CHIHANDA 4
Mwakuzachishila Kanawa Jimbongo
“Kachi nge vatu vanatwame punga, vyuma vanajinyi vyeji kufukilanga.”—Vishimo 20:18
Tuvosena twasaka kupwa najimbongo mangana tulanjile vaka-tanga yetu vyuma vyeji kusakiwanga. (Vishimo 30:8) Kaha nawa “jimbongo japwa mukingo.” (Muka-kwambulula 7:12) Munahase kuchiwana kupwa chachikalu kushimutwilanga hajimbongo namuka-mahyenu, oloze kanda namwechelela jimbongo jinehe ukalu muulo wenuko. (Wavaka-Efwesu 4:32) Mwatela kulifwelela namuka-mahyenu nakuzachila hamwe muwane mwakuzachishila jimbongo jenu.
1 SHINGANYEKENU MWAKUZACHISHILA KANAWA JIMBONGO JENU
VYUMA YAHANJIKA MBIMBILIYA: “Iya hali enu mwasaka kutunga kaposhi, mwazeneka chatete kutwama hamavu nakulava jimbongo jakutungisa, amone numba nge ali najimbongo jakukamanyisa?” (Luka 14:28) Chapwa chachilemu kushinganyeka mwakuzachishila kanawa jimbongo jenu. (Amose 3:3) Sakulenu vyuma muli nakusaka kulanda nakuwana jimbongo jingahi mwatela kuzachisa. (Vishimo 31:16) Numba nge muli najimbongo jajivulu jakulanda vyuma, kachalumbununa nge munahase kulanda vyuma chamulanjilako. Kanda kukongola chamukongwelako. Zachisenu kaha jimbongo muli najo.—Vishimo 21:5; 22:7.
VYUMA MWATELA KULINGA:
-
Nge muli najimbongo jimwe jinasaleho havyuma mwasakanga kulanda, mwatela kuwana mwakujizachishila hamwe namuka-mahyenu
-
Nge muli najimbongo jajindende, oloze enu muli nakusaka kulanda vyuma vyavivulu, kaha twamenu hamavu mukeheseko vyuma muli nakusaka kulanda. Chakutalilaho, munahase kuliwahishila vyakulya enu vavene muchishishisa chakuya nakuvilanda
2 HANJIKENUNGA MUCHANO NAMUKA-MAHYENU
VYUMA YAHANJIKA MBIMBILIYA: “[Lingenunga] vyuma vyosena nakashishi, keshi kumeso aYehova kahako, oloze nakumeso avatu nawa.” (Wavaka-Kolinde 2, 8:21) Mwatela kulweza muka-mahyenu muchano hajimbongo munambate najize munazachisa.
Lwola lwosena mwatela kulweza muka-mahyenu vyuma muli nakusaka kulinga kutalisa kujimbongo. (Vishimo 13:10) Nge namushimutwilanga mwakuzachishila kanawa jimbongo, kaha namutwama mukuunda muulo wenu. Mwatela kumona jimbongo muli najo nge jatanga yenu, keshi nge jenu kahako.—WaChimoteu 1, 5:8.
VYUMA MWATELA KULINGA:
-
Livwasanenu jimbongo namusaka kuzachisa chakuzeneka kuhulisa muka-mahyenu mujila najizachishilamo
-
Kamwatela kuvandamina kaha nge kunepuka ukalu numba jino mushimutwile mwakuzachishila jimbongoko
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Uno Mbimbiliya Yinahase Kungukafwa Nge Nguli naMikuli naUkalu Wakuhona Jimbongo Tahi?
Jimbongo kajeshi kuhasa kulingisa mutu apwenga wakuwahililako, oloze jindongi jamuMbimbiliya jinakavangizaho jinahase kumikafwa nge muli muukalu wakuhona jimbongo.
