Omu namuputuka chiyoyelo chachihya muulo namuka-mahyenu, munahase kumona ukalu wakulisezaseza. Ukalu kana unahase kwiza mwomwo yakulihandununa chavishinganyeka vyenu, nomu mweji kwivwanga, nomu mweji kuyoyelanga. Kaha ukalu weka unahase kufuma kuvatu veka chipwe mwomwo yavyuma vyakulijila vivene.

Kamweshi kuhasa kulihenda kuukalu wosenako mwomwo Mbimbiliya yatulweza ngwayo natumonanga ukalu. (Mateu 5:23, 24) Nge namuzachisa jindongi jamuMbimbiliya, kaha munahase kuwana mwakukumishila ukalu wenu.

VYUMA YAHANJIKA MBIMBILIYA: “Kuli . . . lwola lwakuhanjika.” (Muka-kwambulula 3:1, 7) Mwatela kuwana lwola lwakushimutwila haukalu muli nawo. Lwezenu muka-mahyenu atachikize omu muli nakwivwa navyuma muli nakushinganyeka haukalu kana. Kaha mwatela ‘kuhanjikanga muchano’ lwola lwosena namuka-mahyenu. (Wavaka-Efwesu 4:25) Numba vene nge munapihilila chikuma, kanda kulivetako. Kukumbulula namuchima wakuunda nachimikafwa muunjise vikokojola.—Vishimo 15:4; 26:20.

Numba tuhu nge munalimbalaka muvyuma vimwe, oloze hanjikenunga lika mujila yakukokweza nakusolola zangi kuli muka-mahyenu nakumuvumbika. (Wavaka-Kolose 4:6) Esekenu kukumisa washi ukalu wenu, kanda namulitwamina kulihanjikisako.—Wavaka-Efwesu 4:26.

VYUMA MWATELA KULINGA:

• Wanenuko lwola lwakushimutwila haukalu muli nawo

• Nge muka-mahyenu ali nakuhanjika, mwatela kumwivwilila, kanda kumuvatwila mazu enyiko. Nayenu nawa namupwa nalwola lwenu lwakuhanjika

VYUMA YAHANJIKA MBIMBILIYA: “Pwenunga namuchima wakulizanga chikuma navakwenu. Kaha hakulisolwela kavumbi navakwenu, pwenunga vatete kulinga ngocho.” (Wavaka-Loma 12:10) Kwivwilila kanawa nge mukwenu ali nakuhanjika chapwa chachilemu. Esekenu kwivwishisa vyuma ali nakuhanjika muka-mahyenu, kaha ‘lizakamenunga nakupwa vakulinyisa.’ (WaPetulu 1, 3:8; WaYakova 1:19) Kanda kulyonga kaha nge muli nakwivwililako. Nge chinahase, echenu vyuma muli nakulinga nakwivwilila kuli muka-mahyenu, chipwe mulwezenu mushimutwile chihande kana halwola lweka. Mwatela kumona muka-mahyenu kupwa mutu mumwazachila hamwe, keshi nge muka-kole yenuko. Nge namulinga ngocho, kaha kamweshi “kupihilila washi[ko].”—Muka-kwambulula 7:9.

VYUMA MWATELA KULINGA:

• Mwatela kutwalaho lika kwivwilila numba nge vyuma ali nakuhanjika muka-mahyenu kavyamisuulwishileko

• Mwatela kwijiva mashina namasongo avyuma ali nakuhanjika muka-mahyenu. Ijivenu nakumona mujila ali nakuhanjikilamo muka-mahyenu

VYUMA YAHANJIKA MBIMBILIYA: “Kuzata nangolo cheji kunganyalisanga, oloze kuhanjika kaha hakanwa cheji kutwalanga kukukalikiza.” (Vishimo 14:23) Kamwatela kaha kwitavila vyuma munashimutwilako, oloze mwatela nawa kuvilinga. Kulinga vyuma munalikase namuka-mahyenu chasakiwa kukilikita, numba munganyale. (Vishimo 10:4) Nge namuzachila hamwe, kaha namupwa “nafweto yamwaza” hakukilikita chenu.—Muka-kwambulula 4:9.

VYUMA MWATELA KULINGA:

• Livwasanenu vyuma atela kulinga mutu himutu mangana mukumise ukalu muli nawo

• Shimbu jimwe mwatela kukekesa vyuma mwalikashile mumone numba nge muli nakuvilinga