1-3. Ukalu muka alitalasanyine nawo Yesu, kaha alingile ngachilihi?

 LIYONGOMENA lyavatu lyanyemukilile Yesu nakumutondatonda vamukwate. Vapwile hamwe namaswalale oku nawa vanambate jipoko jamikwale najimbwechi. Omu vapwile nakuhita naufuku mujijila jamuYelusalema nakuzauka Chinema chaKichilone nakuya kuPili yaMilive, vapwile nakusoloka kwijiva nge vanavazondola valinge chuma chimwe chachipi. Numba tuhu kwapwile myeji, oloze vambachile manongo namimunyi. Kutala vavimbachile mangana vivamunyikile mujila nge kakweji nengila mumavwi tahi? Uno vashinganyekele ngwavo mutu vali nakutonda mwaswama tahi? Katwatachikiza kanawako, oloze chuma twatachikiza shina echi: Nge mutu mwashinganyeka ngwenyi Yesu nahase kulizuzukila nawoma nakuswama, kaha mutu kana kamutachikiza kanawako.

² Yesu atachikijile chikupu ngwenyi mwamona ukalu. Oloze emanyine nakuvandamina vyuma navisoloka. Lize liyongomena lyapandamine kwakamwihi, kaha Yuta uze apwile sepa lyaYesu uze afwelelele chikuma, ikiye apwile nakuvatwaminyina. Yuta ahamukile nakusolola Yesu uze apwile mwata wenyi hakulyonga kumumeneka nakumusweswenya chakuzeneka kwivwa sonyi. Chipwe ngocho, Yesu omikile nakupandama kuli lize liyongomena nakuvahulisa ngwenyi: “Muli nakutonda iya?” Kaha vamukumbulwile ngwavo: “Yesu wakuNazaleta.”

³ Vatu vavavulu kachi vevwile woma hakumona liyongomena linambate vitwa. Kaha pamo omu mukiko vashinganyekele navatu vaze vejile nakukwata Yesu ngwavo pamo mwevwa woma. Oloze Yesu kevwile woma, chipwe kuchina, chipwe vene kuhanjika makuliko. Ngocho avalwezele ngwenyi: “Yami uno.” Yesu aunjile muchima nakumika, kaha vaze vatu valichikiminyine. Ngocho, vapelyangilile nakuhiluka ufutanyima nakulimbukila hamavu.—Yowano 18:1-6; Mateu 26:45-50; Mako 14:41-46.

4-6. (a) Uno MwanaKalunga vamufwanyisa kuchuma muka, kaha mwomwo ika? (b) Mujijila muka jitatu jize Yesu asolwelelemo muchima wakuhamuka?

 ⁴ Uno chuma muka chalingishile Yesu aunde muchima omu vamulukukile kuli lize liyongomena? Chuma chamulingishile shina kuhamuka. Kuhamuka chatwama havilinga vize atela kupwa navyo twamina, kaha kakweshi mutu ahamuka ngana mwaYesuko. Mukapetulu nafumuho, twalinangulanga omwo Yesu apwile wakulinyisa nakuvova. Shikaho, chapwile chakutamo kumuvuluka ngwavo “Mwanamukoko.” (Yowano 1:29) Oloze kuhamuka chenyi chamulingishile nawa vamuvuluke lijina likwavo. Mbimbiliya yahanjika kutalisa kuli ou MwanaKalunga ngwayo: “Tala! Ndumba wakumuyachi waYuta.”—Kusoloka 5:5.

⁵ Kakavulu ndumba emanyinako kuhamuka. Kutala mwalitulukaho lyehi nakomba yandumba meso nameso tahi? Nge mukiko, kaha mwapwile vakukingiwa mwomwo pamo apwile muchipato hachihela chakulamina tunyama. Chipwe ngocho, pamo mwevwile woma chikuma hakumumona. Omu mwamutalile nakumona kutohwa nangolo jenyi, pamo mwashinganyekele ngwenu kakweshi kuhasa kupwa chuma chimwe chinahase kwivwisa woma ndumbako. Mbimbiliya yahanjika kutalisa kuli ndumba ngwayo: “Atwama nangolo chikuma hatunyama vakwavo, kaha keshi kuchina chuma numba chimweko.” (Vishimo 30:30) Kulishitu naikiye apwa wakuhamuka ngana mwandumba.

⁶ Tushimutwilenu hajijila jitatu jize Yesu asolwelelemo kuhamuka chenyi ngana mwandumba. Apwile wakuhamuka hakuhakwila muchano, nahakukundwiza chiyulo chakwoloka, nahakumona luyanjisa. Natulinangula nawa omwo tuvosena tunahase kupwa vakuhamuka ngana mwaYesu, numba twasemuka nacho chipwe nduma.

7-9. (a) Vyuma muka vyasolokele omu Yesu apwile namyaka 12, kaha munashinganyeka ngwenu vyuma muka vyatelele kumulingisa evwenga woma? (b) Yesu asolwele ngachilihi kuhamuka chenyi omu apwile navaka-kunangula mutembele?

⁷ Mutu atela kupwa wakuhamuka numba ahase kuhakwila muchano mukaye kano vayula kuli Satana uze apwa “ise yamakuli.” (Yowano 8:44; 14:30) Yesu kavandaminyine achivangile kukola numba  aputuke kuhakwila muchanoko. Omu apwile namyaka yakusemuka 12, asalile muYelusalema omu chakumine chilika chaPaseka, oloze visemi jenyi kavatachikijileko. Maliya naYosefwe vafulyangilile nakutonda ou kanyike hamakumbi atatu. Kutwala muze, vamuwanyine jino mutembele. Uno Yesu apwile nakulinga ika mutembele? Atwamine “mukachi kavaka-kunangula, ali nakuvevwilila nakuvehwojola.” (Luka 2:41-50) Achishinganyekenu omu chapwile kushimutwila navaka-kunangula.

⁸ Vaka-kusoneka vyakushikulu vamba ngwavo, vatwamina vamukwitava vasalilenga kakavulu hatembele hanyima yavilika nakuputuka kunangula vatu musenge yajizuvo. Vatu vatwaminenga kujitungi javo nakwivwilila nakuvehwojola vihula. Ava malunga vapwile nachinyingi chikuma. Vatachikijile kanawa visemwa, naJishimbi jaMose najishimbi jeka jakulisezaseza javatu jize vatungilenga. Uno nge yenu mwatwamine mukachi kavaka-kunangula kana, kachi mwevwile ngachilihi? Kutala kachi mwevwile woma tahi? Eyo, chinahase kupwa chakutamo kwivwa woma. Nyi ngachilihi nge mwapwile kaha namyaka yakusemuka 12? Vanyike vavavulu vatwama nawoma. (Yelemiya 1:6) Vamwe kavasaka kulinga vyuma vimwe kuchina navavamona kuli valongeshi javo kushikola, nakushinganyeka ngwavo pamo navavahulisa, chipwe kuvasakula valinge vyuma vimwe, chipwe kwivwa woma wakuvasekeleka chipwe kuvatoleka.

⁹ Oloze Yesu atwamine mukachi kamalunga kanava vachinyingi chikuma nakuvahulisa vihula vyakujiminyina chakuzeneka woma. Kaha nawa kwapwile vyuma vyeka alingile halwola kanelu. Mbimbiliya yatulweza ngwayo: “Vosena vaze vapwile nakumwivwilila valikomokelele chikuma hakunangakana chenyi nomu akumbulwilenga vihula.” (Luka 2:47) Numba tuhu Mbimbiliya kayatulweza vyuma ahanjikile Yesu halwola kaneluko, oloze twenjikiza chikupu ngwetu, kakundwijile vyuma vyamakuli vahanjikilenga ava vaka-kunangula vamukwitavako. (WaPetulu 1, 2:22) Akundwijilenga muchano wamuMazu aKalunga, kaha vaka-kumwivwilila valikomokelele hakumona kanyike wamundende wamyaka 12 ali nachinyingi chachivulu kaha nawa wakuhamuka.

10. Uno vaka-Kulishitu vavanyike makumbi ano vali nakulondezeza ngachilihi Yesu uze apwile wakuhamuka?

¹⁰ Makumbi ano, vaka-Kulishitu vavanyike vali nakukavangiza  mujitambo jaYesu. Numba tuhu kavapwa vakukupuka ngana muze apwile Yesuko, oloze navakiko kaveshi kuvandamina vachikole numba vaputuke kuhakwila muchanoko. Veji kuhulisanga vatu vihula mujila yakuzangama mundandanda yavo chipwe kushikola nakwivwilila omu navavakumbulula, nakuvambulila jino muchano mukavumbi. (WaPetulu 1, 3:15) Vanyike vavavulu vanakafwenga vakwavo vaka-shikola, navalongeshi, navatu vatunga navo mangana vapwenga vaka-kukavangiza Kulishitu. Veji kwivwisanga Yehova kuwaha hakuhamuka chavo. Kaha Mazu enyi afwanyisa vakweze kana kulyume mwomwo veji kutusuulwisanga, nakutwivwisa kuwaha, kaha nawa vapwa vavavulu.—Samu 110:3.

11, 12. Yesu asolwele ngachilihi kuhamuka hakuhakwila muchano omu akolele?

¹¹ Yesu atwalileho lika kupwa wakuhamuka hakuhakwila muchano nomu akolele. Hakuputuka mulimo wenyi wakwambulula, alitalasanyine nacheseko chize vatu vavavulu vanahase kwivwa woma chikuma. Omu Yesu apwile hano hamavu, kapwile kangelo wakulitulahoko, oloze apwile mutu halwola alitalasanyine naSatana uze apwa wangolo chikuma, kaha nawa muka-kole wamupi hali vaka-kole jaYehova vosena. Chipwe ngocho, Yesu akanyine nakuhamika Satana uze azachishilenga Visoneka mujila yakuhenga. Yesu ahonesele Satana hakuhamuka nakumulweza ngwenyi: “Fumaha, ove Satana!”—Mateu 4:2-11.

¹² Yesu atusela chakutalilaho chamwaza omu azachile mulimo wenyi wakwambulula mwomwo akingilenga Mazu aIse kuli vosena vaze vasakilenga kuwahingika chipwe kuwazachisa mujila yakuhenga. Kunyima, vatwamina vamukwitava vanangwilenga vyuma vyamakuli nganomu chili namakumbi ano. Yesu alwezele vatwamina vamukwitava vamumakumbi enyi ngwenyi: “Mweji kuzeyesanga mazu aKalunga mwomwo yavisemwa vyenu vize munaliselanga.” (Mako 7:13) Malunga kana vavamwenenga kuvatu kupwa vavalemu chikuma, oloze Yesu avavulukile hatoma ngwenyi vapwile vatwamina vatupuputa, kaha nawa vaka-kulyonga. a (Mateu 23:13, 16) Uno tunahase kulondezeza ngachilihi kuhamuka chaYesu?

13. Vyuma muka twatela kwanuka hakulondezeza Yesu, kaha kutokwa muka twatwama nacho?

 ¹³ Twatela kwanuka ngwetu katwatwama nauhashi wakutachikiza vyuma vili mumichima yavatu chipwe ngolo jakusopesa ngana mwaYesuko. Chipwe ngocho, tunahase kulondezeza muchima wenyi wakufwila kuhakwila muchano nakumika. Chakutalilaho, nge natusopolola makuli veji kunangulanga vaka-kwitava chamakuli hali Kalunga, nahavyuma ajina, nahaMazu enyi, kaha natukafwa vatu vamukaye kano vaze vatwama mumilima mwomwo yamijimbu yaSatana yakumbembejeka vatachikize muchano. (Mateu 5:14; Kusoloka 12:9, 10) Natuvakafwa vafume muundungo wakunangula chamakuli chize cheji kuvevwisanga woma nakwenyeka usoko wavo naKalunga. Twatokwa chikupu hakumona omu luli nakutesamo lushiko lwaYesu lwakwamba ngwavo: “Muchano naumilingisa kupwa vakulihehwa.”—Yowano 8:32.

14, 15. (a) Jila muka Yesu asolwelelemo omwo “chapwa chiyulo chakwoloka”? (b) Vyuma muka vyakundwiza kulimona ulumbi vize alihendeleko Yesu hakuhanjika napwevo wakaSamaliya?

¹⁴ Upolofweto wamuMbimbiliya wahanjikile chimweza ngwawo Meshiya mwakasolwela vaka-kamafuchi omwo “chapwa chiyulo chakwoloka.” (Mateu 12:18; Isaya 42:1) Yesu aputukile kusolola omu chapwa chiyulo kana halwola apwile hano hamavu. Ahamukile hakulinga mwaya chiyulo lwola lwosena, nakuhona kumona vatu ulumbi. Chakutalilaho, akanyine tato vapwilenga nayo vatu vamumakumbi enyi yakumonanga vatu ulumbi yize vakanyisa muvisoneka.

 ¹⁵ Omu Yesu ahanjikile napwevo wakaSamaliya halishima lyaSukale, tumbaji twenyi valikomokelele. Mwomwo ika? Halwola kana, vaYuleya kavalinwishilenga meya navaSamaliyako, kaha chijindo kana chaputukile lyehi kushikulu shimbu kanda naYesu ezenga hano hamavu. (Ezela 4:4) Kaha nawa valapi vamwe valumbilishilenga mapwevo. Kutwala muze, jishimbi javo jize vasonekele jakanyishile malunga kushimutwila namapwevo, kaha jasolwele nawa nge mapwevo kavatelelele kuvanangula Jishimbi jaKalungako. Chikumanyi mapwevo vavaSamaliya kavavamwenenga kupwa vatomako. Yesu kakavangijile tato kaneyi yakulimona ulumbiko, oloze anangwile uze pwevo (muka-ujila) wakaSamaliya hasanga, nakulisolola kuli ikiye nge apwile Meshiya.—Yowano 4:5-27.

16. Mwomwo ika vaka-Kulishitu vatela kupwila vakuhamuka hakusaka valihende kumuchima wakulimona ulumbi?

¹⁶ Kutala mwatwamaho lyehi navatu vamuchima waupi wakumonanga vakwavo ulumbi tahi? Pamo vatu kana vahunga vaka-miyachi yeka chipwe vaka-mafuchi eka, nyi pamo veji kulumbilisanga vatu vausonyi weka chipwe vatu vaze vakwechi chiyoyelo chakulihandununa nechi chavo. Vaka-kukavangiza Kulishitu kaveshi kukundwiza tato kaneyi yayipiko, oloze veji kukilikitanga mangana valihende kumuchima kanou wakulimonanga ulumbi. (Vilinga 10:34) Shikaho, tuvosena twatela kupwa vakuhamuka numba tulihende kutato kaneyi.

17. Vyuma muka alingile Yesu mutembele, kaha mwomwo ika?

¹⁷ Kuhamuka chalingishile nawa Yesu azate nangolo hakukafwa vatu jaKalunga vapwenga vatoma nakukundwiza kulemesa chamuchano. Kumaputukilo amulimo wenyi hano hamavu, Yesu engilile muchihela chatembele muYelusalema, kaha evwile kupihya hakuwana vatu vali nakusekasana nakutambasana jimbongo muchihela chatembele. Hakuwana nge Yesu afwilililile kulinga mwachiyulo, ngocho ahangile vaze malunga valizangamina nakumwanga vyuma vyavo valanjishilenga. (Yowano 2:13-17) Kaha alingile nawa chuma chakulifwanako kumakumishilo amulimo wenyi. (Mako 11:15-18) Numba tuhu echi chalingishile vatu vamwe vamuhunge chikuma, oloze kevwile womako. Mwomwo ika? Kufuma vene kuunyike wenyi, avulukilenga tembele kupwa zuvo yaIse, kaha echi chikiko chamulingishile alinge chuma kana. (Luka 2:49) Yesu kasakile kwechelela  vatu vapihise kulemesa chamuchano hakusekasanyina mutembeleko. Twima yenyi yamulingishile apwenga wakuhamuka nakufwila kwolola vyuma.

18. Vaka-Kulishitu makumbi ano vanahase kusolola ngachilihi kuhamuka hakufwila kulama chikungulwilo chipwenga chitoma?

¹⁸ Vaka-kukavangiza Kulishitu makumbi ano navakiko vafwila kulemesa chavo chipwenga chitoma, nakupwa navilinga vitoma. Kachi nge vanamono ngwavo ndumbwavo navulumuna mulonga waunene, kavaswekako. Oloze veji kuhamukanga nakuya nakushimutwila nenyi. (Wavaka-Kolinde 1, 1:11) Kaha nawa veji kuzatanga nangolo nakumona ngwavo vakulwane muchikungulwilo vanatachikiza vyamulonga kana. Vakulwane vanahase kukafwa vaze vali nakuviza kushipilitu nakukinga nawa chikungulwilo chipwenga chitoma hakufumisamo vaze navahona kupihilila nakwalumuka.—WaYakova 5:14, 15.

19, 20. (a) Vilinga muka vyakuhengesa chiyulo valingilenga vatu mumakumbi aYesu, kaha vatu vamwe vasakile Yesu alinge vyuma muka? (b) Mwomwo ika vaka-kukavangiza Kulishitu veji kukanyinanga kwazana muvihande vyalifuchi nachiyulo namuvilinga vyaulyanyi, kaha vavakisula mujila muka?

¹⁹ Uno twatela kukukulula ngwetu Yesu akumishile vilinga vyosena vyakuhengesa chiyulo mukaye tahi? Nduma, mwomwo halwola kana kwapwile lika vaze vahengeselenga chiyulo. Lifuchi atwaminengamo valiyulilenga kuli vatu vakulifuchi lyeka. VaLoma vapwile namaswalale vangolo, ngocho vashinyinyikilenga vaYuleya, nakuvatelesanga mitelo yayinene, nakuluwanganyisa visemwa vyavo vyamukwitava. Chuma kana chalingishile vatu vavavulu vasake kulingisa Yesu azane mumapolitiki halwola kana. (Yowano 6:14, 15) Aha nawa Yesu atelelele kupwa wakuhamuka.

²⁰ Yesu alumbunwine ngwenyi Wangana wenyi kawapwile wakukayeko. Chakutalilaho chenyi chakafwile vaka-kumukavangiza valihende kuvihande vyamapolitiki vyapwileko halwola kana, nakuhaka kaha mangana kumulimo wakwambulula mujimbu wamwaza waWangana waKalunga. (Yowano 17:16; 18:36) Omu lize liyongomena lyejile nakumukwata, Yesu anangwile chishina chachinene chakutalisa kukulihenda kuvihande vyamapolitiki. Halwola kanelu, Petulu alusukile hakumbata poko yenyi yamukwale nakulemeka lunga  umwe. Chinahase kupwa chachashi kukukulula ngwenu chuma alingile Petulu chapwile chakwoloka mwomwo haufuka kana vatu valukukile MwanaKalunga chakuzeneka mulonga, ngocho atelelele kulwa navo. Oloze kufuma vene halwola luze, Yesu asele chakutalilaho chize vatela kulondezeza navaka-kumukavangiza makumbi ano. Ambile ngwenyi: “Kindulwisa poko yove yamukwale muchindalo chayo, mwomwo vosena vaze navakwata poko yamukwale navakanonga kupoko yamukwale.” (Mateu 26:51-54) Vaka-kukavangiza Kulishitu vatelelele kupwa vakuhamuka halwola kanelu nganomu chili noholyapwa. Hakuwana nge navaka-Kulishitu vamakumbi ano kavasaka kwazana muvihande vyamapolitikiko, ngocho kavatwama napuho yakukundwiza jijita, navikokojola vyakulalisa vatu, najipindangano navilinga vyeka vyaulyanyi vize vinavulu chikuma mukayeko. Puho kaneyi yamwaza yapwa hikukisula chize cheji kufumanga hakuhamuka chavo.

21, 22. (a) Yesu vamukafwile ngachilihi shimbu kanda engile muukalu waunene? (b) Uno Yesu apwile ngachilihi wakumika palanga nakusongo?

²¹ MwanaYehova atachikijile chimweza ngwenyi mwakamona luyanjisa lwalunene hano hamavu. (Isaya 50:4-7) Ahichile muukalu wakufwa nakuyoya ngana muze tunamono kumaputukilo akapetulu uno. Uno Yesu ahashile kumika ngachilihi halwola alitalasanyinenga naukalu kanou? Kutala munanuka vyuma apwile nakulinga Yesu shimbu kanda vaka-kole jenyi vezenga nakumukwata tahi? Apwile nakulomba namuchima wenyi wosena kuli Yehova. Kaha Yehova alingile vyuma muka? Mbimbiliya yatulweza ngwayo Yesu “vamwivwile.” (WavaHepeleu 5:7) Yehova atumine kangelo kufuma mwilu kwiza nakukafwa ou Mwanenyi wakuhamuka.—Luka 22:42, 43.

²² Omu mwahichile tando yayindende kufuma hakumukolezeza, Yesu alwezele vaposetolo jenyi ngwenyi: “Katukenu, tuyenu.” (Mateu 26:46) Achishinganyekenu hakuhamuka chenyi hakuhanjika  mazu kana awa. Ambile ngwenyi “tuyenu” mwomwo atachikijile ngwenyi mwalweza vaka-kole jenyi vahone kulemeka masepa jenyi. Kaha nawa atachikijile ngwenyi masepa jenyi navamuseza nakuchina, ngocho mwasala nakuyandangila ukawenyi. Chikupu vene, amwene lamba ukawenyi hakumusopesa, nakumutoleka, nakumuyanjisa nakumujiha mujila yayipi. Chipwe ngocho, atwalileho lika kupwa wakuhamuka hakuhita muukalu wosenou.

23. Lumbununenu ovyo katweshi kuhasa kwambila ngwetu Yesu kalyecheleleleko omu engilile muukalu wakumujiha.

²³ Kutala Yesu alyechelelele tahi? Nduma, kulyechelela kachatambukila hamwe nakuhamukako. Yesu anangwile vaka-kumukavangiza vapwenga vakuvanguluka mangana valihende kukala  ponde nayivawana, nakutwalaho lika kulinga mwaya muchima waKalunga. (Mateu 4:12; 10:16) Oloze halwola kanelu, Yesu atachikijile ngwenyi chapwile chachikalu kulihenda kuukalu kanou mwomwo ejivile vyuma ajinyine Kalunga. Yesu afwililile kulama kulonga chenyi, ngocho kakwapwile chuma cheka atelele kulingako, shina kumika kaha nakwingila mucheseko.

24. Mwomwo ika twatela kufwelela ngwetu tunahase kumika nge cheseko chinatuwane?

²⁴ Vaka-kukavangiza Yesu vanomikanga kakavulu hakukavangiza mujitambo jaMwata wavo. Vavavulu vanazamenga mbe hakuvatoleka, nakuvayanjisa, nakuvakasa mutumenga chipwe vene kuvajiha. Uno ava vatu vakuhona kukupuka veji kuhasanga ngachilihi kumika mujila kaneyi? Kavomika mungolo javoko. Yesu vamukafwile kuli Kalunga, kahomu mukiko chapwa nakuli vaka-kumukavangiza. (Wavaka-Fwilipi 4:13) Ngocho, kanda namwivwanga woma wavyuma vinahase kumiwana kulutweko. Oloze fwilenu kulama lika kulonga chenu, kaha Yehova mwamikafwa mumike. Zamenunga mbe ngana mwaTwamina yetu Yesu uze ambile ngwenyi: “Likolezezenu! Ami ngunafungulula lyehi kaye.”—Yowano 16:33.