1, 2. Mwomwo ika chisemi wazangi mwevwila kuwaha hakumona mwanenyi ali nakumwononoka, kahechi chalifwana ngachilihi namuze eji kwivwanga Yehova?

 ACHISHINGANYEKENU chisemi nemana muzuvo ali nakutalila mwanenyi wamundende hanjanena uze ali nakuhema ngunja navakwavo. Kaha yize ngunja hinayichituka nakuya nakuholokela mumukwakwa wajiminyau. Ou mwana himwashishika yize ngunja. Kaha sepa lyenyi umwe himwamulweza ayilahile mangana akayimbate, oloze ou kanyike mwanyukumuna kumutwe nakwamba ngwenyi: “Visemi jami vangukanyisa kuhemena mumukwakwa.” Chisemi chenyi mwevwa kuwaha havyuma nalingi mwanenyi.

² Mwomwo ika ou chisemi mwevwila kuwaha? Mwomwo akanyisa ou mwanenyi kuyanga mumukwakwa ukawenyi. Kaha hakuwana nge ou mwana nononoka numba tuhu katachikijile ngwenyi chisemi chenyi ali nakumumonako, ngocho ou chisemi nejiva ngwenyi mwanenyi ali nakulinangula kupwa namuchima wakwononoka, kaha mwapwa wakukingiwa. Chikupu vene, ou chisemi mwevwa ngana muze eji kwivwanga Setu wamwilu Yehova. Kalunga atachikiza ngwenyi twatela kumufwelela nakumwononoka numba tutwaleho lika kupwa vakushishika nakutalilila vyuma vyamwaza atushika kulutwe. (Vishimo 3:5, 6) Kaha atutuminyinyine muka-kutunangula wamwenemwene uze ahambakana vaka-kunangula vosena hano hamavu mangana atukafwe tutesemo vyuma kana.

3, 4. Mujila muka Yesu “alinangwile kwononoka,” kaha ‘vamukupwishile’ ngachilihi? Hanenu chakutalilaho.

³ Mbimbiliya yahanjika vyuma vimwe vyamwaza kutalisa kuli Yesu ngwayo: “Numba tuhu apwile mwana, oloze alinangwile kwononoka hakuhita muvihuli. Kahomu valingile hivanamukupwisa lyehi mwosena, apwile jino muka-kuneha ulwilo wahaya myaka yosena kuli vosena vaze navamwononokanga.” (WavaHepeleu 5:8, 9) Yesu atwaminenga mwilu myaka yayivulu, kaha amwene omu Satana navangelo veka vakulikanga vakanyine kwononoka Yehova, oloze ou MwanaKalunga watwatwa kavakundwijileko. Upolofweto vahwima wahanjika kutalisa kuli Yesu ngwawo: “Ami kaha kangwalikangileko.”  (Isaya 50:5) Jino mazu akwamba ngwavo “alinangwile kwononoka” azata ngachilihi kuli ou MwanaKalunga wakukupuka wakwononoka? Uno mutu kanou wakukupuka ‘vamukupwishile’ ngachilihi?

⁴ Achitalenu hachakutalilaho chino, liswalale ali napoko yamukwale yakuvambuka yize vatunga kanawa kweseka namulimo wayo, oloze kanda ayizachiseho lyehi mujita. Jino himwatambasana poko kana napoko yeka yamukwale yakukola chikuma yize nawa vazachisaho lyehi mujita. Chikupu vene ou liswalale nalingi kanawa kutambasana poko yenyi. Chochimwe nawa, Yesu ononokele Ise shimbu kanda ezenga hano hamavu. Oloze omu afumine hano hamavu, muchima wenyi wakwononoka wazamine jino chikuma. Vawesekele, nakuukupwisa hakuhita muvyeseko vize kamwenenga omu apwile mwiluko.

5. Chuma muka chalingishile Yesu amone kwononoka kupwa chachilemu chikuma, kaha vyuma muka natushimutwila mukapetulu uno?

⁵ Chihande chakwononoka chapwile chachilemu chikuma kuli Yesu, mwomwo chikiko chamukafwile atesemo mulimo wenyi hano hamavu. Hakupwa “Alama wakukuminyina,” Yesu ejile hano hamavu nakulinga chuma chize vahonene kulinga visemi jetu vakulivanga, kaha chuma kana shina kutwalaho lika kwononoka kuli Yehova Kalunga chamokomoko navyeseko. (Wavaka-Kolinde 1, 15:45) Oloze kwononoka chaYesu chapwile chakufuma kumuchima, keshi chakumushinjilako. Ononokelenga navishinganyeka vyenyi vyosena, namuchima wenyi wosena, namwono wenyi wosena kaha nawa nakuwahilila. Amwene kulinga mwaya muchima waIse kupwa chachilemu chikuma kuli ikiye kuhambakana nakulya. (Yowano 4:34) Uno vyuma muka navitukafwa tulondezeze Yesu hakwononoka chenyi? Tuchivangilenu kushimutwila hamuchima apwile nawo Yesu uze wamulingishile apwenga wakwononoka. Nge nayetu natufwila kupwa namuchima kana, kaha natuhonesa vyeseko, nakulinga mwaya muchima waKalunga. Kufumaho, natutala jino hanganyo yatwama hakupwa vakwononoka ngana mwaKulishitu.

6, 7. Vyuma vimwe muka vyalingishile Yesu apwenga wakwononoka?

⁶ Yesu ononokelenga kufuma kumuchima. Nganomu twamonanga muKapetulu 3, Kulishitu apwile wakulinyisa mumuchima.  Kulivwimba cheji kulingisanga vatu vamone kwononoka kupwa chamokomoko, oloze kulinyisa cheji kutukafwanga twononoke Yehova namuchima wetu wosena. (Kulovoka 5:1, 2; WaPetulu 1, 5:5, 6) Kaha nawa Yesu ononokelenga mwomwo azangile vyuma vyamwaza nakuhunga vyavipi.

⁷ Chuma chachinene chikuma chalingishile Yesu ononoke shina azangile Ise wamwilu Yehova. Natukashimutwila chikuma hazangi kana muKapetulu 13. Zangi kana yalingishile Yesu apwenga namuchima wakwivwa Kalunga woma. Kuzanga chikuma Yehova nakumwivwa woma chamulingishile afwile kulinga vyuma vyamwaza kuchina mwevwisa Ise kupihya. Kaha kwivwa Kalunga woma chikiko chalingishile Ise evwenga kulomba chenyi. (WavaHepeleu 5:7) Kwivwa Yehova woma chikiko nawa chalingisa Yesu apwenga Mwangana wauMeshiya.—Isaya 11:3.

8, 9. Nganomu wahanjikile chimweza upolofweto, Yesu amwenenga ngachilihi vyuma vyakwoloka navyevi vyakuhenga, kahechi achisolwele ngachilihi?

 ⁸ Kuzanga Yehova nawa chasakiwa kuhunga vyuma vize ahunga ikiye. Chakutalilaho, achitalenu haupolofweto uno wahanjika vyaMwangana wauMeshiya wakwamba ngwavo: “Ove wazangile kwoloka, kaha wahungile vilinga vyakuhuka. Shikaho Kalunga, ou Kalunga kove, akuwavishile namaji akuneha kuwahilila kuhambakana vakwenu.” (Samu 45:7) Lizu “vakwenu” vanavuluka hano, lyatalisa kuli vamyangana veka vamuchisaka chaMwangana Ndavichi. Oloze Yesu atelelele kuwahilila chikuma halwola vamuwavishile kuhambakana ava vakwavo vosena. Mwomwo ika? Mwomwo fweto yenyi yapwile yayinene chikuma kuhambakana vakwavo kaha nawa Wangana wenyi naukanganyalisa vatu chikuma. Vamuhana fweto kana mwomwo ononokele Kalunga muvyuma vyosena hakuzanga kwoloka nakuhunga vyuma vyavipi.

⁹ Uno Yesu asolwele ngachilihi nge azanga kwoloka nakuhunga vyuma vyavipi? Chakutalilaho, Yesu evwile ngachilihi omu vaka-kumukavangiza valingile vyuma avalwezele kutalisa kumulimo wakwambulula nakufukila jino mumulimo kana? Awahililile chikuma. (Luka 10:1, 17, 21) Uno evwile nawa ngachilihi omu vatu vavavulu muYelusalema vasolwele muchima wakulikanga mapapa kakavulu hakukana vyuma avakafwilenga? Alilile mwomwo yakulikanga chavatu vamunganda kana. (Luka 19:41, 42) Chikupu vene, Yesu awahililenga havilinga vyamwaza, nakupihilila havilinga vyavipi.

10. Twatela kumona ngachilihi vyuma vyamwaza navyevi vyavipi, kaha vyuma muka navitukafwa tulinge ngocho?

¹⁰ Kulihulika nakushinganyeka hajila Yesu amwenenenemo vyuma nachitukafwa tulikekese tumone ovyo tweji kwononokelanga Yehova. Numba tuhu katwakupukako, oloze tunahase kuzanga vilinga vyamwaza nakuhunga vilinga vyavipi. Twatela kulomba Yehova atukafwe tumonenga vyuma ngana muze avimona ikiye naMwanenyi. (Samu 51:10) Chipwe ngocho, twatela kulihenda kuvyuma vize navimbumbulwisa muchima wetu kutalisa kuvyuma kana. Ngocho, chapwa chachilemu kusakulanga kanawa vyakuhemahema navatu vakulikata navo. (Vishimo 13:20; Wavaka-Fwilipi 4:8) Nge natumonanga vyuma ngana muze avimwenenga Kulishitu, kaha kwononoka chetu kacheshi kupwa chakulyongako. Natulinganga vyuma vyamwaza mwomwo twasaka chikupu kulinga ngocho. Natulihendanga nawa  kukulinga vyuma vyavipi mwomwo yakuhunga vilinga vyakuhenga, keshi mwomwo yakuchina kutumona kuvatuko.

11, 12. (a) Vyuma muka vyasolokele kuli Yesu kumaputukilo amulimo wenyi? (b) Satana esekele ngachilihi Yesu mucheseko chatete, kaha azachishile kafuta muka?

¹¹ Yesu asolwele ngwenyi ahunga shili omu vamwesekele kumaputukilo amulimo wenyi wakwambulula. Hanyima yakumumbapachisa, atwamine mupambo makumbi 40 musana naufuku chakuzeneka kulya. Kumakumishilo amakumbi kana, Satana ejile nakumweseka. Achitalenu omwo Liyavolo asolwele kulunguluka chenyi.—Mateu 4:1-11.

¹² Chatete, Satana ambile kuli Yesu ngwenyi: “Kachi nge umwanaKalunga, amba malolwa awa alumuke kupwa mbolo.” (Mateu 4:3) Uno Yesu evwile ngachilihi hakutwama tando yayisuku chakuzeneka kulya? Mbimbiliya yahanjika hatoma ngwayo: “Evwile zala.” (Mateu 4:2) Satana amwene ngwenyi Yesu nevu zala, kaha mwasaka kulya, ngocho chakuzeneka kukakasana amutalijijile swi nomu amwene ngwenyi nazeye. Tachikizenu nawa ngwenu Satana ahanjikile nakapopolweji hakwamba ngwenyi: ‘Kachi nge uMwanaKalunga,’ mwomwo atachikijile vene ngwenyi Yesu apwa “twatwa kuvyuma vyakutenga vyosena.” (Wavaka-Kolose 1:15) Chipwe ngocho, Yesu kechelelele Satana amuhungumwise alikange kuli Kalungako. Yesu ejivile ngwenyi kuzachisa ngolo jaKalunga hakusaka kulinganyalisa mutu ivene kachalitombola namwaya muchima waIseko. Shikaho akanyine kulinga ngocho, kaha asolwele ngwenyi apendaminyine hali Yehova nakufwelela ngwenyi mwamuhana kulya nakumukafwa.—Mateu 4:4.

13-15. (a) Cheseko muka chamuchivali nechi chamuchitatu vize Satana esekele Yesu, kaha Yesu akwileko ngachilihi? (b) Uno twatachikiza ngachilihi ngwetu Yesu kechelelele Satana amufungululeko?

¹³ Mucheseko chamuchivali, Satana atwalile Yesu helu lyatembele. Satana ahingikile Mazu aKalunga hakulweza Yesu akomwese vatu hakulimbila hamavu kufuma helu apwile mangana vangelo vamwakwile. Nge mayongomena avatu aze apwile hatembele amwene chuma kanechi chakukomwesa, kutala kachi kwapwile umwe ahuhwasanyine ngwenyi Yesu kapwile Meshiya uze vashikileko tahi? Kaha nawa nge vaze vatu vetavilile Yesu kupwa Meshiya mwomwo yakumona  chuma kanechi chakukomwesa, kutala kachi Yesu kahashile kuhonesa kala vihuli amwenengako tahi? Pamo mukiko. Oloze Yesu atachikijile ngwenyi Yehova asakile Meshiya azate mulimo wenyi mujila yakulinyisa, keshi kukunyula vatu vamufwelele hakulinga vyuma vyakukomwesako. (Isaya 42:1, 2) Chikupu vene, Yesu akanyine cheka kulikanga kuli Yehova. Kafwililile kuya fumako.

¹⁴ Nyi ngachilihi muheto wakufwila kupwa nangolo jakuyula? Mucheseko chamuchitatu, Satana alwezele Yesu ngwenyi mwamuhana mawangana amukaye osena nge mwamufukamina nakumulemesa. Kutala Yesu etavilile vyuma amuhanyine Satana tahi? Yesu akumbulwile ngwenyi: “Fumaha, ove Satana! Mwomwo vasoneka ngwavo: ‘Lemesanga Yehova Kalunga kove, ikiye kaha watela kuzachilanga mulimo wajila.’” (Mateu 4:10) Kakwapwile chuma numba chimwe chahashile kuhungumwisa Yesu alemese kalunga wekako. Ngolo jakuyula chipwe vyuma vyeka vyamuno mukaye vasakile kumuhana, kavyahashile kulingisa Yesu alikange kuli Kalunga numba hahandendeko.

¹⁵ Kutala Satana alitwaminyinyine kumweseka tahi? Eyo, alitwaminyinyine mwomwo yakumuhanga kuli Yesu. Chipwe ngocho, mukanda waMujimbu Wamwaza waLuka wahanjika ngwawo Liyavolo “amusezele nakuvandamina lwola lweka lwamwaza.” (Luka 4:13) Satana afwililile kutondatonda jijila jeka jakwesekelamo Yesu palanga nakumakumishilo amulimo wenyi hano hamavu. Mbimbiliya yatulweza ngwayo Yesu ‘vamwesekele mwosena.’ (WavaHepeleu 4:15) Ngocho, Yesu kalitwaminyinyine kupwa wakuvangulukako. Kaha nayetu nawa twatela kulinga mwomumwe.

16. Satana eji kwesekanga ngachilihi vangamba jaKalunga makumbi ano, kaha tunahase ngachilihi kulihenda kuvyeseko kana?

¹⁶ Satana chatwalaho lika kweseka vangamba jaKalunga namakumbi ano. Chaluvinda, kuhona kukupuka cheji kutulingisanga tufwenga mumiheto yenyi. Satana eji kuwananga kengililo hakumona muchima walifwi vatwama nawo vatu, namuchima wakulivwimba nakufwila kuyula vakwavo. Kaha eji kuzachisanga chikumanyi kafuta kakufwila luheto. Ngocho, lwola lumwe twatela kulikekesa tumone nge nayetu twafwila vyuma kana. Twatela nawa kulihulika nakushinganyeka hamazu atwama hali WaYowano 1, 2:15-17. Omu natushinganyeka hamazu kana, twatela kulihulisa tumone nge kufwila vyuma vyamukuyoya, naluheto, nakufwila kuyula  vakwetu chinatulingisa tuhone kuzanga Setu wamwilu. Twatela kwanuka ngwetu kano kaye kali nakuhita hamwe kaha naSatana uze eji kukayulanga. Ngocho, tukanenunga tufuta twenyi tuze tunahase kutuhungumwisa tulinge shili. Tulondezezenu Mwata wetu mwomwo “ikiye kalingile shiliko.”—WaPetulu 1, 2:22.

17. Uno Yesu amwene ngachilihi kwononoka Ise, oloze vatu vamwe vanahase kwamba ngwavo ngachilihi?

¹⁷ Kwononoka kachakumina kaha hakulihenda kushiliko mwomwo Kulishitu afwililile kukavangiza jishimbi jaIse josena. Ambile ngwenyi: “Shimbu yosena ngweji kulinganga vyuma vyakumwivwisa kuwaha.” (Yowano 8:29) Kwononoka chenyi chamulingishile apwenga wakuwahilila. Oloze vatu vamwe vanahase kwamba ngwavo chapwile chachashi kuli Yesu kwononoka. Vanahase kushinganyeka ngwavo Yesu ononokele kaha kuli Yehova uze apwa wakukupuka, oloze etu kakavulu tweji kwononokanga vatu vakwechi ngolo jakuyula vaze kavakupukako. Chipwe ngocho, naYesu ononokelenga vatu vakuhona kukupuka vaze vapwilenga nangolo jakuyula.

18. Yesu ahanyine chakutalilaho muka chakwononoka omu apwile mukweze?

¹⁸ Yesu vamulelele kuli Yosefwe naMaliya vaze vapwile visemi vakuhona kukupuka. Ngocho, pamo amwenenga tutenga vapwile natwo ava visemi jenyi kuhambakana vakwavo vanyike vavavulu. Kutala alikangile nakuseza mulimo wenyi atelelele kuzata mutanga hakupwa mwana, nakuputuka jino kulweza visemi jenyi mwakutwaminyina tanga tahi? Achitalenu omu mukanda waLuka 2:51 wahanjika hali Yesu omu apwile namyaka 12. Wahanjika ngwawo: “Atwalileho lika nakuliluula kuli vakiko.” Kwononoka chaYesu chapwa hichakutalilaho chamwaza kuli vakweze vaka-Kulishitu vaze veji kufwilanga kwononoka visemi javo nakuvavumbika.—Wavaka-Efwesu 6:1, 2.

19, 20. (a) Yesu amwene ukalu muka wakulipwila kutalisa kukwononoka vatu vakuhona kukupuka? (b) Mwomwo ika vaka-Kulishitu vamuchano makumbi ano vatela kwononoka vaze vali nakuvatwaminyina muchikungulwilo?

¹⁹ Yesu amwene ukalu kutalisa kukwononoka vatu vakuzeneka kukupuka, uze kaveshi nakumona vakweze vaka-Kulishitu makumbi  anoko. Achitalenu halwola lwakulipwila ayoyelelemo. Numba tuhu Yehova etavishile kwitava chavaYuleya, natembele yavo yize yapwilile muYelusalema, namulimo waupilishitu vitwaleho lika hamyaka yayivulu, oloze kwitava kana chapwile hakamwihi nakuchifumisako mangana vachishishise nachikungulwilo chavaka-Kulishitu. (Mateu 23:33-38) Halwola kana, vatwamina vavavulu vamukwitava kana vanangwilenga vyuma vyamakuli vize vyafumine kukunangula chavaHelase. Mutembele nawa mwalisalile tato yakulihana maswekeza, ngocho Yesu avulukile yize tembele ngwenyi yapwile “wina wakuswama vihwanga.” (Mako 11:17) Kutala Yesu alitwaminyinyine kuyanga muze mutembele namujisunangonga tahi? Nduma. Yehova achipwile lika nakuzachisa jila kana. Ngocho, Yesu ononokele nakuyanga kuvilika valingililenga mutembele namusunangonga nakuvandamina lwola luze Kalunga mwakalumuna vyuma.—Luka 4:16; Yowano 5:1.

²⁰ Hakuwana nge Yesu ononokele muvyuma kanevi, kahanyi vaka-Kulishitu vamuchano makumbi ano vatela kwononoka chikuma, mwomwo lwola tulimo lukiko luze vahanjikile chimweza nge kulemesa chamuchano navakachikindulwisa. Kalunga atufwelelesa ngwenyi keshi kukechelela Satana akapihise vatu jenyi vamukulemesa kanechi chamuchanoko. (Isaya 2:1, 2; 54:17) Chipwe ngocho, tunahase kumona ukalu muchikungulwilo chavaka-Kulishitu  mwomwo yashili nakuhona kukupuka. Kutala twatela kulikanga kuli Yehova mwomwo yatutenga twavandumbwetu chipwe vene kulitwamina kuyanga kukukunguluka chipwe kupopolola vakulwane tahi? Nduma. Twatela kufwila kukundwiza vaze vali nakutwaminyina muchikungulwilo. Kaha nawa twatela kwononoka hakuyanga kukukunguluka chachikungulwilo, nakukukunguluka chachihanda, nakuzachisa vyuma vyamuVisoneka vize tweji kulinangulanga kukukunguluka kana.—WavaHepeleu 10:24, 25; 13:17.

21. Uno Yesu alingile ngachilihi omu vamushinyinyikile kuvatu mangana alikange kuli Kalunga, kaha atusela chakutalilaho muka?

²¹ Yesu kechelelele vatu chipwe vene masepa jenyi azangile chikuma vamuhonese kwononoka Yehovako. Chakutalilaho, kaposetolo Petulu esekele kukunyula Mwata wenyi amone nge kachapwile chakutamo kuli ikiye kuyanda nakufwako. Oloze Yesu akanyine vishinganyeka vyaPetulu vize vyasolokele nge vyamwaza oloze kumana vyakuhenga. (Mateu 16:21-23) Makumbi ano, vaka-kukavangiza Yesu vali nakumona ukalu kufuma kuvausoko wavo vaze vafwelela chikuma, vaze veji kufwilanga kuvakunyula mangana valikange kujishimbi jaKalunga. Ngana mwavaka-kukavangiza Yesu vamulikulukaji lyamyaka lyakulivanga, nayetu twafwila kukavangiza mazu akwamba ngwavo, “twatela kwononoka Kalunga hakupwa ikiye muka-kuyula, kuhambakana vatu.”—Vilinga 5:29.

22. Yesu avatwile chihande muka, kaha mujila muka?

²² Omu Yesu alitalasanyine nakufwa, Satana ahakile kwononoka chaYesu mucheseko chachinene chikuma. Halikumbi lize afwile, “alinangwile kwononoka,” mwomwo alingile mwaya muchima waIse keshi mwaya muchima wenyiko. (Luka 22:42) Kaha nawa halwola kana, alamine kulonga chenyi nakutusela chakutalilaho chamwaza. (WaChimoteu 1, 3:16) Avatwile chihande chize akatwile Satana kushikulu chakwamba ngwenyi, vatu vakuhona kukupuka kaveshi kuhasa kwononoka Yehova nge vali muchesekoko. Alama naEve vahonene kwononoka Kalunga, oloze vyuma alingile Yesu mukuyoya chenyi omu ejile hano hamavu, vyasolwele hatoma nge Satana apwa muka-makuli. Yesu uze apwa mutu wamulemu chikuma havyuma vyosena atenga Yehova, ononokele palanga nakukufwa.

23-25. (a) Uno kwononoka chatambukila ngachilihi hamwe nakulonga? Lumbununenu. (b) Vyuma muka natushimutwila mukapetulu nakavangizaho?

 ²³ Mutu atela kupwa wakwononoka numba vamumone ngwavo apwa wakulonga chipwe alihana kuli Yehova namuchima wenyi wosena. Hakuwana nge Yesu ononokele, ngocho alamine kulonga chenyi nakunganyalisa vatu vosena. (Wavaka-Loma 5:19) Shikaho, Yehova ahanyine Yesu fweto yayinene chikuma. Nge nayetu nawa natwononoka Mwata wetu Kulishitu, kaha Yehova mwakatuhana fweto. Kwononoka Kulishitu cheji kunehanga “ulwilo wahaya myaka yosena.”—WavaHepeleu 5:9.

²⁴ Kupwa vakulonga nawa chapwa hifweto nahayo. Mukanda waVishimo 10:9 wahanjika ngwawo: “Ou mwatambuka mukulonga, mwapwanga wakukingiwa.” Chakutalilaho, kulonga natuchesekesa kuzuvo yayinene yakutunga natumenga vamwaza, kaha kwononoka chetu mukala chuma tunahase kuchesekesa kutumenga vanatungisa yize zuvo. Kamenga umwe nahase kusoloka kupwa wamokomoko, oloze kamenga hikamenga apwa wamulemu chikuma. Tumenga nge vanavulu, vanahase kuvatungisa zuvo yayinene chikuma. Chochimwe nawa, nge natupwa vakwononoka mukala chuma, kaha natupwa nawa vakulonga muvyuma vyosena.

²⁵ Nge natwononokanga lika hatando yayisuku, kaha natupwa nawa nalukakachila. Mukapetulu nakavangizaho natushimutwila hamuchima waYesu walukakachila.