1, 2. Mwomwo ika chapwila chachikalu kupandama kuli Yehova chakuzeneka Yesu kutukafwa, kaha vyuma muka atulingila Yesu Kulishitu?

 KUTALA mwajimbalaho lyehi tahi? Munahase kwanuka lwola lumwe mwatambukile ungeji wakuya nakumona sepa lyenu chipwe kausoko kenu, kaha hinamujimbala jila. Omu mwapwile nakuya mujila kaneyi yakuhona kutachikiza, kutala mwemanyine nakuhulisa mutu amilweze jila mwatela kuya tahi? Achishinganyekenu omu munahase kwivwa kachi nge mutu kana mwamilweza ngwenyi: “Ngukavangizenu, nangumitetekela swi nokwo muli nakuya.” Ocho kuwaha kana namwivwa vayaya!

² Omu mukiko Yesu Kulishitu eji kulinganga kuli yetu. Katweshi kuhasa kupandama kuli Kalunga chakuzeneka Yesu kutukafwako. Vatu vosena mukaye “vanahandunuka kukuyoya chakuli Kalunga” mwomwo yashili vaswana nakuhona kukupuka. (Wavaka-Efwesu 4:17, 18) Ngachize, twasakiwa mutu wakututwaminyina. Yesu uze akwechi muchima wamwaza eji kutukafwanga, nakututwaminyina, nakutuhana chakutalilaho chamwaza chize twatela kukavangiza. Ngana muze twamonanga muKapetulu 1, Yesu atulanya mutu himutu ngwenyi: “Twaya upwenga umuka-kungukavangiza.” (Mako 10:21) Kaha atulweza navyuma vyatela kutulingisa twitavile chilanyo kana. Lwola lumwe Yesu ambile ngwenyi: “Ami yami jila, yami muchano, yami kuyoya. Mutu naumwe wauchi mweza kuli Tata kuvanga ahichile muli ami.” (Yowano 14:6) Tushimutwilenu havyuma vize vyasolola nge tunahase kupandama kuli Kalunga kuhichila kaha muli Mwanenyi. Nge tunatachikiza vyuma kana, kaha  natushimutwila jino havyuma vyalingisa Yesu kupwa ikiye ‘jila, ikiye muchano, ikiye kuyoya.’

3. Mwomwo ika twatela kuhichila kaha muli Yesu hakupandama kuli Kalunga?

³ Chatete, tunahase kupandama kuli Kalunga kuhichila kaha muli Yesu mwomwo Yehova atongola ou Mwanenyi azate mulimo waulemu. a Vyuma vyosena ajina Ise navikatesamo kuhichila kaha muli ikiye. (Wavaka-Kolinde 2, 1:20; Wavaka-Kolose 1:18-20) Hakusaka tutachikize mulimo waulemu azata Yesu, twatela kushimutwila havyuma vyasolokele mulitepa lyaEtene muze vatu vatete valinungile hamwe naSatana nakulikanga kuli Yehova.—Kuputuka 2:16, 17; 3:1-6.

4. Kulikanga chize chapwile muEtene chakatwile chihande muka, kaha Yehova ajinyine kulinga vyuma muka hakusaka avatule chihande kana?

⁴ Kulikanga chize chapwile muEtene chakatwile chihande chachinene chize chaneha chihula hali vaka-kuyoya vosena mwilu nahamavu chakwamba ngwavo: Uno chikupu Yehova Kalunga apwa wajila, wamwaza, wakwoloka, wazangi mujijila jenyi josena tahi? Hakusaka kuvatula chihande kanechi, Yehova ajinyine kutuma mwanenyi wakushipilitu wakukupuka ezenga hano hamavu. Mulimo atelelele kuzata ou mwanenyi wapwile waulemu chikuma. Mulimo kana wapwile wakuhana kuyoya chenyi mangana ahakwile wata waYehova nakusokola vatu vosena. Atelelele nawa kushishika palanga nakukufwa numba akumise ukalu wosena uze wejile mwomwo yakulikanga chaSatana. (WavaHepeleu 2:14, 15; WaYowano 1, 3:8) Chipwe ngocho, Yehova apwile namayongomena avana venyi veka vakushipilitu vakukupuka. (Ndanyele 7:9, 10) Uno iya asakwileho mangana ezenga  nakuzata mulimo kanou waulemu? Asakwileho “Mwanenyi umwe kaha wakulipwila” uze vavulukilenga jino ngwavo Yesu Kulishitu.—Yowano 3:16.

5, 6. Uno Yehova asolwele ngachilihi nge afwelelele Mwanenyi, kaha lufwelelo kana lwazamine haka?

⁵ Kutala twatela kulikomokela hakuwana nge Yehova asakwile Yesu tahi? Nduma, katwatela kulikomokelako. Afwelelele chikuma ou Mwanenyi umwe kaha wakulipwila. Makulukaji amyaka kunyima shimbu kanda ou Mwanenyi ezenga hano hamavu, Yehova ahanjikilile chimweza ngwenyi Mwanenyi mwakapwa lika wakushishika chamokomoko nakala ukalu mwakahitamo. (Isaya 53:3-7, 10-12; Vilinga 8:32-35) Achishinganyekenu omwo alumbunukila mazu kana. Ngana mwavangelo navatu vosena, ou Mwanenyi apwile nalisesa lyakulisakwila ivene vyakulinga. Oloze Yehova amufwelelele nakuhanjika chimweza ngwenyi mwakashishika. Uno lufwelelo kanelu apwile nalwo muli Mwanenyi lwazamine haka? Lwazamine havyuma atachikijile hali ou Mwanenyi. Yehova atachikiza kanawa Mwanenyi kaha nawa atachikiza ngwenyi asaka kwivwisa Ise kuwaha. (Yowano 8:29; 14:31) Ou Mwana azanga Ise, kaha nawa Ise amuzanga. (Yowano 3:35) Eyi zangi vatwama nayo yavalingisa valinunge nakulifwelela chikuma.—Wavaka-Kolose 3:14.

⁶ Hakuwana nge tunatachikiza ngwetu Yesu azata mulimo waulemu, Ise nawa amufwelela chikuma, kaha nawa valinunga mwomwo yazangi, shikaho kuvanga tuhichile kaha muli Yesu numba tupandame kuli Kalunga. Oloze kuli chuma chikwavo chasolola nge MwanaKalunga kaha ikiye nahase kututwaminyina kuli Ise.

7, 8. Mwomwo ika chapwilile chakwoloka Yesu kuhanjika ngwenyi naumwe wauchi atachikiza Ise “shina Mwana kaha”?

⁷ Twatela kutesamo vyuma vimwe numba tuhase kupandama kuli Yehova. (Samu 15:1-5) Ou MwanaKalunga ikiye kaha atachikiza kanawa vyuma twatela kulinga mangana Ise atwivwile uselewa. Yesu ambile ngwenyi: “Vyuma vyosena vananguhanevyo kuli Tata, kaha kakweshi mutu amutachikiza  kanawa Mwanako shina Tata kaha. Kaha nawa kakweshi mutu amutachikiza kanawa Tatako shina Mwana kaha, naweshowo nawa navazanga kumusolwelayo kuli Mwana.” (Mateu 11:27) Tutalenu havyuma vyalingishile Yesu ahanjike ngwenyi naumwe wauchi atachikiza Ise “shina Mwana kaha.”

⁸ Hakupwa “twatwa kuvyuma vyakutenga vyosena,” Yesu atwama nausoko wakulipwila naYehova. (Wavaka-Kolose 1:15) Achishinganyekenu hausoko vapwile nawo hamyaka yayivulu omu vatwaminenga ukawavo kufuma kumaputukilo akutenga vyuma swi nomu vatengele jino vaka-kuyoya veka vakushipilitu. (Yowano 1:3; Wavaka-Kolose 1:16, 17) Achishinganyekenu nawa hakutokwa apwile nacho ou MwanaKalunga chakutwama hamwe naIse nakulinangula mwaya vishinganyeka namuchima waIse, nakulinangula nawa jishimbi najijila jenyi. Chikupu vene, Yesu ahanjikile muchano hakwamba ngwenyi naumwe wauchi atachikiza Ise shina ikiye kaha. Kulikata kanechi chakafwile Yesu asolole omwo apwa Ise nakumulumbununa mujila yize navahona vatu veka kulingamo.

9, 10. (a) Mujijila muka Yesu asolwelelemo omwo apwa Ise? (b) Vyuma muka twatela kulinga numba Yehova atwivwile uselewa?

⁹ Vyuma anangwilenga Yesu vyasolwele nge atachikijile kanawa mwaya vishinganyeka vyaYehova, nomwo eji kwivwanga, navyuma asaka kuli vaze veji kumulemesanga. b Yesu asolwele omwo apwa Ise mujila yeka nawa yakulipwila. Ambile ngwenyi: “Weshowo nangumono ami namono naTata nawa.” (Yowano 14:9) Yesu alondezezele Ise muvyuma vyosena ahanjikilenga navize alingilenga. Shikaho, hakutanga mijimbu yaYesu muMbimbiliya yize yahanjika omu anangwilenga kanawa vatu, nomu muchima wenyi wakutetela wamulingishilenga okenga vatu kumisongo yavo nakuvevwila keke nakulila, tunahase kwinjikiza chikupu ngwetu naYehova mukiko apwa. (Mateu 7:28, 29; Mako 1:40-42; Yowano 11:32-36) Jijila jaIse namwaya muchima wenyi vyasolokele chikupu muvyuma ahanjikilenga Mwanenyi navize alingilenga. (Yowano 5:19; 8:28; 12:49, 50) Ngachize, twatela  kukavangiza vyuma anangwilenga Yesu nakumulondezeza numba Yehova atwivwile uselewa.—Yowano 14:23.

¹⁰ Hakuwana nge Yesu atachikiza kanawa Yehova nakumulondezeza, ngocho katwatela kulikomokelako hakumusakula apwenga jila yakupandaminamo kuli Ise. Omu tunatachikiza lyehi kanawa ngwetu tunahase kupandama kuli Yehova kuhichila kaha muli Yesu, tushimutwilenu jino haulumbunwiso wamazu aYesu akwamba ngwenyi: “Ami yami jila, yami muchano, yami kuyoya. Mutu naumwe wauchi mweza kuli Tata kuvanga ahichile muli ami.”—Yowano 14:6.

11. (a) Mwomwo ika natwambila ngwetu tunahase kupwa nausoko wamwaza naKalunga kuhichila kaha muli Yesu? (b) Uno mazu ahali Yowano 14:6 ashindakanya ngachilihi chihela atwama nacho Yesu chize chapwa chakulipwila? (Talenu kwinyikila chamwishi.)

¹¹ Tunalinangula lyehi nge tunahase kupandama kaha kuli Kalunga kuhichila muli Yesu. Achitalenu omu alumbunukila mazu kana kuli etu. Yesu ikiye “jila” kulumbuna nge tunahase kupwa nausoko wamwaza naKalunga kuhichila kaha muli ikiye. Mwomwo ika chapwila ngocho? Mwomwo Yesu ahanyine kuyoya chenyi mwandando yakusokola, kaha ashishikile palanga nakukufwa chenyi. (Mateu 20:28) Katweshi kuhasa kupandama kuli Kalungako chakuhona ndando kaneyi. Shili yahandula vatu kuli Kalunga, ngachize Yehova keshi kupandama kuli vaka-shiliko mwomwo apwa wajila. (Isaya 6:3; 59:2) Oloze ndando yakusokola yaYesu yatulingisa tupandame kuli Yehova mwomwo yafwika hamilonga yetu yashili. (WavaHepeleu 10:12; WaYowano 1, 1:7) Ngocho, nge natwitavila nakufwelela mundando kaneyi vatuhana kuli Kalunga kuhichila muli Kulishitu, kaha Yehova mwatwivwila uselewa. Kakweshi jila yeka tunahase kuzachisa mangana ‘vatuwanyise naKalungako.’ c—Wavaka-Loma 5:6-11.

12. Yesu apwa ngachilihi “jila”?

 ¹² Yesu nawa ikiye “jila” kupandama kukulomba. Tunahase kupandama kuli Yehova mukulomba kuhichila kaha muli Yesu nakufwelela ngwetu Kalunga mwevwa kulomba chetu. (WaYowano 1, 5:13, 14) Yesu ivene ambile ngwenyi: “Kachi nge namukalomba chuma kuli Tata, mwakamihanacho mulijina lyami. . . . Lombenu jino, kaha namutambula, mangana muwahilile chikuma.” (Yowano 16:23, 24) Ngachize, tunahase kulomba kuli Yehova nakumuvuluka ngwetu “Ove Setu” kuhichila kaha mulijina lyaYesu. (Mateu 6:9) Chuma chikwavo chalingisa Yesu apwenga “jila” shina chakutalilaho chenyi chamwaza atusolwela. Nganomu twamonanga hakavanga, Yesu alondezezele Ise mujila yamwenemwene. Chakutalilaho chaYesu chasolola omu twatela kuyoya mangana twivwise Yehova kuwaha. Ngocho, twatela kukavangiza mujitambo jaYesu numba tupandame kuli Yehova.—WaPetulu 1, 2:21.

13, 14. (a) Uno twatachikiza ngachilihi ngwetu Yesu ahanjikilenga muchano? (b) Vyuma muka atelelele kulinga Yesu hakupwa ikiye “muchano,” kaha mwomwo ika?

¹³ Yesu ahanjikilenga muchano wamumazu aupolofweto waIse lwola lwosena. (Yowano 8:40, 45, 46) Kaha mukanwa kenyi kavawanyinemo makuli numba amandendeko. (WaPetulu 1, 2:22) Navaka-kole jenyi vatachikijile ngwavo anangwilenga “jila yaKalunga kweseka nomu mwaya muchano.” (Mako 12:13, 14) Chipwe ngocho, omu Yesu ambile ngwenyi ‘Ami yami muchano,’ kapwile nakulumbununa kaha ngwenyi atandakanyishile muchano muvyuma ahanjikilenga, navize ambulwilenga nakunangulako, oloze mwaliwezele navyuma vyavivulu.

¹⁴ Anukenu ngwenu makulukaji amyaka kunyima, Yehova ahwiminyine vaka-kusoneka Mbimbiliya vasoneke upolofweto wauvulu wakuvuluka Meshiya chipwe ngwetu Kulishitu. Upolofweto kanou wahanjikile chimweza vyakuyoya chenyi, namulimo wenyi wakwambulula nakufwa chenyi. Kaha nawa Jishimbi jaMose jenyikilile kuvyuma vyavivulu vize mwakatesamo Meshiya. (WavaHepeleu 10:1) Yesu atelelele kushishika palanga nakukufwa  chenyi numbanyi atesemo vyuma vapolofwetele hali ikiye nakuhasa jino kusolola nge Yehova apwa Kalunga uze eji kutesangamo upolofweto. Mulimo kanou waulemu wapendaminyine chikupu hali Yesu. Vyuma ahanjikilenga navize alingilenga vyasolwele hatoma nge vyuma vapolofwetele hali ikiye vyapwile vyamuchano. (Wavaka-Kolinde 2, 1:20) Chikupu vene, Yesu apwile “muchano” mwomwo muchano wamumazu aupolofweto waYehova wateselemo kuhichila muli ikiye.—Yowano 1:17; Wavaka-Kolose 2:16, 17.

15. Uno kufwelela muli MwanaKalunga chalumbununa ika, kaha kulinga ngocho nachitutwaminyina kuvyuma muka?

¹⁵ Yesu ikiye “kuyoya” mwomwo tunahase kupwa ‘nakuyoya chamwenemwene’ kuhichila kaha muli ikiye. (WaChimoteu 1, 6:19) Mbimbiliya yamba ngwayo: “Ou mwafwelela Mwana ali nakuyoya chahaya myaka yosena, ou mwalikanga kuli Mwana keshi kukamona kuyoyako, oloze utenu waKalunga naupwa hali ikiye.” (Yowano 3:36) Uno kufwelela muli MwanaKalunga chalumbununa ika? Chalumbununa kwitavila ngwetu katweshi kuhasa kupwa nakuyoyako chakuzeneka ikiye. Kaha nawa chalumbununa nge twatela kusolola lufwelelo lwetu muvilinga hakutwalaho lika kulinangula kuli Yesu, nakufwila kukavangiza chakutalilaho chenyi navyuma anangwilenga. (WaYakova 2:26) Eyo, kufwelela muli MwanaKalunga cheji kutwaminyinanga kukuyoya chahaya myaka yosena. Vaka-Kulishitu vawavisa nashipilitu ‘vamuutanga wamikoko waundende,’ navakatambula kuyoya chakushipilitu chakuhona kufwa mwilu, kaha “mikoko veka” ‘vamuliyongomena lyalinene,’ navakatambula kuyoya chakukupuka mupalachise hano hamavu.—Luka 12:32; 23:43; Kusoloka 7:9-17; Yowano 10:16.

16, 17. (a) Uno Yesu mwakapwa ngachilihi “kuyoya” nakuli vaze vafwa? (b) Chuma muka twatela kufwelela?

¹⁶ Nyi ngachilihi kuli vatu vaze vafwa lyehi? Yesu apwa “kuyoya” nakuli vakiko nawa. Omu mwahichile tando yayindende kufuma hakusangula sepa lyenyi Lazalu kuvafu, Yesu alwezele Malita ndumbwaLazalu ngwenyi: “Ami yami kusanguka, yami kuyoya. Ou mwangufwelela, numba nge mwafwa, mwakayoya  cheka.” (Yowano 11:25) Yehova ahana Mwanenyi “jisapi jakufwa najeji jaFuka,” kulumbununa nge amuhana ngolo jakusangula vafu. (Kusoloka 1:17, 18) Yesu uze vatohwesa lyehi mwakazachisa jisapi kana mangana akasokolole vikolo vyaHetese nakusokola jino vosena vaze vali muvimbumbe.—Yowano 5:28, 29.

¹⁷ Yesu alumbunwine mukavatu vyuma ejililile hano hamavu novyo azachilile mulimo wakwambulula hakuhanjika mazu ano ngwenyi, “Ami yami jila, yami muchano, yami kuyoya.” Mazu kana atwama naulumbunwiso waunene kuli yetu makumbi ano. Anukenu ngwenu Yesu ahanjikile nawa ngwenyi: “Mutu naumwe wauchi mweza kuli Tata kuvanga ahichile muli ami.” (Yowano 14:6) Mazu aYesu apwa amalemu chikuma noholyapwa ngana muze apwile halwola luze awahanjikile. Ngachize, twatela kufwelela ngwetu katweshi kuhasa kujimbalako nge natumukavangiza. Chikupu vene, Yesu kaha ikiye nahase kututwaminyina kuli ‘Ise.’

18. Vyuma muka twatela kulinga numba tupwenga vaka-kukavangiza Yesu vamuchano?

¹⁸ Hakuwana nge Yesu azata mulimo waulemu kaha nawa atachikiza kanawa Ise, ngocho twatela chikupu kumukavangiza ou MwanaKalunga. Nganomu twamonanga mukapetulu nafumuho, kupwa vaka-kukavangiza Yesu vamuchano chatela kusoloka muvilinga keshi muhanjikiso, chipwe muvyuma natushinganyeka kahako. Kukavangiza Kulishitu chasakiwa kulinga vyuma anangwilenga nakulondezeza chakutalilaho chenyi mukuyoya chetu. (Yowano 13:15) Mukanda uno muli nakutanga naumikafwa mutesemo vyuma kana.

19, 20. Vyuma muka vili mumukanda uno vize navimikafwa mufwile kukavangiza Kulishitu?

¹⁹ Mutupetulu vanakavangizaho, natuhunanana hakuyoya chaYesu chahano hamavu nahamulimo wenyi wakwambulula. Tupetulu kana vanavapange muvihanda vitatu. Chatete, natushimutwila havilinga vyenyi najila alingililengamo vyuma. Chamuchivali, natukekesa hamulimo azachile wakwambulula  nakunangula vatu. Kaha chamuchitatu, natutala hajijila asolwelelemo zangi. Kuputukila muKapetulu 3, namupwanga lipwata lyakunangula lyakwamba ngwavo “Munahase Kukavangiza Ngachilihi Yesu?” Visoneka navihula vanahakemo navitukafwa tuhase kulihulika nakushinganyeka mwakulondezezela Yesu muvyuma ahanjikilenga nakulinga.

²⁰ Hakuwana nge Yehova Kalunga atusokola, ngachize katwatela kumona nge twajimbala chipwe nge Yehova ahanduka kuli etu mwomwo yashiliko. Yehova alisuwile hakutuma Mwanenyi hano hamavu mangana atulweze mwakupwila nausoko wamwaza naIse. (WaYowano 1, 4:9, 10) Shikaho vyuma kana vyatela kumilingisa mufwile kwakula kuzangi kana hakwitavila chilanyo chaYesu chakwamba ngwenyi: “Pwako umuka-kungukavangiza.”—Yowano 1:43.