KAPETULU 10
“Vasoneka Ngwavo”
“Lelo echi chisoneka . . . chinatesamo”
1-3. Vyuma muka vyavilemu vize Yesu asakile vatu vamuNazaleta vatachikize, kaha unjiho muka avasolwelele?
KUMAPUTUKILO amulimo wenyi wakwambulula, Yesu Kulishitu akindulukile kwimbo lyenyi kuNazaleta. Afwililile kukafwa vatu vamungalila kana vatachikize chuma chachilemu echi ngwavo: Ikiye apwile Meshiya uze vashikile kumyaka yakunyima. Uno unjiho muka atelelele kuvasolwela?
2 Chakuzeneka kukakasana, vatu vavavulu vafwelelele ngwavo Yesu mwalinga chuma chimwe chakukomwesa, mwomwo vevwilenga mijimbu yavyuma vyakukomwesa alingilenga. Oloze kavasolwelele chinjikizo numba chimweko. Aliyililile kwenyi kusunangonga ngana muze alingilenga makumbi osena. Omu ahetele kuze, akatukile mangana atange, kaha vamuhanyine mukanda wakuvunga waIsaya. Mukanda kana wapwile wausuku uze pamo vajingilile kutuvitondo tuvali, kaha Yesu aputukile kuuvungununa kanawa palanga nomu awanyine mazu apwile nakutonda. Kaha atangililile helu mazu aze jino atwama hamukanda waIsaya 61:1-3.—Luka 4:16-19.
3 Lizavu lyavatu lize lyapwile nakumwivwilila, lyatachikijile mazu amumukanda kana. Mazu kana apwile aupolofweto wakuvuluka Meshiya. Muze musunangonga mwapwile kwijiva hwilichi, kaha meso avatu osena ashishikile hali Yesu. Aputukile jino kuhanjika pamo mukujiminyina ngwenyi: “Lelo echi chisoneka munevu ngana chinatesamo.” Vatu valikomokelele hakwivwa mazu alikoji apwile nakulovoka mukanwa kenyi. Oloze chasolokele nge vatu vavavulu vachipwile lika nakusaka kumona chinjikizo chakukomwesa. Shikaho Yesu ahamukile nakuzachisa chakutalilaho chamuVisoneka mangana asolole ngwenyi kavapwile nalufweleloko. Hahaze vene, vatu vamuNazaleta vasakile kumujiha.—Luka 4:20-30.
4. Chakutalilaho muka atusela Yesu, kaha vyuma muka natushimutwila mukapetulu uno?
4 Halikumbi kaneli, Yesu alingile chuma chize akavangijilenga mumulimo wenyi wosena. Apendaminyine chikuma haMazu aKalunga vahwima. Chikupu vene, vyuma vyakukomwesa alingilenga vyapwile vyavilemu chikuma mwomwo vyasolwele nge shipilitu yaKalunga yapwile hali ikiye. Chipwe ngocho, kakwapwile vyuma vyeka amwene Yesu kupwa vyavilemu chikuma kuhambakana Visoneka Vyajilako. Tukekesenu jino hachakutalilaho kanechi asolwele. Natushimutwila hajila Mwata wetu enyikilile kuMazu aKalunga, nakuwahakwila nakuwalumbununa.
Enyikililenga kuMazu aKalunga
5. Vyuma muka Yesu asakile vaka-kumwivwilila vatachikize, kaha asolwele ngachilihi nge mazu ahanjikilenga apwile amuchano?
5 Yesu asakile vatu vatachikize okwo kwafuminenga mujimbu ambulwilenga. Ambile ngwenyi: “Vyuma ngweji kunangulanga kavyapwa vyamiko, oloze vyapwa vyayauze angutumine.” (Yowano 7:16) Lwola lukwavo nawa ambile ngwenyi: “Kangweshi nakulilingila tuhu vyuma uka wamiko, oloze ngweji kuhanjikanga vyumevi nganomu vene angunangwile Tata.” (Yowano 8:28) Kaha ahanjikile cheka ngwenyi: “Vyuma ngweji kuhanjikanga kuli enu, kavyapwa vyayami iveneko, oloze Tata uze alikata nayami ikiye ali nakuzata milimo yenyi.” (Yowano 14:10) Yesu asolwele ngwenyi awa mazu ahanjikile apwile amuchano hakwinyikila kuMazu aKalunga vasoneka.
6, 7. (a) Mapapa kangahi Yesu enyikilile kuVisoneka VyachiHepeleu, kaha mwomwo ika echi chinahase kupwila chakukomwesa? (b) Vyuma anangwilenga Yesu vyalihandunwine ngachilihi navize vanangwilenga vaka-kusoneka?
6 Vyuma vahehwojola kutalisa kumazu aze ahanjikilenga Yesu vyasolola nge, ahanjikilenga mapapa kakavulu vyuma vyamumikanda yamuVisoneka VyachiHepeleu kweseka namuze vavisoneka, kaha lwola lumwe enyikilile kumikanda yimwe kaha. Pamo munahase kwamba ngwenu kahanjikilenga chikuma mazu amuVisoneka kanako. Munahase kushinganyeka ngwenu mwomwo ika ahonenene kwinyikila kumikanda yosena mumyaka yitatu nachimbwa yize anangwilenga nakwambulila vatu? Pamo enyikilile kumikanda yosena, mwomwo havyuma vize ahanjikilenga Yesu nakulinga, vasonekaho kaha vyavindende. (Yowano 21:25) Vyuma kana munahase kuvitanga kaha mujola jajindende. Jino achishinganyekenu kuhanjika vyaKalunga naWangana wenyi mujola jajindende kaha nakuhasa kuvuluka mazu amumikanda yamuVisoneka VyachiHepeleu yakuhambakana hachimbwa. Kaha nawa Yesu kapwilenga namikanda yakuvunga lwola lwosenako. Omu ahanjikile Chihande chenyi ChahaPili chize chaya puho chikuma, ahanjikile nakwinyikila kuVisoneka VyachiHepeleu vize alaminyinyine mumutwe.
7 Yesu asolwele nge amwene Mazu aKalunga kupwa amalemu hakuhanjika vyuma vyatwama muVisoneka. Vatu vapwile nakumwivwilila “valikomokelele mujila anangwililengamo, mwomwo apwile nakuvanangula nge mutu ukwechi ngolo, keshi ngana mwavaka-kusonekako.” (Mako 1:22) Omu vaka-kusoneka vanangwilenga vatu, vasakilenga kuhanjika hajishimbi javaYuleya jahakanwa nahavyuma vahanjikilenga valapi vakushikulu vaze valinangwile chikuma. Kakwapwile lwola lumwe luze Yesu ahanjikile hajishimbi javaYuleya jahakanwa chipwe havyuma vanangwilenga valapi nakuvimona kupwa vyavilemuko. Oloze amwenenga Mazu aKalunga ngwenyi akwechi ngolo chikuma. Kaha kakavulu tweji kutanganga ngwavo Yesu ahanjikilenga ngwenyi: “Vasoneka ngwavo.” Kakavulu azachishilenga mazu kana chipwe eka akulifwanako hakunangula vaka-kumukavangiza nahakwolola vishinganyeka vyavo vyakuhenga.
8, 9. (a) Yesu asolwele ngachilihi nge Mazu aKalunga akwechi ngolo omu atomesele tembele? (b) Mujila muka vatwamina vamukwitava vasolwele nge kavavumbikile Mazu Kalungako omu vapwile hatembele?
8 Omu Yesu atomesele tembele muYelusalema, ambile ngwenyi: “Vasoneka ngwavo, ‘Zuvo yami navakayivulukanga ngwavo zuvo yakulombela,’ oloze enu munayitenge kupwa nge wina wakuswama vihwanga.” (Mateu 21:12, 13; Isaya 56:7; Yelemiya 7:11) Likumbi lyafumineho, Yesu alingile vyuma vyavivulu vyakukomwesa mutembele. Kaha vanyike vevwile kuwaha chikuma nakuputuka kumwalisa. Chipwe ngocho, vatwamina vamukwitava vapihililile nakuhulisa Yesu avalweze numba nge apwile nakwivwa vyuma vahanjikilenga vaze vanyike. Avakumbulwile ngwenyi: “Eyo, ngunevuko. Uno kanda mutangengaho lyehi mazu awako tahi, ngwavo, ‘Unalingisa tunwa twavana vavandende navakemba kukwalisa’?” (Mateu 21:16; Samu 8:2) Yesu asakile ava malunga vatachikize nge vyuma vyasolokele likumbi kana vavitavishile muMazu aKalunga.
9 Kutwala muze, ava vatwamina vamukwitava valikungulwile nakuya nakuhulisa Yesu ngwavo: “Ngolo jakulinga vyuma kanevi unajiwane kulihi?” (Mateu 21:23) Yesu alumbunwine hatoma Kwafumine ngolo jenyi. Katakilenga vyamumutwe wenyi nakutunga kunangula chenyi chachihyako, oloze azachishilenga vyuma vyamuMazu vahwima kuli Ise. Kaha hakuhulisa chihula kana, ava vapilishitu navaka-kusoneka vasolwele nge kavavumbikile Yehova naMazu enyiko. Ngocho chapwile chakutamo kuli Yesu kusopolola vishinganyeka vyakuhenga vapwile navyo.—Mateu 21:23-46.
10. Tunahase kulondezeza ngachilihi Yesu mujila tweji kuzachishilangamo Mazu aKalunga, kaha vinoma muka twatwama navyo vize kapwile navyo Yesuko?
10 Vaka-Kulishitu vamuchano makumbi ano navakiko veji kuzachisanga Mazu aKalunga mumulimo wavo wakwambulula ngana muze alingilenga Yesu. Mukaye kosena, Vinjiho jaYehova vavatachikijila hamuchima wavo wakufwila kwazana navatu mujimbu wamuMbimbiliya. Mumikanda yetu mwatwama Visoneka vyavivulu chikuma vyamuMbimibiliya. Kaha nayetu tweji kufwilanga kuzachisa Visoneka kala lwola natwambulila vatu. (WaChimoteu 2, 3:16) Ocho kuwaha kana tweji kwivwanga nge mutu mwatwitavisa tumutangile Mbimbiliya nakushimutwila nenyi hanganyo yaMazu Kalunga nomu alumbunukila! Numbu tuhu katwatwama nauhashi wakukomwesa wakwanukanga vyuma ngana mwaYesuko, oloze tukwechi vinoma vyavivulu vyakutukafwa vize kapwile navyo Yesuko. Tukwechi Mbimbiliya yize vali nakupulita mumalimi amavulu, kuhakilako namikanda yeka yahanjika haMbimbiliya mangana yitukafwe tuwane kala chisoneka natusaka. Ngachize, tufwilenu kuhanjikanga vyamuMbimbiliya nakulwezanga vatu vyuma vyatwamamo.
Kuhakwila Mazu aKalunga
11. Mwomwo ika Yesu ahakwililenga Mazu aKalunga?
11 Yesu atachikijile ngwenyi vatu vemanyinyinenga Mazu aKalunga nakole, kaha kalikomokeleleko. Alombele kuli Ise ngwenyi: “Mazu ove apwa muchano.” (Yowano 17:17) Kaha nawa Yesu atachikijile kanawa ngwenyi Satana, “muka-kuyula kano kaye” apwa “muka-makuli kaha nawa ise yamakuli.” (Yowano 8:44; 14:30) Omu Yesu ahonesele vyeseko vyaSatana, ahanjikile mazu amuVisoneka mapapa katatu. Satana nayikiye azachishile mazu amumukanda waJisamu mujila yakuhenga, kaha Yesu akumbulwile mujila yamwaza yize yakingile Mazu aKalunga vahone kuwazachisa mujila yakuhenga.—Mateu 4:6, 7.
12-14. (a) Uno vatwamina vamukwitava vasolwele ngachilihi nge kavavumbikilenga Jishimbi jaMoseko? (b) Yesu ahakwilililenga ngachilihi Mazu aKalunga?
12 Kakavulu Yesu ahakwililenga Visoneka Vyajila kuchina navavilumbununa mujila yakuhenga kaha nawa yakuhungumwisa. Vaka-kunangula vamukwitava vamumakumbi enyi vazachishilenga Mazu aKalunga mujila yakuhenga. Vakaluhwishilenga Jishimbi jaMose hakusaka kukavangiza natuvyuma twatundende, oloze vahonenenga kukavangiza jindongi jamujishimbi jivene. Kaha valingishilenga vatu valemese Kalunga mangana vavamone kaha kuvakwavo muchishishisa chakuhaka mangana kuvyuma vyavilemu vyakufwana nge chiyulo chakwoloka, nakutetela vatu nakushishika. (Mateu 23:23) Yesu ahakwilililenga ngachilihi Jishimbi jaKalunga?
13 Omu Yesu ahanjikile Chihande chenyi ChahaPili, ambilenga ngwenyi ‘mwevwa lyehi muze vavalwezele ngwavo,’ mangana ajimbule vyuma vavulukile muJishimbi jaMose. Kufumaho, ahanjikilenga ngwenyi “oloze aminyi nangwamba kuli enu ngwami,” nakushindakanya jino omu chalumbunukila kukavangiza Jishimbi. Uno apwile nakupopolola Jishimbi tahi? Nduma, apwile nakujihakwila. Chakutalilaho, vatu vatachikijile kanawa lushimbi lwakwamba ngwavo “Kanda mukajiha mutuko.” Oloze Yesu avalwezele ngwenyi nge mutu mwahunga mukwavo, kaha nahokola lushimbi kana. Kaha nawa nge mutu mwevwila uvumbi mutu uze kapwa muka-mahyenyiko, kaha nahokola lushimbi lwaKalunga luze lwakanyisa ujila.—Mateu 5:17, 18, 21, 22, 27-39.
14 Yesu ambile nawa ngwenyi: “Mwevwa lyehi muze vambile ngwavo: ‘Zangenunga vakwenu nakuhunga vaka-kole jenu.’ Oloze aminyi nangwamba kuli enu ngwami: Zangenunga lika vaka-kole jenu nakulombelako vaze vali nakumiyanjisa.” (Mateu 5:43, 44) Kutala lushimbi lwakwamba ngwavo ‘hungenunga vaka-kole jenu’ lwapwile lwamuMazu aKalunga tahi? Nduma, lushimbi kanelu lwapwile lwakutunga kaha kuli vatwamina vamukwitava luze vanangwilenga. Vatu kana vahombwanyishile Jishimbi jaKalunga jamwenemwene navishinganyeka vyavo vyautu. Yesu ahakwililenga Mazu aKalunga chakuzeneka woma kuchina navawapihisa navisemwa vyavatu vyakuhingama.—Mako 7:9-13.
15. Yesu ahakwilile ngachilihi Jishimbi jaKalunga vahone kujimona nge jajikalu kaha nawa mutu nahase kuyanda hakujikavangiza?
15 Vatwamina vamukwitava valingishile nawa Jishimbi jaKalunga jisoloke nge japwa jajikalu kaha nawa mutu nahase kuyanda hakujikavangiza. Omu tumbaji twaYesu vahelele tumitwe twatiliku hakuhita muwande, vaFwaliseu vamwe vavambile ngwavo vapwile nakuhokola lushimbi lwaSambata. Yesu azachishile chakutalilaho chamuVisoneka mangana ahakwile Mazu aKalunga kuchina navawamona mujila yakuhenga. Avalwezele chakutalilaho chimwe chatwama muVisoneka chaNdavichi navatu jenyi vaze valile mbolo kuweluka wazuvo yajila hakwivwa zala. Yesu asolwele nge vaze vaFwaliseu kavatachikijile kanawa mwaya muchima waYehova wakeke nakutetelako.—Mako 2:23-27.
16. Vyuma muka valingilenga vatwamina vamukwitava kutalisa kulushimbi lwaMose luze lwahanjikile hakulukulula mapwevo, kaha Yesu akwileko ngachilihi?
16 Vatwamina vamukwitava vatungile nawa jishimbi javo mangana vahombwanyise Jishimbi jaKalunga. Chakutalilaho, Jishimbi jetavishile lunga kulukulula puwenyi nge namono ‘ukalu umwe’ muli ikiye uze wanehelenga katombo mutanga. (Lushimbi lwamuchivali 24:1) Oloze vatwamina vamukwitava vamumakumbi aYesu vazachishilenga lushimbi kana nakwitavisa malunga valukululenga mapwevo javo hakala ukalu, numba vene nge pwevo nocho ndeho. a Yesu asolwele nge valumwinenga mazu vahwima aze vahanyine Mose. Ngachize, Yesu akindulwishile lushimbi lwaYehova lwakulivanga lwakumbata pwevo umwe kaha nakuvuluka ngwenyi ujila kaha ukiko watela kulingisa ulo ufwenga.—Mateu 19:3-12.
17. Uno vaka-Kulishitu makumbi ano vanahase kulondezeza ngachilihi Yesu hakuhakwila Mazu aKalunga?
17 Vaka-kukavangiza Kulishitu makumbi ano navakiko vafwila kuhakwila Mazu Ajila kuchina vatu navawahingika. Vatwamina vamukwitava veji kupopololanga Mbimbiliya hakwamba ngwavo jindongi jamuMazu aKalunga jize jahanjika hatwamiso yamwaza jaseka lyehi. Kaha nawa vatu mukwitava vali nakuhingika Mbimbiliya hakunangula vyuma vyamakuli nakuvivuluka ngwavo vyafuma muMbimbiliya. Twatokwa chikuma hakuhakwila muchano wamuMazu aKalunga. Chakutalilaho, tweji kusololanga hatoma nge Kalunga kapwa muTulunga vatatuko. (Lushimbi lwamuchivali 4:39) Oloze tweji kulinganga ngocho mukuzangama kaha nawa mujila yayivwovu nakavumbi.—WaPetulu 1, 3:15.
Kulumbununa Mazu aKalunga
18, 19. Vyakutalilaho muka vyasolola nge Yesu apwile nachinyingi chakulipwila chakulumbununa Mazu aKalunga?
18 Halwola vasonekele Visoneka VyachiHepeleu, Yesu apwile mwilu. Kaha atela evwile kuwaha chikuma hakwiza hano hamavu mangana azane mumulimo wakulumbununa Mazu aKalunga. Chakutalilaho, achishinganyekenu havyuma vyasolokele halikumbi lyakulipwila lize Yesu alihumanganyine natumbaji twenyi vavali mumukwakwa wakuya kuEmau hanyima yakusanguka chenyi. Shimbu kanda vatachikize ngwavo mutu vapwile nakuhanjika nenyi apwile Yesu, ava tumbaji valwezele mutu kana ngwavo vevwile ushona nakupihya chikuma hakufwa chaMwata wavo vazanga. Uno Yesu avakumbulwile ngachilihi? “Avalumbunwinyine vyuma vyosena vize vahanjika hali ikiye muVisoneka vyosena, kuputukila vene kuMazu aMose naMazu aVapolofweto vosena.” Uno ava tumbaji vevwile ngachilihi? Valihulishile ngwavo: “Uno katwapwanga nakwivwa hyangu kumichima yetuko omu apwanga nakuhanjika kuli etu mujila, nomu apwanga nakutulumbunwina Visoneka nyi?”—Luka 24:15-32.
19 Halikumbi lyolimwe, Yesu aliwanyine navaposetolo jenyi navatu veka vaze vapwile navo. Achitalenu havyuma avalingilile: “Asokolwele vishinganyeka vyavo vamone kanawa mwalumbunukilile Visoneka.” (Luka 24:45) Chikupu vene, lwola kana lwavanukishile nalwola lweka luze Yesu asokolwele vishinganganyeka vyatumbaji twenyi navatu veka. Kakavulu azachishilenga visoneka vize vyapwile vyawenyembo kuvatu nakuvilumbununa mujila yize yakafwilenga vaka-kumwivwilila vatachikize vyuma vyavihya vyamuMazu aKalunga nakuvalumbunukila.
20, 21. Yesu alumbunwine ngachilihi mazu ahanjikile Yehova kuli Mose hachiputa chakakahya?
20 Likumbi limwe Yesu apwile nakuhanjika nalizavu lyavaSatuse. VaSatuse vapwile hilizavu lyamukwitava chavaYuleya lize lyalikachilenga navapilishitu vavaYuleya, kaha kavafwelelele mukusanguka chavafuko. Ngocho Yesu avalwezele ngwenyi: “Hakuvuluka kusanguka chavafu, uno kanda mutangengaho lyehi mazu ahanjikile Kalunga kuli enu ngwenyi: ‘Ami yami Kalunga kaApalahama, Kalunga kaIsaka, Kalunga kaYakovako’ tahi? Ikiye kapwa Kalunga kavafuko, oloze wavava vavatonyi.” (Mateu 22:31, 32) Yesu azachishile chisoneka vatachikijile kanawa chize vasonekele kuli Mose uze vaSatuse vamwenenga kupwa wamulemu chikuma. Kutala munamono jino omu Yesu alumbunwinenga kanawa visoneka tahi?
21 Mose ashimutwilile naYehova hachiputa chakakahya kafwe mumwaka wa 1514 B.C.E. (Kulovoka 3:2, 6) Halwola kana mwahichile myaka 329 kufuma hakufwa chaApalahama, kaha kufuma hakufwa chaIsaka mwahichile myaka 224, kaha nawa kufuma hakufwa chaYakova mwahichile myaka 197. Oloze Yehova ambile ngwenyi: ‘Ami yami’ Kalunga kavo. Vaze vaSatuse vatachikijile ngwavo Yehova kapwa ngana mwakalunga wamakuli wavafu uze ayula lifuchi veji kuhanjikanga kaha muvishimo ngwavo kweji kuyanga vafu. Yesu ambile ngwenyi Yehova apwa Kalunga “wavava vavatonyi.” Uno echi chalumbunukila mulihi? Yesu akukulwile namazu amalemu ngwenyi: “Kuli Ikiye vosena vavatonyi.” (Luka 20:38) Vangamba jaYehova azanga vaze vafwa lyehi avalama muvishinganyeka vyenyi, kaha keshi kukavavulyamako. Hakuwana nge Yehova avuluka vaze vafwa ngwenyi vavatonyi, ngocho echi chasolola nge ajina chikupu kuvasangula. (Wavaka-Loma 4:16, 17) Eyi yapwile chikupu hijila yakukomwesa yakulumbunwinamo Mazu aKalunga. Kahechi chikiko chalingishile ‘mayongomena alikomokele.’—Mateu 22:33.
22, 23. (a) Tunahase kulondezeza ngachilihi Yesu hakulumbununa Mazu aKalunga? (b) Vyuma muka natushimutwila mukapetulu nakavangizaho?
22 Vaka-Kulishitu makumbi ano vatela kulondezeza jila Yesu alumbunwinyinengamo Mazu aKalunga. Enga, numba tuhu katwatwama nauhashi wakukomwesa ngana mwaYesuko, oloze tunahase kushimutwila navatu chisoneka chize vatachikiza lyehi nakuvalumbunwina vyuma vyahachisoneka kana vize pamo kavatachikizako. Chakutalilaho, pamo vatu tunakuhanjika navo vanazachisanga mazu akwamba ngwavo “Vajilile lijina lyove” namazu akwamba ngwavo “Wangana wove wize” omu vanalombonga mukuyoya chavo chosena, chakuzeneka kulinangula vyalijina lyaKalunga chipwe kutachikiza mwalumbunukila Wangana wenyi. (Mateu 6:9, 10, Luvale Bible 1970) Tweji kwivwanga kuwaha chikuma nge mutu mwatwitavisa tumulumbunwine kanawa muchano wamuMbimbiliya.
23 Kuhanjikanga Mazu aKalunga amuvisoneka, nakuwahakwila, nakuwalumbununa, yapwa hijila yayilemu chikuma yakulondezezelamo Yesu uze anangwilenga vatu muchano. Tutalenu jino hajijila jimwe jamwaza jize azachishilenga Yesu mangana akunyule vaka-kumwivwila hakuvambulila muchano wamuMbimbiliya.
a KaFwaliseu Josephus wamulikulukaji lyamyaka lyakulivanga uze alinangula vyakushikulu kaha nawa uze alukulwilenga mapwevo, ahanjikile ngwenyi mutu nahase kulukulula puwenyi “hakala ukalu, (kaha ukalu kana weji kusolokanga kumalunga vavavulu).”
