Omu Yehova ahakileko tanga, ahanyine mulimo kuli visemi wakunangula vana vavo. (Wavaka-Kolose 3:20) Hakupwa muvisemi, mwatwama namulimo wakunangula vana venu mangana vazange Yehova nakukola kanawa. (WaChimoteu 2, 1:5; 3:15) Mwatela nawa kutachikiza kanawa vyuma vili mumuchima wamwanenu. Kaha nawa chapwa chachilemu enu visemi kusolola chakutalilaho chamwaza. Munahase kunangula kanawa vana venu Mazu aYehova nge namuvangila kuwahaka kumichima yenu.—Samu 40:8.

VYUMA YAHANJIKA MBIMBILIYA: “Mutu himutu anguhwenga kwivwilila, ashipwokelenga kuhanjika.” (WaYakova 1:19) Enu visemi, fwilenu kukafwa vana venu vachiwane kupwa chachashi kushimutwilanga nayenu. Vana venu vatela kutachikiza nge mweji kuvevwililanga nge navasaka kuhanjika nayenu. Pwenunga muvakuunda mangana vana venu vachiwane kupwa chachashi kumilweza kala vyuma vanakusaka. (WaYakova 3:18) Nge vana venu navashinganyeka ngwavo namuvatenukila, kaha navachiwana kupwa chachikalu kumilweza vyuma vili mumichima yavo. Ngocho mwatela kupwa namuchima wakuvatalilila chikoki, nakuvalweza nge mwavazanga chikuma.—Mateu 3:17; Wavaka-Kolinde 1, 8:1.

VYUMA MWATELA KULINGA:

• Nge vana venu vali nakusaka kuhanjika nayenu, kanda kusolola nge kamweshi nalwola lwakuvevwililako

• Shimutwilenunga navana venu lwola lwosena, keshi nge kuvanga kaha kuli ukaluko

VYUMA YAHANJIKA MBIMBILIYA: “Mutu uze anangakana muvyuma mwakafukila.” (Vishimo 16:20) Lwola lumwe mwatela kushinganyeka chikuma havyuma navahanjika vana venu numba mwijive omu vali nakwivwa. Kakavulu vana veji kuhanjikanga kaha kala vyuma vanashinganyeka. Mbimbiliya yamba ngwavo: “Kachi nge mutu mwakumbulula kuchihande shimbu kanda atachikize mashina namasongo chinapu uleya.” (Vishimo 18:13) Kanda kupihililanga washiko.—Vishimo 19:11.

VYUMA MWATELA KULINGA:

• Nge vana venu vali nakuhanjika, kanda kuvavatwijila chipwe kuvatenukila shimbu kanda vakumise kuhanjikako

• Esekenu kwanuka omu mwevwile halwola mwapwile ngana mwavakiko, navyuma mwamwenenga kupwa vyavilemu

VYUMA YAHANJIKA MBIMBILIYA: “Ove mwanami, ivwilila kunangula chaiso, kanda naukana jindongi janokoko.” (Vishimo 1:8) Yehova ahana visemi vosena vavali ngolo jakunangula vana vavo. Ngocho mwatela kunangula vana venu vamivumbikenga nakumyononoka. (Wavaka-Efwesu 6:1-3) Vana vanahase kutachikiza nge visemi javo ‘kavalinunga hakupwa navishinganyeka vyovimweko.’ (Wavaka-Kolinde 1, 1:10) Nge munalimbalaka namuka-mahyenu, kanda kulikokojwesela kumeso avana venuko kuchina navahona kumivumbika hakupwa muvisemi javo.

VYUMA MWATELA KULINGA:

• Shimutwilenu namuka-mahyenu mangana muwane jila yakunangwilamo vana venu

• Nge namupwa navishinganyeka vyakulihandununa navize vyamuka-mahyenu, kaha esekenu kwivwilila kuli muka-mahyenu mumone munayi vishinganyeka vyenyi

VYUMA YAHANJIKA MBIMBILIYA: “Longesa kanyike mwaya jila yize atela kuya.” (Vishimo 22:6) Vana venu kaveshi kuhasa kulinangula mulikumbi lyangongoko. Ngocho mwatela kushinganyekela chimweza mwakunangwila vana venu nakuvazangamisa. (Samu 127:4; Vishimo 29:17) Kuzangamisa vana kachalumbununa kuvaveta kahako, oloze chasakiwa nawa kuvakafwa vamone kulema chajishimbi. (Vishimo 28:7) Mwatela nawa kunangula vana venu vazange Mazu aYehova nakutachikiza kanawa jindongi jenyi. (Samu 1:2) Echi nachivakafwa vapwenga nachivezu chitoma.—WavaHepeleu 5:14.

VYUMA MWATELA KULINGA:

• Mwatela kukafwa vana venu vamone Kalunga kupwa mutu nahenyi uze vanahase kufwelela

• Vanangulenu mangana vatachikize vyuma vize vatela kulihendako vyakufwana nge mivwimbimbi yayipi yahaInternet namijimbu yeka yakulisezaseza. Vanangulenu nawa valihende kuvatu vavilinga vyaujila