22:33, 61, 62.

¹⁸ Chihula chaPetulu vachikumbulwile omu mwahichile kaha kashimbu kakandende. Yesu vamusangwile nachimene halikumbi lyaNyisane 16, kaha likumbi vene lize Yesu ejile kuli Petulu nakuhanjika nenyi kwauka wenyi. (Luka 24:34; Wavaka-Kolinde 1, 15:4-8) Mwomwo ika Yesu ahakilile mangana kaposetolo uze amukanyine chikuma ngana? Yesu pamo alingile ngocho mangana asolole kuli Petulu uze apihililile nakwalumuka ngwenyi Mwata wenyi hanga amuzangila kaha nawa apwile lika wamulemu. Yesu alingile nawa vyuma vyeka vyavivulu vyakumufwelelesa Petulu.

¹⁹ Halwola lukwavo, Yesu asolokele kuli tumbaji twenyi kuKalungalwiji waNgalileya. Halwola kanelu, Yesu ahulishile Petulu mapapa katatu (uze akanyine Mwata wenyi mapapa katatu) mangana amone numba nge Petulu namuzange lika. Hanyima yakumuhulisa kamuchitatu,  Petulu amukumbulwile ngwenyi: “Eyo ove Mwata, ove watachikiza ngwove ngwakuzanga.” Chikupu vene Yesu uze atachikijilenga vyuma vyapwilenga mumichima yavatu, ejivile chikupu ngwenyi Petulu amuzangile chikuma. Oloze chipwe ngocho, Yesu asakile Petulu alihanjikile ivene numba nge amuzanga. Kaha Yesu jino ahanyine Petulu mulimo ‘wakulisa’ ‘nakufunga’ ‘mikoko jenyi vavandende.’ (Yowano 21:15-17) Hakavanga Petulu vamuhanyine mulimo wakuya nakwambulula. (Luka 5:10) Oloze Yesu asolwela nawa ngwenyi namufwelela chikuma hakumuhana mulimo weka waunene wakuzakama vaze navakapwa vaka-kukavangiza Kulishitu. Nakushimbula chiku, Yesu azachishile Petulu mujila yakulipwila mumulimo uze vazachile tumbaji. (Vilinga 2:1-41) Chikupu vene, Petulu evwile kumuchima hwo hakwijiva ngwenyi Yesu namukonekela nakumufwelela chikuma.

20, 21. Natuhasa ngachilihi ‘kutachikiza kanawa zangi yaKulishitu’?

²⁰ Chikupu vene, Mazu aYehova alumbununa kanawa omwo yapwa zangi yaKulishitu. Uno zangi yaKulishitu yatela kutukunyula tulinge ika? Mbimbiliya yatukolezeza tutachikize “zangi yaKulishitu yize yahambakana chinyingi.” (Wavaka-Efwesu 3:19) Ngana muze tunamono, Mikanda yaMujimbu Wamwaza yize yahanjika hakuyoya chaYesu nahamulimo wenyi, yatunangula vyavivulu hazangi yaKulishitu. Oloze ‘kutachikiza zangi yaKulishitu’ chasakiwa kulinga vyuma vyavivulu keshi kutachikiza kaha vyuma yahanjika Mbimbiliya hali ikiyeko.

²¹ Lizu lyachiHelase valumuna ngwavo ‘kutachikiza’ lyalumbununa kutachikiza vyuma ‘hakuvilinga.’ Nge natuzanganga vatu nganomu avazangilenga Yesu, hakulisuula  kuzachila vakwetu, nakuvevwila keke nakuvakafwa, nakuvakonekela namichima yetu yosena, kaha natutachikiza kanawa omwo evwilenga ikiye. Shikaho kulinga vyuma kanevi nachitukafwa “[tutachikize] zangi yaKulishitu yize yahambakana chinyingi.” Twatela kwanuka nawa ngwetu nge natulondezeza Kulishitu, kaha natupandama chikuma kuli Yehova Kalunga ketu wazangi, uze Yesu alondezezelenga chikuma.