1-3. (a) Tumbaji vaze vatambukilenga naYesu vapwile nakutokwa muka, kaha Yesu avakafwilenga ngachilihi chipwenga chachashi kwanuka vyuma avanangwilenga? (b) Mwomwo ika vyakutalilaho vyamwaza vyapwila vyavyashi kwanuka?

 TUMBAJI vaze vatambukilenga naYesu vapwile nakutokwa chachinene mwomwo vapwile nakuvanangulanga kuli Muka-kunangula Wamunene. Vapwilenga nakumwivwa omu alumbunwinenga Mazu aKalunga nakuvanangula muchano uze wavahetelenga kumichima. Halwola kana, vyuma ahanjikilenga valingilenga vyakulamina kaha mumitwe namumichima yavo mwomwo lwola lwakusoneka vyuma ahanjikilenga lwapwile kanda luhete. a Chipwe ngocho, Yesu avanangwilenga mujila yize yavakafwilenga vahase kwanuka vyuma avanangwilenga. Mujila muka? Azachishilenga jijila jakunangwilamo jamwaza jakufwana nge kuzachisa vishimo chipwe vifwanyisa.

² Chikupu vene, vatu kaveshi kuvulyama washi vyakutalilaho vyavyashiko. Muka-kusoneka umwe ahanjikile ngwenyi “vyakutalilaho vyeji kulingisanga vatu vevwishise vyuma vali nakuhanjika nakuhasa kuvihaka muvishinganyeka kwijiva nge vali nakuvimona chikupu.” Hakuwana nge kumona vyuma cheji kutukafwanga twivwishise chikuma, ngocho navyakutalilaho nawa vyeji kulingisanga vyuma vyavikalu vitulumbunukile washiwashi. Vyakutalilaho vyeji kulumbununanga vyuma mujila yamwaza nakutunangula vishina vize tunahase kwanukanga lwola lwosena.

³ Hano hamavu kanda hachipwengaho lyehi muka-kunangula uze atachikijile kanawa mwakuzachishila vyakutalilaho ngana mwaYesu Kulishituko. Vyakutalilaho azachishilenga Yesu tweji kuvyanukanga  nakulelo lino. Mwomwo ika Yesu azachishilenga chikuma vyakutalilaho hakunangula? Vyuma muka vyalingishile vyakutalilaho vyenyi vikunyule vatu? Tunahase kulinangula ngachilihi mwakuzachishila kanawa vyakutalilaho?

4, 5. Mwomwo ika Yesu azachishililenga vyakutalilaho?

⁴ Mbimbiliya yatulweza vyuma vyavilemu vivali vize vyalingishile Yesu azachise vyakutalilaho. Chatete, alingilenga ngocho mangana atesemo upolofweto. Hali Mateu 13:34, 35 tweji kutangangaho ngwavo: ‘Yesu ahanjikilenga navifwanyisa kumayongomena. Chikupu vene, kahanjikilenga kuli vakiko chakuzeneka chifwanyisako, mangana mazu vahanjikile kuhichila muli kapolofweto atesemo, akwamba ngwavo: “Nangulokolola mukanwa kami nakuhanjika vifwanyisa.”’ Kapolofweto vavuluka hano kuli Mateu ikiye asonekele Samu 78:2. Ou muka-kwimba jisamu vamuhwiminyine nashipilitu yaKalunga mangana asoneke mazu kana omu kuchapwile myaka yayivulu shimbu kanda Yesu asemuke. Achitalenu omwo mwalumbunukila mazu kana. Yehova avulukilile chimweza ngwenyi, Meshiya mwakanangulanga kuzachisa vishimo chipwe vifwanyisa. Shikaho chasoloka nge Yehova amona kunangula chakuzachisa vifwanyisa kupwa chachilemu.

⁵ Chamuchivali, Yesu alumbunwine ngwenyi azachishilenga vyakutalilaho mangana vatu ‘vakumbumbula michima’ vasoloke hatoma. (Mateu 13:10-15; Isaya 6:9, 10) Uno vyakutalilaho vyenyi vyasolwelenga ngachilihi hatoma vishinganyeka vyavatu? Shimbu jimwe, Yesu asakilenga vaka-kumwivwilila vamuhulise mangana avalweze mwalumbunukila vyuma ahanjikilenga. Vatu vakulinyisa vamuhulishilenga avalumbunwine, oloze vatu vakulivwimba chipwe vaka-kanengauli kavasakilenga kumuhulisako. (Mateu 13:36; Mako 4:34) Ngocho vyakutalilaho vyaYesu vyasolwelenga muchano hatoma kuvatu vaze vasakilenga kuutachikiza, kaha nawa vyaswekelenga muchano kuli vaze vapwile namichima yakulivwimba.

6. Vifwanyisa azachishilenga Yesu vyazachile mulimo muka waulemu?

⁶ Vifwanyisa azachishile Yesu vyazachilenga nawa mulimo weka waulemu. Vyalingishilenga vatu vevwile chipepa vyuma  avanangwilenga nakumwivwilila. Vyakafwilenga nawa vatu vevwishise vyuma avanangwilenga. Nganomu twevwanga kumaputukilo akapetulu uno, vifwanyisa azachishilenga Yesu vyakafwile vaka-kumwivwilila vanuke vyuma ahanjikilenga. Chihande ChahaPili chize vasoneka hali Mateu 5:3–7:27, chapwa chakulipwila mwomwo chatwama navifwanyisa vyavivulu vize azachishile Yesu. Kweseka nakulava chimwe, echi chihande chahapili chatwama navifwanyisa vyakuhambakana 50. Hakusaka mutachikize kanawa chishina kanechi, anukenu ngwenu echi chihande munahase kuchitanga kafwe muminyutu 20 kaha. Echi chalumbununa nge Yesu ahanjikilenga chifwanyisa chimwe kafwe mujisekondi 20. Chikupu vene, Yesu amwene nganyo yatwama hakuzachisa vifwanyisa.

7. Mwomwo ika twatela kuzachishilanga vyakutalilaho ngana muze alingilenga Yesu?

⁷ Hakupwa tuvaka-kukavangiza Kulishitu, twatela kumulondezeza hakuzachisa jijila anangwililengamo jakufwana nge kuzachisa vyakutalilaho. Vyakutalilaho vyamwenemwene vinahase kulingisa vatu vevwile kuwaha vyuma natuvanangula nganomu mungwa weji kuyemesanga yifwo. Nge natusakulanga kanawa vyakutalilaho natuzachisa, kaha vatu navatachikiza washi muchano. Tuchikekesenu jino havyuma vize vyalingishile vyakutalilaho vyaYesu vihete vatu kumichima. Kufumaho natumona jino omu nayetu nawa tunahase kuzachisa vyakutalilaho mujila yamwaza nge tuli nakunangula vatu.

8, 9. Yesu azachishilenga ngachilihi vyakutalilaho vyakwesekesa chuma chimwe kuchikwavo, kaha mwomwo ika vyakutalilaho kana vyapwila vyamwaza?

⁸ Omu Yesu anangwilenga vatu, kakavulu azachishilenga vyakutalilaho vyavyashi vyakwesekesa chuma chimwe kuchikwavo. Awa mazu amashi akafwilenga vatu vahumikize vyuma avanangwilenga nakulingisa muchano uvalumbunukile. Chakutalilaho, omu akafwile tumbaji twenyi vahonenga kulizakamina havyuma vyamukuyoya, ahanjikile ‘hatujila vahelu najitemo jamuchipapa.’ Tujila kaveshi kukuva nakwahako, kaha jitemo nawa kajeshi kutunga mahina chipwe kuzatako. Oloze Kalunga eji kuzakamanga tujila najitemo. Chishina asakile vatachikize shina chino, nge Kalunga eji kuzakamanga tujila najitemo, kaha chikupu vene mwazakama vatu vaze veji ‘kutondanga lika chatete Wangana.’—Mateu 6:26, 28-33.

 ⁹ Yesu azachishilenga nawa vyakutalilaho vyakukunyula hakwesekesa vyuma vivali kwijiva nge hichuma chimwe kaha. Vyakutalilaho kana vyapwile vyavyashi. Lwola lumwe alwezele tumbaji twenyi ngwenyi: “Enu mwapwa mumumunyi wakaye.” Tumbaji vatachikijile mwalumbunukilile chifwanyisa kana. Vatachikijile ngwavo hanjikiso navilinga vyavo vinahase kulingisa muchano umunyike nakukafwa jino vatu valise Kalunga. (Mateu 5:14-16) Achitalenu havyakutalilaho vikwavo azachishile Yesu. Ambile ngwenyi: “Enu mwapwa mumungwa wahamavu,” kaha nawa ngwenyi, “Ami yami muvinyo, enu mumitango.” (Mateu 5:13; Yowano 15:5) Vyakutalilaho kanevi vyeji kuhetanga vatu kumichima mwomwo vyapwa vyavyashi kwivwishisa.

10. Vyakutalilaho muka vyasolola omu munahase kuzachisa vifwanyisa nge muli nakunangula vatu?

¹⁰ Munahase kuzachisa ngachilihi vifwanyisa nge muli nakunangula vatu? Kamwatela kuzachisa vyakutalilaho vyavikalu vyamijimbu yayisukuko, oloze esekenu kuzachisa vyavyashi. Achishinganyekenu muli nakushimutwila hachihande chakusanguka chavafu, kaha muli nakusaka mulumbunune ngwenu kusangula vafu kachapwa chachikalu kuli Yehovako. Chakutalilaho muka munahase kuzachisa? Mbimbiliya yafwanyisa kufwa kukusavala tulo. Munahase kwamba ngwenu, “Chinahase kupwa chachashi Kalunga kusangula mutu ngana muze chapwa chachashi kuhindula mutu uze ali mutulo.” (Yowano 11:11-14) Chakutalilaho muka munahase kuzachisa nge muli nakusaka kulumbununa ngwenu vana vasaka kuvazanga numba vakole kanawa? Mbimbiliya yazachisa chakutalilaho chino: Vana vanapu “nge vana vamilive.” (Samu 128:3) Munahase kwamba ngwenu, “Mwana asakiwa kumuzanga ngana muze mutondo wasakiwa musana nameya.” Nge chakutalilaho chenu nachipwa chachashi, kaha vaka-kumivwilila navevwishisa chishina muli nakuhanjika.

11. Vulukenu vyakutalilaho vyasolola nge Yesu azachishilenga vifwanyisa vyavyuma vize amwenenga omu apwile nakukola muNgalileya.

¹¹ Yesu apwile kuluwa mukuzachisa vyakutalilaho vize vyapandamine kukuyoya chavatu. Vyakutalilaho vyenyi vyavivulu vyazamine havyuma amwenenga muNgalileya ayoyelelenga.  Achishinganyekenu hachiyoyelo chenyi omu apwile kanyike. Mapapa kangahi amwenenga naye ali nakucheka unga, chipwe kutunga chimbalwila, chipwe kumunyika linongo, chipwe kukomba muzuvo? (Mateu 13:33; 24:41; Luka 15:8) Mapapa kangahi amwene vaka-kuta ishi vali nakufuta moji avo muKalungalwiji waNgalileya? (Mateu 13:47) Mapapa kangahi amwenenga vanyike vali nakuhemena kuvilanjilo? (Mateu 11:16) Chakuzeneka kukakasana, Yesu amwenenga vyuma vyeka vyavivulu vize azachishilenga muvyakutalilaho vyenyi. Vyuma kana shina kukuva mbuto, naviwanyino vyakulimbata, namande aze anatemo kwaha.—Mateu 13:3-8; 25:1-12; Mako 4:26-29.

12, 13. Mwomwo ika Yesu avulukilile jila “[ya]kufuma kuYelusalema nakushikumuka kuYeliko” hakusaka kushindakanya chishina chenyi muchakutalilaho chakaSamaliya?

¹² Muvyakutalilaho vyenyi, Yesu ahanjikilenga havyuma vize vatachikijile vaka-kumwivwilila. Chakutalilaho, aputukile kuhanjika chakutalilaho chakaSamaliya ngwenyi: “Mutu umwe apwile nakufuma kuYelusalema nakushikumuka kuYeliko, kaha alitulukile navihwanga vaze vapukwile vyuma vyenyi nakumuveta, kaha vayile, vamusezele nalezumuka.” (Luka 10:30) Hakusaka kulumbununa kanawa chishina, Yesu azachishile jila “[ya]kufuma kuYelusalema nakushikumuka kuYeliko.” Omu Yesu ahanjikile echi chakutalilaho, apwile muYuleya kwakamwihi naYelusalema, ngachize vaka-kumwivwilila vejivile jila apwile nakuhanjika. Jila kana yapwile yayipi, chikumanyi kumutu uze atambukilenga ukawenyi mwomwo yahichile mujipili jamalolwa, kaha chapwile chachashi kuli veji kuswama chakuzeneka kuvamona.

¹³ Yesu avulukile nawa vyuma vikwavo omu ahanjikile vyajila kana. Kweseka nachakutalilaho kanechi, kapilishitu umwe ikiye apwile watete kuhitamo, kaha hakavangijile kaLevi, oloze naumwe wauchi emanyine nakukafwa uze kaSamaliya. (Luka 10:31, 32) Vapilishitu vazachililenga hatembele muYelusalema, kaha vaLevi vakiko apwile vaka-kuvakafwako. Vapilishitu navaLevi vavavulu vayilenga nakunokela kuYeliko halwola luze vahonenenga kuzachila hatembele mwomwo hapwile kaha tunda yajikilomita 23 kufuma kuYelusalema. Ngocho, kakavulu vahichilenga mujila kaneyi. Nyingililenu nawa ngwenu Yesu ahanjikile ngwenyi uze kaSamaliya apwile ‘nakushikumuka kuYeliko kufuma kuYelusalema.’ Echi kachapwile chaungeji  kuli vaka-kumwivwililako mwomwo vatachikijile ngwavo Yelusalema yapwilile kwakulunduka kuhambakana Yeliko. Ngachize, mutu ‘hakufuma kuYelusalema,’ apwilenga “nakushikumuka.” b Echi chasolola nge Yesu ashinganyekelenga havatu vapwile nakumwivwilila.

14. Hakuzachisa vyakutalilaho, tunahase kusolola ngachilihi nge tuli nakushinganyeka havatu vali nakutwivwilila?

¹⁴ Hakuzachisa vyakutalilaho, twatela kushinganyeka havatu vali nakutwivwilila. Vyuma muka twatela kushinganyekaho mangana vyakutalilaho natuzachisa vikafwe vatu vali nakutwivwilila? Pamo tunahase kushinganyeka hamyaka yakusemuka yavatu vali nakutwivwilila, nahachisemwa chavo chipwe omu yapwa tanga yavo, namilimo vazata. Chakutalilaho, nge namuzachisa chakutalilaho chaunjimi, kaha ijivenu ngwenu navachivwishisa kaha kuvatu vatwama mungalila yize veji kulimanga, oloze vatu vamumbaka kaveshi kuchivwishisako. Tunahase  nawa kuzachisa vyakutalilaho vize navihanjika hachiyoyelo chavatu nahavana vavo, nahajizuvo, nahavyuma vasaka, nahavyakulya veji kulyanga.

15. Mwomwo ika katwatela kulikomokelako hakuwana nge Yesu apwile nachinyingi chachivulu chavyuma atenga Kalunga?

¹⁵ Vyakutalilaho ahanjikile Yesu vyavivulu vyamusolwele nge apwile nachinyingi chachivulu chavyuma atenga Kalunga, vyakufwana nge mitondo, natunyama najingonde. (Mateu 16:2, 3; Luka 12:24, 27) Uno kulihi awanyine chinyingi kanechi? Chasoloka nge, halwola apwile nakukolela muNgalileya, awanyinenga lwola lwakukekesa havyuma atenga Yehova. Chuma chachinene chikumanyi shina Yesu apwa “twatwa kuvyuma vyakutanga vyosena,” kaha Yehova amuzachishile kupwa ‘kuluwa muka-kuzata’ hakutenga vyuma vyosena. (Wavaka-Kolose 1:15, 16; Vishimo 8:30, 31) Echi chikiko chalingishile Yesu apwenga nachinyingi chachivulu chavyuma atenga Kalunga. Tutalenu jino omwo azachishililemo chinyingi kana mujila yamwaza.

16, 17. (a) Vyuma muka vyasolola nge Yesu atachikijile kanawa omwo vapwa mikoko? (b) Chakutalilaho muka chinasolola nge mikoko veji kwivwililanga kulizu lyakafunga kavo?

¹⁶ Anukenu ngwenu Yesu alivulukile ivene ngwenyi apwa “kafunga wamwenemwene,” kaha vaka-kumukavangiza vapwa “mikoko.” Mazu aYesu asolola nge ejivile kanawa omwo vapwa mikoko. Atachikijile ngwenyi tufunga namikoko valikata chikuma. Atachikijile nawa ngwenyi ava vimuna vakulyononona vasaka kuvatwaminyina, kaha veji kukavangizanga kafunga kavo kweshoko mwaya. Mwomwo ika mikoko veji kukavangijilanga kafunga kavo? Yesu ambile ngwenyi: “Mwomwo vatachikiza lizu lyenyi.” (Yowano 10:2-4, 11) Kutala mikoko vatachikiza chikupu lizu lyakafunga kavo tahi?

¹⁷ George A. Smith asonekele mumukanda wenyi waThe Historical Geography of the Holy Land, kweseka navyuma amwene ngwenyi: “Shimbu jimwe nalwola lwamusana twalivwishilenga kuwaha kuya nakushikamina kumashima avaYuleya, kuze kwejilenga tufunga vatatu chipwe vawana nautanga wavo wamikoko. Mautanga osena alichingasanyinenga hamwe, kaha twalizakaminyine omu kafunga hikafunga nahase kuhandununaho utanga wenyi. Oloze hakukumisa  kunwa meya nakuhema, kafunga hikafunga ayilenga nakwimana kwaukawenyi kukulo yachinema. Mutu himutu asanyikilenga mujila eji kuvasanyikilanga, kaha mikoko valipangunwinenga vavene nakuya kuli kafunga kavo nakuliwana cheka nge muze vejilenga.” Kachi nge Yesu katachikijile omu vapwa mikokoko, kachi chapwile chachikalu kushindakanya chishina apwile nakunangula chakwamba ngwenyi, nge natutachikiza kunangula chenyi nakuchitavila, nakwitavila atutwaminyine, kaha navatuzakama kuli ou “kafunga wamwenemwene.”

18. Kulihi tunahase kuwana mijimbu yahanjika havyuma atenga Yehova?

¹⁸ Tunahase kulinangula ngachilihi mwakuzachishila vyakutalilaho vyakufuma kuvyuma vyakutenga? Vilinga vyakulipwila vatwama navyo tunyama tunahase kuvizachisa kupwa vyakutalilaho vyavyashi kaha nawa vyamwaza. Kulihi tunahase kuwana mijimbu yahanjika havyuma atenga Yehova? Mbimbiliya yatwama namijimbu yayivulu yize yahanjika hatunyama vakulisezaseza, kaha hamwe nahamwe yazachisa vyakutalilaho vyakupandama kuvilinga vyatunyama. Mbimbiliya yafwanyisa vatu vamwe vaze veji kutambukanga lumbushi kuvakayi chipwe kuvisupa, kaha vatu vakuvanguluka  kumanoka, kaha vakuunda nawa kumayembe. c (Mijimbu 1, 12:8; Hambakuke 1:8; Mateu 10:16) Tunahase kuwana nawa vyakutalilaho vikwavo vyamwaza mujimangazini jaKaposhi Kakutalila, naTonenu!, namuvihande namujivindiyo jize jatwama muchihanda chakwamba ngwavo “Uno Valingile Vyakutenga Tahi?” ha jw.org. Munahase kulinangula vyavivulu hakukekesa muvinoma kana muze vazachisa vyakutalilaho vyavyashi vyakufuma kuvyuma atenga Yehova.

19, 20. (a) Yesu azachishile ngachilihi vyuma vimwe vyasolokele hakusaka asopolole kunangula chamakuli? (b) Tunahase kuzachisa ngachilihi vyakutalilaho vyavyashi navyakuliwana navyo mukunangula chetu?

¹⁹ Tunahase kuzachisa vyuma vyeji kusolokanga mukuyoya chavatu kupwa vyakutalilaho vyamwaza. Lwola lumwe, Yesu azachishile chakutalilako chavyuma vimwe vyasolokele hakusaka akane vishinganyeka vyakwamba nge, ponde yeji kusolokelanga vatu vavilinga vyavipi mangana vavazangamise. Ambile ngwenyi: “Vatu 18 vaze kashiukilile kaposhi kakuShilowame nakuvajiha, munashinganyeka ngwenu, vakiko vapwile vaka-shili chikuma kuhambakana vakwavo vosena vatwama muYelusalema tahi?” (Luka 13:4) Vaze vatu 18 kavavulumwine shili yize yafutwishile Kalunga numba vafwengako, oloze vafwile “mwomwo lwola navyuma vyakwiza mukukasumuna.” (Muka-kwambulula 9:11) Ngocho, Yesu akanyine kunangula chamakuli hakuzachisa chakutalilaho chize vatachikijile lyehi vaka-kumwivwilila.

²⁰ Tunahase kuzachisa ngachilihi vyakutalilaho vyavyashi navyakuliwana navyo mukunangula chetu? Munahase kuzachisa vyakutalilaho muka nge muli nakushimutwila vyakutesamo chaupolofweto waYesu kutalisa kuvinjikizo vyakupwako chenyi? (Mateu 24:3-14) Munahase kuhanjika havyuma vinakusoloka makumbi ano vyakufwana nge jijita, najizala jakalombolombo, chipwe mindenda mangana  musolole nge vinjikizo vyakupwako chaYesu vili nakutesamo. Nyi ngachilihi nge muli nakusaka kuzachisa chakutalilaho chize nachilumbununa vyuma atela kulinga mutu uze mwasaka kuvwala mutu wamuhya? (Wavaka-Efwesu 4:20-24) Kulihi munahase kuwana chakutalilaho kana? Munahase kuzachisa mijimbu yavandumbwetu, chipwe kuzachisa vyakuliwana navyo vize vyatwama mumikanda yaVinjiho jaYehova. Munahase nawa kuwana vyakuliwana navyo vyavivulu muvihande vyakulisezaseza muchihanda chakwamba ngwavo “Mbimbiliya Yeji Kwalumunanga Kuyoya chaVatu” ha jw.org.

21. Nganyo muka yatwama hakunangulanga kanawa Mazu aKalunga?

²¹ Chikupu vene Yesu apwile Muka-kunangula Wamunene! Nganomu tunamono muchihanda chino, mulimo “[wa]kunangula vatu . . . nakwambulula mujimbu wamwaza wawangana” ukiko asakile chikuma mukuyoya chenyi. (Mateu 4:23) Nayetu nawa ukiko mulimo tweji kuzatanga. Kunangula kanawa vatu chatwama nanganyo yayinene chikuma. Kachi nge natunangula vatu, kaha chinafwane nge tuli nakuvahana, kaha kuhana cheji kunehanga kuwahilila chikuma. (Vilinga 20:35) Tweji kuwahililanga hakutachikiza ngwetu tuli nakunangula vatu vyuma vyavilemu kaha nawa vyanganyo yakwilila. Vyuma kana shina muchano wakutachikiza Yehova. Kaha nawa tunahase kupwa vakuwahilila hakutachikiza ngwetu tuli nakukavangiza chakutalilaho chaYesu uze apwa Muka-kunangula wamunene havatu vatwamaho lyehi hano hamavu.