1-4. (a) Uno Yesu anangwile ngachilihi pwevo wakaSamaliya mujila yakuzangama, kaha vyuma muka vyafuminemo? (b) Vaposetolo jenyi vevwile ngachilihi?

 YESU navaposetolo jenyi vatambukile tando yayisuku. Vapwile nakufuma kuYuleya nakutalisa kunote mangana vayenga kuNgalileya. Jila yakavatu kufuma kuYuleya nakuya kuNgalileya yahichile muSamaliya, kaha tunda kana vayitambukilenga makumbi atatu. Jino omu likumbi lyahetele hamulungu, vahetele kwakamwihi nanganda yayindende yaSukale kaha vemanyine mangana vanoke.

² Omu vaposetolo jenyi vayile nakulanda vyakulya, Yesu asalile nakunoka halishima lize lyapwile kuweluka wanganda kana. Kaha kwejile pwevo nakuswita meya. Nge Yesu asakile, kachi amuliwile ou pwevo hakuwana nge “azeyele mwomwo yakutambuka ungeji.” (Yowano 4:6) Nge afwikile hameso enyi nakwechelela ou pwevo wakaSamaliya aliyile chakuzeneka kuhanjika nenyi, kachi nevi vyapihileho vene vyauchi. Nganomu twamonanga muKapetulu 4, ou pwevo atachikijile ngwenyi kala kaYuleya mwamuliula. Oloze Yesu aputukile kushimutwila nenyi.

³ Hakuputuka kushimutwila, Yesu azachishile chakutalilaho chize chapandamine kuvyuma atachikijile ou pwevo vize nawa apwile nakulinga halwola kana. Hakuwana nge ou pwevo ejile nakuswita meya, ngocho, Yesu ahanjikile nenyi vyameya akuhana kuyoya aze nawakumisa lipwila lyenyi lyakushipilitu. Ou pwevo avundumwine vihande vyavivulu vize vyatelele kwepula jipami. a Oloze Yesu  atwalileho lika kushimutwila nenyi vyuma ajinyine kumunangula mujila yakuzangama chakuzeneka kulipula nenyi jipami. Ashimutwilile nenyi hakulemesa chamuchano nahali Yehova Kalunga. Mazu ahanjikile Yesu akafwile vatu vavavulu chikuma mwomwo ou pwevo ayile nakulweza malunga vamunganda, ngocho navakiko vasakile kwivwilila kuli Yesu.—Yowano 4:3-42.

⁴ Uno omu vaposetolo vakindulukile, vevwile ngachilihi hakuwana Yesu ali nakwambulila ou pwevo wakaSamaliya? Chasoloka nge kavawahililileko. Valikomokelele hakumona Yesu ali nakuhanjika napwevo kana, kaha chasoloka nge kavahanjikile nayou pwevoko. Omu alingile ou pwevo nyimako, vaposetolo vaputukile kushinjila Yesu alyenga vyakulya vize vejile navyo. Oloze Yesu avalwezele ngwenyi: “Ami nguli nakulya chize munazeneka enu kutachikiza.” Valikomokelele, nakushinganyeka ngwavo pamo Yesu ali nakuvuluka kulya chivene. Kaha avalumbunwinyine ngwenyi: “Kulya chami shina kulinga mwaya muchima wayauze angutumine nakukumisa mulimo wenyi.” (Yowano 4:32, 34) Hano Yesu avanangwile ngwenyi mulimo azachilenga mukuyoya chenyi ukiko wapwile waulemu chikuma kuli ikiye kuhambakana kulya. Ngocho, asakile navakiko vaumonenga mwomumwe. Uno mulimo muka vene ou?

5. Mulimo muka waulemu azachilenga Yesu, kaha vyuma muka natushimutwila mukapetulu uno?

⁵ Lwola lumwe Yesu ambile ngwenyi: “Ngwatela kwambulula mujimbu wamwaza waWangana waKalunga . . . mwomwo vikiko vene vangutuminyine.” (Luka 4:43) Chikupu vene, Yesu vamutumine kwiza nakwambulula nakunangula mujimbu wamwaza waWangana waKalunga. b Navaka-kumukavangiza makumbi ano vakwechi mulimo woumwe. Ngocho nachipwa chachilemu kushimutwila havyuma vyalingishile Yesu ambulile vatu, navyuma ambulwilenga, najila amwenenengamo mulimo wenyi.

6, 7. Uno Yesu asaka ‘muka-kunangula wosena’ evwenga ngachilihi hakwambulila vatu mujimbu wamwaza? Hanenu chakutalilaho.

⁶ Tuchishimutwilenu omu Yesu amwenenga muchano anangwilenga, numba jino tushimutwile omu amwene vatu anangwilenga. Yesu azachishile chakutalilaho chamwenemwene mangana asolole omu evwilenga hakulweza vatu muchano amunangwile Yehova. Ambile ngwenyi: “Weshowo muka-kunangula vatu uze vanangula vyaWangana wamelu, nafwane nge mutu, mwenyazuvo uze eji kulovolanga vyuma vyavihya navyuma vyamwaka muzuvo yenyi yakulamina luheto.” (Mateu 13:52) Mwomwo ika mwenyazuvo vahanjika muchakutalilaho kanechi mwalowela vyuma kuluheto lwenyi?

⁷ Ou mwenyazuvo keshi nakufwila kutembesa vatu vyuma aheta ngana muze alingile Mwangana Hezekiya uze amwene jino vichila nangindu hanyimako. (Vamyangana 2, 20:13-20) Uno vyuma muka vyalingishile ou mwenyazuvo alovole vyuma kana? Achitalenu hachakutalilaho chino: Twambenga ngana ngwetu munatambukila mulongeshi uze mwazanga chikuma. Kaha himwasokolola muchisweko chenyi nakumbatamo mikanda yivali, umwe wamwaka chikuma, kaha ou ukwavo wauhya. Mikanda kana vamusonekeleleyo kuli ise, kaha umwe autambwile kunyima chikuma te achili wamundende, kaha ou ukwavo nautambula kalinwaha. Himwawahilila nakumilweza ngwenyi mikanda kana ayimona kupwa yayilemu chikuma kaha nawa ngwenyi vyuma vyatwamamo vinalumuna kuyoya chenyi, ngocho vinahase kumikafwa nayenu nawa. Echi nachisolola hatoma nge ou mulongeshi amona eyi mikanda kupwa yayilemu kaha nawa ayizanga. (Luka 6:45) Keshi nakumilwezayo mangana alivwimbe chipwe kusaka nganyoko, oloze ali nakusaka aminganyalise nakumikafwa mumone kulema chamikanda kana.

8. Mwomwo ika twatela kumona muchano tweji kulinangulanga muMazu aKalunga kupwa nge hiluheto?

⁸ Muka-kunangula Wamunene Yesu, nayikiye apwile namuchima woumwe wakulweza vatu muchano waKalunga. Kaha aumwene kupwa hiluheto lwandando yayinene. Auzangile chikuma kaha nawa afwilile kuulweza vatu. Asakile vaka-kumukavangiza vaze vapwile  “vaka-kunangula,” navakiko vevwenganga mwomumwe. Kutala omu mukiko tweji kwivwanga tahi? Kuli vyuma vyavivulu vyatela kutulingisa tuzange muchano tweji kulinangulanga muMazu aKalunga. Twamona muchano kupwa waulemu chikuma numba upwa wamwaka chipwe wauhya. Nge natuhanjikanga natwima vyuma atunangula Yehova nakutwalaho lika kuvizanga, kaha natukafwa vakwetu navakiko vazange vyuma kana, ngana muze alingile Yesu.

9. (a) Yesu amwenenga ngachilihi vatu vaze anangwilenga? (b) Tunahase kulondezeza ngachilihi Yesu kutalisa kujila amwenenengamo vatu?

⁹ Nganomu natushimutwila muChihanda 3, Yesu azangile nawa vatu anangwilenga. Upolofweto wahanjikile chimweza ngwawo Meshiya “mwakevwila keke vaka-kukalikiza navaka-kuhutwa.” (Samu 72:13) Chikupu vene, Yesu azakaminenga vatu. Atachikijile vilinga vyavo navyuma vashinganyekelenga. Kaha nawa atachikijile ukalu vahichilengamo navyuma vize vyavahoneselenga kulinangula muchano. (Mateu 11:28; 16:13; 23:13, 15) Chakutalilaho, achanukenu uze pwevo wakaSamaliya. Chakuzeneka kukakasana, evwile kuwaha chikuma hakumona Yesu mwamuhanjikisa. Yesu atachikijile navyuma vyakusweka alingilenga ou pwevo, ngocho echi chamulingishile etavila nge Yesu apwile kapolofweto, kaha ayile nakulwezako navatu veka. (Yowano 4:16-19, 39) Oloze vaka-kukavangiza Yesu vamakumbi ano kavatwama nauhashi wakutachikiza vili mumichima yavatu veji kwambulilangako. Chipwe ngocho, tunahase kuzakama vatu ngana muze alingile Yesu. Kaha tunahase kusolola nge twavazakama hakuhanjika vyuma vize vasaka navize navivakafwa mukuyoya chavo.

10, 11. (a) Vyuma muka ambulwilenga Yesu? (b) Mwomwo ika vatu vapwile nakusakiwa Wangana waKalunga?

¹⁰ Vyuma muka ambulwilenga Yesu? Nge namukekesa vyuma veji kunangulanga vatu mujichachi jajivulu javaze valivuluka kupwa vaka-kwimanyinako Yesu, munahase kukukulula ngwenu Yesu ambulwilenga kaha vyuma vize navikafwa vatu vawane mwakukumishila ukalu wamukuyoya. Nyi pamo munahase kumona nge asakile kwalumuna viyulo vyamapolitiki chipwe afwililile chikuma  kulilwila yivene kuhambakana kulwila vatu. Oloze nganomu twavulukanga hakavanga, Yesu ahanjikile hatoma ngwenyi: “Ngwatela kwambulula mujimbu wamwaza waWangana waKalunga.” Uno vyuma muka vyaliwezele mumulimo kanou?

¹¹ Anukenu ngwenu Yesu nayikiye mwapwile mwilu omu Satana asawile lijina lyaKalunga lyajila, nakufumbukila wata wenyi. Atela Yesu evwile kukola kumuchima hakumona Ise wakwoloka navamuvangijikila ngwavo apwa Muka-kuyula wamupi uze eji kuminanga vatu jenyi atenga vyuma vyamwaza. Atela chamuvijile kumuchima nawa omu vaAlama naEve vaze vatelelele kusema nakusulisa hamavu vetavilile makuli aSatana. Ou MwanaKalunga amwene ngwenyi vatu vosena vengilile mushili nakufwa mwomwo yakulikanga kana. (Wavaka-Loma 5:12) Oloze atela evwile kuwaha hakutachikiza ngwenyi likumbi limwe Ise mwakavatula vihande vyosena.

12, 13. Vyuma muka vize naukafumisako Wangana waKalunga, kaha Yesu ashindakanyine ngachilihi hachihande chaWangana waKalunga omu azachilenga mulimo wakwambulula?

¹² Uno chihande muka chachinene chize chasakiwile kukumisa? Lijina lyaYehova lyajila vatelelele kulijilika nakulifumisa katombo kosena kaze valihaka kuli Satana navatu jenyi. Hakuwana nge lijina lyaYehova lyamusolola kupwa muka-kuyula wakwoloka ngocho vatu vatelelele kutachikiza unjiho wakusolola chuma kana. Yesu atachikijile kanawa vihande kanevi kuhambakana kala mutu. Mukulomba chakutalilaho, Yesu anangwile vaka-kumukavangiza valombenga chatete vyakujilika lijina lyaIse, nakulomba nawa Wangana waIse wizenga, kaha nakulomba mwaya muchima waKalunga valingengamo hano hamavu. (Mateu 6:9, 10) Wangana waKalunga uze vayula kuli Kulishitu Yesu kalinwomu ufumiseko kaye kano kakapi kaSatana nakuhakwila chiyulo chaYehova chakwoloka haya myaka yosena.—Ndanyele 2:44.

¹³ Chihande chaWangana chikiko ambulwilenga chikuma Yesu mumulimo wenyi. Vyuma vyosena ahanjikilenga navize alingilenga vyalumbunwine kanawa omwo wapwa Wangana kana nomu naukatesamo vyuma ajina Yehova. Yesu kechelelele kala chuma chimutangule kuzata mulimo wenyi wakwambulula mujimbu wamwaza waWangana waKalungako. Numba tuhu mumakumbi  enyi mwapwilenga vikokojola vyavivulu vyamukuyoya navilinga vyakuhengesa chiyulo, oloze ahakile muchima kumulimo wenyi wakwambulula mujimbu. Uno kuhaka chikuma muchima kumulimo wakwambulula chalumbunwine nge Yesu apwile wakusalila, kaha nawa afutwishilenga vatu kumichima mwomwo ahanjikilenga vyuma vyovimwe tahi? Kwakusukusuku tahi!

14, 15. (a) Uno Yesu asolwele ngachilihi nge ‘ahambakanyine Solomone’? (b) Tunahase kulondezeza ngachilihi Yesu kutalisa kuvyuma natwambulila vatu?

¹⁴ Nganomu natumona muchihanda chino, Yesu anangwilenga vyuma vyakulisezaseza vize vyevwishilenga vatu kuwaha. Ahetelenga vatu kumichima. Echi cheji kutwanukisanga Mwangana Solomone uze asakwilenga mazu amwaza, akwoloka, amuchano mangana asoneke kanawa vyuma vize vamuhwiminyinyine kuli Yehova. (Muka-kwambulula 12:10) Yehova ahanyine ou mutu wakuhona kukupuka mwosena “kunangakana chachivulu” chize chamukafwile ahanjike vyuma vyavivulu kutalisa kutujila, nakuvaishi, nakumitondo, nakutunyama. Kaha vatu vafuminenga kuvihela vyakwakusuku nakwiza nakwivwilila kuvyuma mwahanjika Solomone. (Vamyangana 1, 4:29-34) Oloze Yesu ‘ahambakanyine Solomone.’ (Mateu 12:42) Apwile namangana akukangana, kaha nawa “nakunangakana chachivulu.” Omu Yesu anangwilenga vatu, azachishilenga chinyingi chakukunama chamuMazu aKalunga nachinyingi chakufuma kuvyuma vyakufwana nge tujila, natunyama, navaishi, navyuma vyaunjimi, najingonde, navyuma vyasolokelenga halwola kana, namijimbu yakushikulu, navyuma vyeka vyamukuyoya. Oloze Yesu kalitukwojwele hamangana apwile nawoko. Mujimbu ambulwilenga wapwile wawashi kwivwa. Echi chikiko chalingishilenga vatu vasake kumwivwilila.—Mako 12:37; Luka 19:48.

¹⁵ Vaka-Kulishitu makumbi ano veji kukavangizanga chakutalilaho chaYesu. Numba tuhu katwatwama namangana nachinyingi chakukangana ngana mwaYesuko, oloze tuvosena tukwechi chinyingi chamweseke kaha nawa twatachikiza vyuma vimwe vize twatela kuzachisa hakunangula vatu muchano wamuMazu aKalunga. Chakutalilaho, visemi hakulela vana vavo vanahase kuvalweza vyuma vanahichimo mangana vasolole omu Yehova azanga vana venyi.  Kaha veka vanahase kuzachisa vifwanyisa navyakutalilaho vyakumilimo, chipwe kushikola chipwe vyuma vatachikiza havatu navyuma vili nakusoloka mukaye oholyapwa. Kaha nawa, twatela kuzangama kuchina natuhungumuka nakwecha kwambulula mujimbu wamwaza waWangana waKalunga.—WaChimoteu 1, 4:16.

16, 17. (a) Yesu amwenenga ngachilihi mulimo wenyi wakwambulula? (b) Uno Yesu asolwele ngachilihi ngwenyi ahakile muchima kumulimo wakwambulula?

¹⁶ Yesu amwene mulimo wakwambulula kupwa hiluheto lwalulemu. Asakilenga kukafwa vatu vatachikize kanawa omu apwa Ise wamwilu, keshi nge muze vamulumbunwinenga vatu vaze vafwelelele mukunangula chautu namuvisemwako. Yesu azangile kukafwa vatu vapwenga nausoko wamwaza naYehova nakupwa nawa nalutalililo lwakukayoya haya myaka yosena. Asakilenga kulweza vatu mujimbu wamwaza uze nauvavendejeka nakuvalingisa vawahilile. Uno asolwele ngachilihi nge azakamine vatu? Talenu hajijila jino jitatu.

¹⁷ Chatete, Yesu ahakile chikuma muchima kumulimo wakwambulula mukuyoya chenyi chosena. Amwene mulimo wakuhanjika vyaWangana kupwa waulemu chikuma mukuyoya chenyi, kaha auhakile muchima. Echi chikiko chalingishile Yesu ashiwiseko chiyoyelo chenyi, nganomu twalinangulanga muKapetulu 5. Ahakilenga muchima kuvyuma vyavilemu chikuma kweseka namuze akafwilenga vakwavo. Kalilunjikilile vyuma vyavivulu vize vyatelelele kachi vimutangule hakuvifwetela, nakuvilama, nakuviwahisa chipwe kulanda vyeka mukuhita chalwolako. Ashiwishileko chiyoyelo chenyi mangana alihende kuvyuma vize navimutangula ahone kutesamo mulimo wenyi.—Mateu 6: 22; 8:20.

18. Mujijila muka Yesu asolwele nge ahundanganyine chikuma mulimo wenyi wakwambulula?

¹⁸ Chamuchivali, Yesu akilikichile chikuma mumulimo wenyi wakwambulula. Ahundanganyine nangolo jenyi josena hakuzata mulimo kana, kaha atambukilenga hamavu jikilomita jajivulu hakutondatonda vatu muPaleshitane mwosena mangana avambulile  mujimbu wamwaza. Avambulililenga hamembo avo, nakuvihela vyasanga, nahavisakano, nakuvihela vyeka. Avambulililenga nahalwola luze asakilenga kunoka, nakulya, nakunwa, chipwe halwola luze asakilenga kutwama kupenge namasepa jenyi azangile chikuma. Numba vene omu apwile hakamwihi nakufwa, atwalileho lika kwambulila vatu mujimbu wamwaza waWangana waKalunga.—Luka 23:39-43.

19, 20. Chakutalilaho muka ahanyine Yesu chakusolola nge twatela kuzata mulimo wakwambulula mukwanguhwa?

¹⁹ Chamuchitatu, Yesu azachile mulimo wakwambulula namuchima wakwanguhwa. Anukenu omu ashimutwilile nauze pwevo wakaSamaliya halishima lyakuweluka wanganda yaSukale. Chasoloka nge vaposetolo jaYesu kavatachikijile ngwavo mulimo wakwambulula mujimbu wamwaza vatelelele kuuzata mukwanguhwako. Ngocho Yesu avalwezele ngwenyi: “Uno enu kamweshi kwamba ngwenu kunasale tukweji vawana numbanyi mulimo wakwaha uputukeko nyi? Ivwenu! Nangwamba kuli enu ngwami: Andulenu meso enu mutale mande, kaha namumona ngwenu anatomasana lyehi, anatemo kwaha.”—Yowano 4:35.

²⁰ Yesu azachishile chakutalilaho kana mwomwo atachikijile ngonde vapwilemo. Chasoloka nge vapwile mukakweji waKishileve (November/December). Kulutwe kuchapwile tukweji vawana numba lwola lwakwaha mbale luhete, kafwe halwola lwaPaseka haNyisane 14. Ngocho, halwola kanelu vanjimi kavapwile nakushinganyeka vyakwaha mbuto javo mukwanguhwako mwomwo kuchapwile tukweji vavavulu. Nyi ngachilihi mulimo wakwaha vatu? Vatu vavavulu vapwile nalipwila lyakwivwilila kumujimbu nakulinangula mangana vapwenga tumbaji twaKulishitu, nakupwa nalutalililo lwavyuma vyamwaza vize avatulikila Yehova kulutwe. Chapwile kwijiva nge Yesu atalile mumande kana awa achifwanyisa nakumona ngwenyi jimbuto jinatomasana, kulumbununa nge jinahi kaha jili nakusakiwa kwaha. c Chikupu vene, lwola lwakwaha lwaheteleho, kaha mulimo kana wapwile nakusakiwa  kuuzata mukwanguhwa! Ngocho omu vatu vamunganda yimwe vasakile atwame lika navo, Yesu avakumbulwile ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.”—Luka 4:43.

21. Tunahase kulondezeza ngachilihi Yesu?

²¹ Tunahase kulondezeza Yesu mujijila josena jitatu tunashimutwila. Tunahase kuhaka chikuma muchima kumulimo wakwambulula mukuyoya chetu chosena. Numba tupwa natanga chipwe twazata milimo yakukaye, oloze tunahase kusolola ngwetu twahaka mulimo wakwambulula kulutwe mukuyoya chetu nge natuuzata lwola lwosena natwima ngana muze alingile Yesu. (Mateu 6:33; WaChimoteu 1, 5:8) Twatela kufwila kuhundangana mulimo kana, nakulisuula kuzachisa lwola lwetu, nangolo jetu navikumba vyetu hakuukundwiza. (Luka 13:24) Kaha nawa twatela kwanukanga ngwetu mulimo wetu uli nakusakiwa kuuzata mukwanguhwa. (WaChimoteu 2, 4:2) Twatela kufwila kwambulila vatu kala kweshokwo tuli.

22. Vyuma muka natushimutwila mukapetulu nakavangizaho?

²² Yesu asolwele nawa ngwenyi amwene mulimo wakwambulula kupwa waulemu hakulongesa kanawa vyuma mangana mulimo kana ukatwaleho lika nahanyima yakufwa chenyi. Alwezele vaka-kumukavangiza vatwaleho lika kuzata mulimo wakwambulula nakunangula vatu. Mulimo kana ukiko natushimutwila mukapetulu nakavangizaho.