Mazu aKujimbula

Kuli Muka-Kutanga:

“Twaya upwenga umuka-kungukavangiza.” (Mako 10:21) Hakuhanjika mazu kana awa, Yesu Kulishitu ali nakutulanya tuvosena tumukavangizenga. Kutala muli nakwakula kuchilanyo kanechi tahi? Kwakula kuchilanyo kana nachiminganyalisa chikuma mukuyoya chenu. Mwomwo ika?

Yehova atumine Mwanenyi umwe kaha wakulipwila hano hamavu mangana ahane kuyoya chenyi kupwa ndando yakusokola. (Yowano 3:16) Ou MwanaKalunga atulweza nawa mwakuyoyela omu ejile hano hamavu. Alamine kulonga chenyi muvyuma vyosena alingilenga nakwivwisa muchima waIse kuwaha. Atulweza nawa vyuma twatela kulinga mangana tupwenga ngana mwaIse. Vyuma ahanjikilenga navize alingilenga vyasolwele hatoma jijila jaIse namwaya muchima wenyi.—Yowano 14:9.

Mbimbiliya yahanjika ngwayo Yesu apwa ‘chakutalilaho, mangana tukavangizenga kanawa mujitambo jenyi.’ (WaPetulu 1, 2:21) Ngocho twatela kukavangiza kanawa mujitambo jaKulishitu numba tupandame chikuma kuli Yehova, nakupwa vakuwahilila mukuyoya oholyapwa, nakutwalaho lika kupwa mujila yakuya kukuyoya chaya myaka yosena.

Hakusaka tuputuke kukavangiza Yesu, twatela kutachikiza kanawa chiyoyelo chenyi chahano hamavu. Ngocho, tufwilenu kulinangula vyuma yahanjika Mbimbiliya hali ikiye. Kulihulika nakushinganyeka havyuma ahanjikilenga Yesu navize alingilenga nakuwana jijila jakumulondezezelamo muhanjikiso namuvilinga vyetu nachitukafwa tutachikize kanawa mwakumukavangijila.

Tunafwelela ngwetu mukanda uno naumikafwa muzange chikuma Yesu naYehova. Kaha zangi kana yimilingise mukavangize kanawa mujitambo jaYesu mangana mwivwise muchima waYehova kuwaha oholyapwa nahaya myaka yosena.

Vaka-kusoneka