1-3. (a) Vyuma muka alingile Yesu omu malunga vavali vaka-kulombalomba vatupuputa vamulembelelele avakafwe? (b) Uno mazu akwamba ngwavo “avevwilile keke” alumbunukila mulihi? (Talenu kwinyikila chamwishi.)

 LIKUMBI limwe, tupuputa vamalunga vavali vatwamine kukulo yajila kwakamwihi nanganda yaYeliko. Ava malunga vejilenga hachihela kana hakumbi hakumbi mangana valombe jimbongo kuvatu vahichilenga mujila. Oloze halikumbi kaneli kwasolokele vyuma vimwe vyakukomwesa vize vyalumwine chiyoyelo chavo.

² Omu mwahichile kapyapya kakandende, ava malunga vaka-kulombalomba vevwile liuya. Hakuwana nge kavapwile nakumona vyuma vyasolokelengako, ngocho umwe ahulishile atachikize ovyo vatu vapwilile nakunehela liuya, kaha vamulwezele ngwavo: “Yesu wakuNazaleta ali nakuhita.” Yesu apwile haungeji wenyi wamakumishilo wakuya kuYelusalema. Kapwile uka wenyiko, oloze kwapwile mayongomena avatu aze amukavangijile. Jino hakwivwa ngwavo Yesu ikiye apwile nakuhita, ava tupuputa vaputukile kutambakana ngwavo: “Ove Mwata, ove MwanaNdavichi, tuteteleko!” Kaha aze mayongomena apihililile nakulweza ava tupuputa vahole kulu. Oloze ava malunga kavaholeleko.

³ Numba tuhu kwapwile liuya lyalinene, oloze Yesu evwile omu vapwile nakutambakana ava tupuputa. Uno alingile vyuma muka? Halwola kana, Yesu apwile nakushinganyeka havyuma vyavivulu mwomwo echi chapwile chalumingo chakukokela kuchalumingo chamakumishilo mukuyoya chenyi chahano hamavu. Atachikijile ngwenyi luyanjisa nakufwa vili nakumuvandamina kuYelusalema. Chipwe ngocho, kaliwile ava tupuputa  vapwile nakutambakana avakafweko. Emanyine nakulweza vatu vamunehele malunga kana. Kaha vamulembelelele ngwavo: “Ove Mwata, tonesa meso etu.” Yesu “avevwilile keke” nakuvakwata hameso avo, kaha vatonene. a Hahaze vene vaputukile kukavangiza Yesu.—Luka 18:35-43; Mateu 20:29-34.

4. Yesu ateselemo ngachilihi upolofweto wakwamba ngwavo “mwakevwila keke vaka-kukalikiza”?

⁴ Lwola kana keshi lukiko kaha Yesu asolwele muchima wakekeko. Yesu evwililenga vatu keke mapapa kakavulu, kaha nawa halwola lwakulihandununa handununa. Upolofweto wamuMbimbiliya wavulukile chimweza ngwawo “mwakevwila keke vaka-kukalikiza.” (Samu 72:13) Chikupu vene Yesu evwililenga vatu keke. Awanyinenga jijila jakuvakafwilamo. Keke yikiko yamulingishile azate mulimo wakwambulula. Tutalenu omwo Mikanda yaMujimbu Wamwaza yasolola muchima wakutetela apwile nawo Yesu, uze asolwelenga muvyuma ahanjikilenga navize alingilenga. Kufumaho, natushimutwila jino omwo tunahase kumulondezeza.

5, 6. Vyakutalilaho muka vyasolola nge Yesu apwile namuchima wakutetela?

⁵ Yesu atetelelenga vatu. Atachikijilenga ukalu vapwilenga nawo nakuvevwila keke. Numba tuhu ikiye kahichilenga muukalu wosena vamwenenga vatuko, oloze evwilenga kukola kumuchima hakumona ukalu wavo. (WavaHepeleu 4:15) Hakuka pwevo umwe uze apwile namusongo wakuhita manyinga hamyaka 12, avulukile musongo kana ngwenyi ‘musongo waupi.’ Echi chasolola nge Yesu ejivile ngwenyi musongo kana wayanjishilenga chikuma ou pwevo. (Mako 5:25-34) Kahomu Yesu amwene nawa Maliya navaze apwile navo vali nakulila hakufwa  chaLazalu, alyonyingile chikuma. Numba tuhu Yesu atachikijile ngwenyi mwasangula Lazalu, oloze evwile ushona chikuma nakusotola masoji.—Yowano 11:33, 35.

⁶ Halwola lweka nawa, muka-mbumba umwe ejile kuli Yesu nakumulembelela ngwenyi: “Kachi nge unasake, unahase kungutomesa.” Uno Yesu evwile ngachilihi numba tuhu ikiye kavijilengako hakuwana nge apwile wakukupuka? Yesu “amwivwilile keke.” (Mako 1:40-42) Kufumaho alingile chuma chimwe chakukomwesa. Atachikijile ngwenyi kweseka naJishimbi jaMose, vaka-mbumba vavamwenenga kupwa vamajilo, kaha kavatelele kulihata navatuko. (VyavaLevi 13:45, 46) Nge Yesu asakile, kachi okile uze lunga chakuzeneka kumukwata. (Mateu 8:5-13) Oloze olwele livoko lyenyi nakukwata uze muka-mbumba nakwamba ngwenyi: “Ngunasake vene. Toma.” Hahaze vene atomene kumbumba yenyi. Chikupu vene, Yesu asolwele muchima wakeke.

7. Vyuma muka navitukafwa tupwenga namuchima wakutetela, kaha tunahase kusolola ngachilihi muchima kana?

⁷ Hakupwa tuvaka-Kulishitu, vatukolezeza tupwenga namuchima wakutetela ngana mwaYesu. Mbimbiliya yatulweza ‘tulizakamenga navakwetu.’ b (WaPetulu 1, 3:8) Chinahase kupwa chachikalu kutachikiza kanawa omu vali nakwivwa vaze vali nakuviza misongo yayinene chipwe vaze vanahombo, chikumanyi nge yetu kanda tuhitengaho lyehi muukalu kana. Oloze anukenu ngwenu kamwatela kuvangila kuhita muukalu vali nakuhitamo vakwenu numba muvevwile kekeko. Yesu evwililenga keke vaka-kuviza numba tuhu ikiye kavijilengako. Uno tunahase kupwa ngachilihi namuchima kanou? Tunahase kupwa namuchima kana nge natwivwililanga kanawa vaze vali nakuyanda omu navatulweza vyaukalu wavo. Tunahase kulihulisa ngwetu, ‘Nge yami ngwapwanga muukalu kana, kachi nangwivwa ngachilihi?’ (Wavaka-Kolinde 1, 12:26) Nge natwivwanga kukola kumuchima hakumona ukalu vali nakuhitamo vakwetu, nachitukafwa ‘tuvendejeke vaze vanahombo.’  (Wavaka-Tesolonyika 1, 5:14) Lwola lumwe tunahase kusolola muchima wakutetela hakulingako vyuma vimwe keshi hakuhanjika kahako. Mukanda Wavaka-Loma 12:15 wamba ngwavo: “Lilenunga navaze vali nakulila.”

8, 9. Uno Yesu asolwele ngachilihi nge azakaminenga vatu?

⁸ Yesu atetelelenga vatu nakuzakama omu vanahase kwivwa. Anukenu lwola luze vamunehelele lunga umwe wakajikamatwitwi kaha nawa kamama. Hakumona ngwenyi ou lunga apwile nakwivwa sonyi, Yesu alingile vyuma vize kalingilenga kakavulu hakuka vatuko. Mbimbiliya yamba ngwayo: “Amufumishile haliyongomena nakuya nenyi kupenge.” Kaha omu vapwile kuze kupenge amukile.—Mako 7:31-35.

⁹ Yesu alingile nawa chuma chakulifwanako omu vatu vamunehelele lunga wakapuputa amuke. Yesu “akwachile kulivoko lyauze kapuputa nakumutwala kusali yalimbo.” Kaha aputukile kumuka chikoki chikoki. Kumuka mujila kaneyi atela chalingishile wongo nameso ayou lunga vitaunuke nakuputuka kumona musana chikoki chikoki. (Mako 8:22-26) Chikupu vene, Yesu azakaminenga vatu.

10. Mujijila muka tunahase kusolwelamo ngwetu twazakama omu vali nakwivwa vakwetu?

¹⁰ Hakupwa tuvaka-kukavangiza Yesu, twatela kuzakamanga omu vanahase kwivwa vakwetu. Shikaho twatela kuvangilanga kushinganyeka havyuma tunakusaka kuhanjika, nakwanuka ngwetu kuhanjika chakulusuka chinahase kulemeka vakwetu. (Vishimo 12:18; 18:21) Hanjikiso yayipi, yakapopolweji nakasautu kavatela kuyivulukila muli vaka-Kulishitu vaze vazakama omwo veji kwivwanga vakwavoko. (Wavaka-Efwesu 4:31) Enu tulama, uno munahase kusolola ngachilihi ngwenu mwazakama omwo vanahase kwivwa vakwenu? Hakuhanjikila  mutu, mwatela kuhanjika mujila yalikoji nakavumbi. (Wavaka-Ngalesha 6:1) Enu visemi, munahase kuzakama ngachilihi omwo vanahase kwivwa vana venu? Nge muli nakuvahuhumuna, kaha fwilenu kulinga ngocho chakuzeneka kuvevwisa sonyi.—Wavaka-Kolose 3:21.

11, 12. Mijimbu muka yamuMbimbiliya yasolola nge Yesu atetelelenga vatu chakuzeneka kumulweza?

¹¹ Yesu kavandaminyinenga kaha vatu vezenga kuli ikiye numba avateteleko. Muchima wakutetela weji kulingisanga mutu afwile kulinga vyuma vimwe vize navikafwa vakwavo. Shikaho, kupwa namuchima wakutetela chikiko chalingishile Yesu awane jijila jakukafwilamo vatu. Chakutalilaho, omu liyongomena lyavatu lyatwamine nenyi hamakumbi atatu chakuzeneka vyakulya, kakwapwile mutu amulwezele ngwenyi vatu vali nazala chipwe kumulweza alingeko vyuma vimweko. Mbimbiliya ngwayo: “Yesu asanyikile tumbaji twenyi nakwamba ngwenyi: ‘Liyongomena ngunalivwila keke, mwomwo vanatwame nayami makumbi atatu, kaha kavalile vyakulyako. Ngocho kangweshi nakusaka kuvasuula vayenga nazalako mwomwo vanahase kufwa chizava mujila.’” Kaha avalishile vosena mujila yakukomwesa.—Mateu 15:32-38.

¹² Talenu nawa hamujimbu ukwavo. Mu 31 C.E., omu Yesu ahetele kwakamwihi nanganda yaNane, awanyine vyuma vyavipi chikuma. Aliwanyine nachendo chavatu chize chapwile nakufuma munganda nakuya kuvimbumbe nakufunda ‘mwana walunga umwe lyamunwe,’ kaha “naye nawa apwile tuliwe.” Achishinganyekenu haushona evwile naye hakuwana nge lwola lwakufunda mwanenyi lwahetele, kaha nawa kapwile nalunga wakulishona nenyiko. Numba tuhu kwapwile vatu vavavulu, oloze Yesu ‘amwene’ uze tuliwe afwishile mwanenyi umwe kaha lyamunwe hachendo kana. Kaha vyuma amwene vyamukwachile kumuchima, ngocho “amwivwilile keke.” Kakwapwile mutu umwe amulwezele vyakulingako. Keke evwile yikiko yamulingishile afwile kumukafwa. Ngocho “aswenyeleko  nakukwata kumusela,” kaha asangwile uze mwana. Vyuma muka vyakavangijileho? Yesu kalwezele uze mwanalunga alinunge haliyongomena lyalinene lyavatu vaze vamukavilengako. Oloze “Yesu amuhanyine kuli naye” valinunge cheka hamwe mwatanga, mangana akazakame naye uze apwile tuliwe.—Luka 7:11-15.

13. Tunahase kulondezeza ngachilihi Yesu hakuwanangako jijila jakukafwilamo vaze vanakalikiza?

¹³ Uno tunahase kulondezeza ngachilihi chakutalilaho chaYesu? Etu katweshi kuhasa kuhana vatu vyakulya mujila yakukomwesa chipwe kusangula vafuko. Oloze tunahase kulondezeza Yesu hakuwanangako jijila jakukafwilamo vaze vanakalikiza. Ndumbwetu umwe nahase kupwa muukalu wakuhona jimbongo chipwe wakumufumisa milimo. (WaYowano 1, 3:17) Nyi pamo zuvo yandumbwetu watuliwe nayisakiwa kuyiwahisa washiwashi. (WaYakova 1:27) Pamo tunatachikizako tanga yimwe yinafwisa yize nayisakiwa kuyivendejeka chipwe kuyikafwako muvyuma vimwe. (Wavaka-Tesolonyika 1, 5:11) Nge kuli ukalu wangana, katwatela kuvandamina vatulweze numba tuvakafweko. (Vishimo 3:27) Muchima wakutetela nautulingisa tufwile kuwanako jijila jakukafwilamo vakwetu kweseka nomu natuhashila. Anukenunga ngwenu kusolwela vakwetu likoji namuvyuma vyavindende chipwe kuvavendejeka kufuma kumuchima yapwa hijila yimwe yakusolwelamo kutetela.—Wavaka-Kolose 3:12.

14. Mwomwo ika Yesu ahakilile chikuma muchima kumulimo wakwambulula mujimbu wamwaza?

¹⁴ Nganomu twamonanga muChihanda 2 mumukanda uno, Yesu atuselelele chakutalilaho chamwaza kutalisa kukwambulula mujimbu wamwaza. Ambile ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.” (Luka 4:43) Mwomwo ika Yesu ahakilile chikuma muchima kumulimo kanou? Chuma chachinene alingilile ngocho shina kuzanga Kalunga.  Oloze kwapwile chuma chikwavo nawa chamulingishile ahake muchima kumulimo kanou, chuma kana shina chino: Afwililile kukafwa vatu kushipilitu mwomwo yamuchima wenyi wakeke. Kukafwa vatu kushipilitu chapwile chachilemu chikuma hajijila josena jize Yesu asolwelelengamo muchima wakutetela. Tukekesenu jino havyakutalilaho vivali vize vyasolola omu Yesu amwenenga vatu vaze ambulililenga. Kukekesa havyakutalilaho kana nachitukafwa tumone ovyo vyeji kutulingisanga twazane mumulimo wakwambulula.

15, 16. Vulukenu vyakutalilaho vivali vize vyasolola omu Yesu amwenenga vatu ambulililenga.

¹⁵ Mu 31 C.E., omu Yesu alingile hanazate lyehi myaka yivali mulimo wakwambulula, atohweseleko mulimo wenyi hakuya “mujinganda josena namumembo osena” amuNgalileya. Vyuma amwene mumembo kana vyamukwachile kumuchima. Kaposetolo Mateu atulweza ngwenyi: “Omu amwene mayongomena avatu, avevwilile keke, mwomwo vayanjile nakulimwanga nge mikoko vakuzeneka kafunga.” (Mateu 9:35, 36) Yesu evwilililenga vatu keke. Ejivile kanawa ukalu wakushipilitu vapwile nawo. Atachikijile ngwenyi vatu kana vavayanjishilenga nakuvasuvilila kuli vatwamina vamukwitava vaze vatelelele kuvafunga kanawa. Ngocho, muchima wenyi wakeke  wamulingishile akilikite chikuma hakuvambulila mujimbu walutalililo. Kakwapwile vyuma vyeka vyavilemu chikuma vasakiwile kuhambakana mujimbu wamwaza waWangana waKalungako.

¹⁶ Omu mwahichile tukweji vavavulu kufuma mu 31 C.E. nakuheta kwakamwihi naPaseka yamu 32 C.E., kwasolokele nawa chuma chikwavo. Halwola kana, Yesu navaposetolo jenyi vengilile muwato nakuzauka musali yaChijiva ChakuNgalileya nakutonda chihela chamwaza mangana vanoke. Oloze liyongomena lyavatu lyahichile kutunda nakulivanga kuheta kuze shimbu kanda vakiko vahete. Uno Yesu alingile ngachilihi? “Yesu hakulovoka muwato, amwene liyongomena lyalinene, kaha avevwililile keke mwomwo vapwile nge mikoko vakuzeneka kafunga. Kaha aputukile kuvanangula vyuma vyavivulu.” (Mako 6:31-34) Yesu ‘evwile cheka keke’ mwomwo vatu kana vapwile nakuyanda kushipilitu. Vapwile nakufwa zala yakushipilitu nakulizakama vavene “nge mikoko vakuzeneka kafunga.” Chikupu vene, Yesu ambulwilenga mujimbu mwomwo yakutetela vatu keshi nge hichilikako.

17, 18. (a) Vyuma muka vyeji kutulingisanga twazane mumulimo wakwambulula? (b) Uno tunahase kupwa ngachilihi namuchima wakutetela?

¹⁷ Uno vyuma muka vyeji kulingisanga etu vaka-kukavangiza Yesu twazane mumulimo wakwambulula? Nganomu twashimutwilanga muKapetulu 9 mumukanda uno, twatwama namulimo wakwambulula nakutunga tumbaji. (Mateu 28:19, 20; Wavaka-Kolinde 1, 9:16) Oloze kwazana mumulimo kanou kachatela kupwa nge hichilikako. Chuma chachinene cheji kutulingisanga twambulule mujimbu wamwaza waWangana waKalunga shina kuzanga Yehova. Kaha tweji kwambululanga nawa mwomwo yakutetela vaze kavetavako. (Mako 12:28-31) Uno tunahase kupwa ngachilihi namuchima wakutetela vatu?

¹⁸ Twatela kumonanga vatu ngana muze avamwenenga Yesu uze ambile ngwenyi “vayanjile nakulimwanga nge mikoko vakuzeneka kafunga.” Achishinganyekenu munawane mukoko uze najimbala. Kaha ali nazala chikuma nalipwila mwomwo yakuhona  kafunga wakumutwala kuchihela kuze kuli mwila wamwaza nameya. Kutala kamweshi kwivwila uze mukoko kekeko tahi? Kutala kamweshi kulisuula kumuhana vyakulya nameyako tahi? Uze mukoko nalifwane navatu vavavulu vaze kanda vevwenga mujimbu wamwaza. Vatu kana vali nakufwa zala nalipwila lyakushipilitu, kaha kaveshi nalutalililo lwamwenemwene lwakulutweko mwomwo yakuvasuvilila kuli tufunga vamukwitava chamakuli. Oloze etu tukwechi vyuma vali nakusaka, kaha vyuma kana shina kulya chamwaza chakushipilitu nameya amuchano amuMazu aKalunga. (Isaya 55:1, 2) Tweji kwivwanga keke hakushinganyeka haukalu wakushipilitu vali nakumona vatu. Nge natwivwilanga vatu keke ngana mwaYesu, kaha natufwila kuvalweza vyalutalililo lwaWangana.

19. Vyuma muka tunahase kulinga mangana tukafwe chilongesa chaMbimbiliya uze natemo kuzata mulimo wakwambulula?

¹⁹ Uno tunahase kukafwa ngachilihi vatu vakavangize chakutalilaho chaYesu? Achishinganyekenu tuli nakusaka kukolezeza chilongesa chaMbimbiliya uze natemo kuzata mulimo wakwambulula. Nyi pamo tuli nakusaka kukafwa ndumbwetu uze nazeye kushipilitu, mangana aputuke cheka kuzata chikuma mulimo wakwambulula. Uno tunahase kukafwa ngachilihi vatu kana? Twatela kuvakunyula. Anukenu ngwenu, chatete Yesu ‘evwililenga vatu keke’ nakuputuka jino kuvanangula. (Mako 6:34) Shikaho, nge natukafwa vilongesa vyaMbimbiliya chipwe vaze vazeya vapwenga namuchima wakutetela, kaha navevwa ngana muze evwile Yesu nakuputuka jino kuzata chikuma mulimo wakwambulula. Tunahase kuvahulisa ngwetu: “Uno kukavangiza vyuma yanangula Mbimbiliya chinakukafwe  ngachilihi mukuyoya chove? Kutala washinganyeka ngwove kuli vatu veka vatela kwivwa mujimbu kana tahi? Vyuma muka unahase kulinga mangana uvakafwe?” Chuma chachinene chatela kulingisa mutu azane mumulimo wakwambulula shina kuzanga Kalunga nakufwila kumuzachila.

20. (a) Uno kupwa muka-kukavangiza Yesu chasakiwa vyuma muka? (b) Vyuma muka natushimutwila mukapetulu nakavangizaho?

²⁰ Kupwa vaka-kukavangiza Yesu kachakumina kaha hakulweza vatu vyuma anangwilenga Yesu nakumulondezezako. Oloze twatela kupwa nawa “namuchima uze apwilenga nawo” Yesu. (Wavaka-Fwilipi 2:5) Ocho kuwaha kana tweji kwivwanga hakuwana nge Mbimbiliya yatulumbunwina vyuma vyalingishilenga Yesu ahanjike vyuma vimwe chipwe kulinga vyuma kana. Nge natutachikiza kanawa mwaya “vishinganyeka vyaKulishitu,” kaha natupwa namuchima wakeke nakutetela nakumonanga vatu ngana muze avamwenenga Yesu. (Wavaka-Kolinde 1, 2:16) Mukapetulu nakavangizaho, natushimutwila hajijila jakulisezaseza jize Yesu asolwelelemo zangi vaka-kumukavangiza.