Nge mwana nasemuka, visemi veji kuwahililanga chikuma oloze nawa veji kulizakaminanga. Omu namusema mwana, namuwana nge lwola lwenu lwaluvulu nangolo jenu munakuvizachisa chikuma hakuzakama mwana. Lwola lumwe namuchiwana kupwa chachikalu kusavala tulo, kahechi cheji kunehanga ukalu muulo wenu. Enu namuka-mahyenu muvosena mwatela kwalumunako vyuma vimwe mangana muzakame kanawa mwanenu nakuhasa kukinga ulo wenu. Uno Mbimbiliya yinahase kumikafwa ngachilihi mulipike naukalu kanou?

VYUMA YAHANJIKA MBIMBILIYA: “Zangi yeji kutalililanga chikoki kaha nawa yeji kutetelanga.” Zangi “kayeshi kufwila vyuma vyayo yiveneko, kayeshi kukwata washi matotoko.” (Wavaka-Kolinde 1, 13:4, 5) Omu muli nakemba, nachipwa chakutamo kuhaka muchima kuli mwanenu. Oloze lunga lyenu nahase kumona nge munamuliula, ngocho mwatela kutachikiza ngwenu nalunga lyenu ali nakusaka kumuzakama. Nge namupwa namuchima wakutalilila chikoki nakusolwela lunga lyenu likoji, kaha mwatachikiza nge kamwamuliwileko nakumulingisa jino amikafwe kuzakama mwana.

“Nayenu malunga nawa, twamenunga namapwevo jenu mwaya chinyingi.” (WaPetulu 1, 3:7) Mwatela kwivwishisa puwenu nakumona nge ali nakuzachisa chikuma ngolo jenyi kukuzakama chikuma mwanenu. Hakuwana nge mwana eji kunehanga milimo yayivulu, ngocho puwenu nahase kuzeya nakumulingisa ahombe. Lwola lumwe nahase kupihilila nayenu, oloze enu kamwatela kutenukako mwomwo “muka-kushipwokela kukwata utenu nawahe kuhambakana chindume.” (Vishimo 16:32) Mwatela kupwa vakunangakana nakumukafwa.—Vishimo 14:29.

VYUMA MWATELA KULINGA:

• Visemi vamalunga: Kafwenunga mapwevo jenu kuzakama mwana numba vene naufuku. Kehesenuko lwola mweji kuzatanga vyuma vyeka mangana mupwenga nalwola lwaluvulu lwakupwa napuwenu namwanenu

• Visemi vamapwevo: Mwatela kwitavila nge lunga lyenu ali nakusaka kumikafwa kuzakama mwana. Nge lunga lyenu katachikijile kanawa mwakumikafwila hakuzakama mwanako, kaha kanda kupihililako, oloze mulwezenu kanawa mwakulingila

VYUMA YAHANJIKA MBIMBILIYA: “Navakapwanga mujimba umwe.” (Kuputuka 2:24) Numba tuhu munapu jino namutu weka mutanga yenu, oloze mwatela kwanuka ngwenu muchili lika “mujimba umwe” namuka-mahyenu. Zatenu nangolo mangana muzamise ulo wenu.

Enu mapwevo, pwenunga namuchima wakusakwilila malunga jenu omu vali nakumikafwa nakumikundwiza. Mazu enu akusakwilila anahase “kuhindula,” chipwe ngwetu kukolezeza. (Vishimo 12:18) Enu malunga, lwezenu mapwevo jenu ngwenu mwavazanga nakuvamona kupwa vavalemu. Sakwililenu puwenu mujila eji kuzakaminangamo tanga.—Vishimo 31:10, 28.

“Mutu himutu kanda mwasakanga kulinganyalisa iveneko, oloze anganyalisenga vakwavo.” (Wavaka-Kolinde 1, 10:24) Lingenunga vyuma vize navivwisa muka-mahyenu kuwaha. Wanenungako lwola lwakushimutwila namuka-mahyenu, nakumusakwilila, nakwivwilila vyuma mwahanjika. Kamwatela kupwanga nalifwi hachihande chakulisavalako. Mwatela kuzakama vyuma vyasakiwa kuli muka-mahyenu. Mbimbiliya yamba ngwayo: “Kanda namuliminanga ovyo mwatela kulihanako, shina kuvanga muvosena munalivwasana.” (Wavaka-Kolinde 1, 7:3-5) Ngocho mwatela kuhanjika muchano hakushimutwila chihande kanechi namuka-mahyenu. Muchima wakutalilila chikoki nakwivwishisa muka-mahyenu naumikafwa muzamise ulo wenu.

VYUMA MWATELA KULINGA:

• Mwatela kuwanangako lwola lwakushimutwila namuka-mahyenu

• Lingenungako tuvyuma tumwe tuze natulingisa muka-mahyenu atachikize ngwenyi mwamuzanga chikuma. Chakutalilaho kumusonekela tumazu twamwaza chipwe kumuhana kachuma kakandende kupwa wana

VYUMA YAHANJIKA MBIMBILIYA: “Kufuma kuukemba wove unatachikiza mikanda yajila yize yinahase kukulingisa upwenga namangana akukutwala kuulwilo.” (WaChimoteu 2, 3:15) Shinganyekelenu chimweza vyuma namusaka kunangula mwanenu. Mwana atwama nauhashi wakulinangula, numba vene achili mujimo. Ngocho, shimbu achili mujimo, mwana nahase kutachikiza lizu lyenu nakutachikiza nawa omu muli nakwivwa. Mutangilenunga mikanda shimbu achili kemba. Numba tuhu keshi kuhasa kutachikiza vyuma muli nakumutangilako, oloze echi chinahase kumukafwa akazangenga kutanga nge nakolo.

Kamwatela kushinganyeka nge kemba keshi kuhasa kwivwa vyuma muli nakuhanjika hali Kalungako. Mwanenu atela kumivwa muli nakulomba kuli Yehova. (Lushimbi lwamuchivali 11:19) Numba nge muli nakuhema nenyi, mwatela kuhanjika havyuma atenga Kalunga. (Samu 78:3, 4) Omu mwanenu ali nakuya nakukola, mwatachikiza ngwenyi mwazanga Yehova, kaha naikiye nawa mwamuzanga.

VYUMA MWATELA KULINGA:

• Lombenu Kalunga amihane mangana akunangula mwanenu

• Hitulukenunga mazu navishina vyavilemu mangana mwanenu alinangule washi