CHIHANDA 9
Lemesenunga Yehova mwaTanga
“Lemesenu Uze atangile lilu, namavu.”—Kusoloka 14:7
Ngana muze munalinangula mumbuloshuwa yino, Mbimbiliya yatwama najindongi jize jinahase kumikafwa enu natanga yenu. Yehova asaka mupwenga vakuwahilila. Ashika ngwenyi mwamihana “evi vyuma vikwavo vyosena” nge chatete namumulemesa ikiye. (Mateu 6:33) Asaka enu mupwenga sepa lyenyi. Ngocho, pwenu nalwola lwakutunga usepa naKalunga. Echi hikutokwa chachinene chize mutu nahase kupwa nacho.—Mateu 22:37, 38.
1 ZAMISENU USOKO WENU NAYEHOVA
VYUMA YAHANJIKA MBIMBILIYA: “‘Ami nangupwanga ngusenu, kahenu namupwanga muvana vami vamalunga, navava vamapwevo,’ omu mukiko mwanambe Yehova.” (Wavaka-Kolinde 2, 6:18) Kalunga asaka mupwenga mumasepa jenyi. Kaha kulomba nachimikafwa mupwenga mumasepa jaKalunga. Yehova amilweza ‘mulombenga shimbu yosena.’ (Wavaka-Tesolonyika 1, 5:17) Afwila mumulweze vyuma muli nakushinganyeka navize muli nakusaka. (Wavaka-Fwilipi 4:6) Nge namulombanga hamwe natanga yenu, kaha navamona ngwavo mwafwelela chikuma Kalunga.
Omu namuhanjika kuli Kalunga, mwatela nawa kwivwilila kuli ikiye. Munahase kulinga ngocho hakulinangula Mazu enyi namikanda yahanjika haMbimbiliya. (Samu 1:1, 2) Shinganyekenunga havyuma munalinangula. (Samu 77:11, 12) Kwivwilila kuli Kalunga chasakiwa nawa kupwa kukukunguluka chavaka-Kulishitu lwola lwosena.—Samu 122:1-4.
Kushimutwila navatu vyuma vyakutalisa kuli Yehova hichuma chachilemu chize nachitukafwa tuzamise usoko wetu naikiye. Nge natulinganga ngocho, kaha natupandama chikuma kuli ikiye.—Mateu 28:19, 20.
VYUMA MWATELA KULINGA:
-
Nonekenu lwola lwakutanga Mbimbiliya hakumbi hakumbi nakulomba
-
Enu natanga yenu mwatela kuhaka chikuma muchima kuvyuma vyakushipilitu, keshi kukuhemahema nakulihizumunako
2 LIVWISENU KUWAHA KULEMESA KALUNGA MWATANGA
VYUMA YAHANJIKA MBIMBILIYA: “Pandamenu kuli Kalunga, kaha mwapandama kuli enu.” (WaYakova 4:8) Mwatela kunoneka lwola lwakulemesa Kalunga mwatanga nakulukavangizanga. (Kuputuka 18:19) Oloze evi keshi vikiko kaha mwatela kulingako. Mwatela kushinganyekanga hali Kalunga mukuyoya chenu hakumbi hakumbi. Zamisenu usoko wenu naKalunga mwatanga hakuhanjikanga hali ikiye “hakutwama mujizuvo jenu, nahakutambuka mujila, nahakusavala, nahakuhinduka.” (Lushimbi lwamuchivali 6:6, 7) Likasenu ngana muze alikashile Yoshuwa uze ambile ngwenyi: “Ami navava vakuzuvo yami natuzachilanga Yehova.”—Yoshuwa 24:15.
VYUMA MWATELA KULINGA:
-
Linangulenunga lwola lwosena nakushimutwila havyuma vili nakusakiwa kuli mutu himutu mutanga