1-3. (a) Uno njimi eji kulinganga ngachilihi nge mbuto jinavulu kaha keshi kuhasa kujaha ukawenyiko? (b) Ukalu muka amwene Yesu kuchivatuko chavula mu 33 C.E., kaha aukumishile ngachilihi?

 ACHISHINGANYEKENU haukalu eji kumonanga njimi. Chatete, eji kulimanga wande wenyi nakutumbamo mbuto. Kufumaho eji kuhundangananga nakuzakama mbuto jenyi nge jinasoko, kaha eji kuwahililanga chikuma hakujimona jili nakukola kanawa. Jino nge lwola lwakwaha lunahete, eji kunganyalanga chikuma mwomwo yakupwa nambuto jajivulu. Chipwe ngocho, eji kupwanga muukalu waunene chikuma wakuhona kwaha mbuto josena ukawenyi mwomwo jajivulu. Ngocho hakusaka kukumisa ukalu kana, eji kukambanga vatu mangana vamukafwe kwaha mbuto jenyi mwomwo lwola lwakwaha lweji kupwanga lwalundende.

² Kuchivatuko chavula mu 33 C.E., Yesu uze asangukile amwene ukalu woumwe. Akuvile mbuto jamuchano omu apwile nakuzata  mulimo wenyi wakwambulula. Jino lwola lwakwaha lwahetele, kaha mbuto nawa javulile chikuma. Vatu vamwaza michima vavavulu vasakiwile kuvakungulula mangana vapwenga tumbaji. (Yowano 4:35-38) Uno Yesu akumishile ngachilihi ukalu kana? Omu apwile hapili muNgalileya, halwola apwile kwakamwihi nakuya mwilu, ahanyine tumbaji twenyi mulimo wakuya nakutondatonda vaka-kuzata vavavulu. Avalwezele ngwenyi: “Shikaho yenunga mukanangule vatu vakumafuchi osena vakapwe tumbaji, mukavambapachise . . . Mukavanangule kulamanga vyuma vyosena vize ngunamilweze.”—Mateu 28:19, 20.

³ Mulimo kanou ukiko vatela kuzata vaka-kumukavangiza Kulishitu vamwenemwene. Tuchikekesenu jino havihula vino vitatu. Mwomwo ika Yesu ahanyinyine tumbaji twenyi mulimo wakutondatonda vaka-kuzata vavavulu? Uno avanangwile ngachilihi mwakutondela vaka-kuzata kana? Kaha mulimo kana wakwata ngachilihi nahali yetu?

4, 5. Mwomwo ika Yesu ahonenene kukumisa mulimo uze aputukile, kaha veya vatelelele kutwalaho kuzata mulimo kana omu ahilukile mwilu?

⁴ Omu Yesu aputukile mulimo wenyi mu 29 C.E., atachikijile ngwenyi mulimo kana, keshi kukaukumisa ukawenyiko. Hakuwana nge lwola lwalitulileko lwakuzata mulimo wenyi hano hamavu lwapwile lwalundende, ngocho kambulwilile kuvihela vyavivulu chipwe kwambulila vatu vavavulu mujimbu waWanganako. Chikupu vene, ambulilile kaha vaYuleya navatu vaze valumukile nakupwa vaYuleya vaze vapwile “mikoko vakujimbala vakuzuvo yaIsalele.” (Mateu 15:24) Chipwe ngocho, vaze “mikoko vakujimbala” valimwangile kuvihela vyakulisezaseza vyakwakusuku vyamuIsalele. Kutwala muze mujimbu wamwaza watelelele kuheta kwalenga kaye kwosena.—Mateu 13:38; 24:14.

⁵ Yesu atachikijile ngwenyi nge nafu, nakukapwa mulimo waunene chikuma. Alwezele vaposetolo jenyi vakushishika 11 ngwenyi: “Chamuchano vene nangwamba kuli enu ngwami, weshowo  mwangufwelela, mwazatanga nawa milimo ngweji kuzatanga ami. Mwazatanga milimo yakuhambakana hali eyi, mwomwo ami nguli nakuya kuli Tata.” (Yowano 14:12) Hakuwana nge ou MwanaKalunga apwile nakuhiluka mwilu, ngocho vaposetolo jenyi kuhakilako vene navatu vosena vaze navakapwa tumbaji kulutwe navakaswika kumulimo kanou wakwambulula nakunangula vatu vapwenga tumbaji. (Yowano 17:20) Yesu atachikijile ngwenyi vaka-kumukavangiza navakazata “milimo yakuhambakana” yize alingilenga ikiye. Tweji kulinganga ngocho mujijila jitatu.

6, 7. (a) Uno Yesu atwalile mulihi hakwamba ngwenyi, vaka-kumukavangiza navakazata milimo yakuhambakana yize alingilenga ikiye? (b) Natusolola ngachilihi ngwetu chapwile chakutamo Yesu kufwelela vaka-kumukavangiza ngwenyi navatesamo mulimo wakwambulula mujimbu wamwaza?

⁶ Chatete, vaka-kukavangiza Yesu navakambulwila kuvihela vyavivulu. Makumbi ano, mulimo wavo wakwambulula unahete kuvihela vyavivulu kuhambakana vize ambulwilile Yesu. Chamuchivali, navakambulila vatu vavavulu. Kalizavu kakandende kaze asele Yesu katohwele nakupwa liyongomena. (Vilinga 2:41; 4:4) Oholyapwa vanavulu nakuheta jino kujimiliyoni, kaha tumbaji vavahya vali nakuvambapachisa mwaka himwaka. Chamuchitatu, navakambulula hatando yayisuku kufuma vene halwola luze palanga nakulelo lino. Kaha munahichi jino myaka kafwe 2,000 kufuma halwola Yesu azachile mulimo kana hamyaka yitatu nachimbwa.

⁷ Yesu afwelelele chikuma vaka-kumukavangiza hakwamba ngwenyi, navakazata ‘milimo yakuhambakana yize alingilenga ikiye.’ Avahanyine mulimo uze amwene kupwa waulemu chikuma wakwambulula nakunangula vatu “mujimbu wamwaza waWangana waKalunga.” (Luka 4:43) Akunyukile chikupu ngwenyi navakazata mulimo kana mujila yakashishi. Uno vyuma muka natulinangulako makumbi ano? Nge natuzatanga mulimo wakwambulula natwima kaha nawa namuchima wetu wosena, kaha natusolola ngwetu tuli nakutesamo mazu aYesu akwamba ngwavo vaka-kumukavangiza navakazata milimo yayivulu. Echi chinapu hikutokwa chachinene chikuma.—Luka 13:24.

8, 9. Chakutalilaho muka ahanyine Yesu kutalisa kumulimo wakwambulula, kaha tunahase kumulondezeza ngachilihi hakuzata mulimo kana?

⁸ Yesu anangwile kanawa tumbaji twenyi mwakwambulwila. Chachinene chikumanyi avahanyine chakutalilaho chamwaza. (Luka 6:40) Mukapetulu nafumuho, twashimutwilanga omu Yesu amwenenga mulimo wakwambulula. Achitalenu hatumbaji vaze ayilenga navo hakwambulula. Vamwenenga omu ambulililenga vatu kukala vihela avawanyinenga vyakufwana nge kungenge yavijiva, nahajipili, namujinganda, nahavisakano, nakujizuvo. (Mateu 5:1, 2; Luka 5:1-3; 8:1; 19:5, 6) Kaha nawa vamumwene kupwa hisamalikita uze ahindukilenga muze pulundundu nakuputuka kuzata swi naufuku. Amwene mulimo wakwambulula kupwa waulemu. (Luka 21:37, 38; Yowano 5:17) Chakuzeneka kukakasana, vamwene ngwavo azachilenga mulimo kana mwomwo azangile chikuma vatu. Pamo vamwene nawa muchima wakeke apwile nawo. (Mako 6:34) Uno chakutalilaho chaYesu chakafwile ngachilihi tumbaji twenyi? Uno nge mwapwile yenu, kachi chakutalilaho chenyi chamikafwile ngachilihi?

⁹ Hakupwa tuvaka-kukavangiza Kulishitu, twafwila kumulondezeza hakuzata mulimo wetu. Ngocho, tweji kukilikitanga mangana ‘tuhane unjiho.’ (Vilinga 10:42) Tweji kutambukilanga vatu hamembwavo ngana muze alingilenga Yesu. (Vilinga 5:42) Tweji kwalumunangako vyuma twanoneka mukuyoya chetu nge chinahase, mangana tutambukile vatu halwola luze tunamono ngwetu vali hamembo avo. Kaha nawa tweji kutondatondanga vatu nakuvambulila mukuzangama kuvihela vyasanga vyakufwana nge mumikwakwa, nakuvihela vyakulihizumwina, nakuvitanda nakumilimo. Tweji kutwalangaho lika ‘kuzata nangolo nakulihakaho chikuma’ mumulimo wakwambulula mwomwo twaumona kupwa waulemu. (WaChimoteu 1, 4:10) Hakuwana nge twazanga chikuma vatu, ngocho tweji kufwilanga kuwana jijila jakuvambulila kweshoko vali, kaha nawa hakala lwola natuvawana.—Wavaka-Tesolonyika 1, 2:8.

10-12. Vyuma muka vyavilemu vize Yesu anangwile tumbaji twenyi shimbu kanda avatume kuya nakwambulula?

¹⁰ Jila yikwavo Yesu anangwililemo tumbaji twenyi shina yakuvahana  jindongi jamwakuzachila kanawa mulimo wakwambulula. Shimbu kanda Yesu atume vaposetolo 12 navaze tumbaji 70 vayenga nakwambulula, atwamine navo hamavu nakuvanangula mwakwambulwila. (Mateu 10:1-15; Luka 10:1-12) Vyuma avanangwile vyavakafwile chikuma, mwomwo mukanda waLuka 10:17 wahanjika ngwawo: “Vaze 70 vahilukile nakuwahilila.” Numba tuhu chiyoyelo chatumbaji tweji chinalihandununa nechi chetu oloze tunahase kulinangulako vishina vyavilemu. Tushimutwilenu jino jindongi jivali hajindongi jize avahanyine.

¹¹ Yesu anangwile tumbaji twenyi vafwelelenga Yehova. “Kanda kumbata ulu, chipwe palata, chipwe unengu muvikapa vyenu vyajimbongoko, chipwe lipakumuna lyavyakulya haungeji wenu, chipwe uvwalo uvali, chipwe mendelo, chipwe mukomboko, mwomwo muka-kuzata atela kumuhana kulya chenyi.” (Mateu 10:9, 10) Halwola kana, vaka-kutambuka maungeji vambachilenga vikwama vyajimbongo, namapakumuna akumbachila vyakulya, namendelo eka akuhakila kuli aze vavwalilenga. a Hakulweza tumbaji twenyi ngwenyi kanda navalizakamina havyuma kanako, mujila yikwavo Yesu apwile nakuvalweza ngwenyi: “Fwelelenu chikuma Yehova mwomwo mwamihana vyuma vyosena namusaka.” Chikupu vene, Yehova avazakamine hakulingisa vatu vaze vetavilile mujimbu wamwaza vavazumbule, hakuwana nge kuzumbula vangeji chapwile hichisemwa chavatu muIsalele.—Luka 22:35.

 ¹² Yesu anangwile nawa tumbaji twenyi valihende kuvyuma vyamokomoko vize navivatangula. Ambile ngwenyi: “Kanda namulimeneka namutu mujilako.” (Luka 10:4) Kutala Yesu avalwezele vapwenga nakaliu nakuhona chisambo tahi? Nduma, keshi mukikoko. Kushikulu, vatu kavakuminyinenga hakulimeneka mumavoko kahako. Oloze valimenekelenga mujijila jakulisezaseza nakuta mijimbu yayisuku. Muka-kulinangula Mbimbiliya umwe asonekele ngwenyi: “Vaka-musamuko kavalimenekelenga nganomu tweji kulimenekanga etu makumbi ano hakufukama chipwe kumeneka mutu mulivokoko, oloze vakiko valipakachilenga mutusamba, nakunongama, nakulyalanga hamavu, chipwe vene kuta mujimbu wausuku. Kulimeneka kana chambachilenga lwola lwalusuku chikuma.” Ngocho, hakulweza tumbaji twenyi vahonenga kulimeneka navatu mujila kaneyi yachisemwa, chapwile kwijiva nge Yesu apwile nakuvalweza ngwenyi: “Mwatela kuzachisa lwola lwenu kanawa mwomwo mwatela kuzata mulimo wakwambulula mukwanguhwa.” b

13. Mujijila muka tunahase kusolola ngwetu tuli nakukavangiza jindongi jize Yesu ahanyine tumbaji twenyi vamulikulukaji lyamyaka lyakulivanga?

¹³ Twatela kukavangiza jindongi jize Yesu ahanyine tumbaji twenyi mulikulukaji lyamyaka lyakulivanga. Hakuzata mulimo wetu wakwambulula, tweji kupendaminanga chikuma hali Yehova. (Vishimo 3:5, 6) Twatachikiza ngwetu nge ‘natutondanga lika chatete Wangana,’ kaha katweshi kukahona kupwa navyuma vyasakiwa mukuyoya chetuko. (Mateu 6:33) Vaka-kwambulula Wangana vashimbu yosena vamukaye kosena vanahase kwitavila chikupu ngwavo Yehova keshi kusuvilila vatu jenyi numba vene mulwola lwalukaluko. (Samu 37:25) Kaha nawa twatela kulihenda kuvyuma vize vinahase kututangula. Vyuma vyamuno mukaye vinahase  kutuhungumwisa nge katwazangamineko. (Luka 21:34-36) Oloze luno keshi hilwola lwakwechelela vyuma kana vitutanguleko. Hakuwana nge kuyoya chavatu chili muponde, ngocho twatela kwambulila vatu mukwanguhwa. (Wavaka-Loma 10:13-15) Kupwa namuchima wakwanguhwa nachitukafwa tulihende kuvyuma vize vinahase kututangula nakutwenyekela lwola nangolo, jize twatela kuzachisa kumulimo wakwambulula. Anukenu ngwenu lwola lunasaleko lunakehe lyehi kaha nawa mulimo wakwaha unatoho.—Mateu 9:37, 38.

14. Vyuma muka vyasolola nge mulimo uze vasoneka hali Mateu 28:18-20 wapwa wavaka-kukavangiza Kulishitu vosena? (Talenu na wa kwinyikila chamwishi.)

¹⁴ Yesu uze vasangwile kuvafu ahanyine vaka-kumukavangiza mulimo waulemu chikuma hakwamba ngwenyi, ‘Yenunga, kanangulenu vatu vapwenga tumbaji.’ Hakuhanjika awa mazu, Yesu kapwile nakulweza kaha vaze tumbaji apwile navo hapili muNgalileyako. c Mulimo avahanyine wapwile wakwambulila “vatu vakumafuchi osena.” Kaha nautwalaho lika “palanga nakuchikukulwishi chakatwamino kamyaka yino.” Ngocho, mulimo kanou wapwa wavaka-kukavangiza Kulishitu vosena kuhakilako vene nayetu makumbi ano. Tuchishimutwilenu hamazu aYesu vasoneka hali Mateu 28:18-20.

15. Mwomwo ika twatela kwononokela lushimbi lwaYesu lwakunangula vatu vapwenga tumbaji?

¹⁵ Shimbu kanda Yesu ahane tumbaji twenyi mulimo kanou, ahanjikile ngwenyi: “Wata wosena wamwilu nahamavu vananguhanewo lyehi.” (Vesi 18) Uno chikupu Yesu atwama nawata wosenou tahi? Eyo, atwama nawo! Apwa kangelo wakulitulaho uze eji kuhananga jindongi mayongomena avangelo. (Wavaka-Tesolonyika 1, 4:16; Kusoloka 12:7) Atwama nawata hali  vaka-kumukavangiza vosena hamavu, mwomwo apwa ‘mutwe wachikungulwilo.’ (Wavaka-Efwesu 5:23) Kufuma vene mu 1914, Yesu nayulunga mwilu mwaMwangana wauMeshiya. (Kusoloka 11:15) Atwama nawa nangolo jakusangula vafu. (Yowano 5:26-28) Hakuwana nge Yesu avangilile kuhanjika hangolo jenyi atwama najo, ngocho mazu ahanjikile muvesi 19 na 20 apwile hilushimbi keshi nge himazu aze vatelelele kushinganyekaho kahako. Twatela kwononoka mazu aYesu mwomwo ngolo jenyi kajapwa jakulihana yiveneko, oloze jakumuhana kuli Kalunga.—Wavaka-Kolinde 1, 15:27.

16. Uno Yesu atulweza tulinge vyuma muka hakwamba ngwenyi “yenunga,” kaha tunahase kutesamo ngachilihi mulimo kana?

¹⁶ Yesu alumbunwine jino omu wapwa mulimo wakwambulula hakwamba ngwenyi: “Yenunga.” (Vesi 19) Ngocho, atulweza tuzate nangolo mangana twambulule mujimbu waWangana kuvatu. Tunahase kuzachisa jijila jakulisezaseza hakutesamo mulimo kanou. Kwambulwila kuzuvo hizuvo yapwa hijila yamwaza chikuma yakuwanyinamo vatu. (Vilinga 20:20) Kaha nawa tweji kufwilanga kwambulila vatu mukutulukila hakushimutwila navo mujimbu wamwaza nge tuli nakulinga vyuma vyeka vyamukuyoya. Jijila tweji kwambulwilangamo jinahase kulihandununa kweseka nachiyoyelo chavatu navyuma vasaka. Chipwe ngocho, chuma chachinene tweji kulinganga shina echi: Tweji ‘kuyanga’ nakutonda vaze vatela.—Mateu 10:11.

17. Uno tweji ‘kunangulanga ngachilihi vatu vapwenga tumbaji’?

¹⁷ Kufumaho Yesu alumbunwine chuma chikwavo twatela kulinga hakuzata mulimo kanou hakwamba ngwenyi, kanangulenu “vatu vakumafuchi osena vakapwe tumbaji.” (Vesi 19) Uno tweji ‘kunangulanga ngachilihi vatu vapwenga tumbaji’? Kambaji apwa muka-kulilongesa chipwe ngwetu muka-kulinangula. Chipwe ngocho, kunangula vatu kupwa tumbaji kachalumbununa kaha kunangula vatu chinyingiko. Chuma tweji kufwilanga hakunangula vatu Mbimbiliya shina kuvakafwa valumuke nakupwa vaka-kukavangiza Kulishitu. Tweji kufwilanga kushindakanya hachakutalilaho chaYesu mangana vatu tuli nakunangula vapendamine hali ikiye hakupwa Muka-kuvanangula kaha nawa Chakutalilaho chavo. Kulumbununa nge vatela kuyoya ngana muze ayoyelenga ikiye nakuzata nawa mulimo uze azachilenga.—Yowano 13:15.

18. Mwomwo ika lumbapachiso lwapwila lwalulemu chikuma kuli kambaji?

 ¹⁸ Chuma chikwavo chachilemu chapandama kumulimo kanou shina chize avulukile Yesu ngwenyi: “Mukavambapachise mulijina lyaTata, neli lyaMwana, neli lyashipilitu yajila.” (Vesi 19) Lumbapachiso lwapwa hichuma chachilemu kuli kambaji, mwomwo chapwa hichinjikizo chakumusolola nge nalihane kuli Kalunga namuchima wenyi wosena. Ngocho, lumbapachiso lwapwa lwalulemu chikuma mwomwo hakiko hapendamina kuyovoka chamutu. (WaPetulu 1, 3:21) Chikupu vene, nge kambaji wakumbapachisa mwatwalaho lika kuzachila Yehova, kaha nahase kukalivwisa kuwaha vyuma vyamwaza vyakwilila mukaye kakahya kaze kali nakwiza kulutwe. Kutala mwakafwaho lyehi mutu apwenga kambaji kaKulishitu wakumbapachisa tahi? Kuzata mulimo wakwambulula hichuma chimwe chize cheji kutukafwanga tupwenga vakuwahilila.—WaYowano 3, 4.

19. Vyuma muka tweji kunangulanga vatu vavahya, kaha mwomwo ika twatela kutwalaho lika kuvanangula nahanyima yakuvambapachisa?

¹⁹ Yesu alumbunwine chuma chikwavo chapandama kumulimo kanou hakwamba ngwenyi: “Mukavanangule kulamanga vyuma vyosena vize ngunamilweze.” (Vesi 20) Tweji kunangulanga vatu vavahya vakavangizenga jishimbi jaYesu, kuhakilako vene nalushimbi lwakuzanga Kalunga, nalwakuzanga vakwavo vatu, nelu lwakunangula vatu vapwenga tumbaji. (Mateu 22:37-39) Tweji kuvanangulanga chikoki chikoki valumbunwinenga vakwavo muchano  wamuMbimbiliya nakuhakwila lufwelelo lwavo. Nge vanatemo kwazana hamwe nachikungulwilo mumulimo wakwambulula, kaha tweji kuzatanga navo hamwe mangana tuvanangule mwakuzachila kanawa mulimo kanou. Tweji kutwalangaho lika kunangula tumbaji vavahya nahanyima yakuvambapachisa. Vandumbwetu vaze vanambapachisa kalinwomu vanahase kusaka kulinangula vyuma vyeka mangana vatachikize mwakuhonesela ukalu watwama hakukavangiza Kulishitu.—Luka 9:23, 24.

20, 21. (a) Mwomwo ika katwatela kwivwa womako hakuzata mulimo atuhana Yesu? (b) Mwomwo ika natwambila ngwetu luno keshi hilwola lwakuzelendenda mumulimo wakwambululako, kaha twatela kufwila kulinga vyuma muka?

²⁰ Mazu amakumishilo ahanjikile Yesu kupandama kumulimo wakwambulula eji kutukolezezanga chikupu. Ambile ngwenyi: “Kaha ami nangupwanga nayenu makumbi osena palanga nakuchikukulwishi chakatwamino kamyaka yino.” (Mateu 28:20) Yesu atachikiza ngwenyi mulimo kana wapwa waulemu chikuma. Kaha nawa ejiva ngwenyi lwola lumwe kwazana mumulimo kana cheji kulingisanga vatufumbukile kuli vaka-kole. (Luka 21:12) Oloze katwatela kwivwa womako. Twamina yetu keshi kutwechelela tuzate ou mulimo ukawetu chipwe chakuzeneka kutukafwako. Tweji kwivwanga kuwaha kutachikiza ngwetu Mutu uze akwechi “wata wosena wamwilu nahamavu” ali nakutukafwa omu tuli nakuzata mulimo kanou.

²¹ Yesu afwelelesele tumbaji twenyi ngwenyi mwapwanga navo myaka yosena omu navazatanga mulimo wavo wakwambulula “palanga nakuchikukulwishi chakatwamino kamyaka yino.” Ngocho, twatela kutwalaho lika kuzata mulimo atuhana Yesu palanga nomu nakakakuma kano kaye. Shikaho, luno keshi hilwola lwakuzelendendako. Mulimo wakushipilitu wakwaha uli nakuzovoloka. Mayongomena avatu vamichima yamwaza vali nakuvakungulula. Hakupwa tuvaka-kukavangiza Kulishitu, tufwilenu kukilikita mangana tutesemo mulimo kanou waulemu vatuhana. Kaha nawa tufwilenu kuzachisa lwola lwetu, nangolo jetu navikumba vyetu hakukavangiza lushimbi lwaYesu lwakwamba ngwenyi: “Yenunga mukanangule vatu . . . vakapwe tumbaji.”